اوستاد حسن دمیرچیدن آچیق مکتوب

اگر اینسانلاری معاریفچیلییه دوغرو یؤنلتمک اوچون چالیشیب و اؤز جیبلریندهن پول خرج ائدهرک ، مکتبلر تیکدیرنلر وارسا ، نه یازیق کی وار اولان مکتبلری بیر حق سؤزو-سؤیلهمک اوسته باغلادانلاردا واردیر.

بیر یاراماز توهین اوزهرینده یوز مینلر آذربایجانلی کیمی منده اؤتن ایل خورداد آیینین یوروشلرینه قاتیلدیقدان بیر نئچه گون سونرا یاخالانیب . بیر ایل حبسه محکوم اولدوم ، ائلهجهده موسیقی آموزشگاهیمین دا جاوازی لغو اولوندو.

آلتی آی حبسدهن سونرا ،اؤنجهدن حؤکمه اعتیراض ائتدییمه گؤره ،حؤکمون دایاندیریلماسینا امر گلدی. وثیق ایله دوستاقدان آزاد اولدوقدا ،ایرشاد ایدارهسینه گئدهرک ،آموزشگاهین جاوازینین قایتاریلماسین ایستهدیم ،اماکین ایدارهسینه یازدیلار . اماکین ایدارهسینین کوموسیونوندان بئله بیر جواب چیخدی: هله پرونده جریاندادیر، اولا بیلر حؤکمون تایید اولونسون ،یوحسا حؤکم سینیرسا ،آچیلیشینا بیر ایقدام اولونا بیلردی.

سکگیز آی سونرا ،سایین وکیلیم مهندیس نقی محمودی جنابلارینین چابالاری اثرینده بو دؤنه دیوان عالی کشور طرفیندهن حؤکم سیناراق برائت قازاندیق.

بو حؤکمون برگهسین گؤتورهرک ،یئنهده ایرشاد ایدارهسینه یوللاندیم.

بو دؤنه تبریزین ایرشاد ایدارهسینین هونر بؤلومونون باشقانی اوزده سئوینهرک تبریک دئییب؛ رئیس ایله دانیشارام ،اوچ-دؤرد گونهدهک جاواب وئرهریک ،سؤیلهدی.

بو دانیشیقدان اوچ گون سونرا کی من جاوازین برپا اولونماسین گؤزلهییردیم چوخ تعجوبله بیر خشن . ادبسیز اماکین ماموری مکتبه داخیل اولاراق ،آموزشگاهین پولمب اولماسیندان دانیشدی.

بیر تند لحن ایله بیزده ایستهدی کی ،آموزشگاهدان چیخاق و او حؤکمون ایجرا ائتسین.

من برائت آلمیشام دئیه مانع اولدوم ،مامور آجیقلاناراق کلانترییه تفون ائدهرک ،داها اوچ مامور گلدیکده بیزی آموزشگاهدان چیخاریب مکتبین قاپیسین باغلایاراق ، پولمب ائدهرک گئتدیلر.

بیر داها اماکین ایدارهسینه گئتدیم ،بو قانونسوزلوغا اعتیراض ائدهرک ، هذهلهندییمی گؤردوکده "معجزون"بو شعری یادیما دوشدو:

ماه موبارکده جنگ-جدل چوخ اولار،

حقسیز چیخار ، فقیر گئده ،گر شیکایته.

وارلی اگر ازه یوخسولون داشیلن باشین ،

تنبیه ائدهر حؤکومت او ،باش جراحته.

سؤز-سوز بیز آذربایجان سئورلر بو تنبیهلر و تحقیرلره عادت اوزره دؤزموشوک و یئنهده دؤزمهلییک . صابیر دئمیشکن :"هانسی بیر موشکولدور کی ،صبر ایله آسان اولماسین".

قوی برائت حؤکمو گلدیگی حالدا ،16 آی بوش و ایشسیز قالان مکتبی بیر داها گلیب پولمب ائتسینلر و 12 معلیم و 180 اؤیرهنجی تکلیفسیز قالسینلار . بو قانونسوز ایش، آیین-شایین گؤستریر کی ، بئله دوشمنچیلیک تکجه منله یوخ ،بلکه داها آرتیق آذربایجان موسیقیسی ایلهدیر. چونکو منیم 15 ایل آردیجیل ایداره ائدییم موسیقی مکتبینده ایرشاد و اماکن شئونات باخیمیندان هئچ بیر یارامازلیق اوز وئرمهمیشدیر.

آنجاق حاکیم ایداره مسئوللاری منی تکجه آذربایجانچیلیق اوسته سوچ (گوناه)لاندیریرلار.داها دوغروسو منده بئله بیر مقدس دوشونجهنی دانماییب و اونو سوچ یوخ ،هر بیر اینسان اوچون عؤمورلوق شرف سانیرام. بو یولدا هر نه چتینلیگه عشق اولسون دئمیشهم . بونا شاهید اولاراق 30 ایل اؤنجه یازدیغیم بیر شعر ایله سؤزه سون قویماق ایستهییرهم.

ازهلدهن عاشیقم من بیر گول اوزلو یاره عشق اولسون ،

اونون دردی ووروبدور کؤنلومه مین یاره عشق اولسون .

سازیم عشقیم دیر ،خالقیم سئوگیلیم روحوم آذربایجان ،

کسیلسهم قوربان آرزیمدیر،بو دوز ایلقاره عشق اولسون .

وطن سئومک گوناهدیرسا، منی کافیر حساب ائتسین،

چکیرسه اوستومه هرکیم قمه-قداره عشق اولسون.

همیشه بؤیله سوسماز آذر اولادی جوشار هردهن،

ائدهنده ظولم ائوین ظالیملره زیل قاره عشق اولسون .

"دمیرچی" عشقه دوزگون قالمایان آلچاقدان-آلچاقدیر،

بو عشقین یوللاریندا قوی قورولموش داره عشق اولسون.

تبریز-حسن دمیرچی

13/7/86