مرحوم سهند افشاري جنابلارينين اوچونده قورولان ياس تؤرني سامباللي كئچيريلدي !

هفته اوچو 22/12/84 آذربايجانين ايگيد اوغلو مرحوم سهند افشارينين اوچونده قورولان ياس تؤرني آذربايجانين دؤرد بير بوجاغيندان قاتيلان ميلي چاليشقانلارين حوضورو ايله سامباللي كئچيريلدي. مسجيدن سونرا دا سهندين فيكيرداشلاري بير داها دؤنمز سئويمليلرينين قويلاغي اوزره توپلاشديلار.

هفته اوچو 22/12/84، ساعات 30/13ـ دان 30/15 ـ ا دك تبريزين شهدا كويو ايمام زمان(عج) مسجيدينده مرحوم سهند افشارينين اوچو موناسيبتي ايله ياس تؤرني كئچيريلدي. آذربايجانين دؤرد بوجاغيندان يوزلرجه(5 مين نفر جيواريندا) سهندين فيكيرداشلاري، آذربايجان شخصيتلري، يازارلار، اديبلر، شاعيرلر و . . . ياس تؤرنينه قاتيلميشديلار. آغلار گؤز ايله گليب ـ گئدن آذربايجان سئورلر، سهندي واختسيز و چوخ تئز ايتيرديكلرينه آجيميش، قهرلنميش و اوزگون ايديلر. مسجيدده تؤرن بيتندن سونرا، قاپيلاريندا سهندين اوجا روحونا فاتيحه اوخوندو. بورادا سهندين ايستهينلري روحونا فاتحه اوخويوب، خاطيرهسين عزيزلهمك اوچون رحمت واديسينه يوللانديلار. آخشام قاش قارالماقدا ايدي و گونشين آل ياناغي سهندين يوخلوغوندان سارالماقدا. هامي حوزونلو و هر كس گؤزونده ياش، كؤنلونده درد و الينده شمع ،سهندين مزاري اوسته مبهوت اولاراق، باخار قالميشدي. فاتيحه اوخوندو و بورادا اوستاد صمد سردارينيا، موهنديس آيدين صادقي و عاشيق جبرئيل خليلي جنابلاري چيخيش ائديب و سهندين شخصيتي، ادبي و هابئله چاليشمالاريندان سؤز آچيب، اونون يولونون داوامينا سؤز وئرديلر. مراسيم سهندين روحونا بير داها فاتحه اوخونماقلا باشا چاتدي اما سهندين ايستكليلري اونون چوخ سئوديگي (آذربايجان سنسن منيم . . .) ماهنيسيني اوخوماميش مزاري ترك ائدهمهديلر. مارش اوخوندو و ايشتيراكچيلار ماشينلارا اوتوروب، شهره ساري يوللانديلار.

حاشيهده:

1_ مسجيد مراسيمي بيتندن سونرا، سهندين فيكيرداشي و يولداشي اولان محمد فرشي جنابلاري ياخالانيب و خبر تنظيم اولان لحظهيه دك بوراخيلماييبدير. دئمك لازيمدير كي، فرشي جنابلاري تؤرندن فيلم چكيردي و اوندان سوواي ايكي نفر ده امنيتي گوجلر طرفيندن مراسيمين باشاباشيندان و بوتون چؤهرهلردن فيلم چكيرديلر.شخصي گئيمده اولان مامورلار مسجيدين ايچي و هندهورينده گئنيش صورتده گؤزه چارپيرديلار. هابئله مراسيمين كئچيريلمهسييله باغلي امنيتي گوجلر طرفيندن مرحوم سهندين عاييلهسينه چوخلو فيشار گلينيب و ايستهنيلميشدي كي، مسجيدده آذربايجانچيلار طرفيندن يازيلان پارچالار دووارا وورولماسين.

2_ائشيتديگيميزه گؤره محمد فرشي جنابلاريندان علاوه نئچه نفر ده مسجيدين قاباغيندا ياخالانيبلار.

3_مرحوم سهندين ايشلهديگي ايداره، دارايي طرفيندن هئچ بير اعلان يا باشساغليغي وئريلمهميشدي.

روحو شاد

يولو گئدرلي اولسون

22/12/84