س. کارا- مورزا

آنتونيو قرامشىنين هئگئمونيا حاقيندا تعليمى

...22 يانوار -آنتونيو قرامشىنين دوغوم گونودور. يازيچىنين "شوعورون مانيپولياسياسى" اثريندن - قرامشى و اونون هئگئمونيا حاقيندا نظرييهسينه داير حيصه تقديم اولونور.

آنتونيو قرامشى 1929-جو ايلين اوللرينده ايتاليا فاشيستلرى طرفيندن حبسده اولارکن، اؤز بؤيوک اثرى"حبسخانا دفترلرى"نى يازماغا باشلادى. "حبسخانا دفترلري" قرامشى طرفيندن نشر اوچون دئگيل، اؤزو اوچون، بوندان علاوه، تورمه سانسورونون گودوگو آلتيندا يازيلميشدى. اونو اوخوماق آسان دئگيل، لاکين چوخسايلى "قرامشى شوناسلارين" کؤمگي ايله ماتئرياللارين دئمک اولار کي هاميسينين مضمونو برپا ائديليب و ايضاحلار آراسينداکي فرقلر بؤيوک دئگيل. عوموميليکده دئمک اولار کي، اثر بوتون هومانيتار بيليک ساحهلرينه - فلسفه و پوليتولوگيا، آنتروپولوگيا (اينسان حاقيندا تعليم)، کولتورولوگيا و پئداقوقيکايا بؤيوک تؤحفه وئريب. بو تؤحفهني قرامشى مارکسيزمي اينکيشاف ائتديرهرک و پروتئستانت رئفورماسييا، فرانسيز اينقيلابي، 1917-جي ايلين روس اينقيلابي - عئيني زاماندا فاشيزم تجروبهسيني درک ائدهرک ائتميشدير. بئلهليکله او، موعاصير جمعيت اوچون - دؤولت و اينقيلابين يئني نظرييهسيني ياراتميشدير (کندلي روسيياسي شراييطينده ياراديلميش لئنين نظرييهسينين اينکيشافي و موعيّن درجهده آرادان قالديريلماسي اوچون). قرامشىنين سوسياليزم اوغروندا، ايجتيماعى و سياسى موباريزه عرصهسينده چاليشارکن، عوموم علمي اهميتلي بير چوخ يئنيليکلرى اولموشدور...

بللى اولدوغو کيمي، "بيليک - گوجدور" و بيليگي منيمسهميش و اونو تطبيق ائتمک ايمکاني الده ائتميش هر کس بو گوجدن ايستيفاده ائده بيلر. آلوو اينسانا ايبتيدايى وضعيتدن چيخماغا کؤمک ائديب، لاکين اينکويزيسييا آلوووندا يانديريلميش اينسان، آللاهلاردان اينسانلار اوچون آلوو اوغورلاميش پرومئتئيي خوش سؤزلرله خاطيرلامايا بيلر...

اگر بو گون "قرامشى" سؤزو اوزره ايرى غرب علمي معلوماتلار بازاسيندا آختاريش وئرسک (مثلن، نهنگ آمئريکان "ديسئرتاسييالار" بازاسيني)، قرامشىنين نظرييهسينين کؤمگي ايله نه قدر گئنيش ميقياسلي ايجتيماعي حاديثه لرين اؤگرهنيلمهسينه معطل قالارسان. بورايا هم ميلّى موناقيشهلرين قيزيشديريلماسينين گئديشاتي، هم نيکاراقوادا کيلسهنين يوخاري دايرهلرينين "آزادليق تئولوگيياسي"نا قارشي موباريزه تاکتيکاسي، هم آبش- دا ايدمان تاريخي و اونون کوتلوي شوعورا تاثيري، هم موعاصير آفريکان ادبياتينين خوصوصيتلري، هم ده بو و يا ديگر نؤع رئکلاملارين ائفئکتيوليگي عاييددير. اگر 20-30 ايل قاباق پراقماتيک غرب ايجتيماعيتي بوتون اؤنملى ايجتيماعي پروسئسلرين تحليلي اوچون کلاسيک مارکسيزم مئتودولوگيياسيندان (طبيعى کي، ديگر مئتودولوگييالارلا برابر) ايستيفادهني موطلق حساب ائديرديسه، بو گون قرامشىنين قاوراملاري و مئتودولوگييالارينا اساسلاناراق بير پروبلئم اوزرينده "ايشلهمک" ضروري حساب ائديلير.

