http://t0.gstatic.com/images?q=tbn:O_B8nyg5zTOjZM:                        http://t0.gstatic.com/images?q=tbn:IshUdcnkXtrggM:

http://www.rashedi-hasan.blogfa.com/post-80.aspx

ايراني سئونلر  "پان توركيسم "دن

يوخسا  " پان فارسيسم " دن قورخماليديرلار ؟!

حسن راشدي  20/ آذر/ 1389 

سون ايللرده ايراندا ، اؤز ديل ، مدنيت ، هويت و وارليقلاري يولوندا چاليشان توركلره فارس شوونيستلري ، پان آريائيست و پان فارسيست لر طرفيندن  هر آد و مارك دان چوخ ، " پان توركيست " آدي وئريلير !

هله " پان توركيسم "ين حتي آنلام و معناسيني بيلمه دن بو سؤزجوك دن استفاده ائدن بعضي لري ايله ايشيميز يوخ ؛ سؤزوموز ، بو  سؤزون آنلاميني بيلنلر و بو تركيب دن استفاده ائديب ايراني يالنيز فارسلارين مالي و اؤلكه سي سايانلار و فارسلاردان باشقا هئچ بير فارس اولمايان ميلّت و قوميت لره ان ايلكين حاق قائل اولمايانلارلادير !

 گونئي آذربايجانلي تورك يازار ، شاعير و مدني چاليشقانلاريني " پان تورك " آدلانديران اؤزونو بگنميش ، اؤزلريندن باشقا هئچ بير ميلّت و قوميت لره حاق قائل اولمايان شوونيست لردن سوروشماق ايسترديم ، ايران چرچيوه سينده ياشايان و ان آزي اسلام حاكميتيندن سونرا آرديجيل اولاراق 1000 ايل و رضا خان ديكتاتورلوغونا قدر بو اؤلكه ني اداره ائده رك هر هانسي چاتيشمازليقلاري اولورسا اولسون آنجاق حاكميتلري آلتيندا اولان و تورك اولمايان هئچ بير ميلّت و قوميتلرين ديل و مدنيتلري ضدينه اولمايان و بوگون ايران آدلي اؤلكه ده 30 ميليوندان چوخ نفوسا ماليك اولاراق ،ان ابتدايي مدني حاقدان محروم قالان توركلرين لاپ ساده و ايلكين مدني – فرهنگي ايستك لريني " پان توركيسم " آدلانديرماق اولارمي ؟ !

 هئچ بير غير قانوني وسيله و گوج دن استفاده ائتمه دن  قانون چرچيوه سينده ، ديل و قلمي ايله اؤز ميلّي وارليغي ، ديلي ، مدنيتي ، تاريخي و انساني حاقلاريندان مدافعه ائدن انسانلاري نئجه " پان توركيست " آدلانديرماق اولار ؟!

فوتبال مئيدانلاريندا 70 – 80 مين انسانين  آغزيندان چيخان  " تورك ديلينده مدرسه        اولمالي دير هر كسه  ، " منيم ديليم اؤلن دئييل       باشقا ديله دؤنن دئييل " شعارلاريني "پان توركيسم " شعاري آدلانديرماق ، راسيسم  و شوونيسم تفكورونده بوغولماق دئييلمي ؟!

دئمه لي ،اؤزو هئچ بير مدني حاقّا چاتمايان تورك ، نئجه باشقالاريني مدني حاقّا چاتمادان محروم ائديب اونلارين بوتون مادي – معنوي دگرلرينه لاقيد قاليب اونلاري اؤز استعماري آلتينا آلا بيلر ؟!

اگر ايراندا30 ميليون تورك انساني نين گوجو  پان توركيسم ايدآللاريني يايماق قدري اولسايدي هر شئي دن اؤنجه اؤز مكتب – مدرسه سينده آنا ديلينده درس اوخوياردي ، دوزگون تاريخيني يازيب اوشاقلارينا اؤيره دردي ، راديو – تلويزيونوندا، " فاذري " ديلده يوخ ، دوزگون ادبي ديلينده جوربه جور كاناللاردان وئرليش حاضيرلاييب  ياياردي ، دولت بودجه سي ايله چاپ اولان مطبوعاتدا  دوغما ديلينده يازيلار و مطلبلر يازاردي و سينمادا اؤز ديلينده فيليم لر حاضيرلاردي و بو حاقلارا چاتديقدان علاوه  اؤز حاقّينا قانع اولماييب تورك اولمايان باشقا ديل و مدنيتلره او جومله دن فارسلارا هئچ بير حاق وئرمه دن اونلاري اؤز ايچينده هضم ائتمك اوچون مختليف پلانلاري اجرايا آپارماق ايسته سيدي ،اوندا اونلاري "پان توركيست " آدلانديرماق اولاردي !

