1945- نجي ايلدن بري آذربايجانين ميلي – دموکراتيک حرکاتينا بير باخيش

ياشار گولشن

آذربايجانين ميلي دموکراتيک نهضتي کي، 1324- جى ايلين آذر آيي نين 21- دن بري آذربايجان خالقينا و اونونلا برابر ايرانين دموکراتيک قوه لرينه بؤيوک اوميد و داياق نوقطه سي اولموشدي ، بير ايل سونرا ايرتجاعي قووه لرين الينن و اونون باشيندا مرکزي اوردونون هيجومونون آلتيندا گئري اوتوردو. بو هيجومون نتيجه سينده، مينلرله آذربايجانلي کي، گئچن بير ايلين ايچينده ايجتماعي ، سياسي و مدني عرصه لرده فعاليت گؤسترميشديلر، آرادان آپاريلديلار و چوخلاري ايسه مهاجرته مجبور اولدولار .

همين تاريخدن باشلاياراق، آذربايجاندا دورغونلوق دؤوري باشلادي. خالقين بوتون ايقتصادي ، سياسي ، ايجتماعي و مدني نائيليتلري بيردن بيره الدن گئتدي. ايرتجاع قؤوه لري بوتون ايمکانلاري قويدي کي ، آذربايجان خالقىنين هؤويتيني ( ميلي کيم ليگي)، وارليغىنين و اوندان باشقا آذربايجان ديليني و تورک ميلي کيمليگيني اينکار ائتسين و اونون يئرينه فارسلا باغلي آذري آدلانان بيرجعلي هؤويت و يا خود آريايي هؤويتيني اوتورتسون . البته رضا خان قودرتي اله آلان دان بري ، مرکزي دولتىنين اساس سياستي بو جهتده ايره لي سورولوردو، اما آذربايجان ميلي حوکومتي آرادان گئدن دن بو طرفه، پهلوي رژيمىنين تشبوثي داها شيدتلندي .

آذربايجاندا آغير بير شرايط ياراندي. رژيمين نهايت مقصدي او اولموشدي کي آذربايجانليلاري اريتمه سياستي نتيجه سينده، فارس مدنييتي داخيلينده حل ائتسين و آذربايجانين تورک واونون وارليغيني آرادان آپارسين . بو شووينيستي سياست نئچه جيبهه ده ايرهلي سورولوردي .

بير طرفدن آذربايجانين ايقتيصادياتىنين ضعيفلنديرمک مقصديله، آذربايجاني هر بير نه اساسلي عومران طرحلردن محروم ائتدي . يئني وضعيتله باغلي، بوتون اونيورسيته لر، دؤلتي فابريکالار، يول و زيراعت کامپلکس لري هاميسيني فارس منطقه لرينده تاسيس اولماغي باشلادي . آز ايستيثنالار البته واريدي کي بعضي غئيرتلي آذربايجانلي نين هيمتي و شخصي نفوذ لارينين نتيجه سينده حياته کئچميشدي. بو تضييقات اعمال اولدوکن ، صنعتده ، زيراعتده و خصوصن تيجارتده اولان خيصوصي سرمايه لر تهرانا و ايرانين باشقا شهرلرينه داشينيلدي . بئله ليکله آذربايجانين ايقتيصادياتي دؤلتين اوگئي سياستي نتيجه سينده آغير ضربه لر يئدي . بو وضعيتين نتيجه سينده آذربايجانين چوخلي ايشچي قوه لري او جومله دن ماهير صنعتکارلاري، علم - صنعت اوستالارو .. ، اؤز معيشتلرين تامين ائتمکدن اؤتري، آذربايجاندان کؤچمهٔ يه مجبور اولدولار . شوبهه سيز کي ايرانين باشقا شهرلرينين بؤيوک تيجارت مرکزلري ، فابريکالاري ، آذربايجانليلارين امه يي نتيجه سينده يارانيب و چوخلي اوستا کار آذربايجانليلار اونلارين ايقتيصادياتيني قالديرديلار . پهلوي رژيمىنين بو ايقتيصادي پلانلارينين حياتا کچيرلمه سىنين اساس سببي اوندان ايره لي گئديردي کي، آذربايجانين قووتلي بينؤوره سيني ، سابيقه لي موجودلوغونو و موستقيل مدنيتيني آرادان آپارسين .

