كروبي ايله گؤروش باره ده

اينانجلاريميز،آماجلاريميز،قازانجلاريميز

حسن راشدی اکبر آزاد فرزاد صمدلي

تشويقلر،تنقيدلر

كئچن دي آيينين 30-وندا ايران اولوسلار ائوي نين(خانه اقوامين)قوروجولاريندان بير نئچه نفر(تورك، عرب، كورد)ايرانين جومهوريت باشقانليغي اوچون اؤزونو آداي (ناميزد) تانيتديران حجت الاسلام «مهدي كروبي» جنابلاري ايله گؤروشموشدورلر.

اولوسلار ائوي نين مؤسيس عضولريندن اولان آذربايجان تورکلري بو گؤروشدن اله گلن نتيجه لري ،توركلرين وبوتون ايران ميللتلري نين خئيرينه بيله رك،گؤروشه قاتيلمیشديرلار.

بو گؤروش آذربايجان ميللي حركتينه ده اؤز تأثيريني قويموشدور.

چاليشقان و ديرلي اينسانلاريميزين بير چوخو مسئوليت دوياراق اؤز مفكوره لري چرچيوه سينده كئچيريلن گؤروشه موناسيبت و مووقئعلريني موختليف يوللار ايله او جومله دن درگيلر، اينترنئت،اوزبه اوز گؤروش و يا تئلفون واسيطه سيله بيلديريبديرلر.بو گوروشلرحورمتلي آرخاداشلاريميزين طرفيندن چوخ ديققتلي آراشديرمالارايله قارشيلانيبدير.بيزاينانيريق بئله درين باخيشلار و نارين يوروملار بيليمسل تشويقلر و تنقيدلر کولگه سينده آذربايجان ميللي حرکتي نين داها آرتيق گوجلنمه سينه و گئنيشلنمه سينه يول آچاجاقدير.

گوروشدن سونرا بوللو نظرلر اليميزه چاتيبدير.شوبهه سيز قودرتلي ميللتيميزين و حورمتلي چاليشقانلاريميزين اونريلري ، آلقيشلاري و تنقيدلري بيزيم اوچون ان زنگين و انگين بيرثروت سانيلير.بونا گوره ده تشويق ائدنلرين ايچگين محبتلرينه و تنقيد ائدنلرين صميمي نيگرانليق لار ينا گؤره اؤز تشكور و ميننتدارليغيميزي بيلديریريك.

آلديغيمز نظرلرده دوستلارين موختليف آچيدان مووضوعا باخديقلاري اوچون،بير سيرا موبهم مسئله لر باره سینده قيسا ايضاح وئرمك گره کليدير.

كروبي ايله گؤروشدن اؤنجه و كروبي ايله گؤروشدن سونرادا بعضي باشقا آدلي-سانلي آدايلار گؤروش اوچون اؤز حاضيرليقلاريني بيلديرميشديرلر؛آنجاق اونلارين ايران ميللتلرينه قارشي داها آرتيق مشكوك،مبهم و پان آرياچي داورانيشلاري سبب اولدو بيز بو مقطع ده يالنيز كروبي ايله گؤروشو، الوئريشلي گؤرك!

گوروشه حاضيرليق

گؤروشه گئدن فعاللار، اؤنجه ايمكان چرچيوه سينده اوبيري چاليشقان دوستلار ايله علاقه ساخلاييب مشورت ائتديلر.او جمله دن تئلفون،S.M.S و اوز به اوز دانيشيقلار واسيطه سيله مسئله ني گؤتور- قوي ائدیب،اونلارين نظرلريني اؤيرنميشديرلر.نهايتده چاليشقانلارين موثبت نظرلري ،ايجماع حددينه چاتاراق، کروبي ايله گوروش تاييد اولوندو.

