مهاجر آدلی آغاجیمیزین بیر بوداغی دا قیریلدی

عزیزیم اولو داغلار

چشمه لی سولو داغلار.

بوردا بیر ایگید اولوب

گوی کیشنر بولود آغلار.

***

عزیزیم وطن یاخشی

کؤینگی کتان یاخشی.

گزمگه غریب اؤلکه

اولمگه وطن یاخشی.

***

عزیزیم آخار گئدر

سو گلر آخار گئدر.

دونیا بیر پنجره دیر

هر گلن باخار گئدر.

***

عزیزیم گول آنباری

گول اکدیم گول آنباری.

هیجران قویمور گؤز آچیم

درد قویمور گولم باری.

 

شفاهی خالق ادبیاتیمیزدان اولان بو یئتگین, معنالی و چوخ ده یرلی بایاتیلاری یازیلی ادبیاتیمیزا کیم ارمغان ائتمیشدیر؟

شوبهه سیزکی, هامیمیزین یاخشی تانیدیغیمیز ادبیاتیمیزین جفاکئشی, ميلی ده یرلریمیزین کئشیکچیسی اوستاد محمدعلی فرزانه اونلاری بیرینجی کره اوخوجی آیدیتوریاسینا چیخارمیشدیر. من, بو بایاتیلاری اوستاد فرزانه نین " بایاتیلار" آدلی کتابیندان اؤرنک گوؤتورموشم.

ائل آغ ساققاللاریمیزدان ائشیتديگیم بئله بیر سوز وار: هر نه یه امک صرف ائدیلیرسه او ایتمیر. بو حیاتین قانونی دیر. اولا بیلسین کی, بعضا اؤن پیلاندان آرخا پیلانا کئچیر, آما زامان کسيگینده یئنه اؤز موقعینی الده ائتمیش اولور. ائله همن سببدن دیرکی, من بو گون بو بایاتیلاری یازیما بیر نؤع آچار سئچمیشم..

نئچه گون اونجه ائل آغ ساققاللاریمیز,ادبیاتیمیزین جفاکئشی, ملت ایناميلی تدقیقاتچی اوستاد محمدعلی فرزانه حیاتلا وداعلاشدی. اوندان بیزه نه لر قالدی؟

اجازه نیزله من سؤزومی بو جان اوزن ایتگیمیزله باغلی بیلیکلی عالیم, تورکولوق, ادبیات شوناس دوکتور جاواد هیئتین باش ساغلیغی ایله آچماق ایستردیم. دوکتور جاواد هیئت اوره ک یانغیسی ایله نئجه ده معنالی یازیر.او یازیرکی" دوکتور فرزانه نین آدی و عزیز خاطيره سی مدنیت تاریخیمیزده همیشه قالاجاق و گنجلریمیز, گله جک نسیللر اونون اثرلریندن و حیاتیندان ایلهام و فیض آلاجاقلار.

چوخ ده یرلی,معنالی, یئتگین و اوره ک یانغیسی ایله یازیلان بو باش ساغلیغیندان سونرا من سؤزومی دورد ميصراعلیق بیر شعر ایله داوام ائدیرم. نییه کی, بو ده یرلی سؤزلردن سونرا اونون تاثیر دایره سیندن کنار منیم صؤحبته کئچمه ییم بیر آز چتین اولار.اونا گؤره ده من ایسته ییرم ميلی ده یرلریمیزین ان گوجلی قوللاریندان اولان شعر صنعتیمیزین نهنگ ليگینه سیغینیب سؤزه باشلاماغا ايستيقامت الده ائدیم:

بو عؤمور هارداسا دایاناجاقدی.

دئییرم کاش اوندا وطنده اولاق.

تورپاغین اوستونده غریب یاشادیق

تورپاغین آلتیندا غریب اولمایاق.