ديگر جيبهه ايسه نشريه لرده ، راديو و تئلئويزيا دا، فارس ديليني و مدنيتيني اؤنه چکه رک باشقا ميلتلري خيصوصن تورکلرين موجولوغونو تحقير، جوک دوزه لتمه لرله و کيچيتمک له، تورک کيمليک لريني آرادان آپارماق مقصدي داشيردي . ايرتجاع ائله تصوور ائديردي کي، آذربايجاندان کؤچنلر باشقا کولتور داخيلينده، فارس ديلي هيجومون آلتيندا اؤز وارليقلاريندان اوزوله جکلر. ائله فيکيرلشيرديلر کي، اونلار اؤز آنا ديللرين ياددان چيخاريب اؤزلرين ياواش ياواش فارس حساب ائده جکلر .. تزه وضعييتي درک ائتمه ينلر ايسه مودام تحقير آلتيندا قاليب، ديکته اولان وضعييتين قبول ائتمه سينه مجبور اولاجاقلار. پهلوي رژيمىنين بو شووينستي سياستي آذربايجاندا موستقيم شکيلده اعمال اولونوردو. اوجومله دن اوشاقلار مدرسه لرده تورکى دانيشاندا جزالانديريليرديلار . ايداره لرده، محکمه لرده، تحصيل اوجاق لاريندا، راديو و تئلئويزيا دا مطبوعات اورقانلايندا تورک ديليندن هئچ بير نيشان يوخودي . بوتون ايداره لرده رئيسلر يا فارسلاردان سئچيليردي يا دا اؤزلريندن اولموشلار ايدي کي، اونلارين آذربايجان مدنيتينه قارشي ايشلري، غئير آذربايجانليلاردان آرتيق اوره کلره داغ ساليردي .

آذربايجانين موعاصير تاريخينده بو دؤور بير قارانليق دؤور حساب اولونور . بئله کي، ايران کيمي چوخ ميلتلي اؤلکه نين ايچينده آذربايجان خالقي، هم تاريخي قيدمتي و هم قابيليتلري يوکسک درجه ده اولاراق، بير سيرا فاشيستي هيجوملار آلتيندا بو دوروما گليب چاتيب و اؤز طبيعي اينکشافيندان گئري قالميشدير.

آذربايجانين تورک هؤويتيني آرادان آپارماقدا، پهلوي رژيمىنين سياستي البته نتيجه وئرمه دي .

رژيمين سياستي آذربايجاندان کؤچنلر حاقيندا گؤزله ديي کيمي گئتمه دي . عوموم آذربايجانليلار خصوصن زحمتکشلر اؤز دوغما يوردلاريندان اوزاق دوشسه لرده اؤز عادت - عنعنه لريني و مدنيتلريني قورودولار . ائولرده، بازارلاردا، حتا ايش يئرلرينده ده چوخ ماراقلا، اؤز ميلي ده يرلريني ياشاتديلار. هاردا کي ايکي آذربايجانلي بير بيرينه راست گلدي، اوز آرالاريندا فارسجا دانيشماغي تحقير کيمي سايديلار. ائولرده اوشاقلارلا تورکجه قونوشدولار. دوغما يوردلاريندان اوزاق دوشنلره ، چاي خانالار، کافه لر و بير چوخ ماغازالار دا ييغينجاق يئرلرينه دؤندو. رژيمين آغير باسقي سينا باخماياراق، تورکي دانيشماق و تورکي بيلمک ايرانين بوتون نوقطه لرينده بير ايمتياز حساب اولوردو.

آذربايجان اراضي سينده ده، آذربايجان خالقي رسمي دؤلت هيجوملارينا باخماياراق، اؤز آنا ديللريني، عادت - عنعنه لريني ياشاداراق، آچيق آلينلا اونلاري قورودولار. آذربايجان شيفاهي خالق ادبياتي ديلدن – ديله، سينه دن- سينه يه يول تاپيردي . آذربايجان موسيقي سي هر يئرده ديللندي، اوره کلره سئوينج بخش ائتدي .

