http://anlamlar.blogfa.com/post-131.aspx

شعر، قادين شاعيرلر و فئمئنيزم /ايواز طاها

بير چوخ ميللتلر کيمي، بيزيم تاريخيميز ده کيشيلرين اويلاغيدير. دوغرودور، دده قورقوددا،  اصليکرمده و عباسگولگزده  قادين سؤيلملرييله قارشيلاشيريق. آمما بو اوجقاردير. اوجقار دئيهنده بير داها وورغولاماق ايستهميريک کي، عربلر قيز اوشاقلاريني ديري ديري باسديريرديلار. بيليريک، حئمورابي قانونلاريندا دئييليردي، بير کيشي، هانسيسا آريستوکرات کيشينين قيزيني دؤيهرک اؤلدورسه او کيشينين اؤزو يوخ، قيزي اؤلدورولمهليدير. خوشبختليکدن بونلار اوزاق کئچميشلرده قالدي. ايندي بونو دئمک ايستهييريک: مرکز، تاريخ بويو آرديجيل اولاراق کيشيلرين الينده اولموشدو. بونون سونوجو آيديندير. قادينين سسي شعر جوغرافياسيندان يوخا چيخديقدا، تاريخين ياريمکورهسيني سسسيزليک بورويور: قادين ياريمکورهسيني. چاغداش گيريشيملر ده بو سوسقونلوغو اونا گؤره پوزا بيلمير کي، قاديني توپلوما آپاريجي عاميل کيمي قايتارميرلار. اونا اوجقاردا دئکوراتيو بير يئر آييريرلار.

1

فئمئنيزمي، گؤزهل قيزلارين شعريني چيرکين قيزلارين شعريندن داها ياخشي باشا دوشمک کيمي قاوراماساق، شعر اينقيلابيندا اؤنملي دوٍرتولردن [انگيزهلردن] بيريدير. چونکي بوردا «قادين»ـدان مقصد، کيشيلرين ياشي ايله مشغول اولان وارليقلار دئييل، تملچي بير گوجدور. بو گوج، ائرککشاه [مردسالار] سؤيلملري آلتاوست ائتمکله، ادبييات نظرييهلريني کؤکلو دَييشيکلييه اوغرادير. شعرين بير گوجو ده گلهجهين اؤنگؤرهنليييندهديرسه، بونو فئمئنيست قادينلاردا داها آرتيق گؤرمک اولار.

ژاک لاکان Jacques Lacan بوندان داها درينلره گئدير. لاکانـا گؤره، ديلين ايکي يؤنو واردير: اونلارين بيري ديلين عومومي، قايدا قانونلو  و گراماتيک  قورولوشودور؛ او بيري ايسه بونلاردان عيبارتدير: سؤزجوکلرله اويناماق، رؤيا و آنلاملارين سربست چاغيريشيمي.[1] بو، ديلين بيلينجآلتي [ناخودآگاه] يؤنودور. ديلين قايدالي يؤنو چاليشير بيلينجآلتي يؤنو ازيب باسديرسين. او بيري ياندان، بيلينجآلتي يؤن ده ثابيت آنلاملاري و گراماتيکاني لاخلاديب اوچورتماقلا ديلين قايدالي يؤنونو داغيتماغا چاليشير. بو سؤزلردن يارارلاناراق سؤزومون جاني بودور: ديلين عومومي و قايدالي يؤنو کيشييانا و ائرککشاهليقجاسينادير. او بيري يؤن، ديلين قايداـ قانونلارينا قارشي داغيديجي دؤيوش آپارير:  فئمئنيست گئرچکليک اؤزونو دوغرولتماغا و گؤسترمهيه جان آتير. شعرين يارانماسي ذکادان داها آرتيق بو ايکينجي يؤنه باغليديرسا، اوندا قادين سسينين شعرده اؤنمي بير داها تصديقلهنهجکدير.

دوغرودور قادين سسينين ائشيديلمهسينين ايلکين شرطي فئمينيست اولماق دئييل. (فئمينيزم آنلاييشينا باغلي بعضي ايجتيماعي آخيملارين افراطا وارماسي، بير چوخ قادينلاري بئلهجه آدلانديريلماقدان اوٍشوندورور.) لاکين اونلارين مدعاسيندا، ادبي متينن يئني بوجاقدان اوخونوشونو  اوچون جيددي تکليفلر وار.

بس گؤرهن فئمئنيزم نه دئمک ايستهيير؟ شعريميزله اونون باشقا هانسي ايلگيلري وار؟ قادين/کيشي جوٍتلوٍيونون قارشي دورماسي، و بونونلا ايلگيلي قارشي دورمالار، فئمئنيزم آخيمينين مرکزينده دورور. اونلار، توپلومدا کيشييه اوٍستونلوک وئرميش قورولوشو داغيتماق ايستهيير. پسيکولوگ و سيياسي نظرييهچي، جئين فلکس Jane flax يانيلمير، فئمئنيست ائپيستئمولوگييانين گؤرهوي بونو آيدينلاشديرماقدير کي، ائرککشاهليق هم بيزيم صنعته و بيليمه باخيشميزا نفوذ ائتميشدير، هم ده صنعتله بيليمين يو اؤزهلليکلرينه. دونيا بارهسينده و بو دونيادا کئچديييميز تاريخ حاققيندا ياخشيجا بيليييميز اولمادان، (حتتا دونياني نئجه اؤيرهنهجهييميزي بيلمهدن) الوئريشلي ايجتيماعي داورانيشلاري گئنيشلنديره بيلمهريک. غربده بئله دوشونورلر، گؤرهن بيز نئجه دوشونوروک؟  

