طهراندا، دونیا آنا دیلی گونو سئمیناری،اوستاد فرزانه نین نامینه حصر اولاراق قورولدو

فئوئرال(فئوریه) آیی نین 21/ ایسفیند آیی نین 2- نده، دونیا آنا دیلی گونو موناسیبتیله، ستارخان مدنیت اوجاغی نین چالیشمالارینا گوره، طهراندا، حکیمیه فرهنگسراسیندا، دونیا آنا دیلی گونو سئمیناری، رحمتلیک اوستاد پروفسور محمدعلی فرزانه نین نامینه حصر اولاراق قورولدو.

دونیا آنا دیلی سئمیناری بیر دقیقه سایغی دوروش ایله اوستاد فرزانه نین مقامینه، ماکی و بزیرقان شهرلرینده یئنی اولایلاردا تورک شهیدلرینین نامینه و 14 ایل اونجه خوجالی فاجیعه سینین شهیدلری یادینه باشلادی.

سعید بی موغانلی بو سئمینارین آپاریجی سی اولاراق، اوستاد فرزانه نی آذربایجانین دیل وادبیات، فولکلور و هابئله میللی دیره نیش ساحه لرینده ان تانینمیش بیر تورک عالیمی کیمی تانیتدیردی.

سونرا عدالت دومان، قاراداغلی شاعیر، «فرزانه اولمز» آدیندا بیرشعر اوخودو:

اودلاردان یارانیب یانان بیر اوره ک،

یانار، نور سپه لر، کول اولا بیلمز!

آیدین عالیملرین کونلو آینادیر،

اونون قارشیسیندا، تول اولا بیلمز!...

چکسه ده ائللرین دردین نیسکیلین،

فرزانه لر اؤلمز، دونیا وار بیلین!

اگر یوخسا فرزانه سی بیر ائلین،

عدالت دئمه یه دیل اولا بیلمز!

دومانین شعریندن سونرا فرزاد صمدلی بیرینجی دانیشان اولاراق تیریبون آرخاسینا چیخدی. او دئدی:منجه هر بیر آذربایجانلی تورکون اؤز یاشاییشیندا، 4 قوتسال ناموسو واردیر:آنا دیل، آنا یورد، آنا دین و آنا.

صمدلی «آنا دیلی»نی ان بویوک میللی ناموس تانیتدیراراق، هر بیر میللتین مدنیت، تاریخ، هونر و شرف عوصاره سینی آنا دیلینده بیلدی.او آنادیلیمیزی میللی وارلیقیمیزین خولاصه سی بیلرک «قاموسوموز؛ ناموسوزدور»،آتالار سوزونو ایفاده ائتدی.صمدلی بی دونیا دیللری آراسیندا تورک دیلین ان گوجلو دیللردن بیریسی و تورک لهجه لری آراسیندا آذربایجان دئییشین ان شیرین و آخیجی لهجه لردن بیری دییرک، آذربایجان تورکجه سینی «بال و سود» دیلی آدلاندیردی. اوآرتیردی:ان آزی کئچن 1200 ایلده، بیزیم بولگه میزده، تاریخ بویو تورکون دیلی ان گوجلو و چوخ دانیشیلان دیل اولاراق، آذربایجان تورک میللتی بوتون دیللره سایغی گوستریب و خوصوصیله تات وعرب دیللرینین گوجلنمه سینده نهنگ شاعیرلر، فیلسوفلار و حکیملر تقدیم ائدیبدیر. آنجاق اواعتیراض اولاراق سویله دی:تاسسوفلر اولسون کئچن 85 ایلده تورک دیلینه تاتلار طرفیندن سایغی یوخ، بلکه چوخلو سایغیسیزلیق گورونوبدور!

صمدلی دونیا بشر حاقلارینین اعلامیه سین و هابئله دونیا اوشاق حاقلارینین کونوانسیونونون باغلی مادده لرین تعلیم تربیت ساحه سینده اوخویاراق، بوگونکو ایران اولکه سینده تعلیمات سیاستلرین سرت قینادی و ایرانین اویره تیم گئدیشاتی نین آماجلارینی، دونیا تانیدیغی و گئتدیگی یوللارین بلکه ده ترسینه بیلدی.او بوگونلر بوتون ایرانین یئنی مکتبلرین، 140 ایل اونجه دن، تبریزلی میرزه حسن روشدیه کیمین بویوک اینسانلارین چالیشمالاری نتیجه سی بیلیب ، ایلک یازیلان درسلیکی ایران یئنی تعلیمات تاریخینده تورکجه دئییب، بوگون اوشاغلار باغچالاریندا و هابئله مکتبلرده مودافیعه سیز تورک کورپه لرینی، سیتیماتیک اولاراق آسیمیلاسیونا و الیناسیونا ساری سوروندورمک سیاستینی کولتورل بیر جنوسایدا بنزه تدی. او حاکیمیتدن ایسته دی مهران رحیمی کیمی قوشاچایلی و آلتی یاشلی اوشاغلارین سوزونو ائشیتسین:دای بسدی، من فارس ده ییلم، منیم آنا دیلیمده مکتبلرده درس وئرین!

