ايراندا باسقي آلتينداکي ميلتلردن اولان قادينلارا قارشي دؤولت شيددتي

سئودا زنجانلی

بوگون باشدا شرق توپلومو اولماق اوزره تمام دونيايا حاکيم اولان پاترييارکال (آتا-کيشي مرکزلي، کيشي حاکيمييتلي) سيستمده هر تورلو (ایقتيصادي، ميللي، سوسيال و پوليتيک) حاکمیت و باسقي ايليشکيسي (علاقه سي)، ان چوخ قادينلاري مقدور ائدير. قادينلاري کيشيلرين " ناموسو " کيمي گؤرن، قادینين کيمليغيني اؤزونه گوره يوخ، کيشييله اولان علاقه سينه گوره اولوشتوران بو سيستئمين نتيجه سي اولاراق، بير شخصي تجقير ائتمئنين، باسقي آلتينا آلمانين و آشاغيلامانين ان باشليجا يولو اونون عاييله سينده کي قادينلارا تحقير اولونماسيدير: بو تکجه شخصلر اوچون يوخ، سوسيال توپلولوقلار و دولاييسييلا اولوسلار اوچون ده کئچرليدير: بير اولوسو باسقي آلتينا آلمانين و آشاغيلامانين بير يولو دا او اولوسون قادينلارينا قارشي دئییشیک يوللارلا شيددت اويغولاماقدير. بو سببله دير کي تاريخدن بوگونه ساواشلاردا ايشغالچي دؤولتلرين عسگرلري ايشغال اولونان يورددا تحککوم و ايقتيدارلارينين ايثباتي اولاراق قادينلارا تئجاووز ائديرلر و يئنه بو سببله دير کي موخته ليف اؤلکئلرده ديلي و اولوسال کيمليگي ياساق اولان باسقي-آلتينداکي ميللئتلر، حاکيم-اولوسون قادينلاريندان چوخ داها درين و چوخ-بويوتلو (چوخ ميقياسلي) بير ظولمه معروض قاليرلار. بوگون ايران’دا فارس ائتنيک کيمليگينه (ethnicity) ياني اولوسونا منسوب اولمايان قادينلارين گؤردويو دؤولت شيددتي (زوراکيليغي)، پاترييارکال سيستمدئکي بو ايقتيدار-تحککوم ساواشي نين بير قولودور.

شوبهه سيز ايران’دا يالنيز ميللي وارليغي باسقي آلتيندا اولان تورک، کورد، عرب، بلوچ ... قادينلاري يوخ، بوتون قادينلار دؤولت شيددتينه معروض قاليرلار: بوگون تئهران، ايصفهان، شيراز، قوم کيمي شهرلرده ده دؤولتين پوليسي قادينلاري ايسلامي حيجابا مجبور ائدير، قادين حاقلاريني تاپتالايان موخته ليف قانونلار ائتنيک کيمليگيندن ياني اولوسوندان آسيلي اولماياراق ايران’داکي توم قادينلاري هدف آلير. آنجاق اؤلکه ده ياشانانلارا، پاترييارکال سيستمين سوسيولوژيک تحليلي نين ايشيقيندا باخيلاندا، بورداکي باسقي آلتينداکي ميلتلرين قادينلارينا قارشي دؤولت شيددتي نين، ديگرلرينه اولاندان داها فرقلي و داها آغير بير فورمدا اولدوغونو گؤروروک.


هرشئيدن اول، بو اولوسلارين آناديلين تحصيل، مطبوعات.. ساحه لرده ياساقلانماسي نين اؤزو معنوي بير دؤولت شيددتيدير و ان چوخ دا بو ياساقا معروض قالان ميللئتلرده کي قادينلاري، ياني آنالاري هدف آلير. هر توپلومدا، نسيلدن نسيله ديلي و کولتورو (مدنيتي) داوام ائتديرن شئخص، توپلومون ان کيچيک واحيدي اولان عايله ده کي " آنا " دير، ياني قاديندير. " آنا " ديل ياساقي نين باشليجا نتيجه سي اولاراق آنانين اوشاقييلا علاقه سي چوخ ديللي ليغين سونوجو اولاراق پروبلئم لشير، بيرچوخ دورومدا آناديلده تحصيل ياساقي نين ياراتديغي آسسيميلاسييا (assimilation: اؤزگلشم)، اوشاقلارين " آنا " ديللريني دانيشابيلمئمه لرينه و بو سببله آنا-اوشاق علاقه سينده بير قوپوقلوق ياشانماسينا يول آچير: و آنانين اوشاقييلا " آنا " ديلينده دانييشابيلمه مه سي اولور نتيجه. بو هم " آنا " کيمليگينده، دولاييسييلا " قادين " دا، و هم اولوسال کيمليکده درين يارالار آچير.

