21فوريه دونيا آناديلي گونو موناسيبتيله تبريک:

حرکتيميزده قيزيل صحيفهلر

عليرضا صرافي

sarrafi2006@yahoo.com

30بهمن 1385

آناديلينه سايغي بسلهين سئويملي ديلداشلار!

آناديليگونو قورولتايي و مراسيمينين قورولماسينا غيرت ائدن دگرلي وطنداشلار!

سکگيز ايل اؤنجه يونسکو طرفيندن 21 فوريه دونيا آناديلي گونو اولاراق قيد اولوب، بيرچوخ اؤلکهلرده رسمي اورقانلار طرفيندن، بو گونده آناديلي شنليکلري قورولور. بيزه گلديکده، ميلّتيميزين آناديلينه سئوگيسيني بيلديرهجک بوتون ايمکانلارين محدودلاشديريلديغي کيمي، بو بؤيوک و معنالي گون ده - عار اولسون - رسمي مديالاريميز طرفيندن بير نئچه ايل اِفِره چيخماييب، تماميله گيزلي ساخلانيلميشدير!

نهايت بيرچوخ دوستلارين ايشبيرليکلريله (م. 2004=) 1382- جي ايل فوريهنين ايگيرميبيرينده ايلک دفعه اولاراق تبريز شهرينده آناديلي قورولتايي تشکيل اولدو. اونا آذربايجانين هر يئريندن او جوملهدن اورميه، خوي، مراغا، زنگان، اردبيل، ائلهجه ده تهران و کرجدن ده قاتيلانلار وار ايدي. قورولتايين اوغورلاريندن بيري، اونون زنگين قطعنامهسي اولدو. بيرلشميش ميلتلر تشکيلاتي کونوانسيونلارينا ايستيناداً، ديل حاقلاريميزين برپاسيندان سؤز ائدن بو قطعنامه، هامينين سسبيرليگيايله قبول اولوب، بير هفته چکمهدن اوچمين، اوچيوز، اوتوزاوچ ايمضانين دا گوجونه آرخالاندي و دؤرد ديلده، اؤلکه ايچي بوتون مسئوليت داشييان اورقانلارا، ائلهجه ده يونسکو و بيرلشميش ميلّتلر تشکيلاتينا سونولدو، بئلهليکله ده بيرينجي قورولتاي و قطعنامهسي ميلّي حرکتيميزين قيزيل صحيفهلريندن بيرينه چئوريلدي.

1383-1384-جو ايللرده ايکينجي و اوچونجو قورولتايلارين انگللنمهسينه باخماياراق، او بير بايرام کيمي بوتون شهرلريميزده، ائولرده کئچيريلمگه باشلاييب، خالقيميزين اؤز آناحاقلاريندان ال چکميهجگيني بير داها دا وورغولاندي.

بونا رغماً، بيزيم ايش باشينداکي بعضي جنابلارين، ميلتين بو دينج حرکتي و نجيب ايستکلريني دويوب، دينلهمکده قولاقلاري ساغير و ان ايلکين اينسان حاقلاريني قارشيلاماقدا آياقلاري آغير اولدو!

اونلار سکسن ايل اؤنجه يابانجيلارين اليله خالقين آياغينا وورولان بير دوگونو، رسمي سالونلاردا، دينج و دانيشيق يولو ايله آچماقدانسا، ايش بيلمهمزليکلري و ترس سياستلري اوزوندن، بوروشدوروب، داها دا دوگون سالماغا چاليشديلار! صميميت اوزوندن سونولان سوآليميزي، قاپالي قاپيلارلا جوابلاديلار.

آنجاق 1385-جي ايل خوردادين بيرينده، "يا اؤلوم، يا ديليم" باغيران ميلّتيميز، داها ائولره- سالونلارا سيغماييب، کوچه، خيابانلارا آشيب، داشدي و ديل دوشمنلريميزه، آذربايجان بؤيوکلوکده بير ميدان اوخودو، بئلهليکله يئني بير قيزيل صحيفهني ده حرکتيميزين تاريخينده آچميش اولدوق. منه ائله گلير کي، ميلّي حرکت تاريخينده بو دؤورو، دونيادا قبول اولموش نورملارلا آياقلاشماسي و مودرن، چاغداش و جسارتلي ادبياتينا گؤره، يئني بير فاز کيمي دگرلنديرمک اولار.

* * *

صاباح بلکه ده چوخ گئج اولدو، يوخاريدا اگلشيب، ميلّتيني آشاغيلايان وظيفهلي آغالار، قولاقلارين آچيب، تورک وطنداشلارينين حاق سؤزلريني ائشيتمگه جسارت ائتمهليديلر. تاريخ ثابيت ائتميشدير کي تمکينلي، مدني و دينج يوللارلا، اؤز ميلي حاقلاريني ايستهين بير ميلّت، واقتي گلينجه دوشمن قارشيسنا باشقا جور چيخماغي دا باجارميشدير.

خالقيميز دونيادا آنا ديلي حاقلاري اوغروندا ان چوخ ديرنن و ان چوخ هزينه وئرن بير ميلتدير. تکجه آلتميش ايل اؤنجه، آناديلي باشدا اولماقلا ميلّي حاقلاريني قازانديرماق اوچون، ايگيرميبئشمين اوغول- قيزي قوربان وئرديگيميزي آنارساق، گونده بير شهيد وئرديگيميزدن دانيشا بيلريک.

محض بو اعتيباره گؤره ده – من دئيرديم - آنا ديلي گونو، بينالملل بير گون اولماسينا رغماً هم ده بيزيم ان دوغما و ميلّّي بير بايراميميز کيمي قيد اولونا بيلردي.

* * *

يئري گلميشکن، بيرينجي آناديلي قورولتايي و (قارشيسي آلينان) ايکينجي و اوچونجو آناديلي قورولتايلاري و اونون يانيسيرا تبريزده کئچيريلن آناديلي مراسيملرينين قوروجو هيأتي عضولريندن بيري کيمي، اؤز آديمدان، ائلهجه ده بو قورولتايلار و مراسيملرده جانوديلدن امک صرف ائدن بوتون ميلّي چاليشقانلاريميز آديندان، بوتون ائلسئور و ديلسئور وطنداشلاريميزي تبريک ائديب، آناديلي بايرامينيز موبارک اولسون دئييرم.

عين حالدا بو 2007-جي ايلده آغير باسقيلارا معروض قالماسينا رغماً، غيرت گؤستريب، آنا ديلي قورولتايلاري و مراسيملري قوروجولارينين اليني سيخير، اونلارا اوغورلار ديلهيير، تدبيرلرينين اوغورلو کئچمهسيني آرزولاييرام.

امينم کي ميلتيميزين بو نجيب، مدني و تمکينلي حرکتي، آغزي ياوا دوشمنلريميزي سوسدوروب، اونون ايفتيرا و تکفير چوماغيني اليندن يئره سالاجاق. گلهجک بيزيمدير...

ياشاسين وارليغيني ياشادان ميلتيميز

ياشاسين آناديليميز

تهران-30بهمن 1385