«طرح بسندگی زبان فارسی در سنجش سلامت» فاشیستی بیر پروژه دیر

سيف حاتملوى
سون زمانلاردا آموزش- پرورش وزیری نین معاونی رضوان حکیم زاده خانیم، فاشیستی بیر طرحی اورتایا آتمیشدی. بو طرح ین آدی " بسندگی زبان فارسی در سنجش سلامت" دی.

بو خانیم، سئرچه نی بویویوب، بولبول یئرینه جماعته ساتماق اوچون، بو فاشیستی طرحه «انسانی» بیر دون گئیدیرمه یه چالیشاراق، دانیشیقلاریندا، غیر فارس اوشاقلارین درس اوخومالارینا کمک لیک ده ن سؤز آچیر.
بیلدییینیز کیمی بیر چوخ اؤلکه لرده، او جمله ده ن ایراندا، اوشاقلار مدرسه یه باشلامادان- اونلارین ذهن و جسم قابلیتلرینی و ممکن اولان معلولیت لرینی یوخلاماق اوچون - بیر تست کئچیرمه لیدیلر.
رضوان حکیم زاده نین طرحی اساسیندا، بو ایشی داهادا مکمل ائله مک اوچون، فارس دیلینی بیلمک ده او تست لره آرتیریلمالیدی.
بو طرح ین اساسیندا هر گاه اوچ - دورت یاشلاریندا غیر فارس اوشاقلار فارس دیلینی بیلمه سه لر، اونلار بیر نوع " معلول" - و بیر آز قابا دئسک - " گئری ذکالی" حساب اولونورلار. یانی فارس دیلینی بیلمک بیر او قدر بؤیوک مزیت دیر کی، کیمسه او دیلی اؤیره نه بیلمه سه، گئری ذکالی حساب اولونا بیلر؟؟!!...

دئمه لی بئله بیر طرح لری حیاتا کئچیرمکله، ایراندا غیر فارس ملتلره قارشی آپاریلان آسیمیله سیاستی، یئنی بیر کیفیته مالیک اولوب و غیر فارس اوشاقلارین منلیک و کیملیکلرینی آرادان آپارماق سیاستینده، پداگوژی نزدینده، طبی وسیله لر ده علاوه اولونماقدادی.

ایکینجی دونیا ساواشیندان قاباق، آلمان اؤلکه سینده نازی لرین اقتدار و حاکمیته گلمه سینی ایزله ینلر بیلیرلر کی، او اؤلکه ده ده «تمیز آریا ملتینی» یاراتماق و بو ملتی «ناخالص» لرده ن آریتماق اوچون، طبی وسایط ده ن استفاده اولونموشدور. یهودی لرین باش و بوورون اؤلچولرینی آلماق اوچون یئنی طبی وسایط لر دوزلمیش، سینتی- روما ( قاراچی- کولیلر) لارین اوستونده مختلف طبی آزمایش لر و تست لر اولونموش، هموسئکسوئل لری « معالجه» ائله مک اوچون یئنی متدلار امتحان اولموش و جسم و ذهن جهتینده ن معلول اولان انسانلار، اؤلدورولموشدورلر.

بو آرادا ایسته ر- ایسته مز آدامین یادینا دوکتور محمد رضا نیکفرین سون یازیلاری دوشور. دوکتور نیکفر یازیر کی، ایران ناسیونالیزمی نین یارانما مرکزی، ایکینجی دونیا ساواشیندان اؤنجه، او زامانکی آلمان پاینختی اولان برلین شهری اولموشدور.

رضوان حکیم زاده خانیم ین طرحی ده، البته بیر تازا پروژه دئییل و رضا شاه دؤورونده " محمود افشار یزدی" کیمی فاشیست لرده، ایراندا آذربایجان تورکی دیلی نین کؤکونو قازماق اوچون، آذربایجانلی اوشاقلاری عایله لرینده ن آلیب و اولادلیق اولاراق فارس خانواده لرینه وئرمک طرحینی اورتایا آتمیشدیلار. محمد رضا پهلوی نین سلطنتی دؤورانیندا دا غیر فارس دیللری جامعه نین بوتون مهم عرصه لرینده ن اوزاق ساخلاماق و فارسی دیلینی اوردو و حاکمیت ین بوتون اورگانلاری واسیطه سیله بو ملتلره تحمیل ائله مک سیاستی دوام ائتمیشدی.
منجه بو مشعشع فیکیر و طرح، رضوان حکیم زاده خانیم ین شخصی ابتکاری اولا بیلمز و اصلینده بئله آداملارین بیر او قدر شعور و ذکالاری یوخدور کی، بئله «داهیانه» پروژه لری یارادا بیلسینلر. بو خانیم باشقا دایره لر و مرکزلرین حاضیرلادیغی بیر طرحی اورتایا آتمیشدیر.

