شماره 14 آبان 1384
	قادينلارين موسيقی صنعتی ايله ايلگيسی فريده اصغرنيا

قادينلارين موسيقي صنعتينه اوغراماقلاري، دويغولاريني جيلانديرماقلا ياناشي، روحسال دوروملاريني، فلسفي و معنوي دوشونجهلرينيده آيدينلاشديرير. بو ائتگيني ايستر عاييله ايچينده، ايسترسه توپلومدا اولوملو اولاراق آيدينجا گؤرمك اولار.

كئچميشده اولان كولتورل وارليقلاريميزي واراقلاساق اگر، قادينلارين رولونو موسيقي صنعتينده و نه قدر اؤنم داشيديغيني آيدينجا گؤره بيلهريك.

موسيقي صنعتي باشقا صنعتلرله ياناشي، اينسانلارين گوندهليك ياشاييشي ايله باغلي، عؤمور سوروبدور. بوتون ائللرده، اوبالاردا، قادينلارين، ال ايشلرينده، توخودوغو قاليلارين ناخيشلارينـدا و تيكيـشلرينده، لايلالاريندا، اوخشامالارينـدا، توي و تؤرهلرينـده، سئوينـج و كدرلرينده، آذربايجانين ميثيلسيز طبيعتينده، تاريخه اوزانان قادينلارين سسيني و ملودييالاريني دينلهمك اولور.

اؤزليــكله آشيق سـاز و سؤز صنعـتينده، قادينلارين ايزلرين، فولكلور موسيقي صنعـتينه باغيشلاديغي اينجيلريني آيدينجا گؤرمك اولار. موسيقي وارليغيميز
كئچميشدن بري، بير بؤلومو، آتالاريميزين چيگنينده اولسا دا، بؤيوك بؤلومو آنالاريميزين ياراتديغي، خالق ماهنيلاري، منيمسهييب ياشاتديغي موغاملاريندا و آشيق هاوالاريندادير.

گرچكدن قادين صنعتينده اولان بو وارليغي آرخايا آتماق اولارمي؟

كئچميشه داياناراق، قادين موسيقيسينين بؤيوك بؤلومو امك نغمهلريدير، اؤز يوردونون بوتون ايناملاري، عادت ـ عنعنهلريدير.

اوزونتويله دئمهلييم كي، زامان كئچديكجه حاكيميتلرين ياراتديغي كيمليكسيز مدنيتين چرچيوهسينده، خالقلارين وارلي كولتورو منيمسهلنيلمهييب، و اينامسال دوشونجهلردن آسيلي اولاراق، بوتون بو عادت ـ عنعنهلر، گوندهليك كئچيم حياتيندا، يئـرلي موسيـقي اؤز كيمليگين، گرچك آنلامدا ايتيريبدير وگونوـ گوندن عوموم خالق آراسيندا بو صنعتده چاليشان قادينلارين رولو آزاليب و بو صنعتدن اوزاقلاشماسينا سبب اولوبدور، بو اوزدن ده كولتورل باخيمدان كئچميش نسلي ايله اينديكي نسلين آراسيندا اولان قيريقليقلارين بير نهدنيده بو دور.

كئچميشه داياناراق موسيقي كولتوروموز نه قدر گوجلو اولسا دا، تاريخ بويو بو تاي آذربايجاندا موسيقي صنعتيميزه، ديليميزله ياناشي حاقسـيزليق اولوب و بو حاقسـيزليغين بؤيوك آغريسي قادينلارين اوزرينه دوشوب.

57ـ جي ايل دئوريميندن سونرا، خالق كئچميـش دؤورون دار چرچيوهلري و دوستاقلاريندان، سربست اولموش كيمي، ايتميش وارليقلاريني الده ائتمگه چاليشيردي. اوزونتويله دئمهلييم كي كي يئني چرچيوهلر باشقا شكيلده كولتورل ساحهده يئر آلماغا باشلادي.

بوتون قاداغالارا و چتينليكلره راغماً، خالق بوتون ساحهلرده، اؤزلليكله موسيقي صنعتينده اولان وارليغلاريني گرچك آنلامدا الده ائتمگه چاليشيب. اؤزل موسيقي ائولرين، يارانماسيلا موسيقي صنعتي اولدوغو كيمي اؤزونو گؤسترمگه باشلاييب و اونون ائتگيسين قادين و قيز اوشاقلاريندا داها آرتيق گؤرمك اولور. اؤزليـكله دينسل عاييـلهلر ايچينده موسيقييه صنعـت باخيمييلا، باخماقلاري موسيقي كولتورموزده، بؤيوك بير آدديم ساييلير.

گونو ـ گوندن قادين و قيز اؤيرنجيلرين سايي آرتديقجا، موسيقي صنعتينده قادينلارين رولو اومود وئريجي اولوبدور.