قرامشى اثرينين اساس بؤلمهلريندن بيري - هئگئمونيا حاقيندا تعليم دير. بو تعليم- دؤولتين داغيديلماسي و يئني ايجتيماعي- سياسي قورولوشا کئچيد حاقيندا عومومي اينقيلاب نظرييهسينين بير حيصهسى دير. بيزيم پروبلئميميزه بيرباشا مربوط اولان تعليمين ماهيتي حاقيندا قيساجا دانيشاق.

قرامشىنين فيکرينجه، حاکيم صينيفين حؤکمرانليغي يالنيز زوراکيليغا دئگيل، هم ده راضيليغا اساسلانير. حاکيميت مئکانيزمي - تکجه مجبورائتمه دئگيل، هم ده اينانديرمادير. حاکيميتين ايقتيصادي اساسي کيمي مولکيت صاحيبي اولماق کيفايت دئگيل - مولکيتچيلرين حؤکمرانليغي بو يوللا آوتوماتيک اولاراق ضمانت آلتينا آلينمير و ثابيت حاکيميت تامين ائديلمير.

بئلهليکله، هانسي صينيفين حاکيم اولماسيندان آسيلي اولماياراق، دؤولت ايکي نهنگه - گوج و راضيليغا اساسلانير. لازيمي راضيليق سوييهسينين الده ائديلديگي وضعيتي قرامشى هئگئمونيا آدلانديرير. هئگئمونيا - دونوب قالميش، بيردفعهليک الده ائديلميش وضعيت دئگيل، اينجه و ديناميک، فاصيلهسيز پروسئسدير. بو زامان "دؤولت مجبورائتمه دمير دونونا [زيرئهينه] بورونموش هئگئمونيادير". باشقا سؤزله، مجبورائتمه – سادهجه اولاراق داها اهميتلي مضمونا ماليک دميردون [زيرئه] دير. بوندان علاوه، هئگئمونيا سادهجه راضيليغي دئگيل، هم ده موثبت (فعال) راضيليغي نظرده توتور کي، بو زامان وطنداشلار حاکيم صينيفه لازيم اولان شئيلري آرزو ائديرلر. قرامشى بو جور تعريف وئرير: "دؤولت - پراکتيکي و نظري فعاليتين مجموعسودور کي، اونون واسيطهسيله حاکيم صينيف، ايدارهچيلرين فعال راضيليغينا نايل اولاراق اؤز حؤکمرانليغينا برائت قازانديرير و اونو الينده ساخلايير".

صؤحبت سادهجه سياستدن دئگيل، موعاصير غرب جمعيتينين تمل کئيفيتلريندن گئدير. بو اوندان بللي اولور کي، ياخين نتيجهلره تاماميله فرقلي يوللا ديگر گؤرکملي موتفکّيرلر ده گلميشلر. هايدئگئر تدقيقاتچيسي آمئريکان فيلوسوف ج. وايت يازير: "1936-جي ايلده هايدئگئر قيسمن نازيست آلمانياسينداکي شراييطده قازانديغي سياسي تجروبهيه، قيسمن ده نيتچهنين اثرلرينين اوخونماسينين نتيجهسي اولاراق - آنتونيو قرامشىنين (تخمينن عئيني زاماندا، لاکين فرقلي تجروبه و موطاليعهدن چيخيش ائدهرک) "هئگئمونيا" پروبلئمي آدلانديرديغي ايدئيايا گليب چيخميشدير: داها دقيق ايسه، ايطاعتدهکي قروپلاري، اونلارين ايرادهسينه قارشي، لاکين اونلارين راضيليغي ايله جمعيتين کيچيک حيصه سينين ماراقلارينا اويغون شکيلده مانيپولياسييا ائدهرک، غئيري-آشکار شکيلده، موختليف اوستونلوک تشکيل ائدن ايجتيماعي قروپلارين مووقّتي بلوکلارينين "ديناميک تارازليغي"نين کؤمگي ايله، "غئيرى-زوراکي مجبورائتمه"دن ايستيفاده ائدهرک نئجه ايداره ائتمهلي ايدئياسينا."

