http://oyrenci.com/news.php?id=1729

 

من ده قیرمیزی سیمگه یه دستک وئریره م- احسان تبریزلی

 

چهارشنبه  ۷ مهر ۱٣٨۹ -  ۲۹ سپتامبر ۲۰۱۰

 

گونئی آذربایجانی تمثیل ائده ن بیر سیمگه یارادیلما ضرورتی اوزه رینده کی سون تارتیشمالار هئچ ده یئنی دئییل دیر. ایللردیرکی چوخونلوق طرفینده ن قبول اولونان و گونئی آذربایجانین ایچینده ان آز تهلکه یارادجاق و ان آز اختلافلار سبب اولاجاق بیر سیمگه نین یئری چوخ بوش گورونوردو. بو گونه کیمی سونولان سیمگه لر عمومیت له خالقیمیز طرفینده ن دستک لنمه میشدیر. حتی بللی بیر تشکیلاتین سوندوغو قوندارما بایراغا قارشی اولانلارین اونردیگی قارا آی اولدوزلو بایراق ایسه ملتیمیز طرفینده ن دستک قازانا بیلمه میشدیر. من بیر اویرنجی فعالی اولاراق زامانیندا اونریلن بو قارا آی اولدوزلو بایراغا، بیرلیک نامینه اوز اوره ییمده دستک وئرمیشه م. حتی اویرنجی دوستلاریم طرفینده ن بئله بیر دسته یین رسمی شکیلده اعلان ائدیلمه سی طرفداری اولموشام. آما او سیمگه نین عمومی لشمه پتانسیلینه صاحیب اولمادیغی اوچون و هر هانسی بیر دستک وئرمه نین یئنی اختلافلار توره ده بیله جه یینده ن قورخاراق رسمی دستک وئرمکده ن هم فردی اولاراق و هم اویرنجی قورولوشو اولاراق واز کئچمیشیک.

 من بورادا مقصدیم تئوریک جهتده ن سیمگه نین وارلیق ضرورتی نی بحث ائتمک دئییل دیر. چونکو آرتیق بوتون میللی فعاللار و اویرنجی حرکاتینا منسوب اولان دیرلی یولداشلاریم بونو منده ن داها یاخشی بیلیرلر. هر شئی ده ن اونملی اولان بیزیم هامی میزین بیرلیگینی گوجلندیره جک بیر سیمگه نین یارانیشی دیر. اینانیرام کی یئنی اونریلمیش بو قیرمیزی سیمگه نین میلتیمیز و فعاللاریمیز طرفینده ن دستک قازانماسی دوروموندا، بو قیرمیزی سیمگه ایرانین سیاسی آتمسفرینده یاشیل سیمگه یه قارشی یئنی بیر گوجلو دالغا یاراتما و بیرلیمیزی داها دا گوجلندیرمه قابلیتی واردیر. بعضی لرینه گوره بو سیمگه ده ن داها دا یاخشی سی اونریله بیلردی، وحتی اونون ایچینده بیر گویرچین و یا ... یوادا سالا بیلردی آما بوگون بیزیم مسئله میز بیر سیمگه آلتیندا بیرلشمک و اوزوموزو او سیمگه آلتیندا دونیایا تانیتدیرماقدیر.

 بوتون بونلاری نظره آلاراق من بیر اویرنجی فعالی اولاراق قیرمیزی سیمگه میزه دستک وئریرم و بوتون قدیمی و یئنی اویرنجی یولداشلاریمی رسمی شکیلده بو سیمگه یه دستک وئرمه یه چاغیریرام. بو دستک فارس شونیزمی نین یورتدویو راسیستی سیاستینه قارشی بویوک ضربه اولاجاق، اینانجیندایام.

 

1389  مهر آی نین یئدی سی

 

احسان تبریزلی