گوناسکام دان هفته لیک باخیش

آذربايجان اؤيرنجي سي ياشايير

بو گونلر آذربايجان قياملارينين ايل دؤنومونه ياخلاشيركن، آذربايجان اؤيرنجي سي ده تلاش ايچريسينده دير. چونكو 19 ارديبهشت آذربايجان اؤيرنجي گونودور. آذربايجان اؤيرنجي حركتي اؤز وارليغيني سيستملي بير شكيلده اورتايا قويماق اوچون بئله بير گونه احتياجي وارايدي. كئچن ايل بير سيرا دارتيشمالاردان سونرا 19 ارديبهشت آذربايجان اؤيرنجي گونو اولاراق آدلانديريلماسي سئوينديريجي اولموشدور. گوناسكام اولاراق اؤزوموزو هر زامان گرچك آذربايجان اؤيرنجي حركتي نين يانيندا حيس ائديريك. بو هفته ليك باخيشدا آذربايجان اؤيرنجي گونو مناسبتي ايله بير نئچه نكته اوزه رينده دورماق ايسته ييريك.

1- آذربايجان اؤيرنجي حركتي، اؤنجه ليكله آذربايجان اؤيرنجي سينه داها سونرادا آذربايجان تورك ميللتينه عاييدير. بو حركتي سياسي تشكيلاتلارا باغلاماق دوغرو دئييلدير. چاغداش اؤيرنجي حركتلرينه باخديغيميزدا اؤيرنجي حركتلرينين باغيمسيز اولدوقلاري زامان باشاري الده ائتديكلريني گورمكده ييك. بو ندنله آذربايجان اؤيرنجي حركتي هئچ بير گروپ و تشكيلاتين مالي دئييلدير. آذربايجان اؤيرنجي حركتي آدينا بئله بير يول ايزله ينلر شبهه سيز كي آذربايجان اؤيرنجي حركتي نين گرچك اوزونو تمثيل ائتمه ييرلر. آذربايجان اؤيرنجي حركتي چرچوسينده فرقلي پلاتفورملاردا بير آرايا گلمك مومكوندور. بو ايشي آذربايجان اؤيرنجي حركتي " گلجك بيزيمدير" چاتيسي آلتيندا دوغرو اولاراق قاباغا آپارانلاري دا گؤرمكده ييك. گرچي بو چاتينين دا بعضي اكسيكليكيري وار، آما زامان سوره جينده بو سورونلار اورتادان قالخا بيلر. اگر آذربايجان اؤيرنجي حركتينين باشاريلي اولماسيني ايسته ييرسك، اؤيرنجي حركتينين باغيمسيزليغيني قورومالييق.

2- آذربايجان اؤيرنجي حركتي، ميللي حركت سوره جينده اؤنملي بير يئره صاحيبدير. آذربايجان اؤيرنجي گونونه صاحيبلنمك، ميللي حركته صاحيبلنمك دئمكدير. آذربايجان ميللي حركتي يولوندا فعالييت گؤسترن توم فعاللار و تشكيلاتلار بو گونه صاحيب چيخاراق ميللي وظيفه لريني يئرينه گتيرمه ليديرلر. بو گونه قاتيليم نه قده ر گئنيش اولورسا، آذربايجان اؤيرنجي سي او قده ر، اؤزونو گلجه يه دوغرو اومودلو حيس ائده جكدير. آرتيق آذربايجان اينسانينين سياسال ياشامي اولوشمايا باشلاميشدير. آذربايجان اينسانينين ميللي گونلري اوزونو ياواش ياواش گؤسترمكده دير. آذربايجان اؤيرنجي گونو ده آذربايجان تورك ميللتينين بير ميللي گونودور. گلين بو ميللي گونوموزه سياسي آيريشمالاري بير طرفه بوراخاراق صاحيب چيخاق.

تبریز بیلیم یوردوندا یوخلامالار آرتیب

آلدیغیمیز سون بیلگی لره اساسا شنبه اردیبهشت آی نین 15-ی یعنی هفته نین بیرینجی گونونده ن اعتبارا تبریز اونیورسیته سینده اویرنجی لرین بیره بیر کیم لیک لرین کننرل ائتدیکده ن سونرا ایچری بوراخیرلار.

بللی اولدوغوندان هفته نین سونو چهارشنبه 19 اردیبهشت اویرنجی گونو اولاراق تثبیت ائدیلدیکده ن بو طرفا هر جور اولاسی گوستری و میتینگه قارشی گوونلیک تدبیرلری آرتیریلیب. اویرنجی لر ایسه سویوق قانلی لیقلا چهرشنبه گونون گوزله ییرلر. بیر چوخ اونیورسیته لرده اویرنجی لر بیلدیریلر یاینلایب و اویرنجی گونونون عزیزله مه سینده جیدی اولدوقلارینی سویله ییب لر.

سون گونلرده رژیم حجاب سیزلیغا قارشی قوندارما و یئرسیز اولاراق آرتیردیغی گونلیک تدبیرلری ایله داها آرتیق انسانلاری قورخودوب و سوسدورماغا چالیشیر. گونده ن گونه شهر بیر نظامی اتمسفره گیرمه گه یاخین لاشیر. بوتون به هده قورخولارا باخمایاراق اویرنجی لر و میللی فعاللار ایچره بویوک متینگ لرله باغلی حاضیرلیقلار گئدیر. آما هر کس بونو سورور: آذربایجان یئنه آیاقلاناجاق می؟ گلن گونلرده بو سورولارین طبیعی کی جوابینی هر کس آلاجاقدیر.