گؤتئبورگ – آذربایجانلیلار توپلوسونا باش ساغلیغی

آذربایجانین گؤرکملی عالیم، ادبیات شناس و آراشدیریجیسی، وارلیق درگی سینین قوروجو و تمه ل داشلاریندان ساییلان دوکتور محمد علی فرزانه نین اؤلومو هامیمیزی سارسمیش و ماتمه بوروموشدور. اونون 60 ایلدن آرتیق عؤمرو دیلیمیزین، ادبیاتیمیزین و مدنیتیمیزین دیرچلمه سینه حصر ائدیلمیشدیر. او بوتون حیاتینی آنا دیلی و خلقینین عشقی ایله یاشامیش و اونون یولوندا هر تورلو مباریزه و چتینلیکلره گؤووس گلمیش و چوخ زامان آجی گونلر گئچیرمیشدیر.

من شخصا اونونلا 35 ایل دوستلوغومدا بو حقیقتین شاهیدی اولموشام و اسلام اینقلابینین غلبه سیندن سونرا وئریلن نیسبی دیل آزادلیغیندان فایدالاناراق اونونلا و چوخو مرحوم اولان بیر نئچه غیرتلی آذربایجانلی دوستلا بیرگه وارلیق درگیسینی یایماغا باشلامیشام. او زامان دیلیمیزی و ادبیاتیمیزی دریندن بیلنلرین سایی بارماقلارین سایی قده ر آز ایدی هم ده مرحوم فرزانه نین وارلیق لا همکارلیغی بعضی ایدئولوژی اسیرلری طرفیندن تنقید ائدیلیردی. آنجاق دوکتور فرزانه بو دئدی – کودولارا باخمایاراق وارلیقلا یاخیندان همکارلیغینا دوام ائدی و زامانلا حقلی اولدوغونو و بو ایش بیرلیگیی نین نه قده ر ایثابت لی و خلقیمیزه فایدالی الدوغونو ثبوت ائتدی.

دوکتور فرزانه عین زاماندا بؤیوک فولکلور آراشدیریجیسی و هم ده ناشیری اولموشدور، اونون فولکلوروموز ساحه سینده گؤردوغو ایشلر و یایینلادیغی اثرلر زنگین فولکلور خزینه میزین ابدیلشمه سینه یاردیم ائتمیش و گئنجلریمیزه بؤیوک بیر ادبی میراثا چئوریلمیشدیر.

دوکتور فرزانه فارس دیلی و ادبیاتی ساحه سینده داهی اوستاد ایدی. اونون فارسجا نثری ایراندا معاصر نثریمیزین ان گؤزل و پارلاق نمونه لریندندیر. دئمه لی فرزانه ایران معاصر ادبی سیمالارینین بیرینجی سیراسیندا دورماقدادیر.

بوتون بونلارار رغمن فرزانه نین حیاتی همیشه چتینلیکله گئچمیشدیر، او هئچ بیر زامان لاییق الدوغو کیمی دگرلندیریلمه میش و رفاه ایچینده یاشامامیشدیر، آنجاق بوتون بو چتینلیکلره و محرومیتلره گؤووس گلمیش – دایانمیش و بیر موستقیل اینسان کیمی قناعتله و شرفله بیر حیات یاشامیشدیر.

بوگون اونو جیسمی آرامیزدان آیریلمیش و آنا توپراغیمیزا قووشماغا گون گؤزلمکده دیر، آما اونون اوجا روحو و عزیز خاطیره سی آرامیزدا، باشیمیزین اوستونده و اوره ک لریمیزده دیر. بیز بو بؤیوک اینسانی، خلقینین وورغونو و مدنیتیمیزین بؤیوک کئشیکچیسی نین خاطیره سینی هر زامان قلبیمیزده یاشاتاجاغیز و آدینی دیللر ازبری ائده جه ایک، هم ده زمانه میزین کم التفات لیغی و وفاسیزلیغی نی اؤز محبت و وفامیزلا عوض ائده جه ایک.

اونون آدی ادبیات تاریخیمیزده قیزیل مرکب له یازیلی اولاجاق و گئنج لریمیزه الهام و فیض قایناغی اولاجاقدیر.

من ایکی آیدان بری لوس آنجلس ده معالجه ایله مشغول اولدوغوم اوچون سیزین توتوغونوز صمیمی یاس مراسیمینده ایشتراک ائده بیلمدیم. بیر نئچه گون سونرا ایراندا ( تهران و تبریزده ) توتولاجاق طنطنه لی یاس مراسیملرینده داهی حاضیراولا بیلمییه جاغام، بو وسیله ایله سیزلره و هامی آذربایجانلیلارا هارادا اولماقلاریندان آسیلی اولمایاراق باش ساغلیغی وئریر و اولو تانری دان او عزیزیمیزه رحمت و عایله سینه اوزون عؤمور و صبیر دیله ییره م.

ساغ اولون. لوس آنجلس، دوکتور جواد هئیت

2006- یانوار 19