صمدلی ایکینجی ناموسو «آنا یورد»وموز بیلدی.او 35میلیون آذربایجان تورکلرینه، آذربایجانی آنا یورد و ایرانی بیر اولکه کیمی سویله دی. او دئدی: بیز اولکه میزی ساده جه ایران- عراق ساواشیندا مودافیعه ائتمک اوچون یوزمینلر شهید و یارالی وئرمیشیک.بلکه ده بیزیم یالنیز شهید لریمیزین سایی بو گونکو ایران ائرمنی لرین دیری لری ساییندان قات قات چوخدور.صمدلی حیرتانرک دئدی: انجاق تاسسوفله موسلمان آذربایجانلی لارین مدنی حاقلاری عیسوی و قاراباغ ایشغالچی لاریندان حیمایت ائدن ائرمنی لره باخاراق قات قات اسکیک دیر!

او حاکیمتین بئله تبعیضاتلی داورانیشین و هابئله کئچن 85 ایلده موختلیف سوزلر و فرقلی بهانه لر ایله آذربایجان تاریخی اراضی سین بولمک سیاستینه ایستر ایسته مز باغلی اولان نتیجه سینی، بو گونکو کورد فاشیستلری نین آذربایجان آلینی نا وحشی هوجوموندا گوردو. صمدلی دئدی: او زامان کی بعضی شخصلر کوردو ان اصیل ایرانلی وطنداشی کیمی آدلاندیردیلار،او زامان کی بعضی مسئوللار غربی آذربایجاندا کوردلرین اوجالان کیمی بیر قانیق تروریست اوچون ییغینجاق ایجازه لری وئردیلر، او زامان کی عراقدان قاچان کوردلری و هابئله کوردوستان ائلاتینین یوز مینلر نفر ساییسیندا غیری بومی اولان کوردلرین آذربایجانین غربینده یئرلشدیردیلر و هابئله یوز مین لر نفر تورکو آجلیقدان و ایشسیزلیگدن کوچمه یه تشویق ائتدیلر...، آیدینجاسینا بئله بیر آجیناجاقلی گونلرین گلمه سی گوزله نیلیردی.

صمدلی دئدی: حاکمیت تئزلیکجه اوگئی- دوغما تارتیشمالارینا سون قویوب ، شومال غرب بولگه لرینده ایجتیماعی آمانلیقین کسینتی سیز سورمه سین ایسته ییرسه، آذربایجان تاریخی ایالتینین ایعاده سینه رسما ایقدام ائتمه لیدیر، چیخمازلیغدا قویولموش آذربایجان مملکتی نین یولارینی بو گونکو ان قیسا ، داریسقال و قانلی یوللارین اوزانماسی و گئنیشله نمه سی ایله ایصلاح ائتمه لیدیر.او دئدی:تاسسوفله طهران دوولتی طرفیندن کئچن 85 ایلده آذربایجانین، آذربایجانات وضعیتینه کئچمه سی، کورد فاشیستلرینی قیزدیریب و خاریجدن گلن سیلاحلی کوردلر تحریکاتی ایله، کرکوک گئدیشاتی نین اوخشار خولیانی، پژاکین تروریست طرفدارلارینین ذهنلرینده جانلاندیریبدیر.آنجاق آج تویوق یوخودا داری گوره ر!

صمدلی بی اوچونجو ناموسو «آنا دین»یمیز آدلاندیردی. او ایسلام دینینی ان مترقی و متعالی بیر دین کیمی اینسان اوچون تانئیدیب قورآنی کریم بویوردوغونا و هابئله شیعه نین اوصولی مذهبینه دایاناراق، عدالتین یاییلماسین دینسل شوعارلاریندا ان اونملی بیر عامیل کیمی گوروب بئله لیکله ایراندا بوتون قومیتلر و میللتلر آراسیندا تبعیضاتا سون قویولماسینی ایسته دی. او دانمارک درگی لرینده رسول الله (ص) مقامینه ایهانتی محکوم ائدرک، ائرمنی لرین آغدام مچیدینده داها بویوک ایهانتلری قارشیسیندا بو گونکو سوکوتو، اوتاندیریجی و اوساندیریجی بیر سوکوت بیلدی.

