علي رضا اردبيلي

alirza@live.se

(اين مقاله در پاسخ نوشته آقاي سيرس مددي در مورد نهضت 21 آذر به تركي نوشته شده است)

توتاليتر ایدئولوگیا و دموكراتيك سياست
(سيروس مددي*-نين مقالهسيني بهانه ائدركن)

(*مقالهنين دواميندا ايختصار اوچون س.م. يازيلميشدير)

آذربايجان ميللي آزادليق حركاتي، ايچينده اولدوغوموز حاضيركي دٶرونو 1980-جي ايللرين سونوندان باشلاييب، يوكسك اينتلكت، عالي شعور و متانتله ايرهلييه دوغرو آدديملاماقدادير. حركاتيميز مدني و راسيونل كاراكترلي اولدوغو اوچون، نظري مسئلهلر و حركاتين بوتون سويهلرينده چاليشان قوهلرين حاديثهلري آناليز ائده بيلمك قابليتي سون درجهده اٶنم داشيماقدادير. بيزي بو باخيمدان اينكيشافا آپاران فيكري موباحيثهلر البته بوشلوقدا باش وئرمير و اينسانلاريميزين فرقلي مٶوقعدن چيخيش ائتمهلري ، هم فرقلي فيكيرلر داشييان طرفلر و هم اونلارين موباحثهلريني ايزلهين حركات ايشتيراكچيلاري اوچون ياراديجي و پداقوژيك رول اوينايير. قئيد ائتمهلييم كي، حركاتيميزين حاضيركي دٶورونون نظري اساسلاري زمانهميزين قورقودو اولان جناب دوكتور جواد هيئت و مرحوم اوستادلاريميز پروفسور حميد نطقي و دوكتور محمد علي فرزانه كيمي شجاعتلي عاليملر طرفيندن قويولدوغو اوچون، نظري اينكيشافيميز چوخ هارمونيك، هاي-كويسيز و اساساً فردلر يوخ، فيكيرلرين توققوشماسيله باش وئرير.

يئري گلميشكن آچيقلاماق ياخشي اولاردي كي، آديني چكديييم عاليم اوزمانلاريميز و ميللي مفكورهميزين ساغلام اينكيشافيندا رول اويناميش مينلرله قلم و فيكير صاحيبلري، موختليف دونيا گٶروشلرينه ماليك اولسالاردا، ميلتكيمي فورمالاشماق پروسئسينين قاچيلماز طلبي اولان عوموم ميللي منافعه صاديق قالماق پرينسيپيني هر نهدن اوستون توتوب و اومانيسم چرچيوهسينده توتاليتر دونيا گٶروشلريندن اوزاق، دموكراتيك، ميللي و پلوراليستيك مفكورهنين عرصهيه چاتماسيني مومكون ائتميشلر. البته كي بو اينكيشاف، موهوم مودرن تاريخي عنعنهلر يميزين تسلسولو كيمي گٶرونمهليدير. "آذربايجان خالق جمهوريتي"ايله "آذربايجان ميللي حوكومتي" تاريخي تجروبهلري معاصير دونيانين تلاطوملي ايدئولوژي اوكيانينين درينليگينه دايانان، معنوي داياق نٶقطهلري رولونو اويناميشلار. بو اينكيشاف هر جور توتاليتر ايدئولوگيا، ايستر ديني فاناتيزم ايستر قولدارليق و كوتلهوي ترور رژيملرينين كومونيستي ايدئولوگياسيندان مينلر ايل و ميليونلار كيلومتر اوزاق بير زامان و مكان شراييطينده اينكيشاف ائتمكدهدير.

بوتون بونلار البته چوخ سئوينديريجي حال دير آمما نادير حاللاردا، ميللي حركاتين سيرالاريندا مٶوجود اولان فيكيرلردن اوزاقلاردا اولان، "س.م.-"نين “۲۱ آذر و بو گون” باشليقي آلتيندا يازيلميش مقالهسي كيمي يازيلار، نظري مسئلهلرين تارتيشماسي اوچون چوخ غنيمت ساييلمالي بير گيرهوه اولورلار. من آديني چكديييم مقالهني آيري-آيري باخيمدان نقد ائتمك مقصديله، هر باخيمدان، اٶنجه اول عومومي گٶروشلريمي شرح ائديب، سونرا نقد ائتمك ايستهديييم مقالهيه بير نظر سالميشام.

