س. حاتملوی


آلمان بیر دقیقه ده

( آلمانلیلار ال و بارماق اشاره لریله نئجه دانیشیرلار)


نئچه هفته بوندان اول روسیه ده یاشایان دوستلاریمین بیرینه انترنت واسیطه سیله گؤنده ردیییم بیر ویدئو و اونون منه وئردییی جاواب, آشاغیداکی مطلبین یازماسینا سبب اولدو. مطلبه گیرمه ده ن اول, بو ویدئو حاقدا بیر ایضاح وئرمه لییم:

" آلمان بیر دقیقه ده, آلمانلیلار ال و بارماق اشاره لریله نئجه دانیشیرلار" آدلی, او جمله ده ن فارس دیلینده حاضیرلانان بو ویدئو، اؤلکه نین رادیو کانال لارینین بیرینین واسیطه سیله مجازی دونیادا پایلانمیشدی. بو ماراخلی ویدئودا گؤستریلیر کی, آلمانلیلار ال و بارماق اشاره لری ایله, قیسسا بیر صورت ده، نه لر آنلادا بیلیرلر.
مثال اوچون: باش بارماقلارینی اووجلارینین ایچینده ساخلاییب, اللرینی یوموروق توتمالاری, بیرینه ظفر و موفقیت آرزو ائتمک معناسیندا گلیر. اورتا بارماقلارینی, اشاره بارماقلارینین اوستونه میندیریب, اللرینی ترپتمک؛ بیریلری ایله چوخ یاخین دوست اولماق معناسیندا دیر. بیزلریله مقایسه ده, بارماقلارلا سایماقدا, آلمانلیلاردا بیر آز باشقا اولور. مثلا بیزلرده بیر دانا، اشاره بارماغی ایله آنلاتدیغی حالدا, آلمانلیلاردا بو ایش باش بارماق ایله آنلادیلیر. بئله لیکله ایکی, اشاره بارماغی و اوچ ایسه, اورتا بارماقلا ساییلیر. اونون اوچون هر زامانکی بیر کافه ده بیر مشتری باش, اشاره و اورتا بارماقلاریله اوچ دانا قهوه سفارش وئریرسه, او آدامین آلمانلی اولماسیندان امین اولا بیلیرسینیز. آلمانلیلار اللرینین ایچ اوزونو صوراتلارینا دوغرو آپاریب ساغا- سولا ترپتدیکلری ایله, بیر آدامین عاغیل سیز اولدوغونو دئمک ایسته رلر. عین زاماندا اشاره بارماقلارینی باشلارینا بیر نئچه دفعه ویرماقلا, گینه ده بیرینین عاغیل سیز اولدوغونا اشاره ائدیرلر. نهایت بو ویدئو دا گوسته ریلیر کی, آلمانلیلار بیر توپلانتی دا دانیشان بیرینی آلقیشلاماق اوچون, چه پیک چالماق یئرینه, یوموروقلاری ایله یوموشاقجا, بیر نئچه دفعه میزین اوستونو تاققیلدادیرلار.

 

ویدئونو گؤردوکده ن سونرا, دوستوم منه یازمیشدی:

" چوخ گؤزل؛ بونلاری من بیلمیردیم. آمما دونیادا آلمانلیلارا مخصوص بیر حرکتی هر کس بیلیر کی, سانیرام حالادا بیر چوخ آلمانلی نین قانیندا واردی و خصوصیله آلمان دؤولتی نین, ده رینلییینده حالادا چوخ محکم یئری وار. اودا ساغ الینی ایره لی وئریب و هایل سسله مه لریدی. آلمان دؤولتی و بیر چوخ آلمانلیلار, هله ده او هوس ده ن و حرکت ده ن واز کئچمه دیلر."