فرهنگستان زبان فارسی، دانشگاهلارین اوزده ن ایراق اساتیدلرینین بیر چوخو، حاکمیت ین واسیطه سیله کنترول اولان مئدیا بوتونلوکده او جمله ده ن صدا و سیما و شرق روزنامه سی کیمی غزت لر، جاواد طباطبائی لرین رهبرلیک ائله دییی ایرانشهر کیمی حلقه لر، اصلاح طلبلره باغلی حزبلر و شخصیت لرین چوخونلوغو، جبهه ی ملی، پان ایرانیست دایره لر، معین جمهوری خواه دایره لر، حزب کمونیست کارگری کیمی اوزده ن ایراق سوللار، سلطنت و خالق مجاهیدلرین یانچیلارینین بیر چوخو، داخیل ده و خارج ده « ایران زمین» داشینی سینه لرینه ویران و « فارسی را پاس بداریم» آدلاری آلتیندا فعالیت ائده ن اونلار جمعیت لرین بیر چوخو، داخیلده و خارج ده تاریخی و آرخئولوژی آراشدیرمالار جمعیت لرینین بیر چوخو، بو دایره لره منسوب دیلار.
بو طرح، قاباقکی دؤولت لرده تهران شهرینده صدا و سیما واسیطه سیله "سیز بیر تورک عایله سی ایله قونشو اولماق ایسته ییر سیز"(1) آنکت و پرسش نامه سینین دولدورولماسی و دؤولت طرفینده نشر اولونان ایران روزنامه سینین "تورکی دیلی سوسه ریلرین دیلی دی"(2) کاریکاتوری نین دوامیندا، اورتایا آتیلمیش بیر پروژه دی.

چوخ احتمال کی بو پروژه یه قارشی مخالفت لر شدتلندیکده، آموزش- پرورش بو طرحی دالی آلسین. لاکن هر نئچه ایلده ن بئله «تست» لری اورتایا آتماق، بیرینجی نوبه ده فارس دیلی و فارس ملتینه دایانان « یک ملت- یک زبان» فاشیستی و اولتراناسیونالیستی فیکیرلره زمین حاضیرلاماق و غیر فارس ملتلرین ملی وارلیقلارینی ساخلاماق و قوروماق اراده سینی سیندیرماق مقصدی ایله حاضیرلانیرلار.
ایرانین الده قاییرما پارلمانی نیندا تبریزده ن نماینده اولان محمد سعیدی اسماعیلی، بو حقده داها ایره لی گئتمیش و بو طرح ین دالیسیندا " قومیت لری تحریک ائله مک" کیمی بیر توطئه گؤرور. 

ایراندا غیر فارس ملتلرین ایسته دیکلری " آموزش به زبان مادری" طرحینی حیاتا کئچیرمک یئرینه، حاکمیت طرفینده ن بو جور فاشیستی طرح لری اورتایا آتماق گؤسته ریر کی، حاکمیت و اوپوزیسونون چوخونلوغو، غیر فارس اوشاقلارین حتی بئله آنا دیللرینی اؤیره نمه یینه ده قارشی دیلار و بو ایشین ماراخلی جهتی بوردادی کی، رضوان حکیم زاده لر، رهبرلری علی خامنه ای یه لبیک دئمک اوچون، بئله بیر داهیانه طرح لر ایله غیرفارس ملتلری آسیمیله ائله مک سیاست مئدانینا قدم قویماقدادیلار. بیلدییینیز کیمی سون زامانلاردا علی خامنه ای بیرده ن- بیره خوابنما اولموش و دانیشیقلارینین بیرینده ایراندا فارسی دیلی نین خطرده اولماسیندان!!... سؤز آچمیشدیر.
بونلار تصور ائدیرلر کی، زمان اونلار اوچون ایشله مکده دی و ایگیرمی- اوتوز ایل ده، بو جور فاشیستی طرح لری حیاتا کئچیرمه یه دوام ائتسه لر، ایراندا داها غیر فارس دیللرده ن اثر- علامت قالمایاجاقدی.

اوزده ن ایراق ایران الیته سینین بیر چوخو حالا دا بئله سیاست لرین دوامی نین اؤلکه اوچون و بو اؤلکه ده یاشایان ملتلرین دوستولوق و باریش ایچینده یاشامالارینا نه قدر تهلکه لی اولدوغونو باشا دوشمورلر.

حالبوکی بیر آز شعور-ا مالیک اولان و سیاست ین الفباسینیا آزما- چوخ تانیش اولان هر کس بیلیر کی، عراق، سوریه، افغانستان و تورکیه ده ایللر بویو دوام ائده ن داخلی ساواش ین اصل عامیللرینده ن بیری، ملی مسئله و بو اؤلکه لرده یاشایان اتنیک لرین آراسیندا اولان کولتوره ل، دین و اقتصادی تبعیض لر و حق سیزلیکلر اولموشدور.

بونلار طوطی قوشو کیمی تکرار ائدیرلر کی، ایران اؤلکه سینین شرط لری یوخاریدا آدلاری گلن مملکت لر ایله فرقلی دی و ایراندا بئله بیر ساواشین باشلاماسی ممکن دئییل.

بونلارا نه دئمک اولار؟...

انشالله گربه است؟؟!!...

(1) و (2)- زامانیندا بو پروژه لره قارشی ملی فعاللاریمیزین طرفینده ن کسگین مخالفتلر و اعتراضلار اولونموش و ایران روزنامه سینین کاریکاتورینا قارشی آذربایجانین بیر چوخ شهر، قصبه و کندلرینده باش وئره ن نمایش لرده، پولیس قووه لرینین مداخله سی و شدتی نتیجه سینده، بیر نئچه نفر اؤلموش و یارالانمیشدیلار.