بوردا البته سون سؤزو  اساسن قادينلاريميز دئمهليديرلر. اسلاووْي ژيژئکين فيکيرلريندن ايلهام آلاراق قادين مسئلهسينده اوچ ديرهنيش فورماسيني و يا مرحلهسيني گؤروروک کي، آذربايجان قادين شعري نازلاناـ نازلانا اونلاردان يان کئچير. بيرينجي مرحله، داخيلي مرحلهدير. بو مرحلهده قادينلار کيشيلري اونلارين اينانديغي و ساووندوغو عايله گلهنکلرينه داياناراق تنقيد ائديرلر: «کيشيلر! سيز اؤز اوزهرينيزه گؤتوردويونوز عايلهوي وظيفهلرنيزه عمل ائتميرسينيز.» بئله بير تنقيده قورشانميش قادينلار اونودورلار کي، کيشيلر تانينميش وظيفهلرينه عمل ائتميرلرسه، دئمک سيستئم چاتيشمازدير، اونون داياقلاري ظولم اوزهرينده قورولوب. باشقا سؤزله, کيشي خئيرينه فورمالاشيب. ايکينجي مرحلهده قادينلار دئييرلر بيز عايلهده باشچيليغي اله کئچيرمک ايستهميريک، بيز اينديکيندن داها آرتيق گوج، امتياز و صلاحيت ايستهميريک، يالنيز کيشيلرين گوجو و اوستونلويوندن قيراقدا يئرلشميش بير آلاني [عرصهني] ايستهييريک. ائله بير آلان کي، اوندا مدني و معنوي ايستکلريميزي ايرهلي سوٍرهک، مادي منفعتلريميزي آچيقلاياق، حاکيم قودرتي تنقيد ائدهک، و کيشي حؤکرمانليغيني دئويرمهدن، اونون گوجونو معينلشديريب محدودلاشديراق. بو مرحلهده قادينلار کيشيلره آلتئرناتيو آختارماسالار دا, کيشيلر ادعا ائده بيلرلر کي، قادينلارين گوج قازانماقدان چکينمهلري يالان و رياکارجاسينادير. قادينلار گئرچکدن گوج آختاريرلار. اوچونجو  مرحلهده هر شئي آيدينلاشير. بيزيم توپلوموموزون تجروبه ائتمهدييي اوچونجو مرحلهده قادينلار داها دئميرلر: «اللريميز تميزدير، گوج آختارميريق، آغاليق فيکرينده دئييليک.» اونلار کيشيلرين تنقيديني قبول ائديرلر. «کيشيلر! بلي بيز گوج آختاريريق، نييه آختارماياق کي، سيزين گؤبهيينيز گوجله کسيلمهييب کي؟ آغاليق سيزين آلنينيزامي يازيليب؟»

2

بيليريک قادين، سايجا[2] توپلومون ياريسي اولاراق اونون قيراغيندا ياشايير. سايينا اويغون شکيلده گوج قورولوشلاريندان پاي گؤتورمور؛ توپلومداکي آپاريجي  ايشلهکلري [فونکسيالاري] يئرينه يئتيرمير؛ ائوده مطبخ کونجونه سيخناشديريلير؛ و البته يئري گلنده اورهکدن سئويلير. اونا باغيشلانيلان بو سئوگي ده اومارسيز دئييلدي. بيرينجيسي، بو سئوگينين قاپازي آلتيندا آناليغا آپاران بير يول جيزيلير. ايکينجيسي ايسه او، عوموميتله سئويلديييندن بئش قات آرتيق سئوير. بعضن قادينين بير آنا کيمي بويو اوخشاديلديقدا، ندنسه توپلومون «قادين ياريمکورهسي»ـنده بير آلدانيش حيسسي يارانير. منه ائله گلير کي، مقدس آناليق وظيفهسي، بئله آنلاردا بويوندوروق کيمي اونون بوينونا سالينير. بلکه ائله بونا گؤره ايدي کي، فئمئنيزمين آناسي ساييلان سيمون دوبووار،[3]عايله قورومونا باريشمازجاسينا قارشي چيخيردي. دوبووار، قادينلارين اَزيلمهسينده، و اينسانين ايجتيماعي حاقلارينين تاپدالانماسيندا تکجه عايلهني باشليجا عاميل کيمي قلمه وئرميردي، کيشيلرين اوستونلويونو حئيواني بير اؤزهللييه باغلاييردي: «اينسانين حئيوانا اوستونلويو اونون حيات باغيشلاماسيندا دئييل، ياشاييشي تهلوکهيه سوروکلهمهسيندهدير. بونا گؤرهدير کي، اينسانلار آراسيندا بو اوٍستونلوک، نسيل آرتيمينا يارايان [توليد مثل ائدهن] جنسه دئييل، اؤلدورمهيي باجاران جنسه وئريلير». منجه، آناليق قادينين لذذت آلديغي بير وظيفهدير، آمما کيشيلر بو وظيفهني ايستهنيلن قدهر قودساللاشديراندا، سانکي بونو دئمک ايستهييرلر: سن اوتور اوشاق دوغ، من توپلومو اداره ائدهجهيم.

دوبوارا گؤره، توپلومون قادين بارهسيندهکي يانليش تصووورلريني اونون بدنينين فيزيولوژي قورلوشو ايله باغلاماغين مؤحکم اساسي يوخدور. بس بو تصووور هاردان گلير؟ اونون نظرينجه کيشي قاديني اؤزونه ياراياجاق بيچيمده ايختيراع ائتدي. ايستر قوللوقچو بيچيمينده، ايسترسه ده بوٍت. مؤوجود قادين آنادان اولماميشدان اؤنجه بئلهجه گليشديريلدي. قادين لازيمي دويارليليقدان محروم قالاراق، اؤزونو ائله بير چئورهده گؤرور کي، ايکينجي درجه لي وارليق اولدوغونو منيمسهمک مجبورييتينده قالير.

