اؤز ديلينده مدرسه           اولماليدير هر کسه!

آنا ديلينده تحصيل آلماق حقى، بوتون اينسان حقلری موقاويلهلرينده دوغما و طبيعی بير حق ساييليرسا دا، 21- جی يوزايلين باشلانغيجيندا، ايران اؤلکهسينده يالنيز فارس ديللى اوشاقلارين اؤز ديللرينده درس اوخوماغا حقلرى و ايمکانلارى واردير. ايرانلى اوشاقلارين چوخونلوغو فارس ديللى دئييلدير. بونا گؤره ده اؤگئى سانيليرلار. اونلار ايرانين «اؤگئى ميلتلرينين» بالالارى اولدوغو اوچون، اؤز آنا ديللرينده تحصيل آلماغا حقلرى يوخدور. اونلار اؤزگه بير ميلتين ديلينده، فارس ميلتىنين ديلينده درس اوخوماغا محکومدورلار.

«آموزش و پرورش» قورومو ايرانين ان بؤیوک ایجتیماعی قوروملاريندان بيرى ساييلير. بو ایل بیر میلیون بئش یوزمين نفره یاخین بیرینجی کیلاس شاگیردلری درس کیلاسلاریندا حاضیر اولاجاقلار. شاگیردلرین ان آزى يوزده آلتميش بئشىنين (65% ) آنا ديلىسى فارس ديلى دئييلدير. اونلار يئنيدن ديل آچماليديرلار، آنجاق يابانچى بير ديلده.

بیرمیلیون نفردن يوخارى ايشچى و معليم ایران «آموزش پرورش» قوروموندا ايشلهييرلر. درس کیتابلارينین چاپ ایشلری ایله و یازی وسایطی ایله مشغول اولان و گئچیملری «آموزش پرورش» قورومونا باغلی اولان مؤسيسه لرده و صنایعلرده ایشلهینلری ده سايا سالساق، «آموزش پرورش» قورومونون رولو و اؤنمی داها آيدينراق اورتایا چیخاجاقدير. بو ساحهنين ايران ايقتصادياتيندا اولدوقجا آغير چکيسى واردير و ايجتيماعى باخيمدان چوخ گوجلو اهميته ماليک دير. حاکیم رژيمين ايشلهنيلميش ميلى اريتمه و آپارتايد سياستى ده هیچ بیر ایجتیماعی ساحهده بو قدر آرديجيل، سرت و گؤزهچارپان دئييلدير.

ايراندا، «آموزش پرورش» قورومو دا باشقا دؤولت قوروملارى کيمى فارس محورلى دير. بو قوروم غئیری فارس میلتلری او جوملهدن و اؤزللیکله ایراندا یاشایان تورکلری آسیمیله ائتمکده و کیملیکلرینی محو ائتمکده حل ائديجى رول اویناییر. ایسلام جومهوریسینین ایرقچی و آپارتايدا سؤيکنميش «آموزش پرورش» قورومونون سياستلرينى ایفشا ائتمک، ايران تورکلرينين، آذربایجان خالقىنين میلی دموکراتیک حرکتی فعاللارینین واز گئچیلمز وظیفه لریندندیر.

ايسلام جومهوريتىنين يوروتدوگو ایرقچی و آپارتاید سياستلريله موباریزه ائتمک اوچون آرديجيل، دواملی- دؤزوملو و تشبوثلى اولماق گرکیر. مهر آیىنین بیری آنا دیلینده تعلیم تربیه ایستگينی ايرلى سورمک اوچون ان اویغون گونلردن بيرى دير. اینسان حقلرینين باشليجالاريندان بيرى آنا دیلینده تعلیم تربیه آلماق حقىدير. بو حق ایرانين غئیری فارس میلتلری اوچون وطنداشلیق حقی حؤکمونده دير. ايسلام جومهوريتى بو حقى دانير و دوغرولماسىنين قاباغينى آلير. بو دوغما حقى الده ائتمگه گؤره، سیویل ایطاعتسیزلیک موباريزهسى متودوندان گئنیش و یارادیجی شکیلده ایستیفاده ائتمک اولار. آنا دیلینده تعلیم تربیه آلماق و ميلى کيمليگينى قوروماق مسالهسى ایران خلقینین ميلى ظولم بويوندوروغو آلتيندا ياشايان چوخونلوغونون واز گئچيلمز حقى و ايستگى دير.