 

حؤرمتلی اوخوجولارین گؤرودویو کیمی کئچن تاریخی سبب لره گؤره, خصوصیله ایکینجی دونیا ساواشیندا باش وئرمیش قانلی و آجی حادثه لرین نتیجه سینده, باشقا اؤلکه لرده آلمانلیلارا قارشی حالادا چوخ اؤن یارقی ( پیشداوری) یاشاماقدادیر. حالبوکی بو اؤلکه ده, اوتوز ایلده ن آرتیق یاشاماق، منی باشقا قناعت لره گتیرمیش و بو ایللرده گؤردوکلریم و یاشادیقلاریم نتیجه سینده، بو اؤن یارقی لارین بیر چوخونون نه قدر یانلیش اولدوغونو باشا دوشموشم.

بورادا دوستوما یازدیغیم جاوابی اوخوجولار ایله پایلاشماق ایسته ییره م:

 

عزیز دوست!

آلمانلیلار ایکینجی دونیا ساواشیندا روسیه توپراقلارینی اشغال ائتدیکده ن سونرا، روسلارا قارشی او قدر جنایت ائله میشدیلر کی، بو جنایت لر نسیل لر بویو هله - هله اونلارین یادداشتیندان سیلینمزدی. من نئچه دفعه روسیه اؤلکه سینه ائتدیییم سفرلریمده, آلمانلارا قارشی بو آنتی پاتی یا شاهید اولموشام. البته بودا طبیعی بیر مسئله دی. بئله ایلیشگی لرین نورمال لاشماسی, ایللر و حتی نسیل لر طلب ائده ر.
بورانین مدیا سیندا گون، هفته و آی اولماز کی آلمانلیلارین باشقا ملت لره قارشی ائتدیکلری جنایت لرده ن سؤز گئتمه سین. خصوصیله روسلارا و یهودی لره قارشی جنایت لر حاقدا هر زامان دانیشیلیر.
آلمانین مدرسه لرینده و درس کتابلاریندا هیتلر و نازی لر دؤورو حاقیندا چوخ یازیلیر و دانیشیلیر. نازی لرین ظولمونه معروض قالان یاشلی آلمانلیلار بو مدرسه لره گئدیب و فاشیزم حاقیندا مدرسه طلبه لرینه دانیشیرلار. قئید ائتمه لییم کی هیتلر رژیمی ایش باشینا گلدیکده ن سونرا, یاریم میلیونا یاخین آلمانلی کمونیست، سوسیال دموکرات، لیبرال, مسیحی و آنتی فاشیست قووه لر نازی لرین باسقی سی و تضییق ینه معروض قالدیغی اوچون, اؤلکه نی ترک ائتمیشدیلر. او دؤورده توتوقلانیب, زندانلاردا و دوشه رگه لرده ساخلانیب و اؤلدورولموش اولان آلمانلیلارین ساییسی دا اون مینلری آشمیشدی. اؤلکه ده ن قاچیب باشقا اؤلکه لره یئرلشن آلمانلیلارین بیر چوخو, هیتلرین رژیمینینه قارشی مبارزه نی اورگانیزه ائتمیشدیلر. آلمانین قاباقکی صدراعظمی ویلی برانت بو آنتی فاشیست لرده ن بیری اولموشدور. ویلی برانت او زامان سوئد اؤلکه سینده سوسیال دموکرات آنتی فاشیست آلمانلیلارین حلقه سینده فعالیت ائدیب و نئچه دفعه گیزلیجه آلمانا گیریب و اوراداکی آنتی فاشیست قووه لر ایله علاقه ده اولموشدور. یا شرقی آلمانین باش وزیری اریش هونکر، نازی لر زامانی حبس اولونموش کمونیست لرده ن بیری اولموشدور.
بونلاری یازماق و سنه باش آغریسی وئرمک ده ن قصدیم، بو گون آلمانلیلارا قارشی دیگر اؤلکه لرده اؤن یارقی لارین هله ده چوخ یایقین اولماسینا اشاره ائتمک ده ن غبارت دی.
بو گون آلمان اؤلکه سینده قانونلارا دایاناراق, هر هانکی بیر سیاسی فعالیته مانع اولمامادیغی حالدا، فاشیست گروپلارین فعالیتی نین قارشی سی آلینیر و بو گروپلارا قارشی پولیس و امنیت اورگانلاری, تضییقی حرکاتا کئچیرلر. آلمان اؤلکه سینده هله ده آنتی فاشیست اولماق بیر ارزش حسابلانیر و دئمک اولار کی بلکه دونیانین هئچ اؤلکه سینده بو قدر آنتی فاشبست تشکیلاتلار یوخدور. بو اؤلکه ده قانونلارا گؤره هر هانکی فاشیست بیر سمبل ین داشیماسی، ساخلاماسی و یا تبلیغی جرم حسابلانیر. بو سمبل لارین بیری ده " ساغ الی قووزاییب و هایل هیتلر سسله مک علامتی" دیر. بو ایش آلماندا جرم حسابلانیر. خصوصیله دولت اورگانلاریندا بئله بیر سمبل لارین داشیماسی کیمسه نین عقلینه بئله گلمز.