بو معنادا اؤلکه دن کناردا اولان قوللی- بوداقلی مهاجر آدلی آغاجیمیزین, بارلی- به هرلی نهنگ بیر بوداغی دا قیریلدی. بو بوداغین کؤلگه سی بیزی هئچ زامان اوز کؤلگه سی آلتیندا مورگی دویمه یه چاغیرمامیشدی. او, بیزی دائیما صاباحین خئیرلی ایشلری اوچون کؤلگه سی آلتیندا بیر آز دینجلمه یه,آزاجیق نفس درمه یه, یئنی دن قوت توپلاماغا, معنویاتیمیزلا جیلالانماغا, ميلی ده یرلریمیزدن قیدالانماغا سفربر اولماغا چاغیرمیشدی.

بو بوداغین اوزاقدان گؤرونن یام- یاشللیغی,طراوتلی اولماسی ,کؤوره کليگی بوتون یول یولچولارینا یول یولداشی ایدی. او, بیر نئچه کئچیدین دایاناجاغی ایدی.

ائی یولچو آیاق ساخلا, دایان بو دایاناجاقدا!

بو بوداق کؤلگه سینده بیر آز دینجل. روحونو آزاجیق صفالاندیر. کؤنلونو دورولت. شوبهه سیزکی, بو دایاناجاقدا دایانا بیلسن, اورادان الی بوش گئتمزسن!

تاریخیمیزدن بیر شیریم آچیلار گؤزلری نین اؤنونده.ادبیاتیمیزدان بیر زولاق جانلانار قارشیندا. ميلی قهرمانلاریمیزدان آذربایجان سیماسیندا بیر لؤوحه تصویر اولار گؤزلری نین قاباغیندا. اوندادیرکی, خالق صنعتیمیزین ان درین قاتلاریندان اولان بایاتی بولاغیندان ایچرسن. ميلی مدنیتیمیزین یازیلی عابيده سی ساییلان دده م  دده قورقود اؤیودوندن کئچرسن. بو دایاناجاقدا بیر آز دینجه له بیله‌سن , بیر آز دورولارسان. دایان بو دایاناجاقدا. بو دایاناجاق ادبیاتیمیزین جفا کئشی , ميلی ده یرلریمیزین کئشیکچیسی اوستاد فرزانه آدلی دایاناجاقدی. تاسوفلر کی, اودا گئدن لره قوووشدی. قیریلدی نهنگ بیر بوداق دا مهاجر آدلی آغاجیمیزدان.

حورمتلی هموطن لر!

ایکی هفته اؤنجه بیزیم ونکووئر شه‌هریندن یاییلان " اودلار یوردی" رادیوموزون پروقرامی بوتؤولوکله اودلی- آلوولی مصراع لار موليفی , هامیمیزین سئویملیسی شاعير "قافلانتی"- نین حیات و یارادیجیلیغینا حصر اولونموشدی. من همن وئریلیشی شاعير قافلانتی نین اؤلومی موناسبتی ایله یازیچی و شاعيرلر عایله سینه موراجيعت له بیتیرمیشدیم. اجازه نیزله همن موراجيعتی سیز عزیز هموطن لریمیزین ديقتینه چاتدیرماق ايستردیم. نییه کی, بو موراجيعت اوستاد فرزانه نین اؤلومی ایله ده سسله شندیر:

سیرامیز سئیرکله شیر,

یاشلی لار گئدیر الدن.

بیزده کی, هر گون اؤتور

یاشلاشیب قوجالیریق.

بیر زامانلار واریدی-

بیزلر بیر- بیریمیزدن

هر آن خبرداریدیق.

آما ایندی اؤلنده

دوستی یادا سالیریق.

بو سویوق قانلی لیق می ؟-

لاقئید اولماقدی یوخسا.

اؤز- اؤزونه قاپیلیب

تنهالانماقدی یوخسا ؟

یوخسا کؤکی دریندی

یادلاشان بو خيصلتین ؟...

