آذربایجاندا اویرنجی گونو: 19 اردیبهشت ان اویغون گون

هر بیر اویرنجی سل حرکاتین اونملی اوزه للیکلرینده ن بیرسی او حرکاتین باغیمسیزلیغی دیر. اگر اویرنجی حرکاتی بو اوزه للیگینده ن واز گئچرسه او زامان اوز وارلیغین و تمییزلیگین سورغو آلتینا آپارجاقدیر. قدیمکی و یئتمیش اینجی ایللر ده اویرنجی اولان یولداشلاریمیزین سویله دیکلرینه گوره آذربایجان اویرنجی حرکاتی یئنی دونم ده ان آز 1370 اینجی ایلده ن بری بوتون اونیورسیته لرده و اوزه للیکله تبریز اونیورسیته سینده باشلامیشدیر. 1371 اینجی ایلین باهاریندا تبریز اونیورسیته سی اویرنجی لری ارمئنی و داشناکلارا قارشی ساعت قاباغینا قده ر یورویه رک اوز اعتراض لارینی بیلدیرمیشلر و بو حادثه نین خبری ایسه سلام آدلی گونده لیکده یاینلانمیشدیر. او زامانین اویرنجی لرینده ن اولان مجید، ایوب، علیزاده، کیومرث، صفر، جلال، احمد، علی، صالح، نادر، سیاوش و... امکلری اولموشدور. اونلار بیرینجی دفعه اولاراق تبریز اونیورسیته سی نین ائشیگینه چیخاراق داها ساغ-سول و مذهبی شعارلار وئرمه میش بلکه یالنیز و یالنیز آذربایجان ملی منفعت لری آماجی ایلا شعارلار وئرمیشدیلر. ایشین ان ایلگینج یئری اودورکی حتی اویرنجی لرده ن بیرسی پالتارلارینی چیخاراراق اعتراض اولاراق اوزونه اوت وورماق ایسته میشدیر.

خوجالی فاجعه سینه قارشی اولان اعتراض ایسه بیر ایل اونجه کی اعتراضین آردینجا 1372 ینجی ایلین اردیبهشت آییندا اوز وئرمیشدیر. او گونکو اعتراضدا یئنه تبریز اونیورسیته سی اویرنجی لری تبریز دانشگاهینن سلف سرویسی قارشیسندان باشلایاراق اونیورسیته نین دیش قاپیسینا دوغرو یوروموشلر. او گون حراست مامورلاری قاپیلاری باغلایاراق اویرنجی لرین ائشیگه چیخماقلارینا ایذین وئرمه میش و نتیجه ده صفر آدلی اویرنجی سلف سرویسین قارشیسیندا ائرمنی لرین جنایتلرینه قارشی دانیشمیش و ایرانی ائرمنی لری یاردیم ائتمکده ن چکینمیشدیر. بو اولایدا کریم آدلی اویرنجی حراست مامورلاری طرفینده ن تبریز اونیورسیته سینین ریاست حوزه سی قارشیسندا دویولموشدور.

عینی زاماندا تهران اونیورسیته سی اویرنجی لری ایسه تهراندا ائرمنی سفیرلیگینین قارشیسندا متینگ گئچیرمیشدیلر. بو میتنگه بیر چوخ آذربایجانلی اویرنجی قاتیلمیش و نهایتده پلیس مامورلارینین دخالتی ایله اولای بیتمیشدیر.

آنجاق 19 اردیبهشت 1374 اولایی داها جدی و داها گوجلو اولاراق دوزنله نمیش و بویوک مقیاسدا تبریز اونیورسیته سی قارشیسندا کئچیله ره ک شونیزمی قورخویا سالمیشدیر. بو گونده مینلر اویرنجی نین دوزه نلدیگی متینگ ده آذربایجان اویرنجی سی سسینی بوتون آذربایجانا چاتدیرمیش و رژیم ین بو حرکته قارشی اولان فعالیتی سونوچسوز قالمیشدیر. بو مراسیمین دوامیندا بیر نئچه گونده ن سونرا اورمیه اونیورسیته سی اویرنجی لری ده تبریزده کی قارداشلارینین سیسینه سس وئرمیش و اعتراض متینگی دوزه نلمیشلر. دئمک 19 اردیبهشت گونو و اویرنجی گونو آدلانان بو گونون مراسیمی گئچمیشده کی مراسیملرین دوامی اولاراق دیرلندیریله بیلیر. بو گونون اعتراضی بیرینجی اعتراض یوخ بلکه ان ائتگین و ان تاثیرلی حرکت لرده بیریسی اولموشدور.