بئله ليكله اؤن حاضيرليقلاردان سونرا و شوبهه سيز ايکي طرفلي حؤرمته اساسلاناراق او گؤروش كئچيريلدي.آذربايجانلي گوروشنلرين آچيسيندان دانيشيقلارين اساس مقصدي ايران ميللتلري نين خوصوصيله آذربايجان تورك ميللتي و ايران اراضي سينده ياشايان باشقا تورك سويداشلاريميزين مظلوميتي نين سسلنمه سي ايدي. بيز ايسته ييرديك اؤز مظلوميتيميزي كروبي جنابلاري نين الينده اولان تريبونلاردان و سايير تريبونلاردان سسلنديرك.بيزظن ائديريك بؤيوك ميقياسدا بو ايشه موفق اولموشوق!

اولوسلار ائوي نين قوروجو عضولري ايله حجت الاسلام كروبي نين گؤروشمه سي ايرانين سياسي مئيدانيندا موعين قدر اؤز تأثيريني قويموشدور. گؤروش گونونون صاباحي ان آزي يئدي- سكگيز قزئت گؤروشون خبريني ايلك صحيفه ده تيتر ائتميشدير، ان آزي ايكي نيسبتاً چوخ تيراژلي قزئت ده گؤروشون خبريني بيرينجي تيتر سئچميشدير وهمان ايلك صحيفه ده خبرين راپورتونو البته ییغجام شکیلده چاپا وئرميشديرلر!

هابئله بير چوخ آيريجا داخيله و خاريجه نشريات و خبر آژانسلاریدا خبري يايميشديرلار.البته آذربايجانلي اينتئرنئت سايتلاريندادا خبر داها گئنيش اولاراق اؤز يئريني قازانميشدير.

تمللريميز

بيزيم موضع و نظرلريميز كروبي ايله گؤروشدن اونجه موختليف يوللار ايله او جمله دن موصاحيبه لرده و خوصوصيله ايران ميللتلر و قوميتلري طرفيندن حجت الاسلام خاتمي يه يازيلميش 773 ايمضالي آچيق مكتوب، مين نفرليك ايمضايا ياخين آذربايجان دانشير منشورو،3333 ايمضالي تبريزين بيرينجي ميللي آناديل قورولتايي نين قطعنامه سي، 303 ايمضا ايله ياييلميش اردبيل اوستانينا آذربايجان ابدي آدي نين قايتاريش كوميته سي نين بيانيه سي، آلين يازيسي ني تعيين ائتمك حقي(حق تعيين سرنوشت) آديله 100 نفره ياخين ايمضا ايله وئريلميش بيانيه ده و...آچيقلانيبدير.بئله ليکله کروبونون گوروشونده بو بيانيه لر و او موصاحيبه لر دانيشيقلاريميزين تمللري ساييليردي.

البته کروبي گوروشونده حاضير اولان چاليشقانلار بو گوروشه هئچ تامارزي اولمادان، بئله گوروشلری یاساق گورمه دن و هابئله کروبونون کئچميشده سياسي داورانيشلارينی دقيق بيلرک شيرکت ائتميشديرلر.اونلار گئتمه دن اونجه اوز خوصوصي اوتروملاريندا، «مهدي کروبي يه رياست جومهورلوق سئچکيلري اوچون موطلق وعده وئرمييه جه ييک، آنجاق اونو کئچميشده بو قونودا گورمه ديکلرينه گوره قيناييب گله جکده محتمل گوره جکلرينه آلقيشلاياجاييق»دييه گوروش اوچون حاضيرلانديلار. بئله بير اينانجلاري و دويغولاري بئينيميزده و اوره ييميزده ياشاداراق کروبي له گوروشدوک.

گوروشنلرين باخيشيندا چنه وورماق گوجوندن(Bargaining Power)فايدالانماق ودوگماتيستي(Dogmatism)دوشونجه لردن اوزاقلاشماق اونملي بير شيوه سانيليردي. بئله ليکله و قطعيتله بيز كروبي يه هئچ بير حيمايت وعده سي وئرمه ميشيك و بو گؤروش اونون تأييد اولماسينا و يا رد اولماسينا موطلق دليل اولا بيلمز!