باشقا یئرده گزمه یک

بو خيصلتین عيلتین.

 

کئچمیشینی اونودان

اویانمیر کی , اویانمیر.

یوخوسی عصری آشان

خالق اؤزونی دویانمیر.

ميلی ده یرلرینی

اؤزونه آرخا سانمیر.

 

بو خالقین ائولادی ییق.

بیز گؤی دن گلمه میشیک.

نه وار بئله گؤرموشوک

عکسینی گؤرمه میشیک.

اؤزگه نی اؤزوموزدن

هر آن اؤنه چکمیشیک.

بو گونوموز بیر یانا

هله گؤرون صاباحا

بیز نه توخوم اکمیشیک.

کئچمیشه خور باخمامیز

کئچیبدی جانیمیزا.

دوغمایا یادلاشمامیز

هوپوبدی قانیمیزا...

بو گون یئنه بیر کئچید

آیریجیندا دورموشوق.

دایانیب سوچلولار تک

بوینوموزی بورموشوق.

 

اوله نه یوخ!- گلین کی ,

اؤزوموزه آغلایاق.

بو کؤهنه وردیش اولان

سؤزوموزه آغلایاق.

 

بو اؤلن اؤلمه سئیدی

سهویمیز گؤرونمزدی.

بو اؤلن اؤلمه سئیدی

سوچوموز بیلینمزدی.

 

اؤلن اؤزگه دئییلدی.

او بیزیم اؤزوموزدی.

ایچیمیزه آغلایان

او گیزلی گؤزوموزدی.

 

گلین گئج اولمامیشدان

ایزیمیزه قاییداق.

قبره قویولمامیشدان

اؤزوموزه قاییداق.

مین یئره , مین بیر یولا

گلین پارچالانمایاق.

وطن , مپلت آدیندان

بیز گرک کی , بیر اولاق.

 

ائی هم عصریم وطنداش!

قلم داشیم سنله یم!

یول یولداشیم سنله یم!

گل, بیر اولاق بیرلشک.

گل, اؤلمزلیک نامینه

بیرلشک , مت لشک!

بیز اؤله نیک , گئده نیک.

گل , اؤلمزلیک داشی یاق.

بیرلشک , ملت لشک

بیز ملت ده یاشایاق.

 

سیرامیز سئیرکله شیر,

یاشلی لار گئدیر الدن.

بیزده کی, هر گون اؤتور

یاشلاشیب قوجالیریق.

سوچلولار تک دایانیب

گئده نین آرخاسینجا

آرخایا بویلانیریق.

 

حورمتلی هموطن لر!

من آرزو ائدیره م هئچ بیرینیز سوچلولار تک آرخایا بویلانان اولمایاسینیز. اوستاد فرزانه نین آرخاسینجا سوچلولار تک بوینونوز چینینیزده, اللرینیز قوینونوزدا آرخایا بویلانماغینیز آخیرینجی اولسون. بویوک لرینی اونودان خالق , داها بویوک ائولاد عرصه یه گتیره بیلمز.- دئمیشلر.

هامیمیزا آیدین دیرکی, بوتون ساحه لرده خالقیمیزین اونودولماز ائولادلاری چوخ اولوب. موباريزه تاریخیمیزده بابک لردن باشلامیش, مقاومت سیمولوموز صفرخانلارا کیمی, ادبیاتیمیزدا مهاجر حیاتی یاشامیش کلاسیک شعریمیزین پارلاق اولدوزی محمد فضولی دن توتموش تخییولده فارس و تورک ادبیاتی نین آدلیم صنعتکاری اوستاد شهریارا کیمی, موسیقیده ده ده علسگرین صنعتیندن یول آلمیش دونیادا سسی- صداسی ائشیدیلن خالقیمیزین یارادیجی اوغلی اوزئییر حاجی بيگوفا کیمی بو خالقین مین لرله, یوز مین لرله قهرمانی و یارادیجی صنعتکاری اولموشدی. تاسوف لرکی, اونلاری خالقیمیزین ميلی یادداشینا چئویرمک ايمکانیمیز اولمامیشدی. نییه کی,هر خالقین ميلی یادداشینی فورمالاشدیرماق اوچون اونون آنجاق و آنجاق اؤزونی اؤزی ايداره ائتمه سیندن کئچیر. اوندادیرکی, او ملتین یاراتدیغی مکتب لرینده گله جگینی قوران ائولادلاری ميلی ده‌یرلرینی ميلی یادداشا چئویره بیلیر.