س.م.- بو مقالهسي، ميللي حركتين اصلينده پوليفونيك و هارمونيك سسلهنن نظريهچي اوركسترينين حاشيهسيندن بير "خاريج" سس كيمي ائشيديلير. بو يازي، سهو فيكيرلر، يارامايان ايفادهلر و يانليش دونيا گٶروشلريندن عيبارت نفيس و نادير بير كاتالوقدور كي، ميللي حركتين فعاللارينين كيتابخانالاري و ايش ماسالارينين اوستونده، ال آلتيندا اولماسي چوخ فايدالي اولا بيلر. من بو يازيمدا حٶرمتلي آقا س.م.-نين يازيسيني بهانه ائديب، بير سيرا حركاتيميز اوچون اٶنملي اولان مٶضووعلاري آچميشام. اصلينده س.م.-نين مقالهسي اولمادان دا بو مٶوضوعلار، حركاتين سيرالاريندا حضورو اولان هر فيكير صاحيبيني مشغول ائتمهليدير و س.م.-نين فيكيرلرينين نشرينين ده منيم مقالهمين "شأني كيتابتي" اولماسي، بو مٶوضوعلارين اهميتيني هئچ آزالتمير.

س.م.-نين مقالهسيني اوخوياندا، آذربايجان ميللي حركاتينين سيرالاريندا تهلوكهلي آخينلارين باش آليب گئتديگيني باشا دوشولور. آمما حقيقت بئلهديرمي؟ ميللي حركاتين حاقيندا علمي سوسيولوژيك آراشديرمالار و ايستاتيستيك ماتريالين اولماديغي بير حالدا، بو حاقدا آنلاييشلاريميزي اساسلانديرماق اوچون، آرقومنتلشديرمهدن باشقا بير يول قالمير. آذربايجان ميللي آزادليق حركاتي، ميللي حوكومت دٶروندن تام فرقلي اولاراق، "بير نئچه ساوادلي رهبر و ساوادسيز كوتلهدن عيبارت پيراميد" مودلي كيمي يوخ، مينلر و اون مينلر ساوادلي و الي قلم توتان، افقي بير سيستمله فورمالاشميش، آزاد فيكيرلي فردلردن عيبارت بير اينتلكتوئل حركاتدير. بو آرادا نشر ايشينين سون درجهده راحاتلاشماسي عوجوباتيندان بير سيرا "خاريج"سسلرده اوردا-بوردا ائشيديلير. بوگون هر عومومو بير حركات كيمي، آذربايجانليلارين نشر ائتديگي اساس جريانين كناريندا هئچ كاتالوقدا، كلاسيفيكاسيالانا بيلمهين فيكيرلر ده مٶوجوددور و مادام كي آذربايجانليلار هاميسي سووئت مودللي بير توتاليتر رژيم و "1984" مودللي "تفكور پليسي" كنترولوندا ياشاميرلار، وضعيت بئلهده قالاجاقدير. هلهليك مين شوكور كي، "تفكور پليسي" آذربايجانليلارين فيكري فعاليتلريني صاف-چوروك ائده بيلمير. آمما (و بو موهوم بير "آمما"دير) آذربايجان ميللي حركاتينين عومومي فيكري-سياسي منظرهسيني ترسيم ائتمكده بو "خاريج" سسلري ايستيناد نٶقطهسي كيم توتماق تاكتيكاسي بوگونه كيمي بير اوغور قازانمادان، فارس شوينيزمينين آژيتاتورلاري و اونلارين تأثير دايرهلرينده بولونان بير-ايكي آذربايجانلي قلم صاحيبي طرفيندن ايستفاده اولموش متوددور. بو متودون يالنيشليغيني گٶسترمك اوچون بير ميثال گتيريرم. مشروطه اينقيلابيني احاطه ائدن عومومي فيكرلري آراشديرماق اوچون ايكي متدود:

1. دونيادا بٶيوك سياسي، فيكري و صنعتي اينقيلابلار، روسيه، عثمانلي و بٶلگهده باش وئرن حاديثهلر، اختر و سايير مطبوعات، تلگرافين رولو، ميرزا فتحعلي آخوندوف، عبدالرحيم بي حق وئردييف، ميرزا حسن رشديه و زينالعابدين مراغهاينين فيكيرلرينين نشري، قوزئي آذربايجاندا گونئيلي ايش قوهسينين سياسيلشمهسي، ملانصرالدين مجموعهسي، آذربايجانين انجمن غيبيسي و انجمنين رهبرلري، دٶورون موهوم روحاني رهبرلرينين فكيرلري، يازيچي و شاعيرلرين اثرلري و ساييري آراشديريب، نتيجه چيخاراماق.