ديگر طرفدن اينکار ائتمک اولماز کي، بعضي صينيفلرين داخيلينده ، تهران حکومتي سياستي موفقيتلر ده قازانميشدي. هرهانسي وضعييت اولورسا اولسون اؤز مادي خئيرلريني گودنلر ، او جومله دن سرمايه صاحيبلري ، دولت اورقانلاريندا مقام و منصب الده ائدنلر ، هر جور تحقير و توهينلره دؤزه رک ايسته ميرديلر کي حاکيميتين ضربه سي آلتيندا قالان بير مدنيته، باغلي تانينسينلار . نمونه اولاراق، سيلاحلي قووه لرين داخيلينده اولان چوخلي آذربايجانلي افسرلر وار ايدي کي، صف لرده و ييغينجالاردا، تورکلره چوخ آلچاق فورمادا توهين ائديب هله اوندان آرسيز- آرسيز کئف ده چکيرديلر . سيلاحلي قووه لرده اولان او شرفلي افسرلر کي بئله وضعيتي قبول ائده بيلميرديلر، يا حبس اولونور ، يا سورگونلره گؤنده ريلير ، يا دا کي، ياخشي حاللاردا سيلاحلي قووه لردن کنارلاشيرديلار .

آذربايجان مدنيتينه و هؤويتينه دوشمن اولانلارين باشقا سببلريني ده گؤسترمک اولار. تاريخ آسپکتيندن ياناشيلسا ، مشروطه حرکاتيندان باشلادي، آذربايجانين ميلي حرکاتي هميشه موترقي و دموکراتيک کاراکتر داشيميشدير .آذربايجان نهضتلري و اونلارين باشچيلاري ، تئوريسينلري ، هئچ واخت عظمت و يا خود اوستونلوک مفکوره لريني داشيانلار اولماميشلار . آذربايجانين مشروطه حرکاتيندان باشلادي ، -1945 جى ايلده يارانان آذربايجان ميلي حکومتينه قدر دؤورو نظرده آلساق ، ستارخانين ، علي ميسيونون ، حيدر عموغلونون و شئيخ محمد خياباني نين حيات و موباريزه لري بو سؤزلرين تصديقي دير . بو حرکتلر ده تورکچولوک نيشانه لري آزما - چوخ گؤرونسه ده، اساس مقصد بوتون ميلتلر آراسيندا آزادليقي يايماق، ايرتجاع و قارا دينچي قووه لرين ماهيتيني، خيصوصن حوقا بازليقلاريني ايفشا ائتمکدن عيبارت اولموشدور. بونونلا ياناشي، بوتون زحمتکئشلرين اينساني حقوقلاريني مودافيعه ائتمک مقصده اويغون ساييلميش دير . آذربايجانين ميلي دموکراتيک حرکاتيندا 1945- جى ايلده يارانان آذربايجان ميلي حکومتيني هئچ شوبهه سيز کي خيصوصي وورغولاماق لازيم گلير. بو حرکات نتيجه سينده تورپاق مسئله سينده حياتا کئچيريلن ايصلاحات، ايران تاريخينده بيرينجي دفعه اولاراق قادين لارين ايجتيماعي سياسي حياتا قدم قويمالاري و بير سيرا موترقي تدبيرلر، گلهجکده ده گؤروله جک هر بير يئني حرکته ايز قويموش اولدو . آذربايجانين ميلي حرکاتيندان صؤحبت دوشنده ايستر- ايسته مز فئوداليزمه، ديکتاتورلوغا و ايرتجاعا قارشي اولماقلا برابر، ترقي، آزادليق و دموکراسي يه گئدن يول کيمي تعبير اولونوردو. آذربايجاندا يارانان جونبيش لر، خالقين اساس ايستکلريني ترنوم ائديردي. اونلار ائلات ، خان - خانليق ، طايفا بازليق داوالاري دئييلدي. بئله ليکله آذربايجانين موستقيل هوويتي آذربايجانلي اولان ايرتجاع قووه لرينين داخيلينده آغير وحشت ياراديردي . اونلار اوچون آناديلي، مدنيت، ميلي کيمليک هئچ بير اهميت کسب ائتميردي. بئله ماهييته ماليک اولانلار پهلوي رژيمي ايله ال - اله وئريب اؤز ميلي کيمليک لريندن چيخيرديلار .