بئله اولمادیغی حالدا او ملتین حیاتی ميلی فاجعه لرله اوزله شیر. اوندادیرکی, نه اینکی اؤزگه سی, سایی 30 میلیونی آشسادا ميلتین هئچ اؤز ائولادلاری دا اؤز گوجونی بیلمیر. اؤز موجودیتی نین ده یرینی قاورامیر.

بو معنادا, حیاتلا وداع لاشان, خالقیمیزین همیشه آغریسینی چکن, ادبیاتیمیزین جفاکئشی اوستاد فرزانه نین آدی قیزیل حرف لرله یازیلمالی دیر. اونا گؤره قیزیل حرف لرله یازیلمالی دیرکی, اوستاد فرزانه اؤز حیاتی نین سون گون لرینه کیمی ميلی ده یرلریمیزی یاشادان شخصیتلریمیز حاقیندا یورولمادان گئجه- گوندوز چالیشان قلم صاحيبلریمیزدن اولموشدی.

اونون سون زامانلاردا کامپیوتر سایتلاریندا تیاتر صنعتیمیزین اونودولماغا محکوم ائدیلمیش گؤرکملی و آدلیم نوماینده سی حاجی زاده دن توتموش, سیبیره سورگون ائدیلن ميلی حکومتیمیزین معاريف ناظيری بی ریایا کیمی یازدیقلاری نه قدر دولغون, اينسیجاميلی, معلوماتلا دولی اولان یازیلاردیر. اونلار شوبهه سیزکی, هله ده بیلمه ديگییمیز چوخ شئی دن خبر وئریر.

یئری گلمیشکن "آچیق سوز" سایتی نین قوروجولارینا, " شمس تبریز" سایتی نین امکداشلارینا تشکور ائتمه گی من اؤزومه بورج بیلیرم. بیری بیلمه ین, مینی بیلمز.- دئمیشلر. شوبهه سیزکی, اونلارین امگی حسابینا هئچ اولماسا اوستاد فرزانه نین سایسیز یازیلاریندان بیر قيسمی ایشیق اوزی گوره بیلمیشدی.

من اؤلسم باخ بو اوراقه, تحسورله منی یاد ائت!

توپور چرخ جفاکاره, موعذب روحومی شاد ائت!

اوستاد فرزانه یارادیجیلیغینی ایزله ین لر یقین کی, بو ایکی ميصراع لیق شعری اونون محمد بی ریا حاقیندا یازدیغی " محمد بی ریا نین ایستینطاق نامه سی " آدلی مقاله سینده شاعيرین اؤز شعرلریندن سئچیب باشلیقدا وئرمه سینی گؤرموشلر.

من اؤلسم باخ بو اوراقه, تحسورله منی یاد ائت!

منجه بو مصراع دا سانکی گیزلی بیر کود دا آشیلانیر. ائله بیل اوستاد فرزانه بو ميصراع لاری بیزه خاطیرلایاندا اؤز عؤمرونون سون پیلله لرینده اولماسینی دا خاطیرلادیرمیش. تاسوف کی, بیزلرده هر کس اولورسا اولسون اوندا آنجاق و آنجاق نوقصان آختارماغی پئشه ائتمیشیک. ده یر وئرسک ده, ده یرلندیرمه میز همیشه هر کس اولورسا اولسون اؤلوموندن سونرا اولموشدی.آما, اوستاد فرزانه!- او گوزل اينسان, صمیمی هم صؤحبت , مونيس یول یولداشی, ميلت ایناملی, ادبیات شوناس عالیم بئله دئییلدی.