2. بوتون يوخاريدكي متوديك آراشديرمانين يئرينه، اورد-بوردا بير هجونامه، شيفاهي ايفادلرين الدن-اله كئچميش روايتلري، فيلان محلهده فيلان موللانين فيتواسي يا فيلان قوچيباشينين رشادتلر و شنائتلر سياهيسي، بير نٶمره و يوز تيراژدا نشر اولموش هانسيسا قازئتده گلن باشليق، مشروطه رهبري كيمي معرفي اولموش اوچونجو درجهلي بير ليدردن بير سيتات، بير آراليق ماهنيسينين سٶزلري، اهميتسيز بير شهرده بير ايكي يوزنفرليك نوماييشين شعارلاري، باش وئرميش "معجزه"لرين تفضلات و تفروعاتي و بو كيمي ايشلر.

بيرينجي متوديكاايله فرقلي نتيجهلره گليب چيخماق مومكون دورسه، ايكينجي يوللا گولونج و آغيلدان اوزاق هر تئوريني اساسلانديرماق مومكون اولا بيلر. مشروطه دٶوروايله بوگونكو وضعيتين موهوم بير فرقي، بوگونكو نشر ايمكانلارينين سادهليگيدير. اگر مشروطه اينقيلابي دٶورونده حتي آدلي-سانلي ادبي و سياسي شخصيتلر اثرلريني نشر ائده بيلميرديلر، بوگون هر اوشاغين بئله ايمكانلاري واردير و نتيجهده سون درجهده اهميتسيز و حاشيهاي بير بير فيكير ده اينترنت سايتلاريندا كتبي حالدا نشر اولوب و مغرض دوستلار و دوشمنلري ايستهديكلري هر چئشيد ماترياللارلا تأمين ائدير. س.م.- بو ايكينجي يولون البته ايلك يا تك يولچوسو دئيلدير. "ايران امروز" سايتينين درباري يازيچيسي كيمي آجي بارغارساقسياقي باش-سيز اتك-سيز مقالهلر يازان "مزدك بامدادان"(!) آدلي بير شخص بو ساحهده چوخ "اثر"لر ياراتميشدير. منيم بيلديييم قدر، آذربايجانليلاردان آقا سيروسدان اٶنجه ايكي شخص بو "ژانر"دا اثرلر ياراتميشلار. بئله بير متودلا البته هر ميلت و هر كوتلوي حركته هر دامغاني ياپيشديرماق اولار. (مجبوري حالدا اوزن بير يازييا چئوريلميش بو مقالهني تام اوخوماق حٶصلهيه صاحيب اولمايان اوخوجو، بورا كيمي اٶزونو، منيم س.م.- متدوايله دونيا و آذربايجانا باخانلار حاقيندا دئمك ايسته ديگيم اساس فيكري آلميش حئساب ائده بيلر)

حتي ميللي حركاتين منيم باخيميمدان (س.م.- كيمي) تام سهو ايستيقامتده نظريهچيليگيله مشغول اولان ضيالاليلاريميز هاميسي كتبي اينسانلارديرلا و اونلارين اثرلري آذربايجان مطبوعاتي و مدرن مئدياسيندا عومومون ايختيارينداديرلار. س.م.-نين ترسيم ائتدييي قورخونج منظرهنين رئال اولماسي ايدعالارينين ثبوتي دا اونون اٶز بوينونا دوشور.

