19- اوردیبهشت ، آذربایجان اؤیرنجی گونو موناسبتی ایله
اؤیرنجی یولو

یونس شاملی

آذربایجانین ملی دمکراتیک حرکاتی هرگون مبارزه پروسه سینده یئنی (تازا) انکشافلارا و اؤز مودرن حیاتی ایله باغلی، اویقون دوشونجه لر ایله میدانا چیخماقدادیر. آذربایجان اؤیرنجی گونو، آذربایجان خالقینین و ایران دا یاشایان تورک میلتینین اؤلوم دیریم مجادله سیندن و او مجادله نین ایستقامیتیندن باش قالدیرمیشدیر.

 

آذربایجان اؤیرنجی گونو، آذربایجانین ملی دمکراتیک حرکاتی نین گئدیشاتیندان یارانان یئنی عنعنه لردن بیری ساییلیر. بو تاریخی گون، 1374نجی ایلین اردیبهشت آینین 19دا آذربایجان اؤرنجی سی عدالتچی اراده سین ایران رژیمی نین تورکلره قارشی تحقیر ائدیجی تشبوسونون قاباغین دا، نمایشه قویور. اوگون آذربایجان اؤیرنجی لری ایرانین صدا و سیما آدینا تورکلری تحقییر ائدیجی بیر، سوآل بلانکتی نین  یایلماسی نا اؤز اعتراضی نی بیلدیرب و ایران تلویزیونونون مسئولارینین بو روسوا و راسیستی حرکتینی آذربایجان و ایران کامو اویونا (افکار عمومی سینا) گؤستریبدیر. او موقاویمت دن سونرا هر ایل، اردیبهشت ین 19نون  ایل دؤنومون ده، آذربایجان اؤرنجی حرکاتی طرفیندن آغیرلانیب و گئده گئتده اردیبهشت ین 19 آذربایجان اؤیرنجی گونو آدلانیب دیر.

 

بئله لیکله آذربایجان اؤیرنجی گونو، ایران تورکلرینین گنج ائولادلارینین مجادله سیندن بیر سونت و بیر مجادله عادتی دوغولموشدور. حقیقتاً آذربایجانین ملی دمکراتیک حرکاتی باشلانقیجدان، بو میلتین اؤیرنجی لرینین قوینوندا بسلنمیش دیر.

 

آذربایجان اؤیرنجی گونو، ایران دا یاشایان تورک میلتی و اونون اؤیرنجی لرینین مستقیل حرکتین گؤستریر. آیدینلاشمالی دیر کی آذربایجان اؤیرنجی حرکاتی نین  دردی و آماجی، فارس اؤیرنجی حرکاتی ایله بعضی یؤنلرده ایشتراکی اولسادا، آمما دردیندن چوخ مهم یؤنلرده او حرکتدن آیرلیر. فارس اؤرنجی حرکاتی، اگرسه بیر سیاسی آزادلیق مبارزه سی آپاریرسا، آذربایجان اؤیرنجی حرکاتی بیر اؤلوم دیریم مجادله سی ایله قارشی قارشیا دورور. آذربایجان اؤیرنجی حرکاتی بو اؤلوم دیریم مجادیله سینده، ایستر ایسته مز ایراندا گئدن دمکراتیک مجادیله نین انکیشافینین اساسلاریندان دیر. آمما فارس اؤیرنجی حرکاتی، غیرفارس میلتلرینین برابر حقوق قازانماسینا جددی یاناشماسا، ان یاخشی تاثیری یالنیز سیاسی رژیمین دگیشمه سینه کمک ائدیر. آذربایجان اؤرنجی سینه، آمما، ایران رژیمینین یالنیز دگیشیلمه سی یوخ، بلکه او دگیشیلمه نین کیفیت لی اولماسی اهمیت داشییر. باشقا سؤزجه، فارس اؤیرنجی حرکاتی، ایرانین بوگونکو فارس دینجی و راسیست رژیمی نی سالیب، اونون یئرینه بیر فارس دین سیز راسیست رژیمی ایسترسه، آذربایجانین ملی دمکراتیک حرکتی، و اونلا باغلی آذربایجان اؤیرنجی حرکاتی تمامی ایله بو حرکت ایله قارشی و مخالیف دیر. آذربایجانین ملی دمکراتیک حرکتی و تورک اؤیرنجی لری ایرانین بوگونکو رژیمینین یئرینه، بیر باشقا فارس رژیمی یوخ، بلکه میلتلره دیاناراق فدراتیو جمهوریت، عدالتچی، لائیک و ضد آپارتاید بیر حاکمیتین ایش اوستونه گلمه سینه مجادله آپاریر.

 

بو فاکت لارا دایاناراق، آذربایجان اؤیرنجی حرکاتی کیفی باخیمدان اؤزوایله بیر درین، اینسانی و ملی آماج داشییر. بونا گؤره آذربایجان اؤیرنجی حرکاتی و اونون مبارزه سیمبوللاریندان بیری، آذربایجان اؤیرنجی گونو بو باخیمدان جدی اهمیت داشیر. آذربایجان اؤیزنجی گونون میلتیمیزه گله جک گونلرده کیفی ظفر و حتی ایرانین باشقا میلتلرینین اینسانی آماجلاری اوچون اغور قازانان بیر گوندور.

 

یاشاسین آذربایجان اؤیرنجی گونو