سئچیمه قاتیلانلا، قاتیلماغا چاغیرانلار، قاتیلماق ایستهیهنلهر

اوغوز تورک

ملتلهرین زندانی اولان ایراندا بو سئچیم آلداتماجاسینا کیملهر قاتیلاجاق؟ ایلک اؤنجهدهن ایندیهجهن کیملهر "گهلین قاتیلالیم" دئدیلهر ویا دئییرلهر؟ کیملهر جلادلارین فئلینه اویوب بو سئچیمی بیر فرصت اولاراق بیزه اوتدورماغا چالیشتیلار؟ گونئی آذربایجانلیلاری شاشیرتماق ایستهیهنلهر غرضدهن می یوخسا مرضدهن می بو ایشی گؤردولهر؟ اعلمینین قویروغونا دوشهنلهر گونئی آذربایجان حرکتینه خیانتده اولدوقلارینی بیلدیلهر می؟ دوغرودان صافلیقدان و بیلمهمهزلیکدهن می یوخسا رئژیمین نؤکرلیغیندهن می سئچیمه قاتیلماق دوشونجهسینی آرامیزا سالدیلار؟ بو بویوروقلو (فرمایشی) سئچیمده ههله ده موسوینین، کرروبینین یا احمدینژادین قویروغونا دوشهنلهری نئجه سینیفلهمهک اولار:

1- رئژیمین یاسال (قانونی) اولادوغونا اینانانلار
2- رئژیمین یاپدیغی سئچیمین دوغرودان اولدوغونا اینانانلار
3- رئژیمه باغلی اولانلار
4- خاریجده یاشایانلارا؛ ایرانا گئدیپ گهلهنلهر
5- رئژیمه سئمپاتی و سئوگی دویانلار
6- اؤزلئرینی ایرانلی بیلهنلهر
7- رئژیمین اؤزدوزهلتمهسینه یا دوزهلمهسینه (اصلاحاتا) اینانانلار
8- دونیا و او بؤلگهنین سیاسی اولاراق یاخین و اوزاق گهلهجهیینی گؤرهبيلمهیهنلهر
9- گونئی آذربایجان و باشقا اسیر ملتلهرین گهلهجهیینه اینانمایانلار
10- رئژیمی دونیادا دئموکراتیک و یاسال (قانونی) گؤستهرمهک ایستهیهنلهر
11- سیاسی ایلهریيیگؤرمه گوجو اولمایانلار
12- رئژیمین گئچمیش 30 ایل جلادلیقلارینی اونودانلار یا باغیشلایانلار
13- رئژیمین سئچهجهيی جومهورباشقانینین دوغرودان بیر گوجو اولدوغونا اینانانلار
14- رئژیمی و سیستئمینی دوشمان گؤرمهیهنلهر
15- ایرانین توپراق بوتونلوغونه اینانالار
16- دولتلهرين و اوزهلليکله ایران رئژیمینین نئجه چالیشدیغینی و یاپیسینی آنلامییانلار یا آنلاماق ایستهمهیهنلهر
17- رئژیمین قیلیفتی آنایاساسیني قبول ائدهنلهر
18- "ولایت فقیهه" اینانانلار

بو سئچیمه قاتیلان و قاتیلماغا چاغیران و قاتیلماق ایستهیهنلهرین باشقا نهدهن و دلیللهری ده اولا بیلیر. آما بیر سؤزده دئمهک اولار کی گونئی آذربایجانین گهلهجهیینه اینانانلار بو رئژیمین هئچ بیر اویونونا گیرمهزلهر و مظلوم گونئی آذربایجان ملتینین گؤزونون ایچینه باخاراق یالان دئمهزلهر. بو سئچیم بو رئژیمین بیر نئچه گون داها ایشده قالماسینا بیر فورصتدیر، بیزیم یاراریمیزا بیر فورصت دئيیلدیر. اوماریم بو سئچیم بو جلادلارین سون سئچیمی اولار و سئچیمه قاتیلانلارین و قاتیلماغا چاغیرانلارین و قاتیلماق ایستهیهنلهرین ده سونو گهلهر.

سایقیلاریملا