دومينانت حالا گلمهكده اولان سيياسي اخلاقسيزليق، لومپهنيسم و ذكا قيتليليغي

مئهران باهارلي

هر گون ينئي بير شخصييهت و دوشونور، شخصييهت تئرورو و تخريبي اينتيقادا معروض قالير، اؤزهل ياشامينا تجاووز ائديلير، آلچالديليب تحقيرلهرله كيچيك دوشورولور، سسي سوسدورولوب دوشونجهسي ايله اؤزو حذف ائديلمهك ايستهنير. اولاي بسيطدير: فرقلي دوشونورسهنيز، هله بو فرقلي دوشونجهنيزي ديله گتيرمه و يايما جسارهتينده بولونورسانيز، يوخ ائديلهجهكسينيز. هم معنهوي و كيشيليك و سايقينليق اولاراق، هم ده مومكون ايسه فيزيكي اولاراق.

بو، آچيقجا گونئي آزهربايجان و تورك توپلومونون درين، چوخ يؤنلو و سورهگهن مدهني گئري قالميشليغينين، ائييتيلمهمهنين و ايستيبداد كولتورونون سونوجودور.

آرتيق گرچهكلهري قبول ائتمهنين زاماني گلميشدير. تورك و گونئي آزهربايجان`ين سيياسي موحيطينده بئله مدهني اولمايان و آنتي دئموكراتيك داورانيشلارين اوز وئرمهسي، ايستيثنائي و بيرئيسهل بويوتلارلا سينيرلي اولان، مارژينال بير اولقو دئييلدير. يايقين و ميللي حرهكهت آدلانان آخيمدا دومينات حتتا اؤن سيرالارينا حاكيم اولمايا باشلايان و باشاريلي و ائتگين بير بيچيمده تئرور هاواسي اسديرهبيلهن بير سيياسي طرز و آنلاييشدير.

بو خستهليكلي آنلاييش و طرزي اورتايا چيخاران و منيمسهيهنلهري اوچ قوروبا آييرماق اولاسيدير:

١-سيياسي اخلاقدان يوخسون اولانلار و شخصي ائحتيراصلاري ديشيندا هئچ بير ايلكهيه باغلي اولمايانلار
٢-اوخوموش و يا اوخوماميش لومپهنلهر
٣-ذكا سورونلو اولانلارلا عقلي دنگهلهري يئرينده اولمايانلار

بو اوچ قوروبو و آلچاق و ايلكهل داورانيشلارا ال آتانلاري اوزولهرهك بوتون كسيملهرده ساغدان سولا، فئدئراليستيندهن ايستيقلالچيسينا، ياشليسيندان گنجينه، اوخوموشوندان اوخوماميشينا، قادينيندان اركهيينه، ايچهريده و ديشاريدا، .... هر كسيم آراسيندا گؤرمهك مومكوندور.

سون دؤنهمده اورتايا چيخان تورك خالقي و گونئي آزهربايجان`ين اؤز اينساني و ميللي حاقلاري يولوندا باشلاتديغي يورويوش، ايلك باشدان كيمليك قارقاشاسي و حتتا يانليش كيمليكلهر اوزهرينه قورولموش بير حرهكهت اولاراق دوغموشدور. بو دوروم، اونون ياشاتيلماسي و ساغليقلي حالا گتيريلمهسي قاباغيندا جيددي انگهل.لهر تؤرهتمهكدهدير.

آنجاق يوخاريدا توخونان سيياسي اخلاقسيزليق، لومپهنيسم و ذكا قيتليلارين ناقيص دوغان بو حرهكهته حاكيم اولماسي، اونون كسينليكله اؤلمهسي و يوخ اولماسينا ندهن اولاجاقدير.

Dominant hala gǝlmǝkdı olan siyasi ǝxlaqsızlıq lompǝnism vǝ zǝka qıtlılığı

Mehran Baharlı

Hǝr gün yeni bir düşünür vǝ şǝxsiyǝt, şǝxsiyǝt teroru vǝ tǝxribi intiqada mǝ'ruz qalır, özǝl yaşamına tǝcavuz edilir alçaldılıb tǝhqirlǝrǝ kiçik düşürülür. Sǝsi susturulub, düşüncǝ ilǝ özü hǝzf edilmǝk istǝnir. Olay bǝsitdir. Fǝrqli düşünürsǝniz, hǝlǝ bu fǝrqli düşüncǝnizi dilǝ gǝtirmǝ vǝ yayma cǝsarǝtindǝ bulunursanız, yox edilǝcǝksiniz. Hǝm mǝnǝvi vǝ kişilik vǝ sayqınlıq olaraq, hǝm dǝ mümkün isǝ fiziki olaraq.

Bu, açıqca güney azǝrbaycan vǝ türk toplumunun dǝrin, çox yönlü vǝ sürǝgǝn mǝdǝni geri qalmışlığının, eyitilmǝmǝnin vǝ istibdad kültürünün sonucudur.

Artıq gǝrçǝklǝri qǝbul etmǝnin zamanı gǝlmişdir. Türk vǝ Güney Azǝrbaycanın siyasi muhitindǝ belǝ mǝdǝni olmayan vǝ anti demokratik davranışların üz vermǝsi, istisnayi vǝ bireysǝl boyutlarla sınırlı olan, marjinal bir olqu deyildir. Yayqın vǝ milli hǝrǝkǝt adlanan axımda dominant hǝtta ön sıralarına hakim olmaya başlayan vǝ başarılı ve etgin bir biçimdǝ teror havası ǝsdirǝbilǝn bir siyasi tǝrz vǝ anlayışdır.

Bu xǝstǝlikli anlayış vǝ tǝrzi ortaya çıxardan vǝ mǝnimsiyǝnlǝri üç quruba ayırmaq olasıdır:

1-Siyasi ǝxlaqdan yoxsun olanlar vǝ şǝxsi ehtirasları dışında heç bir ilkǝyǝ bağlı olmayanlar
2-Oxumuş ya da oxumamış lompǝnlǝr
3-Zǝka sorunluu olanlarla ǝqli dǝngǝlǝri yerindǝ olmayanlar

Bu üç qurubu vǝ alçaq vǝ ilkǝl davranışlara ǝl atanları üzülǝrǝk bütün kǝsimlǝrdǝ sağdan sola, federalistindǝn istiqlalçısına, yaşlısından gǝncinǝ, oxumuıundan oxumamışına, qadınından ǝrkǝyinǝ, içǝrdidǝ vǝ dışarıda ..... hǝr kǝsim arasında görmǝk mümkündür.

Son dönǝmdǝ ortaya çıxan türk xalqı vǝ güney azǝrbaycanın, öz insani vǝ milli haqları yolunda başlatdığı yürüyüş, ilk başdan ciddi kimlik qarqaşası vǝ hǝtta yanlış kimliklǝr üzǝrinǝ qurulmuş bir hǝrǝkǝt olaraq doğmuşdur. Bu durum, onun yaşatılması vǝ sağlıqlı hala gǝtirilmǝsi qabağında ciddi ǝngǝllǝr törǝtmǝkdǝdir.

Ancaq yuxarıda toxunuan siyasi ǝxlaqsızlıq, lompenism ve zǝka qıtlıların naqis doğan bu hǝrkǝtǝ hakim olması, onun kǝsinliklǝ ölmǝsi vǝ yox olmasına nǝdǝn olacaqdır.