آذربایجان میللی فعاللارینا و تشکیلاتلارینا چوخ اونملی اخطار!

 

آيدين تبريزلى:

 

بوگونلر چوخ حساس و تاریخی گونلردیر و بیزیم طالعیمیز یازیلماقدادیر آنجاق چوخ تعجب ائتمه لیدیر کی بوتون میللی فعاللار سوسوبلار! نه بیر یازی نه بیر تحلیل و نه اونملی بیانات! بیر نئچه بیانات و تحلیل ده کی یازیلیب چوخ یانلیش یولا گئتمه یی گوستریر. چوخللاری آذربایجان میللتین بو حرکتلره قاتیلماماسینی ایسته ییر و بو حرکتی فارس محور آدلاندیریرلار! آنجاق اونلار هئچ بیلیرلر کی نه بویوک یانلیش یاپماقدادیرلار؟ ایرانین بوتون خالقلاری آیاغا قالخماقدادیر. موسوی و انتخابات بیر بهانه دیر نئجه کی ایران کاریکاتورو بیزه بیر بهانه ایدی. ندن بو زاماندا کی ایران رژیمی هر طرفدن ضربه آلتیندادیر بیز یاتمالییق و قاریشمامالییق؟ بیز ایندی نه یی گوزله ییریک؟ گوزله ییریک کی رژیم باشقا خالقلاری سرکوب ائله سین و بیز ده تاماشاچی اولاق و نئچه ایلدن سونرا یئنه 85 خرداد اولای لاری کیمی تک باشیمیزا آیاغا قالخاق و بوتون پان فارس لار رژیم ایله برابر بیزی بایکوت ائدیب و قانیمیزا بله سینلر و دونیادا بیلمه سین؟ ایندی کی دونیانین دیققتی تام ایراندادیر و رژیمین موخالیفلری ده رژیم ایله ساواش دادیلار ان یاخشی فورصت دیر کی بیزده آیاغا قالخیب و اوز یولوموزو گئدک. بو فورصت بیر داها تکرار اولمایا بیلر. اگر بو رژیمین الیندن قورتارماق ایسته ییرسک و میللی حاکمیتیمیزه چاتماق ایسته ییرسک، ایندی زامانی دیر! لازیم ده ییل موسوی دن یا باشقا سیندان حیمایت ائدک، احمدی نژادا کی خرداد اولای لاریندا بیزیم میللتی قانا بله دی اعتراض ائتمه لییک و اونون حاکمیتینی ایسته مه دیغیمیزی دئمه لییک. آزاد سئچگی لرین اولماسینی ایسته مه لییک. رفراندومون گرک لی اولدوغونو ایسته مه لییک.

 

