آغاجی اوز ایچینده ن یئیه ن قوردلار

پولاد اوزگور

آذربایجان میلی کیملیگین ساوونانلار چوخ چتین و یوروجو بیر پروژه ایله اوز اوزه دیرلر. بو پروژه او قده ر یوروجودورکی بعضی لری دایانابیلمیر و موباریزه سنگرلرین بوشالدیرلار و حتی بعضا تاسف لر اولسون کی کیملیگیمیزین اریمه سینه یاردیم ائدیرلر.

هئچ اونودا بیلمیره م، ایللر اونجه اونیورسیته نین قارشی سیندا اولان بیر میلی ائیلم ده بیزیم اوستوموزه یوگوره ن اطلاعات مامورلاری قارشی سیندا دیره نن و اوزونده ن مودافعه ائده ن بیر یولداشیمیز اونلارین بیریسی نین گوزلوگونده ن ووردو و گوزلوک هاوادا فیرلادی. او گون هر زامان خاطیرمده ایدی. منی بیر آرا توتدولار و بو یولداشیمیزلا ایلگیم کسیلدی. آما ائشیگه چیخدیقدان سونرا هر زامان گوزوم اونو آختارادی. ایللر گئچدی و اونو بیر گون خیاواندا بیر خانیم لا برابر گوردوم. بللی اولوردوکی او ائولنمیش ایدی. یاخین لاشدیق و بیر بیرین ایتیره نلر کیمی قوجاقلاشیب اوپوشدوک. سونرا خانیمی سین منه تانیتدیردی. آما چوخ ایلگینج ایدی. خانیمی ایله فارس دانیشیردی و اونو فارسجا منه تقدیم ائدیردی. بو صحنه نی گوردوکده ن سونرا من نه دئیه بیله ردیم. سانکی باشیما بیر قازان قاینار سو توکموشدولر. نئچه گونه کیمی اوزومه گله بیلمه ییب و بو آجی صحنه نی اونودا بیلمه دیم...

بیلیم یوردوندا ایکی عزیز دوستوموز وارایدی. برابر بیر درگی یاینلاییردیق. هر ایکیسی ده هر زامان بیزه یاردیم ائده ر دیلر. هم درگی نین یاینلانماسیندا و هم اونیورسیته ده کئچیریلن کنفرانسلاردا. حتی اونلارین بیریسی مقاله لر یازمیش و کنفرانسلاردا آپاریجی اولموشدور. اونلار آذربایجان یولوندا چوخ زحمت چکمیشدیلر. سونرالار یولداشلاردان ائشیتدیم کی بونلاردا هر ایکی سی فارس قیزلارلا ائولنمیشلر و اوسته لیک فارس بولگه لرینه کوچموشلر...

بیر دوستوموز واریدی، گوزه ل گوزه ل یازیلار یازاردی. آما تورکجه سی چوخ بوزوق ایدی و گئنلده فارس دیلینده یازماغی ترجیح ائدردی. سون واختلار اینترنتده ده اوندان بعضی یازیلار گوردوم. آدینی چکسه م بیلیره م کی بیر چوخو اونو تانیاجاق. ماشالله اولسون هر یئرده ده وارایدی، آما توستو برک اولسایدی اونون قارشیسینا واجیب ایش چیخاردی و بیر نئچه واخت گوزلره گورونمزدی. بو دوستوموزون آیری ایکی یولداشیندان بیریسی هله ایچریده و بیر آیریسی ایسه تزه زنداندان آزاد اولوب. سون زامانلار ائشیتدیم کی بو عزیزیمیزده بیر فارسلا ائولنمیشدیر. اوزو دئییرمیش کی یوخ بونون بابالاری تورکموشلر. آما هر کسین دئدیگینه گوره اونونلا فارس دیلینده دانیشیر...

بیر باشقا هیجانلا دولو اولان یولداشیمیز تویونا فارسجا دعوت کارتی یازمیشدیر. اونا دئدیم آخی سنده ن بعید دیر. بو نه ایش دیر گوروسن؟ نده ن آنا دیلیمیزده کارت یازمادین؟ منه دئدی کی، بابا ال چک گوره ک. سن یئنه آدام اولمادین؟ یئنه دئیه سن باشین بدنینه آغیرلیق ائدیر ها. اوتور بابا... سوزلرینده ن آنلادیم کی خانیم زورلامیش اونو. تویوندا دا بیر چوخ فارس آهنگی چالیندی. ایندی بیر اوغلو اولوب. کیم بیلیر بلکه ده اونونلا فارسجا دانیشیر؟...

چتین بیر آذربایجانلی تاپابیله ریک کی تهراندا تورک کوکه نلی قوهومو اولماسین. بیزیمده بعضی قوهوملاریمیز تهراندا یاشاییرلار. بونلارین اوشاقلاری تماما فارسلاشمیش دیر. منیم بونلاری آیدینلاتماغا یونه لیک چابالاریمدان دا بیر ایش چیخمیر. نه قده ر یازی، کیتاب و سی دی وئریره م بره بیتیرمیر. اوشاقلارا دئییره م کی نده ن اوز دیلینیزده دانیشمیرسینیز؟ دئییرلر سن چوخ تعصب لی سن. بیزیم رسمی دیلیمیز فارسی دیر و بیز ایسته ییریک بو دیلده دانیشاق. اونلار منه کوروش و هخامنشیلرین بویوکلوگونده ن دانیشیرلار و من ایسه ایچیمده آغلاییرام...

خرداد آی نین ایکی سینده سحر بیر تاکسی یا میندیم. گوردوم گنج بیر سوروجو فارسجا موزیک آچمیش. دئدیم آی قارداش دونن سنین هموطن لرینی اوز آنا دییلرینده ن مودافعه ائتمک ایچین دویمه دیلر می؟ توتمادیلارمی؟ ایندی بو لحظه نئچه آنا، خانیم، باجی و اوشاق گوزلرینی قاپییا بیر خبر گلسین دئیه تیکمه میشلر؟ دئدی بوش وئر. نه تورک-فارس بازلیغی سالمیسیز؟ بیزیم رسمی دیلیمز فارسی دیر. بیرده کی بیزیم موشگولوموز دیل موشگولو دئییل، باهالیق دیر. گوردوم بحثین فایداسی یوخدور. مقصده وارمادان تاکسی نی دایاندیریب و یئره یئندیم. پیاده ایچیمده قان آغلایا-آغلایا یولوما دوام ائتدیم...

بعضی لری دئییر بیزیم اویانیش مرحله میز بیتمیش دیر. بو خاطیره لری فقط او یولداشلارا یازدیم. بیلسین لرکی میلی موجادله بو تئزلیگه سونوج وئرمه یه جک. بیزیم بو جغرافیادا گونده ن گونه سایی میز آزالیر و شونیسمین چیرکین اریتمه سیاستی سونوجوندا تورکلر بیر بیر فارس اولور. بو گون بیزیم آیدینلاریمیز میلتیمیزین پسیکولوژی سین آنلاییب اونلاری بو کیملیک کریزینده ن قورتارمالی دیرلار. بو ایش اوچون ائله بو ساعات و اوزوموزده ن باشلامالییق. اوخوماق، دوشونمک و پلانلار حاضیرلامالییق. اوز وئری و صبر ایله گنجلریمیزی آییتمالییق. میلی دوشونجه نی دامارلاردا آخان قانلارا دونوشدورمه لییک. بو بویوک پروژه یولوندا هرکس الینده ن گله نی ائتمه لیدیر. یولوموز اوزون و چتین بیر یولدور...