آذربايجان ميلي حکومتىنين سوقوطوندان سونرا کي دؤورده، هئچ بير جيدي موباريزه ني گؤسترمک اولماز کي، ميلي شوعارلاري اؤزونده عکس ائتديرسين . بهمن اينقلابينا کيمي يارانان بو دورغونلوق دؤور، نظره غريبه گلير. بو اوزون مودت عرضينده نئجه اولدو کي آذربايجان خالقي بو بويدا ظولمه قارشي قيام ائتمه دي؟ من بو مسئله نين بوتون سببلرينه داخيل اولماق قصديم يوخدور. اما بوردا اساس رول اوينايان فاکتوري قئيد ائتمک اولار.

آذربايجان ميلي حکومتىنين سوقوطوندان سونرا، پهلوي ديکتاتورلوغي آذربايجاندا دهشتلي باسقيلار اعمال ائده رک خالقين اؤنده گئدن فعاللارينين سيستيماتيک فورمادا آرادان آپارماغا پيلانلار تؤکدو و اونلارا عمل ائتدي. همين دؤوردن 1332- جى ايلين مورداد آيين نين 28 - نه دک، ايراندا گئنيش ضيد ايستعماري موباريزه باشلادي. بو موباريزه نين اساس طلبي ايرانين نفتىنين ميلي لشديريلمه سي ايدئياسي، باشقا ايجتيماعي - سياسي مساله لري دالي مرحله ده ساخلادي . مورداد آيىنين 28 ندن سونرا وضعييت داها دا آغيرلاشدي. ايرانين هر نوقطه سينده سياسي ايختيناق باشلادي .اينقلابچي ايش بيرليک لري، باشچيلاري، موترقي افسر لر، حبسه سالينديلار و بير چوخلاري اؤلدورولدو. آذربايجانلا برابر ايرانين بوتون نوقطه لري ده ديکتاتورلوغا قارشي موبارزه مئيدانينا چئوريلدي . بو دؤوردن باشلاياراق ، آذربايجانين سياسي موباريزلري اؤزلريني ايراندا گئدن پيراسئس له باغلي گؤردولر . بئله اولان حالدا ، اونلار ديکتاتورلوغا قارشي موباريزه ني ايستر- ايسته مز اؤن پيلانا کئچيرديلر. نتيجه ده تهران حکومتىنين قولدور قووه لرين اليندن چيخارماق، و اونون يئرينده دموکراتيک حکومت اوتورتماق، اونلارين ايلکين مقصديني تشکيل ائتدي. پهلوي رژيمينين سوقوطونا کيمي آذربايجان ميلتي عئين زماندا کي آغير ميلي و فرهنگي باسقي آلتيندا چاباليردي، اؤز ايستکلريني اوره کلرينده ياشاداراق، باشقا ايرانليلارلا برابر- البته کي هميشه اولدوغي کيمي صفين اولينده اولماقلا -، ديکتاتورلوغون کؤکونو کسمک جيبهه سينده ايشتراک ائديردي . تعجوبلي دئيل کي ديکتاتورون قارشي سيندا هر بير جيدي آپاريلان موباريزه ، ايستر سولچولار حرکاتي ، ايستر باشقا موترقي قوروملارين موباريزه لري، ايستر سياسي، ايستر چيريکي، ايستر نيظامي اولسادا، اونلارين عومده ايشتراکچيلاري، حتا او تشکيلاتلارين بونؤوره سين يارادانلار آذربايجانليلار اولوبلار .

بو حرکاتلارلا ياناشي ، بير چوخ آذربايجانلي، ميلي - مدني عرصه لرده، آنا ديليني قوروماق مقصدي ايله شخصي وسائط لريندن استفاده ائده رک آذربايجانجا پارلاق اثرلر ياراتديلار. اونلارين اساس گؤرکملي نوماينده لريندن صمد بهرنگي، بهروز دهقاني، حبيب ساهر، بولود قاراچورلو - سهند -، محمد علي فرزانه و دوکتور زهتابي لري آد آپارماق اولار .