اگر دؤولتين اساس گوجو و حاکيم صينيفين حؤکمرانليغينين اساسي - هئگئمونياديرسا، او زامان سياسي قورولوش مسالهسي و يا ترسينه - اونون داغيديلماسي شرطلري هئگئمونيانين نئجه الده ائديلمهسي و يا داغيديلماسي مسالهسينه گتيريب چيخاريلير. بو پروسئسده اساس واسيطهچي کيمدير؟ پروسئسين "تئکنولوگيياسي" نئجهدير؟

قرامشىنين فيکرينجه، هئگئمونيانين هم برقرار ائديلمهسي، هم ده داغيديلماسي - "مولکولر" پروسئس دير. او، صينيفي قوووهلرين توققوشماسي کيمي دئگيل (قرامشى وولقار تاريخي ماتئرياليزمين دولو اولدوغو بو جور مئکانيستيک آنالوگييالاري اينکار ائديردي)، گؤرونمهين، کيچيک پايلارلا هر بير اينسانين شوعوروندا فيکير و احوالين دگيشمهسي کيمي فعاليت گؤسترير. هئگئمونيا اؤزلوگونده دونيا و اينسانلار، خئيير و شر، گؤزل و چيرکين اولان حاقّيندا تصوّورلري، سيمووللار و اوبرازلار، عنعنه لر و مؤوهوماتلار چوخلوغونو، بير چوخ عصرلرين بيليک و تجروبهسي مجموعسونو احتيوا ائدن جمعيتين "مدني نووهسينه" [چکيردگينه] اساسلانير. بو نووه ثابيت [دگيشمز] اولدوغو مودّتده جمعيتده مؤوجود قورولوشون قورونماسينا ايستيقامتلنميش "دايانيقلي، کوللئکتيو ايراده" مؤوجوددور. بو "مدني نووهنين" و کوللئکتيو ايرادهنين داغيديلماسي - اينقيلابين شرطلرى دير. بو شرطلرين ياراديلماسي - مدني نووهيه قارشي "مولکولر" آقرئسييادير. بو - شوعوردا موعيّن چئوريليش ائدهجک حقيقتين سسلنديريلمهسي و ايشيقلانما دئگيل. بو، "کيتاب، بروشورا، ژورنال و قزئت مقالهلري، سونسوز تکرارلانان صؤحبتلر و موباحيثه لر توپلوسودور و اونلار اؤز نهنگ مجموعهلري ايله زامان و جوغرافي مکاندا کوورديناسييا ائديلميش و سينکرون فعاليتين آلينماسي اوچون ضروري اولان، موعيّن درجهده بيرجينسليگه ماليک کوللئکتيو ايرادهنين دوغدوغو اوزونمودّتلي سعىلري فورمالاشديريرلار."

ک.پ.س.س. [کومونيست پارتياسى سوئت سوسياليست] ايدئولوژي ماشينين يئنيدنقورما دؤورونده بو جور نهنگ سعىلري نئجه ياراتديغيني خاطيرلاييريق، "سوووک"اون شوعوروندا سووئت جمعيتينين مدني نووهسي هله داغيديلماميشدي و قيسا مودّت بئله اولسا "اؤزل لشديرمه تطبيق ائدنلرين" هئگئمونياسي برقرار اولماميشدي. بو "يوخاريدان اينقيلاب" (قرامشىنين تئرمينلري ايله، "پاسيو اينقيلاب") دقيق شکيلده هئگئمونيا و مدني نووهيه قارشي مولکولر آقرئسييا تعليمينه اويغون اولاراق حاضيرلانميشدي. يئلتسيننين مصلحتچىسي آ.اي.راکيتوو آکادئميک ژورنالدا آچيق شکيلده يازير: "روس بازارينين موعاصير کاپيتاليزم بازارينا ترانسفورماسيياسي يئني ايجتيماعي قورولوش و نتيجه اولاراق، مدني نووهده راديکال دگيشيکليکلر طلب ائديردي".