آنجاق شوبهه سيز اورادا قونوشولموش قونولار و مودافيعه اولونموش حقلر آذربايجان ميللتي نين بوتون حقلري و ايستکلري دئييل.او گوروشده ساده جه ایسلامی ايران جومهورییتی نین آنا ياساسيندا اولان ان طبيعي و بديهي حقلرکي،کروبي و کروبي کيمينلر ايجراسيندا بويوک قوصورلار گوستريبديرلر طرح اولوندو و اونلاردان بو حقلرين وئريلمه ديگينه گوره و وئريلمه سي نين گره گلي اولماسي اوچون آيدينجاسينا اعتيراف آليندي!

بيزيم آماجلاريميز تکجه آنا ياسادا ميللت حقلري قونوسوندا قانونلارین ايجرايي اولماسي دئييل. بيزيم آرزيميز ايراندا گورونن آپارتايدين بوتون ساحه لرده کوکدن قيريلماسي و پان آريانيستلر،شوونيستلر،فاشيستلر و رياکار فيناتيکلرين حوضورلارينا سون قويولماقدير.بو گؤروشده اولان فعاللار چوخ آيدين بير دورومدا بابك قالاسي نين قورولتايیندا، شهيد ستارخان، شهيد باقيرخان،رحمتليک صفرخان،و...مراسيملرينده وئريلميش بيانيه لره گوونه رك آذربايجان ميللتي نين حقلريندن مودافيعه ائتميشديرلر.

سوزلريميز

90 دقيقه يه ياخين گؤروشون تخميناً ياريسی ني تورك لر دانيشميشديرلار.طبيعي دير آذربايجانين بوتون مسئله لريني بو محدود زاماندا طرح ائتمك مومكون اولا بيلمزدي.بونونلا بئله شراييطه اويغون بوتون قوميتلره برابر حق، فارس قومييتي نين حق سيز اوستونلوگونون عليهينه، كولتورل و فيزيكي سيخينتي-بوغونتولارا، اساسي قانونون 15، 19، 48 _ نجي ماده لرينه، تورك لرين ايراندا اكثريت اولا_ اولا مظلوملوغونا و اونلارين رسميته تانينماغينا،سياسي-ايقتيصادي آيري سئچگيليك لره، صفر خان،ستارخان و بابك قالاسي مراسيملرينده كي سيخينتيلارا، ايران ايسلام جمهوريتي نين راديو و تئلويزيونوندا قوميتلره لاييقجه سينه سهم وئريلمدن فارس اولمايان ميللتلرين عليهينه جرياندا اولان تحقير و توهين لره، آذربايجانين ايش سيزليك باخيميندان موهاجير گؤندرن اولدوغونا ،كئچن 26 ايلده مظلوم ميللتلر حقلري نين اينكار اولماسينا، 75و1374جي ايللرده آذربايجان ميللي حركتي نين ايره ليله مه سي و او مقطعدن سونرا آذربايجانلي فعاللارا او جمله دن دوكتور چهرگاني جنابلاري ايله علاقه ده اعمال اولموش سيخينتيلارا و... بو گؤروشده ايشاره اولوندو و كروبي نين بو سؤزلره موناسيبتي، آذربايجان ميللتي نين حقانيتين بير داها گؤزلر اؤنونه گتيردي.

كروبي بابك قالاسي مراسیميله علاقه ده دئميشدير:

" بير مراسيمه كي ، بئش يوز مين نفر قاتيلا ، اومراسيم مردومی بير مراسيم دير "

باخماياراق كي، آذربايجان و تورك لرين حقي لري طبيعي و دوغال حقلردير و هئچ بير كسين تصديق ائديب، ائتمه مه سيندن آسيلي اولا بيلمز ؛آنجاق حقي سسلنديرمك اوچون وسيله لازيم دير!

ديپلوماتيک داورانيش

بعضي دوستلار،بيلگه اوستاديميز پروفسور دوکتور جواد هئيت جنابلاري نين "من سياستچي دئييلم"ديپلوماتيک سؤزو ايله علاقه دار دئميشديرلر:

بيزيم ندن گره ك سياستچيميز اولماسين؟!