ایستر ایستمز او گون آذربایجان اویرنجی سی اوز منفعت لرین سراسری اویرنجی سل حرکتلرده ن آییرمیشدیر. آذربایجان اویرنجی سی نین دوشونجه سینده اولان ساده جه میللی ایستکلر اولموشدور و اونا گوره ده اویرنجی گونونون تانینماسینین اساس سببی بو دوشونجه نی باغیمسیز بیر دوشونجه اولاراق، باشقا جریانلارا آسلانمادان، تک باشینا و باغیمسیز بیر جریان اولاراق هر کسه تانیدیلماسیدیر. دونیانین هر بیر یئرینده اویرنجی گونو ساده جه اویرنجی یه عاید اولمالی دیر. عجبا ایندی اویر ه نجی اولمایان و داها دوغروسو اویرنجی حرکاتیندا یاخیندان هئچ بیر ائتگیسی اولمایان بیری لری بو گونون تانیتیمی ایله ایلگیلی نه قده ر حاقلی اولا بیلر لر؟ بورادا بیزیم آماجیمیز هئچ بیر کسین فیکیرینه سالدیرماق و یا بیرسینی سوچلاماق دئییل، آما اویرنجی لرین اکثریتی طرفینده ن تانیملانان بیر گون و بو گون ایله ایلگیلی بیر پارا مراسیملر کئچیریلدیکده ن سونرا بو یله بیر فیکیری ایره لی آتیب و آذربایجان اویرنجی گونون باشقا بیر گونه سالینماسی، کیمی لرین خئیرینه و کیمی لرین و هانسی آماجین خیرینه و یا ضررینه تماملانا بیلیر؟ بیزده هر کس کیمی دمکراتیک و تنقید آماجی ایله یازیلان بوتون یازیلارین طرفدارییق و داها دوغروسو اونو مقصده اویغون گوروروک، آما فیکیرلرین ایفاده ائدیلمه سینین زامانی و مکانی نی دیقته آلاراق آذربایجانین میللی منافعین هر زامان گوز اونونه قویمالییق. اومید ائدیریک امنیتی اورتام ایمکان ساغلادیغی قده ر اویرنجی لر موضو ایله ایلگیلی اوز فیکیرلرین ایره لی سورسونلر.

آذربایجان میللی حرکاتینین ان صادیق، ان آییق و ان چالیشقان اولان قولو دایما شیدتلی باسقی لارا معروض قالماقدادیر. آسمک طرفینده ن یاینلانان آذربایجان سیاسی محبوسلارینین لیسته سینده یئر آلان اویرنجی سای سی، ساده جه حاکمیتین بو جریانی یولدان چیخاریب و اونا مغلوب ائتمه گه شدیتلی جهد گوسترمه سینین بیر تانیقی دیر. هرکسین بیلدیگی کیمی بو باسقیلار یئنه دوام ائتمکده دیر و بو آن یولداشلاریمیزین نئچه سی حبسه آلینمیش و نئچه سی ده دائما اطلاعات مامورلاری ایله گیزلن پانج اویناماقدادیرلار. عجبا رحمتلیک دوستوموز سهند بی افشاری نین یاس توره نینده یولداشلاریمیزا اولان باسقینین اساس نده نی نه ایمیش؟ سون واختلاردا بوتون اونیورسیته لرده بیزه اولان باسقی آرتیریلیر بئله بیر اورتامدا بو حرکتین یاردیمینا قالخماق و اونون ایستکلرینی دونیا سویه سینه چاتماق هر بیر میلیتچی نین بورجودور. چوخ طبیعی دیر کی بو حرکت و بو اوجاق سونمه یه جک. بیز هر بیر آغیر شرایطده یئنه یولوموزا دوام ائده جه ییک. بویله بیر دورومدا بعضی قلمداش یولداشلاریمیزین 19 اردیبهشت له ایلگیلی دوشونجه لرینین یئرینی بوش گوروروک. اومید ائدیریک بوتون اویرنجی لریمیز و اونیورسیته نی بیتیره ن یولداشلاریمیز ال اله وئره ره ک یئتمیش ینجی ایللرده ن بری آلولانان بو اوجاغی داها ایتستی و داها ایتی ساخلایاق. من بورادا بیر اویرنجی اولاراق او گونکو و بو گونکو اویرنجی یولداشلاریمین قارشیسندا باش اییره م و دئییره م کی " گله جک بیزیمدیر".

24 اردیبهشت 1385، دانشگاه تبریز، مهدی. ع