هئگئمونيانين برقرار (و يا محو) ائديلمهسي اوچون مدني نووهده نهيه تاثير ائتمک لازيمدير؟ قرامشى دئيير کي، رقيبين نظرييهسينه يوخ. عادي شوعورا، اورتا ايستاتيستيک اينسانين گوندهليک، "کيچيک" فيکيرلرينه تاثير ائتمک لازيم دير. ان ائفئکتيو تاثير اوصولو - يورولمادان عئيني فيکيرلرين تکرار ائديلمهسى دير کي، اونلارا اؤگرشسينلر و شوعورلا دئگيل، اينانجلا قبول ائتسينلر. "کوتلهلر - قرامشى يازير - فلسفهني اينانج کيمي منيمسهيه بيلرلر". او همچنين دوعالارين و مراسيملرين دايما تکرارلانماسي اوصولو ايله ديني اينانديرماني دستکلهين کيليسهيه ديقت يئتيريردي.

قرامشى اؤزو چوخ گؤزل باشا دوشوردو کي، عادي شوعور اوچون هم اؤز هئگئمونياسيني قورويانلار، هم ده اينقيلابي قوووهلر موباريزه آپارماليديرلار. هر ايکي طرفين اوغور شانسي وار، چونکي مدني نووه و عادي شوعور تکجه کونسئرواتيو دئگيللر، هم ده دگيشکنديرلر. قرامشىنين "ساغلام دوشونجه" (زحمتکئشلرين کورطبيعى فلسفهسي) آدلانديرديغي عادي شوعورون بير حيصه سي "قاباقجيل سول" ايدئيالارين درک ائديلمهسي اوچون آچيقدير. "آزادليق هئگئمونياسينين" منبعسى بورادا دير. اگر صؤحبت اؤز هئگئمونياسيني ساخلاماق و يا برقرار ائتمک ايستهين بورژوازييادان گئديرسه، او، شوعورا فانتاستيک افسانهلر يئريدهرک، بو ساغلام دوشونجهني نويتراللاشديرمالي و يا ازمهلي دير.

هئگئمونيانين برقرار ائديلمهسي و يا محو ائديلمهسينده اساس فيقور کيمدير؟ قرامشىنين جاوابي بيرمعنالى دير: ضياليلار [آيدينلار]. او، ضيالىليغين ماهيتّي، اونون يارانماسي، جمعيتده رولو و حاکيميت ايله موناسيبتلري حاقيندا بير فصيل يازيب. ضياليلارين ان اؤنملى ايجتيماعي فونکسيياسي – پئشهکارليق دئگيل (موهنديس، عاليم، کئشيش و س.). خوصوصي ايجتيماعي قروپ کيمي، ضياليلار محض موعاصير جمعيتده، ايدئولوگييا واسيطهسيله هئگئمونيانين قورولماسي احتياجي يارانديغي زامان تاپيلميشلار [اولوشموشلار]. محض ايدئولوگييالارين ياراديلماسي و ياييلماسي، بو و يا ديگر صينيفين هئگئمونياسينين برقرار و يا محو ائديلمهسي - ضياليلارين مؤوجودلوغونون اساس معناسي دير.

حاکيميته گئدن بورژوازييانين ان ائفئکتيو هئگئمونياسي فرانسادا برقرار اولموشدو، بورادا سورعتلي شکيلده کاپيتال و ضياليلارين سيخ ايتّيفاقي ياراندي. بو ايتّيفاقين اساسيندا هم بورژوازييا، هم ده ضياليلاري گوجلو فلسفي آخيملار ياراتميش آلمان رئفورماسيياسي ايله ايليشگىلرى دورور (دئگيلديگي کيمي، "کانت تانرينين باشيني اوزدو، روبئسپيئر ايسه کرالين"). عوموميليکده، پروتئستانت رئفورماسيياسينين فرانسا اينقيلابينين سياسي مودئلي ايله بيرلشمهسيني قرامشى هئگئمونيانين برقرار ائديلمهسينين ائفئکتيوليگينده نظري ماکسيموم حساب ائدير.