اؤتن 15ـ 10 ايلدن بري چئشيدلي اوركسترلرده قادين چالغيچيلاريني گؤرمك وكور قروپلارين يارانماسي و قيزلاريميزين موسيقي جشنوارهلرينده ايشتيراك ائتمهلري ، میرزام قادينلاريميزين ائتگيسيني موسيقي صنعتينده گؤسترير. باخماياراق كي، بو ايللرين میرعاباؤتهسينده بير يا ايكيدن آرتيق صحنهده اولماييبلار.

آذربايجان قادينلاري نه قدر باجاريقلي اولسالار دا، ايرانين باشقا بؤلگهلريندن داها آرتيق زوراكيليقلارا معروض قاليبلار.

هر زامانكي كيمي آذربايجانين سياسي و توپلومسال دورومو فرقلهنديريلديگينه گؤره، اقارا بولودلار اوستوندن اكسيلمهييب، اوزونتويله بو قارالتينين آغريلاري بير چوخ قادينلارين اوزرينه دوشوب، گؤزلهنيلمهين قاداغالارلا اوز ـ اوزه دوروب و آذربايجانليلارا عاييد اولان ياسالارلا، قادين صنعتچيلرين صحنهده چاليشمالاري
بو گونهدك ياساقلانيب. قادينلارين، قادينلارادا كونسرت وئرمه حاقي اولماييب.

باخماياراق كي بو گونه دك تكجه تبريز شهرينده چئشيدلي قادين اوركسترلري يارانيب ونئچه ايلدير كي بو قادينلار موسيقي ساحهسينده كؤنوللو چابا گؤستريرلر.

هر شئيدن اؤنملي، اونوتمامالييق كي هانسي دؤورده ياشاييريق!

دونيا كولتورلرينين اوز ـ اوزه گلديگينده، بئلهنچي بير دورومدا بؤيوك سورولار اورتايا چيخير. قادين حاقلاريني موسيقي مدنيتيندن اوزاقلاشديرماقلا كولتورل باخيمدان اتنتنتا.توپلوموموز هانسي دوروملارا معروض قالير؟

بو آيريمتيلارلا دونيا كولتورل اوزلشمهسينده نئيلهمك اولار؟

تاريخه سؤيكهنرك قادينلارين هر بير صنعت ساحهسينده اؤزل يئري وار، بو صنعتده چاليشان قادينلاري آييرماقلا گرچكدن قادين حاقلاريني نئجه ساوونماق اولار؟

شوبههسيز كي نه قدر بو سورولار چؤزولمهييب، بير چوخ چاتيشمازليقلار و اكسيكليكلر موسيقي مدنيتيميزده گؤرونهجكدير، نييه كي توپلومون ياريسيني قادينلار تشكيل ائدير، بو ياريني، قيزلار و يا خود گلهجك آنالاريميزي قيراغا آتماقلا، كولتورل باخيمدان گلهجك گنجلريميزه كيم يانيت وئرهجك؟ بو بورجو كيم اؤدهيهجكدير؟.

اؤزليكله موسيقيميز بئله بير آغير دورومدا ياشايير، ايستر علمي باخيمدان (موسيقي امنممنمتاكادمياسي اولمادان)، ايسترسه يارانان چرچيوهلردن و تاريخي سهولردن.

آذربايجان موسيقيچيلرين اؤتن ايللرده آز اولدوغو ايمكانلاردان يارارلانيب و چاليشمالارينا راغماً، بونو گؤزه آلمالييق كي تاريخ بويو خالقيميز اؤز موسيقي مدنيتيندن اوزاقلانديريلديغينا گؤره، اينديكي دورومدا الده ائتديگي موسيقي وارليغي بير چوخ نهدنلرله توپلومون ايستهگينه يانيت وئرمهيهجكدير. بو دورومدا چوخ دوغالدير كي، خالقين تانيتمي دا آز اولوب، سئچيم باجاريليغي دا اونلاردان آلينير، دوغروجاسينا نه دينلهديگينيده دوزگون بيلمهييب، اؤزگهلنميش و سويهسيز موسيقيلر، دوشؤنجهلريني هدهلهيير.

اؤلكهميزين موسيقي وارليغي كيمليكسيز دوروما دؤشوب، نه تك موسيقي مدنيتيميز، بلكه شيفاهي ادبياتيميزدا دا بؤيوك بير باتقي يارادير.

موسيقيده چاليشان قادين صنعتچيلريميزين رولونو، اؤنجه بير آنا اولاراق، اوشاقلارنين دوشونجهلريني اولوملو يؤنده يئتيرمهسينه و كولتورل باخيمدان توپلومدا اؤز ائتگيسيني و نه قدر اؤنم داشيديغيني، دانيلماز و گرچك آنلامدا گؤره بيليريك.

تبريز قادينلارينين كور قروپو تهران شهري بهمن فرهنگسراسيندا 1378-جي ايل