اسماعیل جمیلی دن آنا دیلی حاققیندا ایکی شعر
آنا دیلیم
ناخیش ناخیش اینجه ایپک بئشیگینده
کئچمیشیمی قوناقلایان
دویغولارین دنیزینده
اینجی ده یرلر کروانین آغیرلایان
دنیالاری دنیاسیندا سیغیشدیران
آنا دیلیم
دونه دونه وقتسیز سولان چیچکلری
تاریخ بویو نیسگیل اولان دیلکلری
یاشام اوچون هپ چرپینان اوره کلری
گوی قورشاغی قانادیندا اوچوشدوران
تورپاق یاشدا سایالارین گؤزگوسونده
مین ایللرین ایزلرینی
گونوموزله باریشدیران
آنا دیلیم
اؤز ائوینده چاغریلمامیش قوناق اولان
اؤز ائلینین دوداغیندا
اؤز یوردوندا یاساق اولان
شیرین دیللی وفاسیزلار دوزاغیندا
قولو باغلی دوستاق اولان
دیلیم دیلیم پارچالانان
سپه له نن
قارانلیغی دئشیب یاران
اولدوز اولان
درین ظلمت گئجه لری
وورغونلارین حسرت دولو گؤزلرینده
آیدینلیغا اومودلانان
آنالارین سئوگی یایان نفسیله
لایلا لاردا یلماز اولان
بئشیکلرده گوللو چیچکلی یاز اولان
گاه ساز اولان گاه سؤز اولان
آنا دیلیم
دار گؤز یابان قوللوقچولار
کین کدورت مزاریندا
کیملیکلرین سومسوننده
قوجا شرقه حوکوم سورن
آدیم سانیم تاپداناندا
اوتانمازلار یوخلوغومو کوی سالاندا
وارلیغیمین کئشیگینده اویاق اولان
اؤز ائلینه داغلار کیمی دایاق اولان
اویانیشا چراغ اولان
دایانیشا بایراق اولان
آنا دیلیم آنادیلیم
اسماعیل جمیلی
" من " دیلیم ام
من دیلیم ام
دیلیم من دیر
دیلیم منی دیله نن دیر
دیلیم منله چیچکله نن یازلاناندیر
دیلیم منله کؤکله نن دیر سازلاناندیر
دیلیم وارسا بو من واردیر
دیلیم یوخسا من اؤلن دیر
من دیلیم ام دیلیم من دیر
من دیلیم له دیلیم منله یوکسه لن دیر
ییخیلمایان ساراییم دیر
کسلمه ین هاراییم دیر
اینجی دولو دنیزیم دیر
آنا پایی عزیزیم دیر
اؤزومدور سؤزومدور ایزیم دیر
وارلیغیمین آینا سیدیر
اؤزلویومون دونیاسیدیر
دیلیم آلینماز قالا دیر
دیلیم ییخیلماز بینا دیر
دیلیم بؤلونمز وطن دیر
دیلیم یوخسا من اؤلن دیر
من دیلیم ام دیلیم من دیر
اسماعیل جمیلی