اؤز عقلي امگيني ساتاراق، ضياليلار پول اولان يئره مئيل ائديرلر. قرامشى يازير: "ضياليلار حاکيم صينيفين ايجتيماعي هئگئمونيا و سياسي ايداره ائتمه وظيفهلرينه تابع ائديلميش فونکسييالارين گئرچکلشديريلمهسي اوچون ايستيفاده اولونان "نؤکري" اولاراق خيدمت گؤستريرلر". دوغرودور، جمعيتده هر زامان موعيّن ضياليلار اولور کي، قرامشى اونلاري "عنعنهوي ضياليلار" آدلانديرير - هئگئمونياسيني ايتيرميش قروپا خيدمت ائتميش، اؤز ايدئيالاريني دگيشمهميش ضياليلار. عادتن هئگئمونياني يئنيجه الده ائتميش قروپ اونلاري اهليلشديرمگه چاليشير. بوندان باشقا، اؤز هئگئمونياسي اوغروندا موباريزه اوچون يئتيشمکده اولان ايجتيماعي حرکاتلار اؤز ضياليلاريني ياراديرلار کي، اونلار مدني نووهيه تاثير و هئگئمونيانين اله کئچيريلمهسي اوچون اساس واسيطهچي رولو اويناييرلار.

بو - قرامشى تعليمينين ايرلى سوردوگونون قيسا و سادهلشديريلميش ايفادهسي دير. دوشونورم، آرتيق بو ايضاحدان بو کونسئپتين [قاوراممفهوم] نه قدر محصولدار و گئنيش اولدوغو گؤرونور. قرامشى تاريخي ماتئرياليزمي (هم مارکسيست، هم ده ليبئرال وئرسيياسيني) دفع ائتميش، يئني سوسيولوژىنين اساسلاريني قويموش شخصلردن بيريدير. اونون آديني عبث يئرده کولتورولوگييادا م.باختين، م.فوکو و فلسفهدهکي ديگر يئنيليکچيلرده بيرليکده چکميرلر. قرامشى - دونيانين يئني علمي منظرهسيني حيسّ ائتميش و اونون روحونو جمعيت حاقيندا علمه کؤچوره بيلميش ايلک فيلوسوفلاردان بيرى دير.

تدقيق ائديلديکدن سونرا قرامشىنين هئگئمونيا حاقيندا تعليمينه اويغون اولاراق اينکيشاف ائتديگي گؤستريلن بو ايجتيماعي پروسئسلردن بير نئچه نومونه گتيرهجگم...

يقين کي، قرامشى نظرييهسينين دوزگونلوگونون ان اؤنملى تصديقي - هينديستانين موستملکه آسيلىليغيندان غئيري-زوراکي يوللا آزاد ائديلمهسي اوزره هيند ميلّى کونقرئسينين اوغورلو ايستراتئگيياسى دير. "کيچيک سؤزلر و فعاليت" چوخلوغو واسيطهسيله پارتييا اهالي کوتلهسينده مؤحکم مدني هئگئمونيايا صاحيب اولدو. موستملکه آدمينيستراسيياسي و اينگيليسمئيللى ائليتا موقاويمت گؤسترمکده عاجيز ايديلر - اونلار اوّلکي قورولوشون دستکلنمهسي اوچون ضروري اولان کوتلهلرين مينيموم راضيليغيني ايتيرميشديلر.

ديگر پارلاق و شوعورلو شکيلده حاضيرلانميش "عمليات" - ايسپانيانين فرانکونون اؤلوموندن سونرا توتاليتار و قاپالي جمعيتدن ليبئرال بازار ايقتيصادياتينا، فئدئراتيو قورولوشا و غرب تيپلي دئموکراتييايا دينج يوللا کئچمهسى دير.

