یکشنبه 16 بهمن ماه سال 1384

اوستاد فرزانه یاس تؤرنی کومیتهسینین سون بیلدیریشی

تاریخ:15/11/84

بؤیوک آذربایجان میلّتی!
بیلدیگینیز کیمی آذربایجان فرزانهسینین بؤیوک علمی مؤوقعینی و هر طرفلی شخصیتینی گؤز اؤنونه آلاراق, «اونا لاییق بیر یاس تؤرنی قورولا بیلسین» دئیه «اوستاد فرزانه یاس تؤرنی کومیتهسی» آذربایجان میلّی حرکتینین تبریزدهکی چئشیدلی قوروپلار و جیناحلارینین نومایندهلری ائلهجه ده باشقا شهرلردن قاتیلان نومایندهلر طرفیندن سئچیلیب, یاراندی.
بو کومیته بئش فرعی کومیته: (تبلیغات, عومومی روابیط, مالی, تدارکات, انتظامات و ایداری ) نومایندهلرینین ایشتیراکی ایله ایشه باشلاییب, آردیجیل جلسهلر دوزنلهدی.
ایلکین جلسهده تؤرنین نئجه آپاریلماسی اوچون آشاغیداکی قرارلار آلیندی:
ـ تؤرن سامباللی کئچیریلمهلی.
ـ تؤرن ساکین شراییطده کئچیریلمهلی.
ـ سیاسی شوعارلار دئییل! یاس تؤرنینه اویغون دانیشیقلار آپاریلمالی.
ـ ائل آغساققاللاری باشدا اولماقلا تؤرنه مدنی شکیلده قاتیلیب, مدنی فورمادا, داورانیلمالی.
و...
بو آرادا اوستاد شهریارین وصیتینی و اوستاد فرزانهنین ائل آراسینداکی, مؤوقعینی, هابئله حیات یولداشینا دئدیگی آرزوسونو گؤز اؤنونه آلاراق, اوستادین مقبرهالشعرادا باسدیریلماسی اوچون چئشیدلی دؤولت ایدارهلری او جوملهدن شرقی آذربایجان اوستانداریسینین سیاسی موعاوینی و ایرشاد ایدارهسی و شهر شورا هئیأتینه موراجیعت اولوندو. آنجاق تاسوفله بو ساعاتا کیمی مسؤوللار هئچ بیر کسین جاواب وئرمهمیش، آذربایجان میلّتینی آسیلی قویموشلار.
هابئله عاییلهسی طرفیندن شام غریبان تؤرنی اوچون طوبائیه مچیدی دانیشیلیب, رزرو اولموشسا دا, لاکین مچید هیأت امناسی امنیتی سیخینتی و فیشارلار اساسیندا, بیر طرفلی اولاراق رزروی لغو ائتمیشلر. باشقا مچید اولاراق الصادق "ولیعصر" مچیدی ده دانیشیلیب, رزرو اولموشدور. آنجاق بو رزرو ایسه لغو اولونوبدور!
بئلهلیکله کومیته اؤز اوتوروملارینا داوام ائدرک, بوتون یؤنلری نظره آلاراق تشییع و دفن مراسیمی حاقدا بئله قرارا گلمیشدیر:
-تشییع یئری مقبرهالشعرادان و ساعات دوققوزدان اعتباراُّ باشلاناجاق.
ـ اوستاد فرزانهنین جنازهسینی قارشیلاماق اوچون, بیر نوماینده هئیأتی اوچاق مئیدانیندا حاضیر اولوب, تهراندان گلن هیئتله بیرگه جنازهنی تشییع اوچون مقبرهالشعرایه گتیرهجک.
ـ تشییع مسیری ایسه: مقبرهالشعرادان ثقهالاسلامین ائوینه قدر, سونرا اورادا ماشینلارا مینیب, دفن اوچون وادی رحمته ساری یولا دوشهجک.
ـ شام غریبان تؤرنینه ایذن وئریلمهمک اوچون, شام غریبان تؤرنی دفندن سونرا قبیر اوستونده کئچیریلهجک.
ـ بیر نئچه نفر اوستاد فرزانه حاقیندا دانیشیق آپاریب, اونون شخصیتینی و گؤردوگو ایشلردن، حاضیر اولانلارا دانیشاجاق.
اوستاد فرزانه یاس تؤرنی کومیتهسی, اوستده قئید اولونان برنامهنین ایجرا اولونماسینا تأکید ائدرک. بو برنامهنی یالنیز او مرحومون عاییلهسینین راضیلیغی ایله ایجرا ائدهجک، او مرحومون عائیلهسی راضی اولمازسا کومیته اؤزونو منحل بیلهجک قرارینا گلمیشدیر.
ایندی ایسه فرزانه عاییلهسینین چئشیتلی باسقیلار آلتیندا اولدوغونو نظره آلاراق و کومیتهنین هر طرفدن الی باغلی اولدوغونا گؤره, هابئله بوتون شراییطی گؤز اؤنونه توتاراق، کومیته اؤزونو منحل اعلان ائدیر.
آنجاق کومیتهنی تشکیل ائدنلر هامیسی وار گوجلریله اوستادین عاییلهسی ترتیب وئرن برنامه اساسیندا تؤرنه قاتیلاجاق و آذربایجان میلّتیندن ووقارلا او مرحومون عاییلهسی طرفیندن دوزنلهنن تؤرنه قاتیلمالارینی ایستهییر. بونونلا دا بیلدیرمک ایستردیک کی بو گوندن اعتیبارا کومیته هئچ بیر مسألهیه سوروملو دئییلدیر.

اوستاد فرزانه یاس تؤرنی کومیتهسی