شماره 14 آبان 1384
بير شكيل، بير يازي
	دوكتور رفيعخان امين

فراز يكيتا

دوكتور رفيعخان، امينالتّجارين دؤردونجو اوغلودور، آتاسي، اونو قارداشي، حسين ايله بيرليكده تخميناﱠ يوز ايل بوندان اؤنجه، سوئيس اؤلكهسينه گؤندرير، رفيع خان طيب فاكولتهسينه، قارداشي ايسه اينشاآت مهنديسليگي فاكولتهسينه گيريرلر.

دوكتور رفيع خان لوزان اونيورسيتهسينين طيب بؤلومونو بيتيرديكدن سونرا، وطنه قاييدير. تبريزين مجتهد كوچهسينده بير خستهخانا و مطب آچير(1) ائويده ائله همين كوچهدهايميش.

دوكتور رفيع خان امين واقتي ايله آذربايجانين ان عاليم و ان آدليم حكيمي (طبيبي) اولموشدور. باشقا يئرلردن ال اوزن خستهلري اونون يانينا گتيريب، شفالارين آلارديلار. واقتيله اونون حاذقليگي حاقيندا بير چوخ سؤزلر آغيزدان ـ آغيزا و ديلدن ـ ديله دوشموشدور(2)

امين عائيلهسي، ائلهجهده دوكتور رفيعخان، هاميليقجا ضيالي و دموكرات ايديلر، دوكتور رفيعخان واقتيله شيخمحمد خيابانينين ياخين يولداشلاريندان اولموش، دموكرات فيرقهسينه قوشولموشدور. او 1335ـ جي ﻫ . ق (1295 ـ ﻫ . ش) ايلينده تبريزين بلديه باشقاني ايميش و آلتينجي دؤور ميلّي شورا مجليسينده، تبريزليلرين ميلّت وكيلي اولاراق حاضير اولموشدور.

سئچكي عرفهلرينده مرتجعلر بير چوخ آزاديخواهلارين او جوملهدن: سرتيپزاده، حاجي محمدعلي بادامچي و ائلهجهدن دوكتور رفيعخانين عليهينه شانتاژ جوي ياراتماق اوچون شعرلر قوشوب، ديللره سالميشلار، اونون حاقينداكي ميصراعلار بئله ايميش:

دوكتور رفيع خان بو ايشده خوشدور

چوخ ياخشي آدامدي، بئيني بوشدور!

دوكتور رفيعخانين آيدينلاديجي يازيلاري واقتيله ايرانين ان دگرلي درگيلريندن اولان، تجدد روزنامهسينده چاپ اولموشدور. او بو درگيده مستعار فمينيست ايمضاسيله قادين حاقلاري مؤوضوعوندا مقالهلر يازاردي.

«فمينيست» سؤزجوگونو ده ايران سياسي ادبياتينا، ايلك دفعه دوكتور رفيعخان امين گتيرميشدير.

قئيد ائتمك لازيمدير كي دوكتور رفيعخاندان باشقا، همين درگيده ميرزا تقيخان رفعتين ده فمينا ايمضاسيله يازيلاري، چاپ اولموشدور. بو مقالهلرين باشليقلاريندان: "زن در ايران مظلوم است، ترقي زنان دنيا، زنان بزرگ جهان، زنان ما، ترقي نسوان اروپا، اولاد وطن را تربيه و تعليم لازمست، مادران فردا و ...." اونلارين هانسي ماهيت داشيديقلاريني آنلاماق اولار.

دوكتور رفيعخان سونرالار تهرانا گئتميش و او شهرين ده آدليم حكيملريندن بيري اولموشدور. تهراندا ياشاديغي ايللر طيب و ساغلامليق حاقيندا يازديغي مقالهلر پايتختيميزين نشريهلرينده چاپ اولموشدور.

قئيد ائتمك لازيمدير كي دوكتور رفيعخان سوئيسده اولاركن بير فرانسالي خانيملا ائولنميش و اونونلا بيرليكده آذربايجانا گلميشلر. نئچه ايل صميمي حيات سورندن سونرا، خانيمي بير حاديثه اثرينده اؤلموشدور. اونون هئچ بير اؤولادي اولماييب، سونسوزموش. دوكتور رفيعخان امين آلتميشلي ياشلاريندا (تخميناﱠ 67 ياشيندا)، 1330 ـ جو ايلده تهراندا وفات ائتميشدير.

· شكيل، دوكتور رفيعخانين قارداشي نوهسي، محسنخان امينين آرشيويندن آلينميشدير.

---

1ـ تجدد درگيسينده وئريلن ركلاملاردا، مطبينين آدرسي شريفالعلما كوچهسي كيمي قئيد اولموشدور و بئله آنلاشيلير كي مجتهد كوچهسينين باشقا بير آدي شريفالعلما كوچهسي ايميش. قئيد ائتمك لازيمدير كي شريفالعلما سيد حسن شريفزادهنين آتاسي و دوكتور رفيع خانين دا آناسينين آتاسيدير. او تبريزليلرين ايچينده چوخ سايقيلي بير شخص ايميش و اونو «آغا» دئييه سسلرميشلر. دارايي خياوانيدا آغا مسجيديني، آغا كروانساراسيني و... شريفالعلما بينا ائتميشدير.

2ـ ديللره دوشن روايتلردن بيري بو كي: بير گون بير زاهينين ياخين آداملاري، هؤيلهسك دوكتور رفيع خانين قاپيسينا گليب، دئييرلر، اوشاق بارماقلارين ايليشديريب آناسينين بطنيندهكي دامارلارا و برك دوگونلهييب، اووجونو آچمير ، بيلميريك نه ائدك. تئز گلين زاهينين جانين قورتارين. دوكتور رفيع خان دئيير: من گلمك ايستهمز. سيز بير پارچا بوز گؤتورون قويون اوشاغين الينين اوستونه، او آووجون آچار.

ائلهده ائديرلر و زاهيني قورتاريرلار.

قايناقلار

ـ از صبا تا نيما ـ يحيي آرينپور

ـ جنبش آزاديستان/ شيخ محمد خياباني ـ عبدالحسين ناهيدي آذر

ـ تجدد درگيسي

ـ رجال آذربايجان در عصر مشروطيت- مهدي مجتهدي

بو يازيني حاضيرلاماقدا آشاغيداكي شخصلرين معلوماتلاريندان فايدالانميشيق:

اعظم خانيم نقشينه، جناب جعفر نيوشا و عليرضا صرافي، هابئله جناب عبدالحسين ناهيدي آذر (تبريزين بيرينجي قادين كونگرهسيندهكي دانيشيغيندان)