فرانکيست ائليتا هئگئمونياسينين بؤحراني هئگئمونيايا ايديعالي اولان سول موخاليفتله باغلانميش بير سيرا پاکتلار واسيطهسيله حلّ ائديلدي. بو پاکتلار و گوزشتلر نتيجهسينده سوللار "ائليتايا قبول ائديلديلر" ،فرانکيستلر ايسه منفور کئيفيتلريني و فرازئولوگييالاريني دگيشديلر و "دئموکراتلارا" چئوريلديلر. سوللار ايسه کوتلهلري دؤزمگه، اؤز سوسيال طلبلريندن ايمتيناع ائتمگه "اينانديرديلار" - ساغلار بونو باجارمازديلار.

قرامشىنين نظرييهسينه اساسلاناراق، کولتورولوقلار غرب جمعيتينده بورژوازييانين هئگئمونياسينين برقرار اولماسي و دستکلنمهسينده اشيانين ("چوخ ايشلنن ماللار") رولونو ايضاح ائديرلر. اشيالار (مادىّ مدنيت) اورتا ايستاتيستيک اينسانين ياشاديغي موحيطي فورمالاشديريرلار. اونلار عادي شوعورا گوجلو تاثير گؤسترن "ايسماريجلار" احتيوا ائديرلر. اگر اشيالار اونلارين "نيشانه" ("سيمووللاردان فورمالاشميش اينفورماسييا سيستئملري") فونکسييالارينين نظره آلينماسي ايله انعکاس و تصوير ائديليرلرسه، آخينىنين نهنگ ميقياسي و موختليفليکلري سايهسينده اونلار عادي شوعورون فورمالاشماسيندا حلائديجي گوجه ماليک اولا بيلرلر. محض چوخايشلنن ماللارين (اونلار آراسيندا خوصوصي يئري آوتوموبيل توتور) ديزايني آبش-دا مدني دگرلرين شوعورا يئريديلمهسينين ("مدني نووهنين" ياراديلماسي و قورونماسي) اساس مئکانيزمينه چئوريلدي. موتخصيصلر خوصوصي اولاراق بو مئکانيزمين جمعيتين "ائفئکتيو ايستاندارتلاشديريلماسي و سئقمئنتلشديريلمهسي" [بير بيريندن آيرى بؤلوکلره و جوزءلره بؤلوندورولمهسى] باجاريغيني قئيد ائديرلر.

ايستاندارتلاشديرما و سئقمئنتلشديرمه - وطنداش جمعيتينده هئگئمونيانين اساس شرطى دير، بورادا "آتوملاشماني"، اينسانلارين فردىلشمهسيني قورويوب ساخلاماق طلب اولونور. لاکين عئيني زاماندا "سئقمئنتلري" طبيعي واحيدليگه گتيريب چيخارمايان - هئگئمونيا اوچون تهلوکهسيز اولان باغلارلا علاقه لنديرمک لازيمدير. قرامشى مئتولوگيياسي اوزره تدقيقاتلارين گؤسترديگي کيمي، آبش-دا بونون اوچون ائفئکتيو اوصول ايدمان ايدي. او، ائله بير سيموول و اوبرازلار ياراتدي کي، جمعيتين ان موختليف سئقمئنتلريني - قارادريلي آشاغي طبقهدن بورژوا ائليتاسينا قدر هر کسي يومشاق، ايجتيماعي واحيدليگه گتيريب چيخارماياجاق باغلارلا علاقه لنديردي. ايدمان عومومي کوتلوي مدنيت و عادي شوعورون خوصوصي کسيميني ياراديردي.

قارشي قوووهلرين موعيّن مساله اوزره ايجتيماعي شوعوردا هئگئمونيا اوغروندا اؤز کامپانيالاريني شوعورلو شکيلده پلانلاشديرديقلاري آيري-آيري حاللارين تدقيقي داها ماراقلي دير. مثلا، 1984-1985-جي ايللرده تاچئرين اؤزللشديرمه کامپانياسي بو جور ايدي. اؤزللشديرمگه قارشي چيخان اينگيليس همکارلار ايتيفاقلاري [اتحاديهلر] ايجتيماعي فيکري اؤز طرفلرينه چکمک ايستهييرديلر، لاکين هئگئمونيا اوغروندا ياريشدا مغلوب اولدولار. عوموميليکده، اينگيليسلر اؤزللشديرمگه راضيليق وئرديلر و يالنيز بونون فسادلاريني اؤز اوزرلرينده حيس ائتديکده تاچئريزمدن اوزاقلاشماغا باشلاديلار.

