آذربایجان فدرال دمکرات حرکاتی نین دونیا قادین گونو موناسیبتی ایله بیانیه سی
قادینلار حرکتی 19مینجی یوز ایلین باشلاریندا صنعتیلشمیش دونیانین اورتایاچیخارتدیغی یئنی قادین کیشی ائشیتسیزلیگی شکیللرینه قارشی اعتراض هدفیله گلیشدی. 8 مارت 1857 ایلینده پارچا توخوما ایش یئرلرینین ایشچی قادینلاری نیویورکدا خیابانلارا گلیب آیلیق قازانجلارینین آرتماسی ، ایش ساعاتلاری نین آزالماسی و ایش شرط لرینین دوزلمه سی ایچین تظاهورات ائتدیلر. ایلک دفعه1911 ایلینده اتریش، دانمارک، آلمان و سویس ده بیر میلیون کیشی و قادین قادینلارین رأی حققینه صاحیب اولمالاری و قادین کیشی آراسینداکی ائشیتسیزلیگی آرادان قالدیرماق ایچین گؤستریلر دوزنلدیلر. زامان ایلرلدیکجه دونیا قادینلار گونوموناسیبتییله قادینلارایستکلرینی داها گنیش بیر چرچیوه ده اورتایا قویدولار. مثلأ بیرینجی دونیا ساواشی اثناسیندا قادینلار ساواشا قارشی کامپانیا قوروب بو وسیله یله دونیا مسئله لرینه نیسبت اؤز لرینین داشیدیغی مسئولیتی گؤستررک دونیا سیاستینده داها آکتیو بیر رولا صاحیب اولماق ایستکلرینی بیلدیردیلر. البته کی زمان ایچینده قادینلار ایش قانونلاریندان علاوه همجینسلری نین دورومونون دوزلمه سی ایچین داها گنیش چالیشمالارا مثلأ آنایاسا و اؤزللیکله مدنی قانونلاری نین دییشیلمه سی یولوندا دیرلی آددیملار آتدیلار.
بو چالیشمالارین سونوجوندا 2000 ایلینین باشلاریندا بیرلشمیش میللتلرینین میللئنیوم زیروه سینده، «اولوسلارآراسی گلیشمه آماجلاری» هدفی ایله یایینلانان 8 ماده لی میللئنیوم بیانیه سینده قادین کیشی ائشیتلیگینه بویوک اؤنم وئریلیب و قادینلارین توپلومدا و سیاستده کی قاتیلیمینی فقیر اؤلکه لرین گلیشمه سینده اساسی بیر شرط اولاراق تانینیب.بیانیه ده اؤلکه لرین گلیشمیشلیک درجه سی اونلارین پارلیمانلارینداکی قادینلارین صاحیب اولدوغو صندل ساییسییلا بلیرتیلمیش. میللئنیوم بیانیه سی بو نوقطه یه تأکید ائدیرکی قادینلارنان کیشی لرین ائشیت حققه صاحیب اولماسی یالنیز بیر هدف اولاراق دئییل اؤزوده باشقا هدفلری قازانماق ایچین اؤنملیدیر. بو اساسدا دا قادین کیشی ائشیتلیگی نین یوخسوللوغون آرادان گئتمه سی و توپلوملارین گلیشمه سی ایچین اؤنملی بیر اساس اولوشدوردوغو تأکیدله بیلدیریلمیش.
کانادا دولتی ده بو ساحه ده اؤنملی بیر آددیم آتاراق2010 ایلینین قادین گونونون شعاری نی« گوجلو قادین، گوجلو اؤلکه و گوجلو دونیا» اولاراق بلیرتمیشدیر.
اجتماعی، اقتصادی و سیاسی لحاظ - دان گئری قالمیشلیگین اؤنملی بیر ندنی قادینلارین بو ساحه لرده آکتیو اولمامالاری دیر. هر انسانی توپلوم قادین و کیشی دن تشکیل اولور، بونلارین یاریسینین فعال و دیگر یاریسینین غیر فعال بیراخیلمالاری او توپلومون فلج و خسته بیر دورومدا اولدوغونو گؤستریر. اگر بیر توپلومدا یالنیز بیر جینسیت گلیشیب و عصره اویقون حرکت ائده، و دیگر جینسیت بونلاردان محروم قالا او توپلوم گئتدیکجه گئرییه دوغرو ایلرلییه جکدیر.