صمدلی دوردونجو ناموسو «آنا» بیلدی.او دئدی هر کیمسه او اوچ ناموسو قوروماسی، آناسی دا هاوا دی!

ایکنیجی دانیشان یوسیف بی فرزانه ایدی. اودانیشیقلارینین باشلانیشیندا سئمینارین قوناقلارینا اوز دوتوب دئدی: تبریزده اوز شهریمیزده، اوستاد محمد علی فرزانه نین یاس توره نینده، قارداشیمین عزاسیندا،موختلیف سیخینتی لارا گوره، منه و فرزانه نین عائیله سینه دانیشماق ایجازه سی وئریلمه دی. ایندی من چوخ سئوینیرم کی ان آزی بورادا اوستاد فرزانه نین خاطیره سین عزیز لمکدن اوترو دانیشا بیله جه یم!

یوسیف بی فرزانه ، اوستادین علمی یاشاییشیندان، مدنی چالیشمالاریندان و میللی دیره نیشلریندن دانیشاراق «آنا دیللیمیزی نئجه اویرندیم؟!» آدیندا اوستادین بیر یازی سینی سئمیناردا یایدی.

سونرا مهندیس حسن راشیدی تریبون آرخاسینا چیخدی.راشیدی دونیا آنا دیل گونونو تبریک دییه رک، آذربایجان میللتینه باش ساغلیغی وئردی!

حسن راشیدی اوستاد فرزانه نین یاشاییشیندان بعضی اوزه ل و گوزه ل خاطیره لر سویله یه رک، دیل قونوسونا داخیل اولوب دئدی: قوی بوتون دونیا بیلسین! بو گون ایراندا 35 میلیون آذربایجان تورکونون دیلینه،ان طبیعی و ال وئریشلی حاق اولاراق، مکتبلرده و بیلیم یوردلاردا اوخوماق ایجازه سی وئریلمیر.او دئدی: ایراندا آذربایجانلی لار اکثریت اولاراق اقلیت حاقلارینداندا محرومدورلار.

راشیدی بو گونکو ایرانین تعلیمات ساحه سینده یورودولن سیاستلرینی، افغانیستان و عراق کیمی اولکه لردن ده دالییا قالمیش بیلدی.

او دئدی: بو گون ایرانین غربی و شرقی قونشولوغوندا اولان اولکه لرده نئچه دیل رسمی دیر. هابئله چین کیمی بیر میلیارد 300 میلیونلوق مملکتده،البته موختلیف آسمیلاسیون سیاستلرینه رغما، شرقی تورکیستان ایالتینده، اون میلیون اویغور تورکونه موختاریت وئریلیب و چینین رسمی ایسکیناس لاری اوستونده اویغور دیلینده، عرب الیفباسیندا چین دیلی قیراغیندا پارا اوچون تانیتیم جومله لری یازیلیبدیر.

سونرا راشیدی ایسرائیل دوولتینی ان غاصیب بیر دوولت بیلرک، او غصبی جوغرافیادا عربجه نین عیبری دیلیندن سونرا رسمی دیل اولماسی و بوتون پارالارین و تابولولارین ایکی دیلده یازیلماسینی وورغولادی. او دئدی: شوبهه سیز صهیونیستلر موسولمانلاری اؤزلری اوچون ان بویوک خطر سانیرلار، آنجاق بو باخیشا رغما ،میللتلره دیل و فرهنگ حاقلاری نین وئریلمه سی اوقدر طبیعی و آیدین دیر کی، بو حاقلارین اونونده هئچ بیر موخالیفت مومکون اولا بیلمیر.

جمال بی فیض اللهی سمئینارین ایکینجی شاعیری اولاراق اوستاد فرزانه و هابئله دونیا آنا دیلی گونو آدیله چیخیش ائتدی.

سون دانیشان اکبر بی آزاد ایدی.

