سلاحلی مبارزه و آذربایجان میللی حرکتی،

آیدین تبریزی،

بو سورو کی آذربایجان میللی حرکتی سلاحلی مبارزه یه باشلامالی دیر یا یوخ چوخ اونملی بیر مساله دیر. کورد تئرورچو گروهلارین یارانماسی و آرتیرماسی هر آذربایجانلینی گله جک گونلره فیکیرلشمه یه چاغیریر. کرکوک داکی وضعیت بیزی داریخدیریر و کئچمیشده کی کورد تئرورچو گروهلارین آذربایجان میللتینه سالدیری لاری بیزی اویاندیرمالیدیر. آما نه ایش گورمه لییک؟ بیزده بیر سلاحلی گروه یاراتمالییق کی ترورلا مشغول اولاق؟!

نئچه مساله اونملی دیر. ایندیکی دونیادا سلاحلی گروهلار دولت لرین آغیر سلاحلارینین قاباغیندا هئچ باشاری الده ائده بیلمزلر و یالنیز کیچیک ترور عملیات لاری یولا سالا بیلرلر. باشقا طرفدن بو سلاحلی پارتی کیمین اوستونه آتش آچاجاق؟ آذربایجانلی ارتشی لر و سپاهی لر و بسیجی لرین اوستونه؟ یا بو گروه کرماندا فعالیت ائله یه جک؟ بیزیم موقعیتیمیز کوردلر و   بلوچلار ایله تام فرقلی دیر. آذربایجانلیلار اگر بیر گناه سیز آذربایجان اولادی که معاش اوچون ارتش ده، سپاه دا ایشله ییر اولورسه بو فرضی سیلاحلی پارتی نی اصلا باغیشلامایاجاقلار. بونو گرک بیز اوز میللتیمیزین روحیه لریندن تانیاق.

اگر بو سلاحلی پارتی نین ایسته یی بودور کی بو حکومتی سلاحلی شکیلده چئویرسین، بیلمه لییک کی بو ایش اصلا اولان بیر ایش دئییل. نه بو پارتی نه پژاک، نه باشقالاری هئچ بیر ایش قاباغا آپارا بیلمز. بو یئنی دونیانین قانونلاری دیر کی عاغیللی لار دوشونوب آما آغیلسیز لار بو یولا گئدیر کی بیری اولار مجاهدین خلق بیری اولار پ ک ک و پژاک کی هرگون بیر نفرین اویون اویونچاغی اولار!

آما اگر بو سلاحلی پارتی نین ایسته یی بودور کی تئرورچو کورد گروهلارین قاباغیندا دورسون، یئنه ده، های کوی سالماق ایله و حکومته بهانه وئرمک ایله کی میللی فعاللاری آغیر شکنجه لر وئرسین کی بو سلاحلی گروه کیمدی و هاردان پول و سلاح آلیر و ... بو ایسته یه چاتماق اولماز. اوندان سونرا بیزیم آذربایجانلی سلاحلی قوه لرده اولان انسانلاریمیز هله لیک حکومتین قاباغیندا دورماسالاردا، کورد تئرورچو گروهلارین قاباغیندا بیزیم میللتین یانیندا دیرلار و بونو هر زامان گوستریبلر. بونا گوره بیر ضعیف و چوخ ضررلی بیر سلاحلی گروه یارادیب و اوزوموزو آذربایجانلی سلاحلی قوه لرین قاباغیندا قویماق عوضینده، گرک بو سلاحلی قوه لرین ایچینده، آذربایجان سئور انسانلاری تاپیپ و اونلار ایله بیر گیزلی گروه یاراداق کی تا اوزاماناجاق کی بو حکومت وار گیزلی قالسین و اگر احیانا حکومت چئوریلیرسه، اونلار حاضیر اولسونلار کی او چتین زاماندا، آذربایجان میللتین اولادلاریندان و ناموسوندان مدافعه ائتسینلر. بو گروه گرک بو حکومت علیهینه هئچ نه فعالیت ائتمه سین تا حکومت طرفیندن داغیلماسین و یالنیز گله جک آغیر گونلره حاضیر اولسون.

بو شکیلده بیز باشارا بیله ریک کی کورد تئرورچو گروهلارین نقشه لرینین قاباغیندا دوراق. بیر سلاح لی گروها کی بیزیم مدنی حرکته چوغ آغیر بیر ضربه اولا بیلر، هئچ گرک یوخدور. آما بونون قیراغیندا بعضی حساس منطقه لرده میللتین اوزو و فردی شکیلده و تشکیلات سیز، اوز عائله سینی قوروماق اوچون سلاحلانماسی، گیزلی شکیلده و های کوی سالمادان، ائلیه بیلر بیر باشقا چاره میز اولا. من اینانمیرام کی بو اطلاعیه حقیقتا آذربایجانلیلار طرفیندن یازیلیب و امنیتی قوه لره چوخ شککیم وار آما اگر بیر عده بو یانلیش یولا آددیم آتماق ایسته ییرلرسه، بیر آن دوروب و دریندن فیکیرلشمه لیدیرلر.

بیر باشقا مساله، عراقداکی کرکوک مساله سی دیر. بیزیم وضعیتیمیز ترکمن لر ایله چوخ فرقلی دیر. اونلار کوردلرین قاباغیندا بیر اقلیت دیلر و بوتون شهرلری اوبیری میللتلر ایله قاریشیق دیر و هئچ یئرده بیر خالص ترکمن شهری یوخدور. آما بیز یالنیز باتی آذربایجانین گونئینده بیر سیرا مشکلیمیز اولا بیلر، کی اونلار دا یالنیز دئییل لر و بیر بویوک میللت اونلارین دالیندا دوروبدور و کوردلر کی او منطقه ده اقلیت ده دیلر بیر ایش قاباغا آپارا بیلمزلر، اگر بیز ایندیدن بو مساله یه دوز فیکیر لشک و خصوصیله ایندی کی رسمی سلاحلی قوه لرین ایچیندن بیر گیزلی شکیلده گله جه یه حاضیرلیق آپاراق. بونو میللتی آییندیر ماق ایله و بو فیکیری سلاحلی قوه لره چاتدیرماق ایله، ایندی مستقیم یا غیر مستقیم (مثلا گوناز تی وی واسیطه سی ایله) قاباغا آپارا بیله ریک و آذربایجانین غیرتلی اوغلانلاری زامانی چاتدیقدا اوزلری بو مساله نی ان دوز سویه ده چوزه بیلرلر نئجه کی هر زامان بونو گوستریبلر.

بیز سلاحلی حرکتلره دوغرو گئتمک یئرینه، داها گوجلو سیویل تشکیلات لار و سیاسی توپلوملار یاراتمالییق و بیزیم باشاریمیز یوزده یوز بیزیم گوجلو و دئموکراتیک تشکیلات لاریمزا باغلی دیر نه 4 ده نه کلاشینکف یا نارنجکه! بیزیم غیرتلی سلاحلی قوه لرده اولان آذربایجانلیلاریمیز هر زامان بو تئرورچو قوه لری یئرلرینده اوتوراجاقلار، مرکزی حکومت اولا یا اولمایا.