شوبهه سیز ميلتیمیز ادبیاتیمیزین جفاکئشی, قایغی کئش انسان, قدیر بیلن ميلت اوغلی, ديقتجیل یارادیجی بیر وطن اوغلی ایتیردی. بو هم ملتیمیزه, هم ده ادبیاتیمیزا بؤیوک بیر ایتگی دیر. بو ایتگینی در حال کیم لر حيس ائتدی؟ باشدا اونون گئجه- گوندوز هم صؤحبتی. اوستاد فرزانه نین اؤز ایفاده سی ایله دئسم اونون خصوصا سون زامانلاردا ان یاخین امکداشی, اختر خانیم. بیز, ونکووئرده یاشایان آذربایجانلیلار اختر خانیما ائویندن آذربایجان نفسلی نهنگ بیر بوشلوغا گؤره باش ساغلیغی دئییر, آرزو ائدیریک فرزانه صنعتی نین بوتون قوللارینی ميلتیمیزه ارمغان ائتسین.

عزیز هم وطن لر!

من اجازه نیزله بو ایتگینی در حال حيس ائدن لر سیراسیندان " آچیق سوز" سایتیندان یئنه یاد ائتمک ایستردیم:

عزیزیم آخار گئدر

سو گه لر آخار گئدر.

دونیا بیر پنجره دیر

هر گلن باخار گئدر.

بو بایاتی نین آردینجا " گوزه للرین آخیرا قالمیشی " حاقیندا گوره ک آذربایجان فدرال- دموکرات حرکاتی نین اجرائیه هیئتی نه یازیر: دونن گئجه, گؤرکملی عالیم و ميلی موباريزیمیز دوکتور محمدعلی قوسی- فرزانه نین عؤمور اولدوزی آخیب, یاد اؤلکه ده آرامیزدان کؤچدی. بو ایتگی ایله ایران تورک لری و آذربایجان خالقی اؤزونون صداقتلی, بیلیکلی وموباريز اوغوللاریندان بیرینی ده ایتیرمیش اولدی.

آذربایجان فدرال- دموکرات حرکاتی نین اجرائیه هیئتی بو بؤیوک ایتگیمیزی, اوستادین حؤرمتلی عایله سینه, اونی سئون لره, تورک ملتینه و آذربایجان خالقینا و ائله جه ده آذربایجان فدرال- دموکرات حرکاتی نین عضولرینه باش ساغلیغی وئریر.

یئری دولماز بیر ایتگی دن

سؤزه سیغماز بیر آجی دان...

سؤز دئمه یه, سؤز دایانیر

سؤز اوتانیر,

سؤز آغلاییر.

سیزجه ایمئيل قوروپلاریندا,سایتلاردا اوستاد فرزانه نین اؤلوموندن درحال سونرا اوخودوغوموز بو شعری موعاصير آذربایجان شاعیری اسماعیل جمیلی هانسی حيس لرله یازمیشدی ؟ شؤبهه سیزکی, اوستاد فرزانه نین احاطه سینده اولانلارین هئچ بیری بو حيس لردن کناردا دئییلدیر. فقط یارادیجی صنعت اوغلی اولماق هامی یا قيسمت اولمور. نه یاخشی کی,خالقیمیزین اسماعیل جمیلی کیمی قدیر بیلن شاعير اوغلی وار.