"آناليق وظيفهسي" ده "حيات يولداشي وظيفهسي" کيمي قاديني ائوده دوستاق ائديب آزادليقدان محروم قويماق اوچون ايستيفاده ائديلن مؤوهوماتدير. دوبوار "وورغون" Amorous The  باشليقلي کيتابيندا، ائوده دوستاق اولماق باخيميندان "سئوگي"ني ان بؤيوک تهلوکه سانير. وورغون قادين مستقل بير وارليق اولماق اوغروندا صرف ائتدييي چاليشمالاريندا يئنيلگييه اوغراديغيني آنلاياجاق، بونونلا دا هانسيسا کيشيني اؤزو اوچون خيلاصکار کيمي سئچهجک. قادين ظاهيرن باغيمسيز گؤرونن مذکر شعوردان آسيلي اولماقلا اؤز وارليغينا اعتيبار قازانير. دوبوار چخيش يولو تکليف ائدير. بو بهيهنيلمز آسيليليقدان چيخيش يولو اولدوقجا يارارلي  و اوبيئکتيودير: مشغوللوق. قادين توپلومدا ايشلهمکله ان بؤيوک آزادليغا قوووشا بيلر. اونلارين ائوده دوستاق اولمالارينين قاباغيني آلا بيلهجک ان کسه يول هانسيسا ايشله مشغول اولماقدير. بو دا وار کي، هر بير ايشين و يا ايجتيماعي وظيفهنين قاپيسي قادينين اوزونه آچيلديقدا، سئوگينين گؤرونوشو قاپانا بيلر. آنجاق بونون درديني چکمک گرهکلي دئييل، بو چاتيشمازليغا کيشي نئجه آليشيبسا قادين دا آليشا بيلر.

کيمليکلري و مدنييتلري کيشي/قادين قارشيلاشماسي اساسيندا ساهمانا سالان بير ماتريس [قليب] وار. بو ماتريسين باشليجا اؤزهللييي اونون تاريخه سيرانميش ائرکک سؤيلمي اولدوغودور. بونا گؤره ده، فئمئنيستلر بو ماتريسي  چاليب سينديرماق ايستهييرلر. گؤرهن بو ايستهيين علمي, يا دا فلسفي داياغي وارمي؟ دوبوار بونو ائگزيستانسياليزمله اساسلانديريردي. ائگزيستانسياليزم مکتبينه گؤره، اينسانين دييشمز کيملييي يوخدور، اينسان اؤزونو گليشديرير. بئلهديرسه، قادينين داها چوخ ائموسيونال (يعني عاطفي، دويغولو) اولماسي, کيشينين ايسه عاغيللي اولماسي بارهده ادعالار ناغيلدير، بوش سؤزدور. بو سؤزلر گلهنکلردن و ايجتيماعي نورمالاردان گلمه اويدورمالاردير. دوبووار بو باخيشدان يارالارناراق قادينلاري اؤزلري حاقدا اَيري دوشونجهلردن چکينديرمهيه چاليشيردي. اونون گومانينجا، قادينلار گلهنکلردن گلمه يانليش اؤنيارغيلاري سيليب زيبيلقابينا تؤکمهليديرلر. دوبووارين بو ايستهيي ايندييهدک دوغرولماييبسا اونون بير سببي قاديندان کوبود کيشي بنزهري ياراتماقدير. دئمک بوردا يالنيز کيمليکلر دييشير. کيشينين يئريني قادين آلير، مرکزين يئريني اوجقار آلير، اوجقار اؤزو ده يئني مرکزه چئوريلير. اؤتهري اولاراق بو چوخ ياخشي چؤزوم يولودور، آمما عدالتسيزليک قايناغي اولان کيشي/قادين قارشيدورماسيني قورويوب ساخلايير. بونا آلتئرناتيو اولاراق ژاک دريدانين اؤنهريسي واردير. دريدا دئيير، مرکزي داغيتماق تکجه يولدور. آمما بو اؤنهرييه ده اعتِراضلار وار. سن دئمه دريدانين اؤزو ده کيشي اولدوغوندان کيشي خئيرينه مرکزي داغيتماق ايستهييرميش! قادينلار بئله دئييرلر. اينديکي قادين منليک قازانير و اوزون سوٍره آپارديغي موباريزه سونوجوندا مرکزي اله کئچيرمک ايستهيير، دلهدوٍز کيشيلر همين مرکزي داغيديرلار. بو کيشيلرين نؤوبتي فيريلداغيدير.

او بيري ياندان بيليريک، چاغداش توپلوملارين وارليغيني چوْخسسليليک عاميلي قورويوب ساخلايير. بو اولماديقدا سانکي توپلوم اوچوروم قيراغيندا سرسمجهسينه يئرييير. ايندي هئچ بير گوج، اينسانلاري تاريخاؤنجهسي [پيشاتاريخي] سوسقونلوق دوروموندا اداره ائتمهيه قادير دئييل. و قادين سسينين ائشيديلمهسي، چوخسسليليک دئييلن دورومون گئرچکلشمهسينين باشليجا شرطيدير. بونا گؤره، بئله بير دوشونجهنين شعريميزه ياييلماسي چؤرهکدندن ده واجيبدير. شعر تاريخيميز، باشقا خالقلار کيمي، بَيلريميزين تاريخيدير. قادينلار بو آلاندا [مئيداندا] يوخ درجهسيندهديرلر. سووئت دؤنمينين هايکويلرينه باخماياراق، مهستي گنجوي ياراديجيليغينين شعريميزه دخلي يوخدور. حئيران خانيم و خورشيدبانو ناتوانـي دا بارماقلا سايماق اولار. بئله اولدوقدا فئمينيستيک تنقيد، بو کيشي اوستونلويونو [هئگئمونياسيني] سارسيتماغين تکجه يولودور. آمما هله کي بو يولا چيخان قادين قوشونوموز يوخدور. سئيرک چاليشمالار وار؛ تک اللر، تکباغيران بوغازلار. بو بوغازلار ايسه بيلميرلر «کوراوغلو، کور اوغلو» دئيه، لووغالانانلاري تنقيد آتشينه توتسون، يوخسا ساوالانين سرين چارداقلاريندا آرخايينليق بالينجيندا اويويانلاري. لاکين هر حالدا قادين, بو دويوملولوق sensitivity مرحلهسينه گليب چاتميشدير کي، داها «سودان گلن کوزهلي قيز» دئييلدير:

ايندي

کؤرپه باغيرساقلار

ات، چؤرهک و پورتغال حيسسينده

تؤوشهيير

قارينلار قورولدايير

اييرمينجينين سون گوپونلري

يئرين تلسگن دامارلاريندا

دؤيونور،

داها من سوٍرمهلي ـ وسمهلي

"سودان گلن کوزهلي" قيز دئييلم

انليک ـ کيرشانلي سئوگيلي دئييلم

خياوانلارين اوزونونداـ ائنينده،

کيشيليک دامارلاري،

چارراهلارين ذهنينده کيرييير، گيزيلدهيير

داها پستيلرين اينامي،

کيتابلاري، کيشيلري ياديرغاييب،

و آراغا، افيونا، توٍستويه،

دوغما داغارجيق اولموشلار،

و خلوت بوجاقلار، اؤز گوٍوهنجلي کئچميشلرينه،

اؤگئي قوجاق اولموشلار. (نيگار خياوي)

   شعريميزدهکي کيشي، اصيل آنلاميندا کيشي اوغلو کيشيدير. حتتا شعريميزين "حئيدر بابايا سالام" کيمي کؤيرک اؤرنکلرينده سرت کيشي باخيشيني گؤروروک: حئيدربابا مرد اوغوللار دوغگينان. بو کيشي سسيدير، بيز قادينين سسيني آز ائشيديرک.

3

ايندي باشلانغيج مرحلهني ياشايان قادين شاعيرلريميزين سايي گؤزه دَيَردير، آمما قادين سسينين توپلو شکيلده اوجالديغيني هلهليک آيدينجا ائشيده بيلميريک. بعضيلري گومان ائديرلر، بو سؤيلم [گفتمان] سئکس اطرافيندا باش وئرن آکسيالارين آناليزي ايله باشلانماليدير. باشقا سؤزله، اونلارين گومانينجا، قادينين سسي ايلک اؤنجه سئکس قاورامي بوغازيندان اوجالسين گرهک: ميصراعباشي ديلهنن و يا اسيرگهنن اؤپوجوکلر، يا گلهنکلره دا آيغيري اولاراق اؤز آتاسي ايله جنسي ايلگيده اولماق. ايش ده  ائله بوردان کورلانير. من آز چوخ فرويدون يوخويا و جنسي ايلگيلره گتيردييي آيدينليقلا تانيشام. آنجاق قادينا بوتونلوکله سئکس آچيسيندان باخيلديقدا، هئچ بير يئنيليک باش وئرمير. دئمک، بيز کئچميشين سوسقونلوغونا چاغداش فورمادا قاييديريق. دوننکي شهوتين يئريني بو گونکو سئکس آلير. دونن اونون سسي شاه حرمخاناسيندان گليردي، بو گون شاعير حارامخاسيندان. آمما بوراسي دا وار کي، بيزيم بير چوخ پروبلئملريميز بو اَيري باخيشدان قايناقلانير. حتتا سؤزده  وطنسئوهرليک، رومانتيزم، واختسيز سئوگيناغيللاري، و چوٍروک اخلاقياتين شعر ميصراعلاريندا بولبول گؤزه چارپماسي، سئکسه دوزگون ياناشماغي باجارماماغيميزدان گلير. گونئيده بو ياساقديرسا، قوزئيده شاعير گؤزونو يوماراق بو حاقدا آغزينا گلهني سؤيلهيه بيلير کي. بس نييه بيز ايکيميزده بير قاپييا چيخيريق؟ البته ايستثينالار دا وار.

سؤز او آزادليقدا و بو ياساقليقدا دئييل. سؤز بوندادير کي، جنسييت gender مسئلهسي بيزيم تاريخي بيلينجيميزده توخونولماز بير تابو اولاراق قالير. بيز اونون گيزلي مئکانيزميني قاورايا بيلميريک. بيز اونون داورانيشلاريميزدا فوران ائدن قاپالي ماهييتيني فرويدون يازديقلارينا داياناراق آچا بيلميريک. نيوتونون فيزيکدهکي، مارکسين ايسه ايقتيصادداکي اينقيلابي بيزه گليب چاتديسا، فرويد اينقيلابي گليب چاتمادي. من سئکس دئيهنده چيلپاقليغي نظرده توتمورام. بوتون اؤرتوکلري ييرتاراق جنسييتله ايلگيلي آکسيالارين آچيق ايضاحينين شعره دخلي يوخدور. بو پاپاق آوروپاليلارين باشيندان چوخدان دوشموشدو. بونا گؤره ده بئله بير آکسيالارين آچيقلاماسينا قورشانميش اثرلر منيم اوچون ماراقلي دئييلدي. آياز سالايئوين "ياراسا" فيلمينده باش وئردييي کيمي، بو شعرلرين مضمونو باياقکي پاپاغي بير داها يئردن قالديريب، باشا قويماق کيمي گلير آداما. دوغرودور جينسي تابولاري سينديرمادان شعريميز اؤزونه يول آچماقدا چتينليک چکهجک. آنجاق آلتبيلينجيميزده ياتان جنسي موتيولري گون قاباغينا چکمکله، اونلارا آيدينليق گتيره بيلمهريک. اونلاري چوٍرودهريک. قوزئيده سئکسه بئله بير ياناشما، گونئيده چاخير، سيگارئت، اؤپوجوک و سئوگي سؤزجوکلري ايله يامسيلانير. سن دئمه بو سؤزجوکلر اولمادان شاعيرين آوانگارد اولدوغونو تلمتلهسيک وورغولاماق اولمور!