حتي دونيانين بيرچوخ اؤلكه لرينده "پان " تفكّورونه اينان آشيري  تشكيلات و قوروملار ، ياراتديفلاري قوروملارين آدلاريندا " پان " سؤزجوگوندن استفاده ائتمزلر  ، لاكين ياشاديغيميز ايران آدلي اؤلكه ده پان فارسيست لر  چوخ افتخارلا ، اؤز پان فارسيستي و شوونيستي تفكّورلريني ، اوتانمادان و افتخارلا  " پان ايرانيسم "  پارتياسي آدي التيندا  "پان فارسيسم " ايده آللاريني  هئچ بير مانعه يه راست گلمه دن سربستجه سينه ايره لي سورمكده ديرلر !

بونلار و بو تفكّورو داشايان باشقا "پان فارسيست لر "  ايراندا ياشايان 30 ميليون توركلره هئچ بير مدني- فرهنگي حاق قائل اولماياراق اونلاري " آذري " يعني فارس كؤكلو ولي تورك ديللي  آدلانديرماقلا  اونلارا ان ايلكين و ابتدايي انساني حاق ساييلان  " آنا ديلده تحصيل " حاقّي بئله قائل دئييل لر !

گؤره سن بئله فيكيرلري داشيانلار اونوتموشلار كي ، ايراني سئومك آدي ايله چئشيتلي ايران ميلّتلرينه يابانجي و اؤزگه گؤزو ايله باخيب و بو اؤلكه ده فارسلاري ارباب و باشقا ميلّت لري  رعيت كيمي سايماقلا باصطلاح سئوديكلري ايرانا خيانت ائتميرلرمي ؟!

واختيله دوكتور عطااله مهاجراني 1379 – جو ايلينده ، "ميلّت لر آراسي مدنيتلر دانيشيغي باشقاني " اولاراق اوستراليا نين " مدنيت و قوميتلر وزيري " ايله گوروشونده  اوستراليادا مهاجرت حاليندا و چوخ آز سايدا  ياشايان فارسلارين ديل و مدنيت قايغي سينا قالاراق  " اوستراليادا مهاجرت حاليندا ياشايان ايرانليلارين ديل و مدنيت لريني قورويوب گوجلنديرمك اوچون تام امكداشليغا حاضيريق " جومله سيني افاده ائده رك  ،" ميلّتلري بير مدنيته تابع ائتمك اولماز " جومله سيني ده قوللانميشدير . ( "ايران " گونده ليگي ، 21/دي /1379 سايي 1715 ) گؤره سن آقاي مهاجراني و مهاجراني كيمي فيكيرلشنلر اونوتموشدورلار كي ، همين زاماندا  ايران چرچيوه سينده ياشايان اون ميليونلارلا  يئرلي تورك انساني نين اؤز اؤلكه سينده ابتدايي مكتب ده بئله اؤز ديلينده درس اوخوماغا حاقّي اولماميش و اونلارين هويت و شخصيتلري هر گون  رسمي و غير رسمي يوللارلا تحقير اولموشدور؟!

آيا اؤز اؤلكه سينده ياشايان ميليونلارلا تورك انساني نين ، اوستراليادا ياشايان نئچه يوز و يا نئچه مين و نهايتا نئچه يوز مين فارس انساني قدر حقّ و حقوقو يوخدورمو ؟!

بونلار كئچميش دؤلتلرين يوروتديكلري آيري – سئچگيليك سياست ديرسه ، بوگونده شوونيست لر ، پان فارسلار ، پان آريائيست لر ، شاه پرست لر  و حتي دئموكراسي ادعاسي آدي آلتيندا چاليشان بير چوخلاري ، بوتون انساني معيارلارا ضد اولان آسيميلاسيون و ضد تورك سياستي آرخاسيندا اولاراق توركلرين ديل ،مدنيت ، تاريخ ، هويت و وارليقلاري عليهينه گئجه – گوندوز و بوتون قوه لري و چئشيتلي يوللارلا چاليشير ، اونلاري تحقير ائدير و فارس ايچينده اريديب قاتيشديرماغا جان آتيرلار !

گوره سن فارس شوونيست لري نه اوچون آذربايجانليلارا توهين ائدنده اونلاري " تورك " لاكين اونلارا ترحم ائديب باصطلاح اورك يانديراندا ، يازديقلاري كيتاب و مقاله لرينده اونلاري " آذري " خطاب ائديرلر ؟!

