سیاسی یادداشت

گونئی آذربایجان چاغداش و یئنی تورکچولوک مرکزی

اسکی ده ن هر زامان تورکچولوکده ن دانیشاندا، بئیینده آنکارا جانلانیردی. سانکی آنکارا تورکچولویون تام گوبه یی ایمیش. آما یئنی دونمده داها ده نگه لر پوزولمایا باشلادی. آنکارا دا اولان تورکچولوک سیاسی ایسلاملا یئنی بیر سنتز اولوشدوردو. او سنتزین محصولو سنی آغیرلیقلی فاناتیک بیر تورکچولوک اولدو. بو تورکچولوک زامان زامان اوز اونمی نی ایتیرمیش و سیاسی آلاندان دیشاری چیخماق زوروندا قالمیش دیر. تورکیه ده امت چی آنلایشی گوجلنمکله برابر اینسانلار لیبرالیزمین مصرفی اولگولارین و سنی سیاسی ایسلامی اونم سه دیکلرینده ن و آیریجا تورکچوله رین فاناتیک داورانیشلاری سونوجوندا آیدین طبقه تورکچولوگو آشاغی لاماغا باشلامیشدیر. ساغ، سول و سیاسی ایسلامچی لار گوجلنمکله برابر میلتچی لر ضعیف له میشلر. گونده ن گونو تورکچولوک آغیرلیغینی و اونمی نی ایتیره ره ک آنکارا، تورکچولک مرکزلیگینده ن چیغماغا باشلامیشدیر.

آذربایجان جمهوریتی استقلالی نی الده ائتدیکده ن و رحمتلیک ائلچی بی جمهورباشقانی اولدوقدان سونرا تورکچولوگون مرکزی باکی یا داشینمیشدیر. تاسف لر اولسون کی سایسیز خیانت لر سونوجو ائلچی بیین دونمی سونا چاتمیش و علیئف لر عائله سی ایش باشینا گلدیکد ه ن بری باکی، سیاسی تورکچولوک باخیمیندان اونمی نی ایتریمیش. بو دفعا اوزلر تبریزه چئوریلمیش دیر. گونئی آذربایجان و اونون باش کندی ساییلان تبریزده یئنی تورکچولوک دالغاسی باشلامیشدیر. آما بو باشلانان یئنی دالغا ایسلام و تورکچولوگون سنتزی یوخ بلکه سیاسی ایسلام و رادیکال شیعه ده ن بئزمیش مدرن، لائیک، دمکرات و سکولار آغیرلیقلی یئنی تورکچولوک اولموشدور. بو تورکچولوگون آرخاسیندا گنج تورک آیدینلاری و اوزه للیکله اونیورسیته لی لر دایانمیشدیر. بو تورکچولوک فاناتیزمه دوغرو یوخ تام ترسینه مدرن دوشونجه لری آلقیلاماغا باشلامیشدیر. آنکارا تورکچولوگونون تملینده تورک اوستونلوگو اولسا بئله تبریز تورکچولوگو عدالت آنلایشلی و ساده جه میلی و اولوسال چیخارلارینی اونم سه مه یه باشلامیشدیر. بو تورکچولوگون آرخاسیندا برابر انسان حقوق لاریندان سوز ائدیلمه ک ده دیر. بوزقورد نشانلاری بو گون تورکیه ده خالق ایچره اولومسوز تپکی لره نده ن اولسادا، گونئی آذربایجاندا میلی موجادله میزین سموبولو حالینه دونوشمکده دیر. فارس فاشیزمی نی نین ایللر بویو باشلاتدیغی اریتمه سیاستی نی قارشی سرت تپکی اولان بو دالغا، عینی زاماندا یئنی ارتباطی آراجلارین و کوره سه للشمه نین ده اورتایا قویدوغو بیر حقیقت دیر. اویدو سیستم لری، اینترنت و تورک دیلینده اولان تلویزیون پروگراملاری بو دالغانی داها دا آرتیق گوجلندیرمیشدیر. بو گون تبریزده گنج قیزلار و حتی سئوگیلی لر بئله تورکجه مسائژلارا اوز دوندرمیشلر. گونده ن گونه تورک دیلی و تورکچولوگه اولان سئوگی و عشق یوکسه لیر و بو گونئی آذربایجانی یئنی بیر سیاسی آلانا سوخماغا چالیشیر. بو گون یئنی تورکچولوک دالغاسی گونئی آذربایجانی بورومه گه باشلاییر و کیمسه اونو دوردورا بیلمه یه جک. بو دالغانین ان گوجلو باشلانیش نوقطه سی ایسه بیر خورداد 1385 اولموشدور. آیدین گنجلیگیمیز بو دالغانین آرخاسیندا دورموش و اونو ساغلام دوشونجه طرزی اولاراق هر تورلو فاشیستی و راسیستی تهلکه لرده ن قوروماغا چالیشیر.

یئنی بیر خورداد بو دالغانین نه قده ر جدی اولاراق سیاسی و توپلومسال حیاتی میزی ائتگی لدیگینین بیر گوسترگه سی اولاجاق. بو گون داها آرتیق تورک دونیاسی گوزونو تبریزه و گونئی آذربایجانا تیکمیش دورومدادیر. تورکچولوگون یئنی بیر وئرسیون و واریانتی نی گنجلیگیمیز اورتا قویماقدادیر. آیدین گله جک، گلیشمیش و مرفه آذربایجان، اوزگور یاشام طرزی، دمکراتیک-لائیک دونیا و میللی برابرلیک بو یئنی تورکچولوگون مئساژلاری دیر.

گله جک بیزیمدیر

http://www.oyrenci.mihanblog.com