دورغونلوق دؤورونده علامتدار اولان حاديثه، شهريارين "حيدر بابايه سلام" کيتابي اولدو . بو کيتاب آذربايجانليلار طرفيندن بويوک حؤرمتله قارشيلاندي. بير چوخ ائولرده مقدس کيتاب کيمي ده يرلنديريلدي . آذربايجان معنوياتينا سؤيکه نن بير چوخ آذربايجانلي دا اؤز قلم لريني ايستعدادلاريني ، فارس ديلينده اينساني هدفلر يولوندا سيناسالار بئله، اؤز اثرلرينده آذربايجان حاقيندا گئدن ظولم لري ايشيقلانديرديلار . اونلار فارسجا يازسالاردا، آذربايجانلي اولمالاري اثرلرينده آيدين شکيل ده حيس اولونوردو .

بو دؤورده جنوبي آذربايجانا، شيمالي آذربايجانين تاثيريني ده گؤزدن قاچيرماق اولماز . شيمالي آذربايجان 1990- جى ايله قدر ساوئت لر بيرليگينده آذربايجانين مدني موستقيل موجوديتىنين، ادبياتىنين، موسيقيسىنين و مدنيتىنين مرکزينه چئويريلدي . بو مودت عرضينده بؤيوک ياراديجي يازيچيلار، شاعيرلر، موسيقيچيلر، اورادا تربيه اولونوب ايراندا ياشايان آذربايجانليلارا اوميد و داياق مرکزي اولدو . اورادان قاچاق گلن کيتابلار ، مطبوعات اورقانلاري ، موسيقي صفحه لري ، فيلم لر و هابئله باکي راديو سونون وئرليشلري، آغير و قارانليق گونلرده گونئي آذربايجانليلار اوچون ايلهام منبعينه چئويريلدي. شوبهه سيز کي شيمالي آذربايجانين موستقيل موجودلوغو اولماسايدي ، پهلوي رژيمىنين شوونيستي اريتمه سياستي ، آذربايجاندا داها آجيناجاقلي وضعييت ياراداجاقيدي . بونونلا ياناشي ، شيمالي آذربايجانين تاثيري، سياسي باخيمدان فرقلي جريان ائتميشدير .

بير طرفدن آذربايجانين ايقتيصادياتيني ، مدني نائيليت لريني، ايرتجاعي دوشونجه لرين آرادان آپاريلماسيني، قادين لارين ايجتماعي سياسي فعالييته کيشيلرله برابر جلب اولونماسي، عموم وطنداشلار اوچون تحصيلين ايجباري اولونماسي ، گونئي آذربايجانا تاثير بوراخماسيني، آچيق - آيدين گؤسترمک اولار ، ديگر طرفدن قوزئي آذربايجاندا فرقلي قورولوش سيستمىنين اولماسي ، تهران حکومتينه زمينه ياراتدي کي آذربايجانلا باغلي، بوتون ايجتمياعي سياسي قوروملارا هيجومونو آرتيرسين. ساوئت حکومتىنين موشخص سياستلري ، خيصوصن پهلوي رژيميله موقاويله لري ، او تايلي - بو تايلي آذربايجانليلار آراسيندا موستقيم علاقه ياراتماغين واورادان يارديم آلماغين غئير مومکون اولماسينا زمين حاضيرلادي . بو دؤورده تهران حکومتي شيمالي آذربايجانلا يارانا بيله جک هر بير علاقه ني شيدتله سرکوب ائديردي .

بئله ليکله قئيد ائتمک اولار کي 1945 - جى ايلده يارانان آذربايجانين ميلي حکومتىنين سوقوطي ساده گئري چکيلمک له قورتارمادي . او دؤوردن سونرا خالقين ميلي هؤويتي و وارليغي ايللرله هيجوم آلتيندا تاپدالاندي . آذربايجان خالقي تهران حکومتىنين سيلاحلي قووه لرينين، ژاندرملارينين ، ساواکينين و باشقا رذيل نوکرلرينين آغير ضربه سينين آلتيندا قالدي . شووينيستي تبليغات و فرهنگي باسقيسى آلتيندا چابالايان خالق، اوره کلرينده موباريزه آلوولاريني گله جک نامينه ياشاديردي. 1356- جى ايلين بهمن آيىنين 29- دا پهلوي رژيمي نهايت آذربايجانليلاردان بيرينجي ضربه ني ايللر بويو تحقيرين ، ظولمون و ايشکنجه نين جاوابيندا آلدي. خالق اؤز اينتقاميني آلماق اوچون آياغا قالخميشدي .