موعاصير آذربایجان حرکات نماینده لریمیزدن محمود بیلگین بو ایتگینی حيس ائدیب یازان دیگر هم وطن لریمیزدن دیر. او, بو ایتگی دن نئچه ساعات سونرا یازیر: اوستاد محمدعلی فرزانه نی قایب ائتدیک! نئچه ساعات اؤنجه بؤیوک اوستادیمیز ایسوئچین گوتنبورگ شه هری نین سالقیرانسکا خسته خاناسیندا ابدیته قووشدی. بیز گاموهاتین طرفیندن بو بویوک ایتگینی بوتون تورک دنیاسینا اؤزه للیک له آذربایجانلی سویداشلاریمیزا تسلیت دئییریک. تورک ملتی نین باشی ساغ اولسون!

منوچهرعزیزی, دوکتور فیض اللهی, ناهیدی آذر, محمدرضا لوایی, رضا عالی, رضا همراز, حسن ارک, حسین حسنی, علی سلیمانی و علی حامد ایمان ایسه "شمس تبریز" سایتی آدیندان اوستاد فرزانه نین ایتگیسی ایله ملتیمیزین غمینده شریک اولدوقلارینی بیلدیریرلر.

بیلمیره م هارادا,هانسی سایت دا, یا کی, هانسی ایمئيل قوروپوندا اوره ک یانغیسی ایله یازیلمیش بیر یازی ديقتیمی جلب ائتدی. تاسوف کی, نه دنسه اونون یازاری حاقیندا دقیق معلومات یازمامیشام. آما, اونون زنگاندان یازیلدیغی یادیمدادیر. یازی دان قیسا بیر اؤرنک گوتورموشم: آز زاماندیر پروفسور, دوکتور فرزانه نین اؤلوم خبرینی دویموشام. بیلمیره م نه دن بیلگی سایار دالیندان دورا بیلمیرم. دئدیم بو نئچه کلمه نی یازیم بلکه آیاغا قالخیم. بیریسی یازدی:- او, کؤچدی و هله من اینانمامیشام.

یالنیز اوستاد فرزانه دئییل غریب قالانی بو تورپاغین!

الوداع!- بیر اوغلون دا گئتدی, تبریز! مزاری اوسته گؤزومده یاش یوخ, تکجه چیرپینان بیر اوره ک وار. بو سئوگی چیرپینتیسی دیر.

بو سئوگی چیرپینتیسینا سبب کیمدیر؟! بو کیميلیک حاقیندا " شمس تبریز" سایتیندا گنج آراشدیریجیمیز رضا همرازین مقاله سی ماراق دوغورور.او, یازیرکی,اوستاد فرزانه گونش ایلی 1302- جی ایلده مش اکبر آدلی نجیب بیر عائیله ده, تبریزین چای قیراغی محله سینده ماهی آدلی بیر زحمتکئش و چالیشقان بیر آنادان دوغولموشدی. یئددی یاشا چاتارکن مدرسه یه گونده ریلمیشدی. اون سککیز یاشیندا بیر معلم کیمی تبریز مدرسه لرینده درس وئرمه یه مشغول اولموش, معلميلیک له یاناشی تربیت کتابخاناسیندا دا ایشله میشدیر.

25- 1324 - جی ایللرده تبریزده نشر اولان آذربایجان قزئتینده محمدعلی فرزانه طرفیندن توپلانمیش ده ده قورقود داستانلاری و بایاتیلارین ایلک اؤرنک لری چاپ ائدیلمیشدیر.

بونونلادا اوستاد فرزانه ادبیاتیمیزلا یاناشی ايجتيماعی فعالیتینه ده باشلامیشدیر. شوبهه سیزکی, بو دووردن باشلایان یول- ميلی ده یرلریمیزله, ميلی کیميلی ییمیزله, ميلی وارلیغیمیزلا, ميلی سیمالاریمیزلا, ميلی دیلیمیزله, ميلی عابيده لریمیزله ماراقلانانلارین گؤزلری قارشیسیندا اولموشدی. او سیرادان ونکووئردن یاییلان " اودلار یوردی " رادیوسونون امکداشی, یازیچی- ترجمه چی حمید دادیزاده نین اوستاد محمدعلی فرزانه نین اؤلومی موناسبتی ایله یازدیغی یازی ديقتی جلب ائدیر.