آيدين دیر قوجامان اوستاديميزين بو سورغويا خاص جاواب و ايضاحلاري اولا بيلر ،آنجاق بيزجه بو مسئله يه موختليف يونلردن ديققت ائتمك مومكون دور:

1. سياسي اولمايان بير شخص كي، عومرونو آذربايجان يولوندا صرف ائديبدير، آذربايجان مسئله لريني سياستچيلر قاريشيسیندا طرح ائده بيلمز مي؟!

2. هاميميز بيليريك ايران ايجتماعيتينده علم و كولتور آداملاري نين اعتيباري سياستچيلردن داها اوستوندور ،بو دا قطعاً بئله دير.

3. شوبهه سیز كي سياست عالمي نين قايدالاريندان بيري، ايشي يوموشاق و آستا گؤتوروب مؤحكم یئرینه قويماق دير.

4.بوردا اساس مسئله آذربايجان و توركلرين مظلوميتي نين دوزگون شكيلده زامان و مكانا اويغون سسلنمه سي ايدي!

5. دئييرلر سياستچي صراحتله «بلي» یا «یوخ» دئیه نده،«بلكه» معني سيندا دير!

ها بئله بعضي دوستلار دئييرلر پروفسور هئيت جنابلاري نين شأني چوخ بؤيوك دور و هر يئره گئتمه مه ليدير!

بوندا هئچ شوبهه يوخدوركي پروفسور هئيت جنابلاري نين خاطیري عوموم آذربايجان ميللتي يانيندا چوخ اوستون درجه ده عزيز دير آنجاق بونو نظره آلماليييق كي، پروفسور هئيت ين حضورو ، رياست جومهورلوق سئچکيلرينه ياخين آذربايجانليلارين موفقيت و اوستونلوگونده هر طرفلي تأثير قويموشدور و بو اله گلمزدي مگر، پروفسور هئيت جنابلاري نين گوذشت و فداكارليغي ايله!

اومدوغوموز بير شي وارمي؟!

بيزيم کروبي دن اومدوغوموز بير شئي وارمي؟!

کئچن 26 ايلده ،بيلديگينيز کيمي کروبي ايران ايسلام جومهوروسونون ايلک10 شخصييتيندن بيريسي کیمی تانينيبدير.دوغرودور بو گوروش سئچکيلر آياغيندا اوز وئردي و بيزله گوروشن،بيزيم حقلريميزه يوخ؛ بلکه داها آرتيق اوز کانديداتورلوغونون غلبه سینه فيکيرله شيردي!

آنجاق مگر کروبونون طبيعي اولاراق اوز غلبه سینه فيکيرلشمه سي بيزيم ميللي حقلريميز اوغروندا چالیشمامیزی دایاندیرا بیلر می؟!

سوز بورادا دير ،بيز بو گوروشله نه قدر وئرديک و نه قدر قازانديق ؟!

بيلديگينيز کيمي سياست عالمي درين و گئنيش بير دنيزدير. بوتون سياستچيلرين تورو بو دنيزه آتيليب و هر لاييق کيمسه قازانديغي و ياراتديغي فورصتلر اساسيندا سهم آپاراجاقدير.شوبهه سيز بو سياست دنيزينده آذربايجان ميللتي نين ان بالاجا حقی نهنگ سهملر اولماليدير!

بئله بير قازانجلار يالنيز بوتون ميللتين يارديمي ايله مومکوندور.هئچ بير کيمسه وهئچ بير قوروپ ،ميللتسيز، يالقيز و تک باشينا بو يولدا موظفر اولا بیلمز!

هر يولون اوزو اوچون قازانجلاري و ايتگيلري واردير. دونيادا هئچ بير سياسي ايش تام اوغورا اوغراماييبدير.اولدوغوموز دورومدان ايکي آدديم ايره لي سورمک سونرا بير آدديم گئريه اوتورماق اوزو اوچون بويوک بير غلبه دیر!