بونون اوچون بيز باشقا يؤندن قادين مسئلهسينه ياناشا بيلهريک: اونون توپلومدا توتدوغو مؤوقعي آسپئکتيندن. بوردا گونئيليـ قوزئيلي اولاراق بير قاپييا چيخيريق. لاکين گونئيله قوزئي آراسيندا اينجه بير فرق وار. بو فرقي آچيقلامازدان اؤنجه دئمهلييم کي، گونئيدهکي قادينلارين حؤرمتي، آزادليغي و موتلولوق حيسسي اوستـ اوسته قوزئيدن چوخدور. قوزئيلي بيريسي چوخ گومان، بونو ائشيتديکده قولاغي تاققيلداياجاق. آمما چادرا و باش اؤرتويونه رغمن بئلهدير. بو نه ايله باغليدير؟ گونئيده کيشيلرين قادينلا داورانيشي ائلهدير کي، او اؤز دوغال کيمليييني حيسس ائدير. لاکين کيشيلرين داورانيشيندان دولايي، قوزئي قادينلاريندا بئله بير حيسس آزدير. باخماياراق سون مقامدا بونلارين ايکيسي ده آيري آيري يوللاردان بير قاپييا چيخيرلار: هانسي دورومون "طبيعي" و يا "غئيرطبيعي" اولماسيني توپلومداکي مدنييت فورمالاشديرير. بونون اوچون آدي چکيلن طبيعي اؤزهللييه باشقا بير مدنييتين گؤزويله باخيليرسا، اولا بيلسين "غئرطبيعي" گؤرونسون. سؤزومون جاني بودور: اولا بيلسين "طبيعي" آدلانان دورومو، کيشيلرين اؤزلري خانيملارين بئينينه سوخوشدورموشلار. بو دورومو لاخلاتماغين بير يولو اونو قادينلارين تنقيد سوزگجيندن کئچيرمکدير. بونونلا دا بيز بير داها قادينا دؤنمهليييک.

قادينا دؤنمک دئيهنده، قادينلا باغلي «من»ين سسيني ائشيتمهليييک. کيشيليـ قادينلي آذربايجان شعرينده «من»ين قيتليغي وار. بونون اوچون شعرلريميز شاعيرلره بنزهيير، شاعيرلر ايسه بيربيرينه. سسلر آنلاشيلماز اوزاقليقلاردان گلمير، قولاغيميزين ديبيندن گلير، شاعيرين بوغازيندان. قادين آدينا دانيشان «من»لريميز اولسايدي، چوخ سسلي شعرلرله قارشيلاشا بيلرديک. ايستيثنالاري دانميرام، آمما شعريميزده قادين سسي آزدير. ايييرمينجي يوز ايلليکده نيگار رفيعبيلي، مدينه گولگون و حکيمه بيلورينين ده سسي سرت ايدئولوگييا بوغازيندن گليردي. گونئيده بو «من»، سکسنينجي ميلادي ايللرده بعضي قادين شاعيريميزين ديليندن سسلنمهيه باشلاميشدي. آمما اونلارين ديليندهکي چاتيشمازليقلار، و فارسجادان گلمه بولبول دئفورمه ايمگهلر، سؤزو گئدن «من»ـين سسيني بوغوردو. باشقا سؤزله، او «من»ـين سسي چوخواخت اؤزگون دئييلدي. سونراکي شعرلرده بو «من» سؤنوکدو، قادين ايسه يئنه ده ادبيياتين اوجقاريندا قالدي.

بوردا صؤحبت ساواددان، يوکسک دوشونجهدن، فئمئنيزم فلسفهسيندن  گئتمير، قادين باخيشيندان گئدير. اؤرنک: 1993ـجو ايلده ادبييات اوزره نوبل موکافاتيني قازانميش توني موريسوننون Toni Morrison نه سيمون دوبووار کيمي ساوادي وار، نه ده گوٍجلو ايجتيماعي چاليشقانليغي. اوندا گوٍجلو اينتيويسيا [شهود] وار. اونون «جننت» باشليقلي رومانينين يوٍکو قادينلارين چيينينه دوشور. بوندان دا ياخشي بئله دئمک اولار: اونون ياراديجيليغيندا قادين اوجقاردا يوخ، اورتادا دايانير. موريسونـدان سوروشاندا کي، سنين رومانين فئمينيستيک اثرديرمي، يوخسا يوخ؟ «من هئچ بير فئمئنيستيک اثر يازماغا قاتلاشماميشام. من هئچ بير ائرککشاهليق [مردسالار] سيستئمين هانسيسا عؤهدهليييني اؤز اوزهريمه گؤتورمهميشم، آمما ائرککشاهليق سيستئمينين قادينشاهليق [زنسالار] نيظامي ايله دَييشيلمهسيني ده دوشونمورم»، دئيير. هئمينگوئيين کيتابلاريندا کيشيلرين سسيني ائشيديريکسه، موريسونـون اثرلرينده قادين سسي داها آيدين دويولور. بودور دئديييميز بصيرت. قادين، اونون رومانلارينين هم اورتاسيندا، هم ده اوجبوجاغيندا حاضيردير.

بير شئي هله ده چاتيشمير: هر بير اثرين آنجاق اؤزو تنقيد مؤوضوعسودورسا، داها يازيچينين کيشي يا دا قادين اولدوغو ايله نه ايشيميز وار؟

بو سورغودا گئرچکليک وار. گؤزهلليک ساحهسينده آپاريلان آراشديرمالار و سؤيلهنيلن تنقيدلر، ياراديجينين اؤزونه دئييل، يازينين آناليزينه يؤنلسه، ايشاره ائتديييميز بحثلرين بير چوخو فئمئنيستيک تنقيدلرين سينيريندان قيراقدا قالاجاق. اؤرنک اوچون دئييلير، يارديجيلار کيشي اولاراق ـ بيلهرکدن يا دا بيلمهيهرکدنـ ائرککشاه ايدئولوگيياني متنه سيراييرلار. آمما بو باخيش يازيچينين نييتينه سؤيکهنير. يازيچينين نييتينه سؤيکهنهرک تنقيده قاتلاشماق ايسه باياغي بير اوسلوبدور. آمما بو سؤزله ده فئمئنيست تنقيدچيلرين آغزيني باغلاماق اولماز. چونکي متنين اؤزونو تحليل ائدهرک سؤزلرين فونکسيالاريني، ائلهجه ده سؤزجوکلره يوٍکلنميش ايدئولوژيک قاوراملاري اوٍزه چيخارماق، تنقيدين باشليجا وظيفهلريندندير. جاناتان کالئرين Jonathan Culler سؤزو ايله دئسک، گؤرونور ادبي متنلر و اونونلا باغلي تفسير گلهنکلري، کيشي اوخوجولاري نظرده توتموشلار و قادينلاري کيشيلر کيمي اوخوماغا مجبور ائتميشلر؛ ائرکک باخيشي ايله اوخوماغا. فئمئنيست تنقيدچيلر «کيشي باخيشيني نورمال باخيش کيمي ادبي اثرلره آشيلايان آيريآيري استراتئگييالاري» افشا ائتميشلر. اونلار ، کيشي باخيشيني نورمال باخيش کيمي قلمه وئرن قورولوشلاري اؤيرنيب رد ائتمهيين يارارلي اولاجاغينا اينانيرلار. بو ايسه، ادبي متنين اوخونوش طرزينيـ ايستر قادينلار، ايسترسه ده کيشيلر اوچون ـ دَييشديرجک.

