آشويتس

سيف حاتملوی
"آشویتس" دوشه رگه سینده (اردوگاه) اؤلدورولن یوز مینلر گناهسیز انسانین خاطیره سی، شوونیزم، راسیزم و فاشیزمه دور دئمکده دیر!...

بو گون یانوار آیی نین ایگیرمی یئددی سی، لهستان اؤلکه سینده یئرلشیلن "آشویتس" دوشه رگه سینده (اردوگاه) اؤلومه محکوم اولان مینلر محبوسون، قیزیل اوردو (ارتش سرخ) واسیطه سیله آزاد اولماسینین یئتمیش بئش ینجی ایلدؤنومودور. اونون اوچون دونیانین بیر چوخ اؤلکه سینده، او جمله ده ن لهستاندا و فئدرال آلماندا مراسیملر، ییغینجاقلار و تؤرنلر کئچیریله جکدیر. بو مراسیملر فئدرال آلماندا خصوصی یئر آلیرلار و مدرسه لرده، اونیوئرسیته لرده، پارلماندا، کابینه ده، دؤولت اداره لرینده و مختلف انستیتوتلار و آراشدیرما مرکزلرینده قئید اولوب و توپلانتی لار کئچیریلیر. 

بونو نظرده آلاراق، آلمان مئدیا سیندادا هر زمانکی کیمی راسیزمه و فاشیزمه قارشی خصوصی حساسیت گؤسته ریلیر و یئنی نسلین - اونلارین آتا بابالارینین یاراتدیقلاری جنایتلر اوچون - بشریتین قاباغیندا مسئولیتی، بیر داها خاطیرلادیلیر.

میلادی ۱۹۳۹- ینجی ایل، آلمان اوردوسونون لهستان اؤلکه سینی اشغال ائتمه سی ایله باشلانان ایکینجی دونیا ساواشیندا، تخمینا یئتمیش میلیون انسان حیاتینی ایتیرمیشدیلر. بو اؤلنلرین بیر چوخونون حیاتی، آلمانلارین مختلف اؤلکه لرده یاراتدیقلاری دوشه رگه لرده سونا چاتمیشدیر.

ایکینجی دونیا ساواشینی باشلایان آلمان  اوردوسو (وئرماخت و اس- اس بیرلیکلری)، "آلمان هر شئی ین اوزه رینده" و "آریالار بوتون نژادلاردان اوستوندور" شعارلارینین پرده سی آلتیندا، بو ساواشدا بشریت تاریخینده مثلی گؤرونمه ین غدارلیق گؤسته رمیش و خصوصیله او زامانکی سوویتلر بیرلیگی تورپاقلاریندا میلیونلار سیویل انسانین اؤلومونه سبب اولموشدور.

آلمان اوردوسو اشغال ائتدیگی اؤلکه لرین تورپاقلاریندا یاراتدیغی دوشه رگه لرده، ساواش مئیدانلاریندا اسیر دوشموش عسگرلر ایله بیرلیکده، سیاسی و عادی محبوسلاری، ها بئله آلمانلی و دیگر اؤلکه لره منسوب اولان یهودیلری ده محبوس ساخلاییردی.

بو دوشه رگه لرین ان آدلیمی، بو گون لهستان تورپاقلاریندا یئرلشن "آشویتس"  دوشه رگه سی دیر. 

" آشویتس"، بشریت ین اوز قاراسی کیمی، تاریخ بویو بشر واسیطه سیله اؤز همنوعلارینا قارشی یارادیلان جنایتلرین موزه سینه چئوریلمیشدی.

بئش ایل عرضینده، "آشویتس" دوشه رگه سینده ساخلانیلان محبوسلاردان بیر میلیون نفری اورادا آجلیقدان، آغیر فیزیکی ایشلرین نتیجه سینده، اشکنجه ده ن و یا گاز سالون لاریندا بوغولماقدان حیاتلارینی ایتیرمیشدیلر. 

" آشویتس" ده اؤلدورولن محبوسلارین چوخونلوغو، اروپا قطعه سینین مختلف اؤلکه لرینده یاشایان خصوصیله آلمان یهودیلری اولموشلار.

بو گون دونیانین بیر چوخ اؤلکه لرینده، فاشیستلر، راسیست لر و اؤزلرینی "اوستون نژاد"  بیلنلر، آلمان فاشیستلرینین ایکینجی دونیا ساواشیندا یاراتدیقلاری جنایتلرده ن درس آلمادان و اوتانمادان، گینه ده ایره لیلمکده دیلر.

بو اؤلکه لرده ن بیری ده قارا بخت ایران مملکتی دیر.

هر شئی ین کپیه سی اصلینده ن داها گولونج و مسخره اولدوغو کیمی، کئچن یوز ایل ده آلمان فاشیست لرینی تقلید ائده نلرده بو اؤلکه ده، قوندارما و هئچ بیر عاغیل، منطق و حسابا اویمایان شیوه لر ایله فارس شوونیزمی نین " بیر دیل، بیر ملت، بیر دین" دوکتورینینی زوراکیلیق، باسقی، قورخو یاراتماق و مخالفلری اؤلدوروب و حبسه آتماق واسیطه سیله حاکیم ائتمه یه چالیشمیشدیلار.