البته آذربايجان ميللي حركاتينين نشر ائتدييي اون مينلرله مقالهلري شاهيد توتوب ايدعا ائتمك اولار كي، حركاتين حاضير كي دٶرونده فعال اولان نسلين بٶيوك چوخلوغونون گنج اولماسينا باخماياراق، ياييلان فيكيرلرين آراسيندا مدرن و هومانيستي باخيش بير او قدر يايقيندير كي، دموكراتيك تفكور طرزينين بير نٶوع حاكم اولماسي و توتاليتر ايدئولوژيلردن و قارا فيكيرلردن قطعيتلي فاصيله توتماقدا ميللي حركاتين سيرالاريندا ايجماع حاكيمدير. ميللي حركاتين ساغلام فيكيرلرله اينكيشاف ائتمهسي حاقدا بير سيرا فاكتلار الده وار و اونلارين ان اعتيبارليسي بير مٶحتشم كيتابخانانين رفلريني دولدورا بيلن سياسي و بديعي ادبياتدير. بابك قالاسيندا قورولان ايلليك ميللي قورولتايلارين نئچهسيندن الده اولون قطعنامهلر، "آذربايجان دانيشير" مانيفستي، ايراندا سون جمهور باشكاني سئچگيلري عرفهسينده "خواستهاي اساسي آذربايجان" آدلي سند، وارليق، شمس تبريز، نويد آذربايجان، تريبون و بير چوخ درگيلرين آرشيولري، مينلرله سايت و وئبلاق، مينلرله طومارلار موراجعتلر و سايير.

ايران تهولكهسيزليك اورقانلاري و فارس شوينيسمينين ايداره ائتديكلريي تبليغات ماشينلاريني حئساب ائتمهدن، بوگون "سووئت"چيليك و حتي روسچولوق (!) يا ديگر فورمالاردا اولان كمونيزم، سياسي دينچيليك و آشيري ناسيوناليسم هر اوچو يالنيز حركاتين حاشيهسينده بعضاً هايلي-كويلي و باشقا حاللاردا اوتانقاجليق پردهسي آرخاسيندا گئدير.

حركاتين حاشيهسينده حيات سورهن آشيري آخينلارين بير سيراسيني اوشاقليق خستهليگي سانيب اوميد ائتمك اولار كي، اونلارين حركاتين يئتگينلشمهسيله تام لغو اولسونلار آمما هر ديري اورقانيزمين اٶز زيانلي ميكرو بيولوژيك دوشمنلري اولدوغو كيمي آذربايجان ميللي حركاتيده بو قايدادان موستثنا دئيلدير. آمما آقا س.م.-نين بو طبيعي خسته ميكرووارليقلاردان بير نٶوعيني سئچيب، بير قورخونج خسته دئو اورقانيزمي ياراديب، باشقا رقيب بير خستهليك يعني سوئتچي توتاليتر ايدئولوگياسينا برائت قازانديرماغا چاليشماسي، اصلينده ائله ميلي حركاتين هئچ اولماسا بو توتاليتريسم خستهليگيندن اوزاق اولماسينا بير ثوبوتدور.

1. توتاليتر ایدئولوگیا

توتاليتر ایدئولوگیا بير سيرا سيستماتيك، داخيلين اينتيظاملي اولان، دوشونولوب حاضيرلانميش فيكري استروكتوردور. توتاليتر ایدئولوگیا دونياني باشا دوشمك و آيري-آيري اولايلارا قارشي مٶقع توتماغي اٶيردهدير.توتاليتر ایدئولوگیا ديني يا دونيوي اولا بيلر.توتاليتر ایدئولوگیا موباريزه آلتي كيمي عمل ائدير، دقيق، آيدين و قطعيتلي اولور. توتاليتر ایدئولوگیا لاري ”دوشمن”سيز تصور ائتمك اولماز. توتاليتر ایدئولوگیا دوشمن، آرايير، دوشمن تاپير و دائما يئني-يئني آكتوئل دوشمنلرين ماهيتيني ايفشا ائدير. استالين دئيردي: "بيزيم داخيلده دوشمنيميز وار، خاريجده دوشمنيميز وار، بو مسئلهني بيز هئچ واخت اونودماماليييق...» "