آزاد سوزلرینی دورد قونودا حصر ائتدی:

بیرینجی قونو اوستاد فرزانه نین عومور بویو آذربایجان یولوندا سارسیلماز و یورولماز چالیشمالاری نین آچیقلاماسی ایله باشلادی. او دئدی : فرزانه اولمه ییبدیر و اولمه یه جکدیر نئجه کی بوتون آذربایجان یولوندا چالیشانلارین و فدا اولان لارین یادی خصوصوصیله شهید سید جعفر پیشه وری نین آدی، هئچ بیر زامان اونودولمایاجاقدیر.

آزاد ایکینجی قونودا آذربایجان میللتینه، دوشمانلار طرفیندن توره دیلمیش سوی قیریملار باره سینده دانیشدی.آزاد آرتیردی: اوروس، ائرمنی، کورد و آریائی لر طرفیندن مشروطیت، جیلولوق، سیمیتقولوق و دئمکیراتلیق چاغلاریندا باش وئرمیش دهشتلی و وحشتلی سوی قیریملار هئچ زامان اونودولمایاجاقدیر و توکولن مظلوم قانلار هئچ بیر کیمسه یه باغیشلانمایاجاقدیر!

او دئدی:کئچن 85 ایلده آذربایجانلی لارین حقلری اونودولوب و دانیلیبدیر.مثلا 29 بهمن کیمی تبریزین بویوک میللی قیامیندان هئچ سوز یوخدور! اوبوگونکو فارس مودیریتینی قینایاراق، تورکلرین جیدی شکیلده مودیرته کئچمه لرین طلب ائتدی و تورک مودیرتین 1000 ایللیک بیر اوغورلو مودیریت کیمی تانیدی.

سونرا آزاد اوچونجو موضوعسونو آنا دیلی گونونه ایختیصاص وئردی. آزاد سویله دی: بو گونلر ایران صدا وسیماسیندا هئچ بیر سوز 21 فوریه نی تانیتدیرماق اوچون دانیشیلماییبدیر. او آنا دیلی گونونو عزیز له یرک بئله بیر گونده اوشاقلاری مکتبلرده و اویرنجی لری بیلیم یوردلاردا ، انا دیلیمزدن مدنی مودافیعه یه سسلدی.

اکبر آزاد سوزلرینی کورد و ائرمنی مسئله سیله سون قویدو. آزاد دئدی: تورکامانچای و گولوستان موعاهیده لری زامانیندان ائرمنی لراوروسلار ایله بیرلیکده، ایش بیرلیگی یاپاراق، آذربایجانلی لارین میللی آماجلاری اؤنونده دوروبدورلار. او ستارخان جنابلاری نین ائرمنی یپرم الی ایله شهادتین وورغولایاراق آرتیردی:آذربایجان تورکلری هئچ بیر زامان ائرمنی داشناک لاری نین خطرین اونوتمامالی دیرلار.

سونرا ازاد بی کوردلرین یئنی فاشیستی داورانیشلارینی ماکی و بازیرقاندا شیدتله محکوم ائدرک، کورد آیدینلارینی بئله فاشیستی و تجاوزکارانه داورانیشلار اوچون سرت قینادی!

او کورد میللتینه اوز سایغی سین بیلدیره رک، آرتیردی: مشروطیت زامانیدان سونرا ایران محروسه مملکتلرینده یالنیز آذربایجان، کیرمان و بلوچیستان، فارس و خوراسان آدلی مملکتلر رسما تانیلمیشدی و کورد بولگه لری سادجه بیر بولگه جیک و ماحال اولاراق آذربایجانا باغلی اولموشدور. بئله لیکه ازاد کوردلرین بوگونکو توپراغلارین آذربایجانین تاریخی اراضی سی ایچره تانییاراق، فاشیست کوردلر مسئله سینه سون قویماق اوچون تکلیفلر وئردی.او آذربایجانین تاریخی ایالتینین قایتاریشن و چهار محال بختیاری کیمین قارا سو اوستانی نین بیجار،قوروه،سونقور،ائلیق و یاس کند شهر لریندن یارانماسی نی ایسته دی.

بو توره نین سونوندا تئیمور بی نصیری فرد اوز شعرینی قیرائت ائتدی.

دانیشیقلار آراسی عبدالله اوجالانین و کورد ترورچو لارینین ایفشاسیندا موختلیف شعر قطعه لری قیرائت اولدو.

هابئله ایشتیراکچیلاردان ایسته نیلدی کی شنبه گونو،قوم شهرینده، استانه میدانیندا، ساعت 15 ده خوجالی فاجیعه سینین ایل دونومو توره نینده مقدورجاسینا شیرکت ائتسینلر.

روح الله ستاری- تهران