ایران توپلوموندا اؤزللیکله ایسلام جومهوریسی نین قورولوشوندان بویانا قادینلار ائشیتسیزلیگه معروض قالمیشلار . گنه ل اولاراق جينسى آپارتايد و قادينلارين تحقيرائديلمه سى ایران اسلام جومهوریيتی نین دونيا گؤروشونون تملی دیر و بو اساسدا ایران اسلام جومهورییتینین آنا یاساسی آچیقجاسینا جینسی آپارتایدا رسمیت و قانونیت وئریب دیر.توپلومون بوتون ساحه لرینده قادینلار ایکینجی درجه لی وطنداش حساب اولورلار.اؤزللیکله ایسلام جومهوریتی نین مدنی و قضایی قانونلاریندا قادینلار بؤیوک اؤلچوده حقسیزلیکلره معروض قالمیشلار. بونونلا بیرلیکده آذربایجان تورک قادینلاری ملی هویتلرینه گؤره ایکی قات داها ظولمه معروض قالیب و توپلومدا دؤردونجو درجه وطنداش حساب اولورلار و بودا قادینلارین سیاسی، اجتماعی و اقتصادی دورومونو یوکسک درجه ده ائتگیلیر. مثال اولاراق توپلومداکی ائشیتسیزلیکلردن آذربایجان تورک قادینلارینین تحصیل دورومو بؤیوک اؤلچوده اولومسوز شکیلده ائتکیلنیب. آیریجا توپلومدا قادینلاریمیزین علئیهینه راییج اولان پروپاگاندا و دوشونجه لرده قادینلارین داها چوخ آسیمیلاسیون سیاستیندن ائتکیلنمه لرینه سبب اولوب، نتیجه ده ، بعضی قادینلارین اؤز میللی کیملیکلرینی اینکار ائتمه لرینه و بونوندا آغیر ایجتماعی و سیاسی پروبلملره یول آچدیغی ایثبات اولونموشدور.
ایران دا گئری قالمیش بیر توپلومدان وتئوکراتیک بیر دولت یاپی سیندان یعنی ایسلام جمهوریسی دن قادین - کیشی ائشیتلیگی نین قبول ائدیلدیگی مدرن بیر توپلوما گئچپیش آنجاق بیر چوخ دئوریمله مومکون اولابیلیر .بو دئوریملری ایلک اؤنجه اؤزدونیا گؤروشوموزده وقادینلارا نیسبت اولان اینانجلاریمیزدا یاراتمالییک . ایران توپلوموندا قادین علئیهینه راییج اولان عنعنه لر،گلنکلر ،ائو و مدرسه تعلیم تربیه سیستمینه حاکیم اولان گئری قالمیش دوشونجه لر کی سیاسی ، ایجتماعی و عمومی شکیلده جیدی مسئله لری کیشی ایشی اولاراق دیرلندیریر، قادینلارین ایجتماعی و سیاسی فعالیتلری نی بؤیوک اولچوده ائتکی لیر. بئلنجی گئری قالمیش دوشونجه لر حاکیم ایدئولوژی طرفیندن ده اؤزللیکله گوجلندیریلیر. توپلومون بوتون ساحه لرینه کؤک سالمیش بو گئری قالمیش ذهنیتله موجادیله ائتمک ، قادینلارنان کیشیلرین ائشیت حقلره صاحیب اولمالاری نین توپلوم ایچینده منیمسه نمه سی و یئرینی آلماسی مدرن بیر مدنیتین اساسی دیر. انسانی حقلریمیزه، گلیشمیش و مدنی اؤلکه لر سطحینه یئتیشمه میز آنجاق قادینلار یمیزین توپلومون اقتصادی، اجتماعی و سیاسی ساحه لرینده قاتیلیمجی اولمالارییلا مومکون اولور.
آذربایجان میللی دموکراتیک حرکتی نین انسان حقلرینه اویقون، گلیشمیش و مدرن بیر یولدا ایلرلمه سینی هدفلمیشسک قادینلارین فیکیر و دوشونجه سیندن توپلومون گلیشمه سی ایچین استفاده ائتملی ییک. بونو وورقولامالییک کی ایندی کی دورومدا یالنیز سکولار، مدرن و مدنی قانونلارلا قادینلاریمیز و بئله لیکله ده توپلوموموزشریعت اسارتیندن و زنجیریندن قورتاریلابیلیر.
آذربایجان فدرال دمکرات حرکاتی 2009 ایلینین دسامبرآییندا آمستردام توپلانتی سیندا تصویب ائدیلن قادین قطعنامه سینی منیمسه یه رک بو پرنسیپلری 2010 ایلینین قادین گونو ایلکه لری اولاراق اعلام ائدیر.
-قادینلارین علئیهینه اولان بوتون یازی لی و شفاهی قانونلارین قالدیریلماسی گرکیر. بو قانونلار توپلومون بوتون ساحه لرینده اؤز عکسلرینی تاپمالیلار
-قادین کیشی برابرلیغی توپلومون بوتون ساحه لرینده قانونی لشمه لیدیر
-آذربایجان تورک قادینلاری اؤزمستقیل تشکیلاتلارینی قورماق حقینه مالیک اولمالی لار
-آذربایجان تورک قادینلارینین توپلومون بوتون ساحه لرینده آکتیو و قراروئریجی بیر شکیلده قاتیلمالاری دستکلنمه لیدیر
-آذربایجان تورک قادینلارینین اؤز میللی کیملیکلرینی قورویاراق یورد ایچی و یورد دیشی تشکیلاتلارلا ایش بیرلییی ائتمه لری دستکلنمه لی دیر
-یورد ایچینده و اولوسلارآراسی ساحه ده آذربایجانلی تورک اجتماعی- سیاسی فعال، صنعتچی ، یازار ......قادینلار تانیتیلمالی و اونلارین معروض قالدیغی ائشیتسیزلیکلر افشا اولونمالی دیر
آذربایجان فدرال دمکرات حرکاتی ایجرائیه هیئتی
12.12.1388
03.03.2010