4

ليريک شعرده، هم تانيش، هم ده آنلاشيلماز بير «من» سسلهنير: ياخينلاشديقجا اوزاقلاشان بير «من». نئجه کي، رومان و اؤيکونون قهرماني، و يا سؤيلهيهني اونون يازيچيسي دئييل، شاعير ده اؤز شعريني اؤزو سسلنديرمير. اونو يازماغا باشقا بير «من» يا «سؤزچو» قوندارير. بونو دئيهنده يالنيز مضمونو نظرده توتمورام و شعري «يازارين نييتي» آدلانديريلان جيندير پرينسيپه داياناراق يوزماق ايستهميرم. «من» دئديييم، شعرين فورما و مضمونونا باغلي بوٍتون اؤزهلليکلريني سسلنديرير. جاناتان کالئرين گؤزهل بير سؤزو وار، شعري سن اوخومورسان، باشقاسي اوخويور. ايلک باخيشدا شعر، بير دانيشيقدير، آمما آنلاشيلماز يئردن باش قالديران سسين دانيشيغي. بيز آنجاق شعرلري سؤيلهيهنين باشقا بير سس اولدوغونو تصووور ائتمکله، اونلاري اوخويوروق: يازيچينين ياراتديغي سؤزچونون سسي. بونونلا دا، هر شعرين بير اوجوندا شاعير تاريخي فرد کيمي دايانير، او بيري اوجوندا ايسه، بللي سؤزلري دانيشان اونون سسي. ليريک شعرده قارشيلاشديغيميز «من»، شعري سؤيلهيير. اولا بيلسين او، شعري قوشموش يازيچيدان تام سئچيلسين. قوجا بير شاعيرين شعري، اولا بيليسن بير گنج «من»ـين ديليندن سسلنسين, يا دا گنج بير شاعيرين "من"ينين ساچـ ساققالي تام آغارسين.

ريلکهنين آغيتلاريندا [مرثيهلرينده]، آلمان اينسانينين سسي ائشيديلير. اورحان ولينين ده البته اؤزونه اوخشار بير «من»ـي وار شعرلرينده. ائله بير «من» کي، آغلاياندا شاعيرين اؤزو کيمي آغلايير:

آغلاسام سسيمي دويارميسينيز

ميصراعلاريمدا،

توخونا بيلرميسينيز

گؤز ياشلاريما،

اللرينيزله؟

بيلمزديم ماهنيلارين بو قدهر گؤزهل

كلمهلرينسه يئترسيز اولدوغونو

بو درده دوشمهدن اؤنجه.

کوٍسکون روحلو ائميلي ديکئنسونـون[4] شعرلرينده، هميشه بير وورغون, بعضن ده شن بير «من» گؤروروک. شاعيرين اؤزو آغلايير، «من»ي ايسه گولور. گؤرون گونش بارهسينده نئجه دانيشير:

دنيز ساکينلرينين دهليزينه اَييلير

داملارا اليني سوٍرتور

تارلانين پاپاغيني اؤپور

سونرا يوخا چيخير گوندوزون گؤز باغلاييجيسي.

ادبي «لاروس»دا پول ماري وئرلن  بارهده دئييلير: «او، سوچلارينا گؤز ياشي الهيهرک اعتراف ائدن شاعير دير. ان ياخشي شعرلرينده سانکي شاعير اؤزو دانيشير، اونون ايچينده بير روح هايقيرماقدادير. شاعير اونون سؤزلرينين قاباغيني آلا بيلمير.» سيلويا پلاتـين[5] قادين سسيني حتتا بير آسلاق کيشينين The Hanging Man احوالاتيني سؤيلرکن آيدينجا دويوروق. هئچ دئييرسن بو قادين، اؤزونو اوتوز بير ياشيندايکن اؤلدورمهييب.

5

اينسان توپلومونون کيشي سؤيلمينه آليشقانليغي, خستهليک حالينا گليب چاتميشدير. گؤرهسن قادين سسيني ائشيتمهيه توپلومون حاضيرليغي وارمي؟

بو حاضيرليق يوخدور. بونا گؤره ده بو"من"ين ديللنمهسي کيشيلرين ياراتديغي بوغونتو دوروموندا، تهلوکه قايناغينا چئوريله بيلر. اوستهليک، بو منين سسيني دينلهمهيه توپلومدا حاضيرليق اولمازسا، اونون اعتيراض دالغاسي قاييديب قادينين اؤز شعورونو، روحي ترازليغيني داغيدا بيلر. آديني چکديييمز سيلويا پلات، بونون تراژيک اؤرنهييدير.

پلاتين مصيبتي, بير تنقيد اثناسيندا اؤزونو قاباريق شکيلده گؤسترير. بير شعرينده او، اريني يوموشاق تنقيد ائدير، شعر ايسه ارينين سانسور سوزگجيندن کئچمير. پلاتين اري تئد هيوز Ted Hughes بوردا کيشيشاه سؤيلمين سيمگهسي اولاراق کيشييه قارشي اولونان تنقيده دؤزه بيلمير.