توتاليتر ایدئولوگیا حقيقت آختارمير، سياسي غرضلره تابعه اولان، عمل و حركت دالينجادير.توتاليتر ایدئولوگیا فرد يوخ جمعي سئوير و مركبليكدن سادهليگه دوغرو قاچير. توتاليتر ایدئولوگیا نين پالتينده الوان رنگلر و بو رنگلرين نئانسلاري يوخدور، اوردا ايكي رنگ، آغ و قارا رنگلرين دوم آغ و دوم قارا نئانسلاري واردير.توتاليتر ایدئولوگیا شوبهه، ظن و گوماندان اوستون بير قطعي پلاتفورمدا گزيشير. توتاليتر ایدئولوگیا ، اينانير و ايمان اهليني، بدعت، شرك، رفض، تروتسكيسم، ليبراليسم و سازشكارليقا قارشي آمانسيز موباريزهيه امر ائدير. توتاليتر ایدئولوگیا دونياني حق و ناحقه بٶلور، حقي بيرمعنالي دستكلهمهينلري بيرباشا ناحق قوشونو اعلان ائدير. توتاليتر ایدئولوگیا زامان و مكان پرسپكتيوينده، استابيلدير و زامانلا مكانين دهييشمهسي هلم-هلم اونون ديرلنديرمه سيستمينه تاثير بوراخمير. نيفرت توتاليتر ایدئولوگیا اوچون عشق و عاطفه كيمي مقدسدير. توتاليتر ایدئولوگیا نيفرتدن استيمول آلير و نيفرتله لبالب دولو اولمايان مٶمنلري حقيقي مٶمنلر سانميز. توتاليتر ایدئولوگیا يالنيز ميكرو كليمادا ياشايا بيلير و اوز مٶمن قوللارينين رئال حياتلا ايلگيلريني كسيب، اونلاري ميكروكليمادا ياشاماغا عادت وئرير.

سياست يعني كومپروميس، يعني پلوراليست بير جمعيتده مين بير فيكر و اراده و آرزودان كومپروميس نتيجهسينده بير قرار چيخارماق. توتاليتر ايدئولوگيا آمما خاليصليق آختارير و كومپروميسي ساتقينليق، اينحراف، ايماني ساتماق و شيرك سانير.

"۲۱ آذر و بو گون" باشليقلي مقاله باشدان-باشا توتاليتر و ايدئولوژيك بير باخيشين محصولودور. بو يازيدا اولان يالنيش باخيشلار و زورناني سهو طرفيندن چالماغا جهدلر گئنيش و چوخ شاخهليدير. بو مقالهده سايسيز-حئسابسيز و رنگارنگ دوشمنلر ايفشا اولوب، هاميسي نيفرتله ياد اولورلار. نادير حاللاردا دوشمنلرين ماهيتي اوخوجويا تقديم اولونور و چوخ حاللاردا "المعني في بطن س.م.-" قالير. مقاله كونكرتليكدن اوزاق و موبهم دير. بوتون مقالهده بيردنه اولسون سيتات يوخدور و مٶلف اٶزونون نيفرت كامپانياسي اوچون نظرده آلديغي قوربانلاين سايي، نفوذو و يايقينليغي حاقدا بير ديرلنديرمه ده وئرمير. مقالهنين مٶلفي اٶز فيكيرلريني ايثباتاً دئمك يئرينه، تماماً نفيله اونو-بونو ايتهاملاماقلا مشغول اولور. مٶليف آغ و قارادان ساواي بويا تانيمير. سيد جعفر پيشهوريني، مقالهبويو دوم آغ عولويلشديرير، محمد امين رسولزاده و ائلچي بيي قاپ قارا دوشمن اوبرازيندا قلمه وئرير. مقاله نين ايندويد طرفيندن يازيليب، بير فردين فيكيرلريني ايفاده ائتدييي وورغولانمير، "منجه"، "بلكه ده"، «اولا بيلر"، "اولا بيلسين كي" و بو نلار كيمي احتياط قيدلريندن ايستفاده ائتمير، "حق"ين مٶمن جارچيسي و "خير" موجاهيدي كيمي "ناحق" و "شر" قوشونونا قارشي آمانسيز هجوما كئچير. س.م.-نين ذهنينده قوراشميش شر قوشونونون تركيبي اينساندا حئيرت دوغورور: موسلمان شرقين فخري، داهي محمد امين رسولزاده، آذربايجانين ائكس پريزيدننتي مرحوم ابولفضل ائلچيبي، پروفسور جميل حسنلي، شيمالي آذربايجان، توركيه جمهوريتي، توركچولر، "پان توركيستلر"، آنتي سووئتلر، بيزي توركلشديرمهيه چاليشانلار، "آذري" سٶزونو ايشلتمكدن ايمتيناع ائدنلر، ديليميزي استانبوللاشديرانلار، نه موتلو توركوم دئينلر، تورك خانلاري، آمئريكادا رسپوبليكاچي پارتيانين عضوي اولان آذربايجانلي (لار؟) و سايير. جناب س.م.- البته بير خير قوشونون تركيبيني ده اوخوجويا تقديم ائدير كي چوخ اورهك آچان دئيل. بو قوشونون تركيبينه ايشاره ائتمك اوچون ائله اوردا "سووئت"ين اولدوغونو وورغولاماقلا من كيفايتلنيرم.