بيز اينانيريق کروبونون گوروشونده هئچ بيرآدديم دالييا آتيلمادان ، ايره ليله ديک!

بو گوروش کروبونون رياست جومهورلوق طلبلري اساسيندا کئچیریلسه ده بيزيم ايستکلريميزي گئنيش وضعيتده گوندمه گتيردي.

اينانجلاريميز

بيز درينجه سينه بونا اينانميشيق کي، فارس ديلي نين ايران ديللري آراسيندا اوستونلويو عوام آلداديجي(Demagogy) سوزلردندير. بيز ايراندا اوتن 80 ايلده فارسجانين رسمي اولماسين و تاتلارين موختليف ساحه لرده روتبه قازانماسين لياقت اساسيندا(Merit Sistem) يوخ،بلکه يالنيز قولدور پهلويلرين قارا کوديتالاري،زهيرلي سونگولري،ساختا تاريخلري وان فاشيستي آخينلاري نتيجه سينده گورورک.بيزيم آماليميز ايرانين يئنيدن تعريف اولونماسيدير.بويئني تعريفده70ميلليون نفرليک ايران اولکه سي موطلق«پرشيا»،«آريان»و«آريا» اولمادان بو اولکه ده ياشايان بوتون قوميتلرين وميللتلرين و خوصوصیله 30 ميليون آذربايجانلي وعوموميتله 35ميليوندان داها آرتيق اوغوز - موسلمان(آذربايجان،تورکمن صحرا،قاشقاييستان،خوراسان تورک بولگه لری ، خلجيستان ...)تورکونون ازلي وابدي يوردودور!

بئله ليکله آيديندير ايران دئييلن ژئوپولوتيك اؤلكه يالنيز بير ميللتي تمثيل ائتمز،توركلردن علاوه تات،كورد،عرب،بلوچ،لور،بختياري، گيلك ، تبري،آسور و ..... سايیر ميللتلر و قوملاردا بو اراضي ده ياشاييرلار. شوبهه سيز بئله بير چوخ ميللتلي اولکه ده، فارس شوونيستلرين عيرقچيليک(Racism) اينانجلاري و قوم-مرکزلی(Ethnocentirsm) داورانيشلاري کيمي اينانجلار و داورانيشلار آغير ميللي فاجيعه لر ياراديب ايچري گرگينليکلره يول آچا بيلر!

كئچن سكسن(80)ايلده شووونيزم خاريجه گؤجلرين كؤمكي ايله ايراندا بير ميللتين ياشاديغي ني تبليغ ائتميشدير و بئله آنلاتميشديركي ايران ميللتي يالنيز فارس دير و چوخ حيله كارليق ايله تات - فارس ديليني ايرانين ميللي ديلي كيمي حئسابا قويموشدور.بيزلردن بعضي آلدانميشلاردا بو زهرلی تبليغلره قاپيلميشديرلار.بئله ليکله تاتلار ايراندا ائو يييه سي تانينديلار . حال بو كي تاريخين آيدين شهادتي بونو ثوبوت ائدير کي ايراندا بيرينجي ائو يييه سي توركلر و آذربايجانليلاردير و قطعاً بيز اؤزتاريخي و حقيقي يئريميزه قاييتماليييق!

بيزجه ايران تركيبينده جنوبی آذربایجانی بئله تانیتدیرماق اولار:

1.تاريخي آذربايجان:تاريخي آذربايجان همان اراضي ديركي هاميميز تانيييريق و بو گون موختليف اوستانلارا بولونوبدور(قوم،تهران، قزوين،زنجان،اردبيل،گيلان،اراک،همدان،كوردیستانين بويوک حيصه سي،غربي آذربايجان،شرقي آذربايجان و...)بو اراضيده ياشايان آذربايجانلي لارين سايي تخميناً 20 ميليون نفردير.

2.معنوي آذربايجان:معنوي آذربايجان او دئمكديركي تاريخي آذربايجاندان قيراقدا،10ميليوندان آرتيق بيزيم آذربايجانلي ديلداشلاريميز موختليف بولگه لرده ياشاييرلار(قاشقاييستان،خلجيستان،ايصفهان،کيرمان،خوزستان،رضوي و گونئي خوراسان، مازندران ، سيمنان، و...).