پلاتين شعرلرينه ايکي بوجاقدان باخماق اولار: بير ياندان شعرين اؤزونون شعرييت درجهسينه، او بيري ياندان شاعيرين نييتينه. اؤنجه شعري شاعيرين  نييتينه داياناراق يوزماسيني پيسلهديک، بوندان سونرا دا پيسلهيهجهييک. شعر قوشولدوغو آندان ياراديجيسيندان آيريلاراق باغيمسيز کيمليک قازانير. شاعيرين کيشي/قادينليغيندان آسيلي اولماياراق، شعرين داخيلي اينسيجامي، سؤز دوزومو، هارمونيياسي، و اونون مضمونو ايله بيچيمينين ديالئکتيکال ايلگيسي، اثرين بديعي سوييهسيني معينلشديرير. دئمک شاعيرين نييتي، شعري نييه و نهيه گؤره يازديغي اؤنملي دئييل.

ايکينجي بوجاقدان باخماق, شعرييت باخيميندان اؤنملي اولماسا دا توپلومدا قادينين قومونا آيدينليق گتيره بيلر. بوردا اؤزهلليکله پلات شعرينين آرخا پلانينا ديققت يئتيرمهييميز، اونون قادينليق قونومونا و قادينليغيندان دولايي اوزلشديييي بوروشوق ايجتيماعي پروبلئملره ايشيق توتماق مقصدي داشييير. پلات شعرينين باجاسيندان باخاندا فئمئنيزمين جانلانديرديغي آجيناجاقلي دورومو گؤروروک: مطبخ کونجونه سيخناشديريلميش قاديني. آتاسي، اري و عيسا (ع) داخيل اولماقلا, بوتون کيشيلره نيفرت ائدهن پلات، بونلاري گؤسترمهيه چاليشير. اونون گؤزويله باخاندا، بعضن کيشي سئوگيسيندن دونيانين ان گؤزهل شعري باش قالديرسا دا، يئنه ده چاتيشماز نهسه قالير. بونون کونکرئت اؤرنهيي تئد هيوزون "دورو ايشيق" Perfect Light باشليقلي شعريدير. شعر, تئدين پلاتـا وورغونلوغونون محصولو اولسا دا، شعره قولاق وئرمهدن فاجيعهنين ماهييتينه وارا بيلمهيهجهييک:

اورداسان، بوتون سوچسوزلوغونلا

نرگيزلر آراسيندا اوتورموش

بير شکيل تک.

اونا "معصومييت" آدي ياراشير.

دورو ايشيق بنيزيني پارلادير

بير نرگيز کيمي

نرگيزلرين آراسيندا بير نرگيز کيمي

سنين يئر اوزونده سون باهارين ايدي بو.

و قوجاغيندا سنين

اويونجاق آيي کيمي

نئچه هفته معصومييتيندن اؤتمهميش کؤرپه اوغلان.

آنا و اوشاق، قوتلو پورترئت ساياغي

يانيندا اوتورموش، اوٍزونه گولن ايکي ياشيندا قيزين

نرگيز کيمي اييليرسن قولاغينا نهسه پيچيلداماغا

سؤزلرين کامئرادا ايتير

بيلگي،

اوٍزهرينده اوتوردوغون تپهده،

خندقلرله احاطه اولونموش قالاسي ايله

ائويندن داها بؤيوک تپهده دوستاقدير،

شکيله دوٍشهممير

سون آن

سنه دوغرو گئري دؤنن

عسگر کيمي

آستاجا ايتکين اؤلکهلردن گلير

آنلاشيلماز يوک آلتيندا اييلميش

قوووشا بيلمير سنه ابدا

سادهجه دورو ايشيق دا اريييب گئدير.

شعر اولدوقجا گؤزهلدير. اؤزهلليکله شعرين سونلاريندا پلاتين اؤنونده اؤلومون عاجيزلييي يئپيئني بير بيچيمده جانلانديريلير. پلاتين چؤهرهسيني ايشيقلانديرميش "دورو ايشيق"دا سون آنين (يعني اؤلومون) اريييب يوخا چيخماسي ائشيتمهديييميز بير قاورامدير. سيلويانين ياسيندا تئدين اورهيي سيلکهلنمهسهيدي بو ميصراعلار کاغيذين اوزهرينه سيچرايا بيلمزدي. آمما سؤز بوراسيندادير کي، پلاتي بئلهجه گؤيلره قالديرميش هيوز، حيات يولداشينين خستهليک آيلاريندا آسيه وئويل آدلي بير قيزا وورولموشدو. بو وورغونلوقدان خبرسيز اولمايان پلات، 1962ـجي ايلده سيخناشديريلديغي مطبخده اينتيحار ائتميشدي. بونا ديققت يئتيرندهکي، سونرالار آسيه ده کؤرپه قيزي ايله بير يئرده اينتيحار ائتميشدي، منجه باشقا سؤزه ائحتيياج قالمير.

پلاتين اؤز جانينا قييماسي تورکيه پوپ اولدوزو تئومانين "اؤلمک اوچون گؤزهل بير گون" آدلانديرديغي واختدا باش وئرمهدي. توپولومون اونا آييرديغي يئري، اؤرومچک تورو کيمي باشا دوشدوکده، ياديندان چيخدي کي، بئلينده قانادي دا واردير. پلاتين حاققيندا يازيلميش  Benden Önce Tufan  اثرينين ياراديجيسي کيمي من ده اونون بير نئچه ميصراعسينين اؤنونده پاپاغيمي باشيمدان گؤتوروهم:

بوٍسبوتون اولور قادين.

اؤلو گؤودهسي

باجاريغين گولومسهمهسي ايله بزهنميش.