آناديل ياساقينا علاوه اولاراق، رسمي مطبوعات و ديگر يوللاردان ائديلن تحقيرلر، دؤولت مسئوللاري و پوليسلر طرفيندن تئجاووز، جينايتلر، اعدام و داشقالاق، باسقي-آلتينداکي ميللئتلرين قادينلارينا قارشي ايقتيدار-تحککوم ساواشيندا قوللانيلان سيلاحلارديرلار. ميثال اولاراق 2010 ايلي نين اييون آييندا تبريز’ده بسيجيلر طرفيندن تجاووزه اوغراييپ قتله يئتيريلن 26 ياشلي ائلناز بابازاده’يئ اويغولانان بو شيددتين، تبريز مرکزلي آذربايجان’ين اؤز قدريني تعيين حققي تاپتالانان بير يورد اولدوغو گرچئغي ديقته آليناندا، سياسي بير آنلام دا تاشيديغي گؤرولور.

آذربايجان قاديني نين معروض قالديغي دؤولت شيددتينه، ايرانين موخته ليف حبسخانالاريندا داشقالاق يولويلا اعدام اولونمايي گؤزله ين قادينلاردان دا ميثال چئکمک اولار. ساييسي ان آزي 19 نفر اولان بو قادينلارين بيرچوخو آذربايجانليدير. بو قادينلاردان بيري اولان تبريزلي 25 ياشلي مريم قربانزاده، توتولدوغوندا حاميله ايدي و قانونلارا گؤره حاميله بير قادين اعدام اولوناماياجاغي اوچون، وکيلي نين آوروپا مطبوعاتينا ورديغي بياناتلارا گؤره آبورتا مجبور ائديلدي. يئنه آوروپا و دونيا مطبوعاتينا سئسيني چاتديران و بير مدت اول آزاد بيراخيلديغي حاقدا يالان خبر ياييلان آنجاق هئله ده اعدامي گؤزله ين سکينه آشتيياني ده بير آذربايجانلي قاديندير و وکيلي نين بئياناتلارينا گوره فارس ديلينده دانيشابيلمئديغي اوچون محکمه ده اؤزونو ساوونماقدا چتينليق چئکميشدير.

ميللي کيمليک حاقلاري يادا قادين حاقلاري ساحه سينده فعال اولان آذربايجانلي قادينلارين حبس اولوناراق جيسمي و معنوي باسقيلارا معروض قالماسي دا دؤولت شيددتي نين بير نؤوعودور. سون اولاراق 6 آي حبسه محکوم اولان آرمان اؤيرنجي تشکيلاتي عوضوو و آذربايجان قاديني آدلي اؤيرنجي درگی سی نين ائديتورو فاطمه نصيرپور کيمي.

البته بيرچوخ فرقلي ميلتين ياشاديغي ايران’دا باسقي آلتيندا توتولان، ديلي و کيمليغي ياساقلانان و اؤز قدريني تعيين حاقي تاپتالانان تک خلق آذربايجانليلار دئبيلدير: تورکلرين يانيندا کورد، عرب، بلوج و ديگر اولوسلاردان قادينلار دا بو شيددته معروض قاليرلار. بوگون بير کورد قاديني اولان (ياني هم ميللي کيمليغي، هم سني مذهبي و هم جينسييتي سببييله آيري-سئچکيليغه معروض قالميش اولان) زئينب جلالييان ايللردير کي " موحاربه " ايتتيهامييلا اعدامي گؤزلئيير. توتولدوغو حئبسخانادا جيدي ساغليک پروبلئملري ياشايان زئينب هر ايکي گؤزوندن طيببي عمليياتا احتيياج دويور، آنجاق خبرلره گؤره حبسخانا مئسوللاري اونا " سن اعدام اولاجاغين اوچون گؤزلرينه احتيياجين يوخدور’ " سؤزويله تداويسينه ايجازه ورمير و بئله ليکله تامام اخلاقي-ويجداني قوراللاري چيينئييرلر.

دؤولت شيددتي باشليغي آلتيندا بو نؤع باسقيلارا تکچه ايران’دان يادا آذربايجانلي تورکلردن يوخ، دونياداکي بيرچوخ آيري اؤلکئدن و بيرچوخ آيري خلقدن ميثاللار تاپماق اولار: روسيادا چئچنلر و شيمالي کافکاسيالي موسلمان خلقلر، ايسپانيادا باسک (basque) ميلتي، بؤيوک بريتانيا’دا شيمالي ايرلاندالي قادينلار و سياسي موباريزه لري، تورکيه ده کورد خلقي، چينده اويغور تورکلري و اويغور قاديني ربيعه غدير، افغانيستان و پاکيستانداکي بلوچلار....اؤلکه لر، خلقلر و قانونلار فرقلئنسئده حاکيم سيستئمين پاترييارکال (کيشي حاکيمييتلي) و مرکزي دؤولتچي " تک ديل-تک ميلت-تک دؤولت " شوارلي monist (تئکچي) فلسفه سي عئينيدير:دولاييسي ايله باسقي آلتينداکي ميللئتلردن اولان قادينلارين گؤردوغو ظولم ده بو سيستئمين بير سونوجو اولاراق مشترکدير.