سیزجه آذربايجان اولمايان آيري توپراقلاردا ياشايان تورک سويداشلاريميزي اونوتماق مومکوندورمو؟!

توركمن قارداشلاريميز توركمن صحراداياشاييرلار. بيز اونلاري اؤزوموزدن و اؤزوموزو اونلاردان بيليريك و بونا اينانيريق كي، موشترك و واحيد آلين يازيميز واردير و چوخ احتيمال ايله، جرياندا اولان ميللي حرکتیمیزده اومودوغوموز ثمرلری یالقیزجاسینا قازانا بيلمه يه جه ييك !

آذربايجان دئموكراتيك فيرقه سي نين ميللي قيامينا گوز تيکه رک بو اولو ديره نيشين بعضي سهولريندن ديققتله درس آلماليييق. بو گونكو موجاديله ده بوتون حقلريميزي بوتولوکده طلب ائديب، بوتون سويداشلاريميزي و ديلداشلاريميزي بیرلیکده مودافيعه ائتمه ليييك!

آيدين دير ايران تورك لري نين ميللي موجاديله سينده اساس محور آذربايجان تورك ميللتي دير!

آماجلاريميز

بيز موسلمان آذربايجانليلاري وتورکلري صراحتله ايراندا ان بويوک چوخونلوق تانیييب،دوشمنلر طرفيندن بعضي تورکلر آراسيندا يولوخدورولموش و سیرایت وئریلمیش یئنیلمک روحيه سيني(Defeatism) بوش سوز بيليب،دونيا قايدالاري اساسيندا بوتون ساحه لرده اکثريت حقلري نين قازانیلماسي اوچون چاليشمالیییق و بئله دوشونجه یه عينيت وئرمک اوچون دوغرو رئاليسم (Realism) ، اوزگور جومهوريتچيلیک (Republicanism) ، باغيمسيز پارلئمانتاريسم (Parliamentarism) ، گئنيش فئدراليسم (Federalism) ، گليشميش ياساچيليق (Constitutionalism) ، آيدين پولوراليسم (Pluralism) ، چاليشقان تئکنوکراسي (Technocracy) ، بوتون ساحه لرده آرديجيل ترقي و ایصلاحات (Progressivism)...يونلرينده ايره لي له مه يي گرکلی گوروروک.

قازانجلاريميز

گودوگونوز کیمی بو گوروشدن سونرا ايچري و ديشاري پان آريانيستلرين مورگه نه يووالاريندا قايناشما و تارتيشما باشلانيبدير!

بوگوروشون ان ساده نتيجه سي آرياچي شوونيستلري مايوس ائتمکدير.بئله گوروشلر قاديردير آذربايجان ميللتين حاکيميتله اون اونه قويماقدان چيخارديب،گرگين سيزليک(detente) وضعييتينه کئچيردرک،موتقابيل حورمت،کولتوره ل آتموسفر و آذربايجانلي لار آراسيندا ميللي روح بيرليگي (Volksgeist) ياراتسین.

بو قازانج،بعضيلرین باخیشیندا ساده نظره گليرسه ده بوتون مدني حقلريندن محروم قالميش و دوشمانلار طرفيندن آرديجيل چيرپيشمايا تحريک اولونان بير ميللته چوخ - چوخ اونمليدير!

ائشتديگينيز کيمي گوروش خبرلري نين ياييلماسي،دوولتي اورقانلاردا نفوذ ائدن و يا خود بو اورقانلاردان قيراقدا اولان پان آريانيستلرين های - هشیرین گؤيه قالديردي.اونلار ايراندا ياشايان مظلوم ميللتلرين طبيعي و دوغال حقلريندن دانيشيب اونو گوندم مسئله يه چئويرمگي باغيشلانماز بيرگوناه كيمي سانميشديرلار!