2. فعل، قول، فيكير

مدرن جمعيتده (جامعهده) اينسانلارين اورهكلرينده نه يه اينانديقلاري، نه دوشوندوكلري اونلارين اٶز مسئلهلري دير سه، جمعيت اونلارين فيكيرلرينين سربست سٶيلهنمه حاقيني قوروماغا ضمانت وئرير و اينسانلار يالنيز اونلاردان باش وئرن عمللر اوچون مسئوليته جلب اولا بيلرلر. فيكير آزادليغي يالنيز مستثني حاللاردا قانون طرفيندن محدودلاشديريلير. آوروپادا بو محدودلاشمانين نومونهسي كيمي بير سيرا اٶلكهلرده ميللي و ائتنيك قوروپلاري تحقير ائتمك و يا هولوكاستي اينكار ائتمهيه ايشاره ائتمك اولار. البته بير عومومو قايدا كيمي ماكسيمال سٶز آزادليغيني تأمين ائتمك، بوتون دموكراتيك سيستملر اوچون ائلمنتار بير وظيفه ساييلير. بو آرادا اينسانلارين اٶز طايفا، ديل، دري رنگي و سايير ميللي خصوصيتلريني "نورم" ساييب، باشقالاريني "ياد" و چوخ حاللاردا اونلارا آشاغي گٶزله باخماق بير خستهليك اولسادا، آشاغي-يوخاري عوموم بشري بير خستهليكدير. ايشاره ائديم كي اسكيمولاردا اٶزلريني دونيانين ان اوستون و آلله طرفيندن سئچيلميش ائتنيك قوروپو حئساب ائديرلر. دونيانين ان دموكراتيك و اينكيشاف ائتميش اٶلكهلرينده ياشايان سويداشلاريميز دا بو خستهليگين اٶز ياشاديقلاري محيطلرده حيس ائتمييه بيلمزلر. بو خوشا گلمز فاكتين اهميتي نه دير؟ بو فاكت اوردان ماراخليدير كي اينسانين بير مركب مخلوق كيمي پتانسيليني بيزه آچير و بيز سياسي فعاليتلريميز و سياسي آماليميزي رئالليقلارين اساسيندا قورماق نامينه، ايراندا فارس ميللتينين ايسوئچ و آلمان ميلتينين هله چاتماديغي ذيروهلره چاتاجاغينا اومود بسلهمك كيمي خوليارلارا آلوده اولماقدان اٶزوموز قورويار بيلريك.

باشقا سٶزله دئسك هئچ كس عاغلينا گتيره بيلمز كي ياخين يوز ايلليكلرده فارس ميلتي اٶزونو دونيانين سئچيلميش و اوستون عيرقي اولماق خولياسيندان ال گٶتورسون. دونيايه ايلك "ولايت فقيه" سيستميني هديه ائتميش ايراندان آوروپايا پناه گتيرميشلرين، اٶز عيرقلريني آوروپاليلاردان اوستون سايماق مودعالارينا بيز چوخ شاهيد اولوروق.

بيرده وورغولاييم كي، ايراندا، بيز كٶنلوموز هر نه قدر ايسته سک ده، فارس ميلتينين اٶزو حاقيندا خوليالي فيكيرلريني دهييشمهيه ياخين يوز ايلليكلرده قادير اولا بيلمهيهجييك. البته دونيادا هئچ جيدي سياسي قووه، اهالينين فيكيرلريني ايدآل سويهده يا ايدآل بير مودل اساسيندا ايصلاح ائتمهيي اوز پروقرامينا قويماميشدير. سياسي بير پلاتفورم هر زامان وطنداشلارين فيكير يا پسيكوژي ساغلامليغيني ايدهآل سويهيه قالديرماق اوچون يوخ، اونلارين ياشاييش سويهسيني قالديرماق، معيشت مسئلهلريني چٶزمكله اينسانلارين خوشبخت ياشاييشي اوچون شراييط ياراتماق اولور.