آمما بو او دئمک دئییل کی بو اؤلکه ده فاشیزمین هئچ طرفداری یوخدور.
بو گون آلماندا چئشیدلی فاشیست گروپلار، باشقا آد و باشقا بیر پروگرام آلتیندا فعالیت ائله مک ده دیلر. آمما اونلارین فاشیست اولماسینی هر کس بیلیر. بونلارین ایچینده ن یالنیز "آلمان ناسیونال دموکرات پارتیسی"  نی جدی بیر جریان حسابلاماق اولار. باشقالارینین بئش- اون نفرده ن آرتیق آداملاری یوخدور. البته سون ایللرده یارانان "آلمان آلترناتیو" پارتیسی نین ده گوجلو بیر قولونون, فاشیستلره مئیلی واردی. لاکن بو پارتی ده, کیم سون سؤزو دانیشاجاقدی، هله لیک آچیقدی. البته بو گروه لار، فعالیت لرینده چوخ احتیاطلی اولوب و دولت اورگانلاری نین الینه بهانه وئرمه سین دئیه، ظاهر ده قانون چرچیوه سینده ن چیخمازلار. طبیعی اولاراق بو تشکیلاتلارین منسوبلاری اداره لرده و دولت اورگانلاریندا دا چالیشیرلار.
ایران کیمی بیر اؤلکه نین عکسینه, آلماندا فاشیست اولماق و یا آریائی نژادیندان دانیشماق چوخ عاییب و حتی جرم حسابلانیر. کیمسه, تانینمیش بیر فاشیست ایله قونشو اولماق ایسته مز و یا اؤلکه نین چوخ یئرینده بیر عایله نین اوشاقلارینین فاشبستلر ایله غلاقه ساخلاماسینا، یاخشی گؤزله باخیلماز.
آلمانلیلار قاتیق دان توکو چکمک ده مشهور دیلار. بو اؤلکه ده سیاسی باخیشی گیزلتمک چوخ چتین بیر ایشدی. اونا گؤره امنیت اورگانلاری، سیاسی اورگانیزاسینلاردا توپلانان فاشیست لرین سایی سینی ایگیرمی ‌ایکی مین نفره یاخین تخمین ائدیرلر. بونلاردان 6650 نفری فاشیست پارتی لرده اورگانیزه اولموش و قالانلاری بو پارتی لره باغلی اورگانیزاسیونلاردا چالیشماقدادیلار. البته بو آمارلار زامان- زامان دئییشه بیلیرلر. بیرده تخمین لره گؤره, حالادا آلمان جامعه سینین آشاغی- یوخاری یوزده اونونون, هیتلر دؤورونه و نازی لره سمپاتی و میلی اولماسیندان دا سؤز ائتمک اولار. طبیعی اولاراق کی بو یوزده اونون بیر چوخو یاشلی انسانلار دیلار. آلمان توپلومونون بو حیصه سی, نازیلرین اقتدارینی یاد ائده رکن, هموسئکسوئل لره و دموکراتیک سیستمه قارشی دیلار. حالبوکی بو گون آلماندا هموسئکسول لر و دیگر جنسی, دینی و سیاسی آزینلیقلار، مانعه سیز اولاراق قانون چارچیوه سینده حیاتلارینی یاشایا بیلیرلر. البته اولترا ساغ قووه لره مئیللری اولانلارین بیر چوخو, اؤلکه ده سوسیال باریش پوزولماسین دئیه, سئچگی لرده فاشیستلری سئچمزلر. آجی تاریخی تجربه لر اساسیندا، عمومیت ده آلمان توپلوموندا رادیکال قووه لره (سول و یا ساغ فرق ائتمز) یاخشی گؤزله باخیلمیر.
دؤلت اورگانلاریندا دا قطعی ین فاشیزم مئیللی انسانلار چالیشیرلار. آمما بونلار گونده لیک حیاتلاریندا و داورانیشلاریندا چوخ دقتلی اولمالیدیلار. بورانین مدیاسی بئله خبرلره چوخ مشتری دیلر. بیرینین آنلی- نا "فاشیست"  دامغاسی ویریلدی ایسه، اونون دولت اورگانلاریندا کاریرر ائتمه سی چوخ زور و معین دؤلت اورگانلاریندا اصلا ممکون دئییل.