بو گوروشون ايچري و ديشاري ائتگیلری سبب اولدو آرياچي تاتلار و هابئله مانقورت تورکلر داها آرتيق سويوش وئره رک، ديله گلسينلر!

اوقدرکي حاکيميت ايچه ریسینده اولان بعضي شوونیست تات کيمسه لر قوميتلرله دييالوغا کئچمه يي باغيشلانماز گوناه سانیبلار و مانتورکلر آراسيندا دا فاجيعه آدلانديريبديرلار!

دوغرودور!

بوگوروش بئله فيناتيک،فاشيست و ساتقين کيمسه لره چوخ قورخونجدور.نييه کي ميللي حقلرین تانيميش بير ميللت،بو حقلری الده ائتمک اوچون موطلق ديره نه جکدير.

آنجاق بيز چاليشيريق بو ديره نيش اينسان حقلرينی، دونيا ياسالارينی،باريش سئورليک و مدنيت قايدالارينی بير«گوي ديره نيش »ي تمثيل ائديب ميللي ظفرلره اوغراسين.

جوموهور باشقانليق سئچکيلري

آذربايجان ميللتي چاغداش تاريخده ايرانين دئموکراتيک تمللري نين قورولماسيندا ان يوکسک رولو ايفا ائديبير.بو ميللتين گوجو ايله ايراندا پارلئمانتاريسم و سئچکيلر اساسي قويولوبدور. بيزجه پرئزيدئنت ليك سئچكيلري چوخ اؤنملي بير حاديثه دير و بيز ايسته ميريك بو حادثه نين يانيندان سايماز يانا كئچك. بيز چاليشيريق اونا فعالجاسينا توخوناق و ايمكان داخلينده بو حاديثه دن آذربايجان ميللي منافعي نين اوغروندا فايدالاناق.بو سئچيكلرده توركلرين منافعي تأمين اولارسا قطعن وار گوجوموزله اونا قاتيلاجاييق و آذربايجان ميللي منافعي تأمين اولمازسا قطعاً فعالجاسينا عكس جهتده، ايشتراك ائتمكدن چكينه جه ييك.هر نه بوندان آسيلي ديركي نه ميزاندا شراييط دئموكراتيك لشه جكدير!

شوبهه سيز ايران کيمي بويوک و کثيرالمله بير اولکه ده،رسمي سئچکيلرده خالقلارين شيرکت ائتمه مه لری،دایاز دوشونجه لي پان آريانيستلره و يا فيناتيک ايدئولوژييا آلتيندا گيزله نن رياکارلارا هئچ ياخشي بير نيشانه سانيلماماليدير!

سون سوز

بيز ايچه ريده اولاراق اولايلارين ايچينده ياشاييريق.

شوبهه سيز ديشاريدا اولان آذربايجانليلاريندا اکثريتي ايچه ريدن اينعيکاسلارين آلاراق دوزگون مفکوره لرله چاليشيرلار. آنجاق آرا- سيرا بعضي خاريجده و داخیلده ياشايان سويداشلاريميز ،«تلسمک» و «تلسديرمک»وضعيیتينه آلیشیبدیرلار!

میللی حقلری میزین تبلیغینده تلسمک یاخچی اولسادا آنجاق بو حقلرین تحصیلینده عجله ائتمک هئچ یاخشی دئییل،نییه کی، عجله ائدن اجله گئدر!

دونیادا بویوک دئییشیکلیکلر« سونامی»سی یولدادیر.اورتا شرقده بو دئییشیکلیکلرین چیرپینتیلاری گونو گوندن آرتیقراق گورونور!

بئله دالغالی دنیزلردن آذربایجان میللتی نین نیجات گمی سی نئجه قورتولوش ساحیللرینه آپاریلمالییدیر؟!

بیزجه دیرایتلی اوزاق گورنلیک،شوجاعتلی دیره نیش،سارسیلماز بیرلیک ؛ اوچ اونملی تمل اولاراق آذربایجانیمیزین وارلیق گمی سینی اوغورلارا چاتدیراجاقدیر.

بئله اولسون ،ان شاءالله