بیر باشقا بویوک خطر بیزیم حرکته بودور کی ایندی بیزیم علاقه میز میللتیمیزله چوخ آزالیبدیر. گونئی دن خبر آلا بیلمیریک. اونلارا سوزلریمیزی چاتدیرا بیلمیریک. اگر بو شرایط ده کی فارس مئدیالاری چوخ گوجلو بو اولای لاری ایزله ییرلر، بیزیم میللت کی بو رژیمدن نهایت ناراضی دیر آیاغا قالخسا بیر حالدا کی بعضی فعاللار قاریشماماغا چاغیریب لار و باشقالاری تام سوسوبلار، اوندا پان فارسلار بوجور تبلیغ ائده جکلر کی آذربایجان میللتی فارس محور حرکت لره قاریشدی و میللی فعاللارین قاریشماماق چاغیرماسینا قولاق آسمادی؟ اوندا بیلیرسیز کی بیزه سیاسی باخیمدان نه بویوک ضربه ده یه جکدیر؟ حتی اگر اینانیرسیز کی گرک بیز مداخله ائتمه یک، ایندی کی بیزیم سسیمیز میللته چاتمیر، عاغیللی سیاست سئچیب و ان آزی بو حرکته قارشی دورماییب و اونو فارس محور آدلاندیرمایاق. سیز فیکر ائدیر سیز کی ایندی بو وضعیت ده گونئی ین عادی میللتی نین نئچه نفری بیزیم سیته لرده یازیلان اعلان لاردان خبردار اولور؟ نئچه نفر گوناز تی وی نی سئیر ائده بیلیر بو زاماندا کی رژیم بوتون گوجویله اینترنتی فیلتر ائدیب و ماهواره لره پارازیت سالیر؟ بیز چوخ تئز بیر قرارا گلمه لییک و آکتیو اولمالییق. اگر بو حرکتی تحریم ائتمک ایسته ییریک گرک بوسوزو تام گوجوموزله میللته چاتدیراق تا اگر میللت بیزیم چاغیریش لاردان خبردار اولمادیغی اوچون آیاغا قالخسا بیزه بیر بویوک سیاسی ضربه ده یمه سین. آمما اگر بیزده رژیمی دار گونده گوروب و اونا قارشی هجوم ائتمک قرارینا گلسک گرک تئزلیکله بو جهت ده حرکت ائدیب و یازی لار و تحلیل لر و بیانات لار یایاق. منجه بو زاماندا تحریم ائتمک و بیر قیراخدا اوتورماق ان بویوک یانلیش اولا بیلر کی بیزه چوخ بویوک زیان وئره بیلر. نئیه کی بیزیم مئدیامیز او قدر ضعیف دیر کی بوتون میللته کی ایندی هیجان ایچینده دی خبردارلیق وئره بیلمه یه جه ییک کی بو حرکتلره قاریشمایین و آذربایجان میللتی کی تاریخ بویو ثابت ائدیب کی ظولمه قارشی سوسابیلمز و چوخ احتیمالی واردیر کی آیاغا قالخا اوندادیرکی بیز اودوزموش اولاجاییق! بیرده دئدیغیم کیمی بیز بوندان یاخشی نه فورصت تاپا بیله ریک کی رژیمه سون ضربه نی ووراق. 85 خرداد اولای لاری ثابت ائله دی کی بیز تک باشیمیزا آیاغا قالسخاق سرکوب اولاجاییق. آما ایندی کی بوتون ایران آیاغا قالخیب، ان یاخشی فورصتدیر کی بیزده آیاغا قالخاق آما موسوی دن یا باشقاسیندان حیمایت اوچون یوخ. میلتیمیزین سئچگی لرده سسی نه حورمتسیزلیک اولدوغو اوچون، احمدی نژاد دولتی نین کی خرداد اولایلاریندا بیزیم میللتین قاتیلیدی، یئنیدن اینتیصاب اولدوغو نا قارشی، دیکتاتورچولوغا قارشی، ساختاکارلیغا قارشی... لوطفن بو تاریخی گونلرده دیققت لی اولاغین بیر یانلیش سیاست بیزه چوخ بویوک ضربه وورابیلر. لوطفن میللی فعاللار و تشکیلات لار حرکته گلین و تئزلیکله بیر قرار وئرین. اگر تحریم ائده جه ییک و قیراخدا اوتوراجاییق تئز قرار وئریب و بوتون گوجوموزله میللته چاتدیرمالییق کی بیزیم میللت بو حرکت لره قاریشماق ایسته میر و اگر بو تاریخی فورصتدن یارارلانماق ایسته ییریک، یئنه تئز بیر قرارا گلیب و حاضیرلیق آپاریب و میللتی بو حرکته حاضیرلامالییق. یعنی هر ایکی حالدا ایندی سوسماق و یاتماق زامانی ده ییل. هر حالدا گرک بوتون گوجوموزله مئیدانا گلک. آما سونوندا بیر سوز داها دئمک ایسته ییرم. میللتین سئچگی لرده چوخ یوخاری سایدا ایشتیراک ائتمه سینی گوروب و عیبرت آلمالییق. چوخلو فعاللار تحریم ائتدیلر آنجاق میللت یوخاری سایدا ایشتیراک ائتدی! ایندی ده اگر بیز تحریم ائتسک آمما میللت آیاغا قالخسا کی احتیمالی چوخ یوخاری دیر و میللتین حرکتینه پان فارسلار صاحیب چیخسا امین اولون کی ان بویوک اودوزان بیز اولاجاییق. ندن شک ائدیریک ندن بو تاریخی فورصتی دیرلندیرمیریک ندن بیزده آیاغا قالخیب و بو رژیمه سون ضربه نی وورماق ایسته میریک نه یی گوزله ییریک؟ ایندی بوتون دونیا خبر آژانس لاری او جومله دن بی بی سی و سی ان ان بو حرکتلری آچیقجاسینا بیر اینقلابا و دئوریمه چئوریله بیله جه یینی موذاکیره ائدیرلر و اونو ایسلام اینقیلابی ایله قیاس ائدیرلر. بوردا بیر بویوک و تاریخی پروسئس گئدیر بیز ندن یاتمیشیق؟!!