بونلار فارس ملتی نی "آریا اوستون نژادی" فرض ائدیب، تورک، عرب و "غیر آریائی لره" خور باخیب، گولونج و مسخره آکسیونلار ایله بیر طرفده ن فارس دیلینی عرب سؤزلرینده ن تمیزله مه یه و دیگر طرفده ن اؤلکه ده تورکلرده ن هر بیر اثر و نشانه وارسا آرادان آپارماغا چالیشمیشدیلار.  

بونلار ایگیرمی بیرینجی عصرده اینانیلماز بیر جهالت و فاناتیزم ایله، هله ده میلیونلار غیر فارس اوشاقلاری آنا دیللرینده تحصیل آلماقدان محروم ائتمکده دیلر. 

بو گون اؤلکه نین بوتون امکانلارینی سفربر ائدیب، غیر فارس ملتلری فارس شوونیزمی نین بویوندوروغو آلتیندا ساخلاماغا چالیشانلارا، "آشویتس" بیر عبرت آیناسی اولمالیدیر.

بو گون اؤلکه ده، بیر طرفده ن تورک دیللی کولتورون سون اوجاقلاریندان اولان " اندیشه ی نو" و " تک درخت" ناشر و کتابفروشلارینی باغلاییب و دیگر طرفده ن  "ایرانشهر" کیمی فاشیست و شپه فاشیست دایره لری سوت ایله بسله یینلره،  "آشویتس" بیر عبرت موزه سی اولمالیدیر.

بو گون " آشویتس" ین آزاد اولونماسینین یئتمیش بئشینجی ایلدؤنومونده، بشریته - بلکه باشقا ملتلرده ن داها چوخ- یوزلر و مینلر داهی فیلسوفلار، بؤیوک یازیچیلار - شاعیرلر، موزیک بسته کارلاری و اونودولماز طب- علم خادم لری هدیه ائده ن آلمان ملتی نین - آلمان فاشیستلری نین یاراتدیقلاری جنایتلر اوچون - انسانلیغین قاباغیندا باشی آشاغی دیر. بو اؤلکه ده یاشایان هر کس، بو اوتانج و باش آشاغیلیغی هر گون حس ائتمکده دیر.

ایراندا یالانچی، پوچ و خیال دونیاسیندا یارادیلان افسانه لر و ناغیللارا دایاناراق " تمیز فارس و آریا ملتی" یاراتماغا چالیشانلار و بئله لیکله میلیونلار انسانی خصوصیله اوشاقلاری اسیر ساخلایانلاردا بیلمه لیدیلر کی، تاریخ اونلارین عمللرینی جزاسیز قویمایاجاقدیر. بونلار آلمانلیلارین معاصیر تاریخینه باخیب، اوتانیب و عبرت آلمالیدیلار.

فاشیزم بیر دوکتورین اولاراق، هاوادان و هئچ ده ن یارانان بیر فنومن دئییل. فاشیزمین یارانماسی اوچون اونا مساعد زمینه و شرطلر لازیمدیر. فاشیزم، یالنیز اوز نژادینی و یا ملتی نی باشقالاریندان اوستون توتماق ایله یارانمیر. لاکن ائله بو سؤزلر و عمللر فاشیزمین یارانماسینا بیر باشلانقیج اولا بیلرلر. 

اونون اوچون اؤز ایچیمیزده ملتیمیزین تاپدانمیش و آیاق آلتیندا ازیلمیش حقلری اوچون جان و باش ایله فعالیت گؤسته ره ن فعاللاریمیزدا بونو اونودمامالیدیلار کی، آذربایجان تورک ملتی دونیامیزدا یاشایان ملتلرده ن بیری دیر و باشقالارینا هئچ بیر اوستونلویو یوخدور. انسان حقلری، دموکراسی، انسانلارین برابرلیگی - خصوصیله قادینلارین کیشی لر ایله برابرلیگی - اوغروندا مبارزه ائده ن فعاللاریمیز، بیلمه لیدیلر کی فاشیزم و آشیری ملتچیلیک، یالنیز فارسلارا و آریا پرستلره مخصوص دئییل و "سیاسی بهداشت" ین اولمادیغی هر بیر یئرده، بو ایرنج دوشونجه لر  کؤک سالا بیلرلر. 

دینچی، قان تؤکن و غدار رژیمه قارشی مبارزه ائده ن انسانلار، بیلمه لیدیلر کی، بو اؤلکه ده انسانلارین آزادلیق و دموکراسی اوچون چیخیش یولو، بو تورپاقلاردا یاشایانلارین - سؤزده یوخ عملده - حقیقی برابرلیگی ایله باشلایا بیلیر. 

اونون اوچون تورک، کورد، عرب، بلوچ و تورکمن ملتلرینی اسیر ساخلایان فارس ملتی ده - بو ملتلر آزاد اولمادیغی تقدیرده - هئچ زمان اسارتده ن آزاد اولا بیلمز.