6

تاريخه جنسييت گؤزويله باخارکن بونو آيدين گؤروروک: قادين، کيشيلرين گؤزونده طبيعتين سيمگهسينه چئوريلير. اينسان، طبيعتي جايناغينا آلير، کيشي ايسه قاديني. بونون اوزون کئچميشي وار. قادين، نئجه دئيهرلر، اؤزونون دوغال کيملييي ايله تاريخين يئتيرمهسيدير؛ قادين وارليغينا گؤز يومولموش کيشيلرين تاريخي. چاغداش دونيادا قادين قاچيلماز بير يولدادير. او، ائوين دؤرد ديواريندان ائشيگه چيخسينمي، چيخماسينمي؟ بوندان اؤنجه قيزين آتا ائوينده قول کيمي ياشاماسي، آزادليغا يؤنلميش مئيلي اونون اورهيينده قيزيشديريردي. آمما بو مئيل نه ائولنمکله راضيليغا قوووشوردو، نه ده ائشيکدهکي هر هانسي بير يئرده اَيلنمکله. ائولنمکده گؤردويو محبت، اونو ايکينجي درجهلي وارليق قونوموندان داها يوکسکلره قالديرا بيلميردي.

چاغداش دونيادا قادين چيخيلماز بير يولدادير. او، ائودن چيخيبدير، داها ائودهکي کؤهنه چرچيوهيه قاييدا بيلمير. ائشيکده ايسه اؤزونو راضي سالا بيلمير. قادين، آنجاق کيشي قوللوغوندا دايانميش اينديکي قورولوشلاري داغيتماقلا، بيليم، اينجهصنعت، و دوشونجه آلانلاريندا سسيني اوجالتماقلا، بو چيخيلمازليغي پوزا بيلر.  بو گؤستريش اخلاقي اؤيودلر کيمي آلينير و معجز شبسترلي اونو مندن داها ياخشي سؤيلهيير: «قازانچاني يوز اللي دفعه سويا باسماقدانسا» پئشه اؤيرنمک گرهکدير، «گر اولا بير ايکي باجي بئله صنعتگر؛ خلاص اولار کيشيلردن تمام عورتلر.» بئله آنلاردا سورغو اؤز ايشيني گورور:

سن قلم آلسان اله کيم طبخ ائدهر شورباني قيز

کيم تيکر ييرتيق ياماغي، دولدورار قلياني قيز؟

آمما قادينلار بو گؤستهريشلره ده گولونج اؤنهري کيمي باخا بيلرلر. چونکي بير يؤندن اينديکي قورولوشلاري داغيتماغا بيليم، اينجهصنعت و دوشونجه آلانيندا سسلريني اولجالتماق لازيمدير؛ اوبيري يؤندن ايسه قورولوشلار داغيلمادان قادين بو سسلري اوجالدا بيلمهيهجک. بو باطيل بير تسلسلدور.[6] قادين بو تسلسلون دمير داروازاسي ايله قارشيلاشماماليدير، يوخسا آياغيني توپلومدان قيراغا چکهجک. عرب شاعيري نازک الملائکه دئيير:

گونلر اؤتدو

سئوينجيمدن يوٍکلو گونلر

هاردايام من؟

آرديجيل اولاراق نرديوانا زيللنميشم

اينديکي پيللهلر باشلانيب

سونو هارادير گؤرهن؟

نرديوانين داروازاسي اورهييمده چؤللويه دوغرو

و آنلاشيلماز ظولمتي باشلانير. 

قادينلار مينلر ايلدير، حؤکوم سوٍرمهييبلر. بوندا شوبهه يوخدور. اونلار تاريخدن سيلينمه اوچورومونون قيراغيندا يورويهرک ياشاييرلار. قادين ياشاماليدير، آمما تهلوکه قيلينجينين آلتيندا. بو کيشييه گرهکليدير. کيشي هئچواخت بو تاريخي يئنيلگييه سون قويماياجاق. کيشي نه قدهر کيشيليکدن دم وورسا دا، کيشيلرين ان دئموکراتي، سون مقامدا اؤز اوٍرهک سؤزونو اوتانمازجاسينا دئيهجک. رييس بلامون،  قادينلار حاقدا بئله دانيشير: «آخماق وارليقلار! جايناغيمدايکن اونلارين الآياق چالمالاريني يامان سئويرم. اونلار آسلانين آغزينداکي قوزو کيميديرلر. ـ او آرتيرير ـ بو، بير شهري باسماق [فتح ائتمک] کيمي بير ايشدير. سيز اؤنجه دوشرگهنيزي دؤيوش مئيدانلارينا باخان اوجاليقلاردا قورورسونوز، سونرا هئچ بير ديرهنيشدن اوٍشونمهدن يوٍروشه باشلاييرسينيز.»

ايکينجي جاهان ساواشيندان سونراکي ايللرده آندرئ برئتونون اثرلرينده قادين تام و يوکسک بير اؤنم قازانير. او، اؤز يازيلاريندا اينسانلارا نجات باغيشلايان مسيحدن اؤز دؤندهريب، بشرين ان تهلوکهلي سورونلارينين  [پروبلئملرينين] چؤزومونو سئوگيدن ديلهيير. برئتون دئيير: کيشي دوشونجهسي سيخينتي و عذابدان باشقا هانسي تؤحفهني اويغارليغيميزا ارمغان ائتميشدير. اؤندهرلييي قادينلارا تاپشيرمانين واختي گليب چاتميشدير.

---

[1] چاغيريشيم: تداعي معاني, association of ideas. [آذربايجان جومهورييتينده: assosia]

[2] سايجا: از لحاظ تعداد. ساي: شماره، تعداد.

[3] Beauvair Simone De (1896-1980)

[4] Emily Dickinson  (18830-1886)

[5] Silvia Plath (1932ـ1962)

[6] باطيل تسلسل: دور باطل، vicious circle

بو يازي "شعر وارليغين ائويدير" باشليقلي كيتابين اوچونجو باسيمينين (چاپينين) 8-جي بؤلومودور. بوندان اؤنجه بازينين اؤزهتي دوشرگهميزده گئتميشدير. ايندي ايسه اونون تام متنيني اوخويورسونوز. (وورغولاماق يئرينه دوشردي كي، تئكنيكي چاتيشمازليقدان دولايي  "اَ" معناسيندا گئدن "ه"حرفي بعضن اؤزوندن سونراكي حرفه بيتيميشدير. سايين اوخوجولارين بو چاتيشمازليقدان دولايي چتينلييه دوشهجهيي اوجباتيندان عذر ايستهييريك).