اگر اونلار رسمي يازيلاريندا ادعا ائتديكلري كيمي آذربايجان اهالي سي نين باصطلاح  " آذري "  و فارس كؤكوندن اولدوقلارينا ايناملاري وارسا نه اوچون اونلارا قارشي اؤز نيفرت لريني " تورك " آدي ايله گوستريرلر ؟!

اگر اونلار اينانيرلارسالار آذربايجانليلارين باصطلاح آذري ديللريني ، تورك سلطانلاري اوزلليكله "سلجوقلار " زور- گوج ايله دگيشيب تورك ائتميشلر ، بس بو تورك سلطانلاري نييه باشقا فارسلارين ، ديللريني دگيشيب تورك ائتمه ميشلر ، مگر تورك سلطانلاري فقط آذربايجانا حؤكم سوروردولر  و  فارس منطقه لري اونلارين حاكميّتيندن خارج ايديلر ؟!

چوخ ماراقلي دير كي ، سلجوقلار و اونلارين باشيندا گئدن و ايلك سلطاني طغرل بگ 429 – هجري قمري ايلي ايراني فتح ائدن زامان نيشابور شهريني  پايتخت سئچيب 434  – جو هجري قمري ايلينده " ري " شهريني  (شهر ري ) اؤزونه ايكينجي پايتخت سئچدي ، باشقا سلجوق سلطانلاري ايسه اوست – اوسته 160 ايل اورتا آسيا ، ايران و كيچيك آسيايا (بوگونكو توركيه يه) حؤكم سوردوكلري امپراتورلوقلار زاماني  آذربايجانين مشهور شهرلري اولان اردبيل ، تبريز ، ماراغا ، اوروميه و زنگان  شهرلريني  اؤزلرينه پايتخت سئچمه ديلر  ، بلكه داها چوخ فارس شهرلريني ، يعني نيشابور ، ري  و اصفهان شهرلريني پايتخت  سئچديلر و بو آرادا يالنيز  آذربايجانين ان گؤنئي نوقطه سي  و فارسلارلا قونشو اولان همدان شهري بير مدت بو سلسله نين باش شهري كيمي سئچيلميشدير ؛ پان فارسيستلرين دليل لرينه دايانارساق ، نيشابور ، ري  و اصفهان شهرلري نين ساكينلري و داها دوغروسو  بو گونكو فارس ديللي منطقه ده ياشايان انسانلار ايلك توركلشميش انسانلار اولماليديريلار ، لاكين بئله اولماميشدير !

ايكينجيسي ، هله ايراندا ياشايان يئرلي توركلري يوخ حسابينا قويساق بئله ، اگر سلجوقلار و باشقا تورك پادشاهلاري مين ايل ايراندا حؤكم سورموش و تاريخي  سندلره داياناراق توركلر چوخ سايدا و فاتح حؤكومتلر چرچيوه سينده اورتا آسيادان گليب ايرانين و آذربايجانين مختليف بؤلگه لرينده يئرله شيب ياشاماغا باشلاييبلارسا ، اگر بو گون ايراندا ياشايانلار  فارسلار و يا باصطلاح توركلشميش آذري لر اولموش اولسالار ، بس بو چوخ سايدا  ( باخ : "آذري يا زبان باستان آذربايجان "  كسروي نين يازديغي كيتابينا ) آسيادان مهاجرت ائديب آذربايجانا و ايرانا گلن توركلر ايندي هارادا ياشاييرلار و اونلارين نسيل لريندن قالانلار كيملردير ؟ !

بس بو قوندارما " آذري " تئوريسي نين آرخاسيندا هئچ بير منطقي دليل و سند اولمادان يالنيز شوونيست لر طرفيندن يورودولن نژادپرستانه سياست ايله بيرليكده ، سياست عالمينده مشهور اولان  " چوماق و يئركؤكو " سياسيتي وار  ؛ يعني ايران آدلي اؤلكه ده اؤزونو و سويونو تورك بيلن و يا فارس كؤكوندن بيلمه ينلر تحقير اولوب غير مدني و وحشي گؤستريله جكلر ؛ و اؤزونو فارس دان و فارس كؤكوندن بيلنلر تميز و پاك نژاد (حتما باشقا نژادلاري غير پاك ساناراق ) مدني ، هوشلو ، باشاريلي ، بوتون علملره و هونرلره ماليك و دونيانين ان اوستون سويه لي انسانلاريندان ساييلاجاقلار !

بئله معيارلاري گؤز اونونه آلاراق گؤره سن "  ايراني سئونلر  "پان توركيسم " دن

                                   يوخسا  " پان فارسيسم " دن قورخماليديرلار ؟!

  8 نظر