بو اورتاق ايستگين قابارديلماسى و اؤن جرگهيه گتيريلمهسى اوغروندا ائديلن تشبوثلر، گنیش خلق کوتله سینين موباريزهده ايشتيراک ائتمهسينى تامين ائدهبيلن بيچيمده اولماليدير. ایسلام جومهوریسینه گرکن فیشاری گتیرهبيلمهليدير، خوصوصيله بینالخلق اورقانلارینین و افکاری عومومینین دیقتينی اؤزونه چکهبيلمهلیدیر.

ایران ایسلام جومهوریسىنین آپارتايد و اریتمه (آسيميلاسيون) سياستىنين، فارس اولمايان ميلتلرين ديللرينی و کولتورلرينى محو ائتمگه جان آتماسىنين، «بير ديللی بير ميلت» ياراتماق اوچون چاليشماسىنين آيدين گلهجگی يوخدور! بو سياستين فارس ميلتى ايله ايرانين چوخونلوغونو تشکيل ائدن فارس اولمايان میلتلرين آراسیندا میلی نیفرت ياراتماقدان باشقا سونوجو اولا بيلمز! ايران خلقینين ديلجه چئشيدلیليگينه و ميلی نظردن چوخ ميلتلیليگينه اينان بوتون فارس ديللی آزادليق سئور اينسانلار، فورصت وارايکن، آنا ديللری فارسجا اولمايان ميلتلرين ديللرينين رسمی تانينماسی ايستگينی و آنا ديلينده تحصيل آلماق حقينی، عملده- واقعی صورتده مودافيعه ائتمکله، اونون دوغرولماسينى طلب ائتمکله، بو سياسته قارشى اولدوقلارينى گؤستره بيلرلر.

مئهر آيینين بيرينجی گونو اؤلکهده حؤکم سورن آپارتايد و ايستيبدادا قارشی سيويل ايطاعتسيزليک سيمبولونا چئوريلمهليدير. آذربايجان بالالاری و يئنی يئتمهلری، معليملرى و اؤيرنجيلرى آنا ديلينده تعليمات حقى اوغروندا، آپارتايد علئيهينه گئدن موباريزهده ايشتيراک ائتمکله اؤز گلهجکلرينی اؤز اللريله جيزماليديرلار! آذربايجاندا و تورکلرين ياشاديقلارى بؤلگهلرده، هابئله باشقا ميلى منطقهلرده، مدرسهلر آچيلارکن، مجبورى فارس ديلينده گئدن تعليماتين  علئيهينه، ميلى کيمليگيميز اوغروندا  سيويل ايطاعتسيزليک موباريزه سى شيوهلريندن ايستيفاده ائتمک اولار.

 تحصيل ايلى نين باشلانيشى اورمو گۇلونون تکلى – ديبلى قوروماسى کيمى بۇيوک بير فاجيعه ايله توش اولوبدور. دۇولت اورمو گۇلونون قوروماسينا (گئج اولموشسا دا) چاره قيلماق يئرينه، خالقين جانينا دوشوب وآذربايجان ياشام چئوره سى مودافيعه چيلرينى تاپدالاييب و دوستاق ائتميشدير. اورمو گولونون يوخا چيخماسىنين قاباغينى آلماق و بوتون سياسى محبوسلارين قئيد شرط سيز بوراخيلماسى يولوندا موباريزه آپارماق ميلى حقلرين دوغرولماسى اوغروندا گئدن بوگونکو ساواشين ترکيب حيصهلريندن دير.

ايران کيمى چوخ ميلتلى بير اؤلکهده ميلى فدراليزم بيچيمينده، دموکراسى اساسيندا قورولان سکولار بير جومهوريتين و يئرلى فدرال حاکميتلرين يارانماسى ايله ميلى حقلره چاتماق اولاندى.