بیر ده بیر شئی یی دئمه ده ن سؤزومو بیتیرمک‌ ایسته میره م:
فاشیزم ایده سی اوچ فوندامنت اوستونده یارانیر و دوام ائدیر:
- قان ( گویا قانی باشقا ملت لرین قانینا قاریشمایان بیر توپلوم وار).
- عیرق (گویا اورتاق ژنتیک و فیزیولوژیک خصوصیت لره مالیک اولان آغ ده ریلی بیر ملت وار).
- توپراق.
بو گون آلمان اؤلکه سینده گئت- گئده بونلارین هر اوچو ده معناسینی الده ن وئرمک ده دیلر.
بو‌گون هر بئش "آلمانلی" دان بیری نین آتا- آنا سی آلماندا دوغولمامیشدی. اونا گؤره بو گون مینلر قارا ده ریلی (سیاه پوست) آلمانلی وار.
تورپاغا گلدیکده، بو گون آلمانین سرحد لرینی بلکه یالنیز بیر تابلو معین ائتمک ده دی. و بو سرحد لرده عسگر سهل دی، بئله بیر گمرک‌ مامورینی دا گؤره بیلمه سن.
البته یوخاریدا یازدیغیم او یوزده اون، بیرلشمیش اوروپا و بو اتحادیه نین قاباقجیل قووه سی اولان آلمان دؤولتی نین سیاست لرینده ن, اولدوقجا راحات سیز و ناراضی دیلار. او جمله ده ن, دؤلت ین  کئچن ایل بیر میلیونا یاخین پناهنده نی سورغو- سئوال سیز اؤلکه یه قبول ائتمه سینده ن.

عزیز دوست!
فاشیزم ین آیاق سسلری بو گون اوروپادان یوخ، "آزادلیق بئشیگی"  آدلانان آمریکا اؤلکه سینده ن گلمک ده دیر.
بویوک دلال آدلانان ترامپ جنابلاری، " آمریکا، آغ ده ریلیلرین اؤلکه سی دیر"، شعاری ایله ایش باشینا گلیب و بو گون آمریکانین دؤوره سینه و سرحدلرینه دیوار چکمک ایسته ییر. بو گون آمریکا دا گینه "قان' عیرق و توپراق" فوندامنتال اهمیت تاپماقدادی.
لاکن من امینم کی ایره لی و آیدین آمریکالیلار بونا اجازه وئرمیه جکلر.
بیرده کی هیتلرین ایش باشینا گلمه سینده  آلمانین بویوک سرمایه و توپراق (یونکرلر) صاحیبلرینین قطعی رول لاری اولموشدور. حالبو کی بو گون آلماندا "یونکرلر" ده ن بیر اثر و نشانه قالمامیش و " کاپیتال"  ایسه, هر بیر سینیر و هر بیر سرحد ده بئله قارشی دی. سرمایه نین شعاری "قازانج" دی.
"
قازانج" ین ایسه ان بویوک مانعی بو گون "قان، عیرق و توپراق" دی. سرمایه اوچون "اوجوز ایش"  لازیمدی. بو اوجوز ایش ده اساسدا آفریقا، آسیا و لاتین آمریکا دا بولونماقدادی.