حمید دادیزاده یازیرکی, دوکتور فرزانه بیر ميلتین ميلی غرورون و وارلیق شعورون داشیان بیر عالیم ایدی. ائله اونا گوره آذربایجانین تورک ریشه لی دیلین و اونون استروکتورون تاریخی اولاراق آراشدیریب و اؤزوندن بؤیوک ادبی ارث بوراخیبدی. اوستاد فرزانه آذربایجان ميلتی نین چاغداش تاریخین , اونون قیزیل کیمی ميلی- دموکراتيک حرکاتین بیر آخار بولاق کیمی بیلیردی. چونکی او تاریخی یاشامیشدی.

بو یاشاماق, بو عؤمور- گون حمید دادیزاده دئمیشکن حقیقتا ميلی- دموکراتيک یاشام ایدی. اونون اؤلومی حاقیندا ,اونون ایتگیسی باره ده باش ساغلیغی یازانلارین سیاهیسی بو مودعانین بیر نؤوع تصدیقی دیر. نییه کی, ميلی- دموکراتيک دوشونجه طرزینی دوشونمه یه, اونی قاوراماغا جان آتان دین عالیمی عظیمی قدیمدن توتموش, عظیمی قدیم دوشونجه سینین تام عکس قطبینده دایانان " راه کارگر" چی لره کیمی اوستاد فرزانه نی قبول ائتمک مجبوریتینده قالمیشلار. اوستاد فرزانه ميلی- دموکراتيک یولدان کنار هر هانسی طرفه مئیللی اولسایدی شوبهه سیزکی, دیگر طرف اونی رد ائتمک عزمینده اولاجاقدی.

اوزون موباريزه یولی کئچمیش بیلیکلی عالیم, اوستاد محمدعلی فرزانه ميلی- دموکراتيک دوشونجه نی شیخ محمد خیابانی دن اویرنمیش, سید جعفر پیشه وری تجربه دن کئچیرن اینامدان یول آلمیش تدقیقاتچی عالیم ایدی.

اونون بؤیوک قلبی یانیندا قلبلریمیزی تورپاغا وئریریک. اوندان گوج آلیریق. رسالتینی چینیمیزه آلیب یولا دوشوروک. فرزانه لردن بیر ميلت دوزه لدیریک. چیچک اوزونی اؤپوروک. اونونلا وداع لاشمیریق. دالیسینجا یولا دوشوروک. دوداغیمیزدا اونون آزادلیق الیفباسی ایله .

بو سوزلری ميلتیمیزین آدلیم شخصیتلریندن بیری,تانینمیش ادبیات شوناس عالیم, دیلچی, دونیا شهرتلی تدقیقاتچی,بیلیکلی تنقیدچی, شاعیر دوکتور رضا براهنی اوستاد فرزانه نین اؤلومی موناسبتی ایله یازدیغی یازیدان قیسا اؤرنک دیر.

عزیز هموطن لر!

گلین گؤرک چوخلاری طرفیندن یاد ائدیلمیش بو یولون, بو یارادیجی شخصیتین ده یری تهران دا فعالیت گؤسترن " ساهر" ادبی- مدنی درنه یین بیانیه سینده نئجه ایفاده اولونور. بیانیه, " دونیا سندن کیملر کئچدی" باشلیغی ایله حاضرلانیبدیر.

ازلدن بئله دیر, چونکی کائینات.

جاهان دائیمی دیر, عؤمور آمانات.

الدن- اله کئچیر وفاسیز حیات

بیز گلدی- گئده ریک, سن یاشا دنیا.