قرامشىنين مئتودولوگيياسي ن.راکفئللئرين تشببوثو ايله، ز.برئژينسکينين رهبرليگي آلتيندا ياراديلميش "اوچ طرفلي کوميسييا"نين فعاليتينين ماهيتيني چوخ گؤزل آشکار ائدير. بو - قارانليق "دونيا حؤکمرانليغينين" ان قاپالي و تاثيرلي تشکيلاتلاريندان بيريدير. آبش، آوروپا و ياپونيادان اولان 300-ه ياخين عوضوو وار. مقصد - خوصوصيله مالييّه و انئرگئتيکا آلانى داخيل اولماقلا، ترانسميلّى کورپوراسييالارين بوتون دونيا اؤلکهلرينه چيخيشينا نايل اولماقلا، يئني دونيا نيظاميني ايستابيللشديرمک دير. اوچ طرفلي کوميسييا اينديکي قلوبال مالييّه بؤحرانىنين يارانماسينا و عومومىليکده 70-جي ايللرله موقاييسهده دونيانين غئيري- ايستابيللشمهسينه شراييط ياراتميشدير. لاکين بيزيم اوچون ديگر نتيجه ماراقلي دير: بو گيزلي تشکيلات بوتون اساس اؤلکهلرده ايجتيماعيته تاثير واسيطهلريني ائله سفربر ائتميشدي کي، فعاليتينين "خوشاگلمز" فسادلاري عوموميتله ايجتيماعي دئباتلاردان يوخا چيخسين. بو قوووهلر (عاليملر، مطبوعات، "معنوي ليدئرلر") دونيا ميقياسيندا عادي شوعورا ائله تاثير گؤسترسينلر کي، اينسانلار آشکار اولاني گؤره بيلمهسينلر. اونلارين "ساغلام دوشونجه"سيني سؤندوروبلر.

نهايت، ليبئرال ضياليلار طرفيندن شرقي آوروپا اؤلکهلرينده سوسياليست قووّهلرين هئگئمونياسينين محو ائديلمهسي تام اولاراق قرامشى تعليمينين منطيقي اوزره حياتا کئچيريلميشدير. آبش-دا بو اؤلکهلرين مدني نووهسينين محو ائديلمهسينده تئاترين رولو حاقيندا ديسئرتاسييالار يازيلميشدير - چوخ ماراقلي موطاليعه دير (قرامشى اؤزو هئگئمونيا نظرييهسينده همچنين تئاترا، خوصوصيله ده ايتالييادا فاشيستلرين حاکيميته گلمهسينده آز رول اويناماميش لويجي پيراندئللو تئاترينا يئر آييريردي). مثلا، آلمانيا دموکراتيک رئسپوبليکاسيندا تانينان، اؤز پيئسلرينده "تاريخين آشاغيدان محوي"نى قارشيسينا مقصد قويان هاينئر موللئر تئاترينين فعاليتي نظردن کئچيريلير. بو - "آنتي-اينستيتوسيونال تئاتر" ،يئني ايجتيماعي قوروملاري گميرمکده اولان تئاتر آدلانديريلان حالين تيپيک نومونهسى دير. تدقيقاتين نتيجهلرينه گؤره، صحنه قورولوشچولاري شوعورلو اولاراق "هئگئمونيا مونوليتينده چاتلار آختارير و بو چاتلاري گئنيشلنديرمگه چاليشيرديلار - تاريخين سونونا قدر". تاريخين سونو او زامانلاردان بري غربه قارشي دايانان "سووئت بلوکونون" آرزو اولونان ايفلاسي آدلانديريلميشدي.

آچيق سؤز: يوخاريداکى سايتا گؤندرلميش ، يازينى عرب اليفباسينا کؤچورنده اويغونلاشديريليب، آزجا قيساديليب و بير نئچه سؤزون بيچيمى دگيشديريلدى.