آذربایجان ادبیاتی نین گورکميلی سیماسی, بوتون معنالی عؤمرونی خالقیمیزین سعادتی و مدنیتیمیزین یوکسلیشی اوغروندا صرف ائدن اوستاد دوکتور محمدعلی فرزانه نین اؤلوم خبری, آذربایجان دیلی و ادبیاتی اوغروندا چالیشانلاری و بوتون ادبی و مدنی ايجتيماعیتیمیزی دریندن سارسیتدی. بؤیوک ادیب, دیلیمیزین و ميلی وارلیغیمیزین سارسیلماز قوروجوسی و تبلیغاتچیسی ایدی.

او ان آغیر ایللرده- پهلوی رژیمی نین قانلی- قادالی واختیندا شيفاهی خالق ادبیاتیمیزین اینجی لریندن ساییلان "بایاتیلار", آذربایجان دیلی نین علمی صورتده اویره نیلمه سی اوچون- " مبانی دستور زبان آذربایجانی"- کیمی ده یرلی اثرلر و اونلارجا ترجمه, ادبی تنقیدی و علمی آراشدیرمالاری نین موليفی کیمی شؤهرت تاپمیشدیر.اوستادین هله ایشیق اوزی گورمه ین چوخلی ادبی و علمی اثرلری,اونون دیل و ادبیاتیمیزین یوکسلیشی اوغروندا ائتديگی میثيلسیز خدمتلری نین نمونه لری دیر.

بیز," ساهر" ادبی- مدنی درنه یی نین اداره هیئتی و عضولری بو آغیر ایتگینی آذربایجان خالقینا, ادبی ايجتيماعیتیمیزه, اوستادین محترم عائیله سینه, دوست و تانیشلارینا باش ساغلیغی وئره رک, سوز وئریریک کی, اونون توتدوغی شرفلی یولی داوام ائتدیرک! اوستاد محمدعلی فرزانه نین ابدی خاطیره سینه عشق اولسون!

عزیز هموطن لر!

شوبهه سیزکی, بو بؤیوک ایتگیمیزی تکجه منیم بو یازیدا سادالادیغیم شخصیتلر, ايجتيماعی, مدنی و ادبی درنکلر یاد ائتمه میشلر. اوستاد فرزانه نین ابدی خاطیره سینی یاد ائدنلرین ساده جه آدلارینی سایماق بویوک بیر سیاهینی تشکیل ائدر.

آرتیق واختینیزی آلماییم دئیه," ساهر" آدینا ادبی- مدنی درنه یین بیانیه سینده وورغولانان " سؤز وئریریک کی, اونون توتدوغی شرفلی یولی داوام ائتدیرک " مفکوره سینه بیزده قوشولوروق. بیزده همن اینامی تکرار ائدیریک.یولی داواميلی اولسون دئییریک!

ای یولچو, دایان بو دایاناجاقدا! بیر آز صبرینی باس. بیر آز حیرصینی بوغ.

بو بارلی- به هرلی بوداق کؤلگه سینده آزاجیق دینجل. روحونی تمیزله, کؤنلونو دورولت. شوبهه سیزکی, دایانا بیلسن بو دایاناجاقدا, اوردان الی بوش گئتمزسن!

ميلی موباريزه تاریخیمیزدن بیر شیریم آچیلار گوزلری نین اؤنونده. یاشی قدیم اولان ادبیاتیمیزدان بیر زولاق جانلانار قارشیندا. ميلی قهرمانلاریمیزدان, یارادیجی صنعتکارلاریمیزدان, ميلت ایناميلی داهی لریمیزدن آذربایجان سیماسیندا بیر لؤوحه تصویر اولار گؤزلری نین قاباغیندا. اوندادیرکی, خالق صنعتیمیزین ان درین قاتلاریندان اولان بایاتی بولاغیندان ایچرسن. ميلی مدنیتیمیزین یازیلی عابيده سی اولان دده م  دده قورقود اویودوندن کئچرسن!...

میانالی علیرضا