دئمهلي (خوشوموز گلسهده، گلمهسهده) فارس ميلتينين منسوبلاري طرفيندن، آللهين پيغاميني ايسلام پيغمبرينه چاتديران ميكائيل و جبرائيل آدلى ملكلرينده آريايي و فارس اولدوغو يا يوزلر ايل عٶمر ائتميش "سلمان پارسي" آدلي بيرينين وجودنا اينانماق كيمي آبسورد سٶزلري ائشيتمهيه اٶزوموزو حاضير وضعيتده ساخلاماليييق. البته بو باخيمدان هم فارسلاين و هم اٶزوموزن خستهحال اينسانلاريمزدا اوميد صحتي اولانلار اوزون مودت مدني ايش يا سوسيال تراپيايله چاليشا بيلرلر، آمما بو نٶع خستهليگين درماني سياسي حركات و بيزيم ميللي حركاتيميزين باجاريقي و گوندهليگيندن چوخ-چوخ كنارلاردا يئرلشير.

بيزي ميللت كيمي محو ائديب و يئر اوزوندن سيلمك ايستهين، محمود افشار، ذبيح بهروز و ورجاوند كيميلرين خسته بئينلرينين محصوللاري يوخ، ايكي رژيمين قهريه قووهلرينين گوجوايله حياتا كئچن قانوني و غير قانوني ميليي آپارتايد رژيمي دير. حتي بيز آريا پرست فارس راسيستلرينين فيكيرلري و پروژهلرينين قانونا چئوريلمهسي خطيني آچيق آيدين گٶرسك ده، بيز خسته بئينلرين تراووشاتي يوخ، كونكرت قانونلار و حاكيم رژيملرين قهريه قووهلرينين حيمايهسيله بير ديللي مملكت يارادماق اجرايي پروژهلرينين قوربانيييق. سٶز يوخ كي بو اجرايي پروژهلر بير سيرا نظري پروژهلرين محصوللاريديرلار. آمما بيز هئچ حالدا كيمسهنين فيكير آزادليقلاريني حتي او فيكيرلر بيزه قارشي و چوخ قارا و غئيري اينساني فيكيرلر اولسادا محدودلاشديرا بيلمهريك. نئجه كي، غرب اٶلكهلرينده ده يابانجيلاري اٶلكهدن چيخارماق بير چوخ عيرقچي قووهلرين آراسيندا وار و اونلارين طرفيندن تبليغ اولونور آمما مادام كي بو فيكيرلر، دٶولت سياستينه چئوريلمهييبلر سادهجه اينسانلارين تام حاقلي اولدوقلاري فيكيرلرين بير حيسهسي كيمي گٶرونمهليديرلر. بو حق هم حاكيم ميلت و هم غئيري حاكيم ميللتلره منسوب اولان شخصلر و قوروپلارا عاييددير.

بيزيم ايستهييميز قادينلار اوچون ماعاشين هاميسي و قدرتين ياريسي اولدوغو كيمي، ايراندا غئيري فارس ميللتلره ده سايلاريلا متناسيب، قدرت و مادي ايمكانلارين تضمين اولماسيدير. هابئله بيز هم فارسلار و هم غئيري فارسلار اوچون ايراندان كناردا اٶزلرينه قايل اولدوقلاري معنوي دونيا ايله هر طرفلي و هر سويهده علاقه يا راتماغي هم لئقيتيم ساييريق و هم فدرال عوموم ايرانين ايقتيصادياتي و دونيادا نفوذونون آرتماسي اوچون فايدالي و حتي واجب. بيز فارسلارين افغانستان و تاجيكيستان فارسلاريله همكارليق و هر سويهده علاقهلريني "پان فارسيسم" آدلانديرميريق. بيز فارسلاري دونيانين بير نومرهلي ميلتي اولدوغون ايدعا ائدنلرين آغزيني باغلاماق ايستهميريك. آمما بيز ايراندا بير ديلين رسمي اولماسيني غئيري دموكراتيك و دٶزولمز ساييريق. بو ايكي ايش نه موقاييسه اولوناسي دير و نه بير جينسدن. بير حالدا سٶز، وطنداشلارين ويجدان و فيكير آزادليغيندان گئدير اوبيري حالدا، بير قانلي و قانسيز گئنوسايددان.

حٶرمتلي سيرس مددي بو ايكي مسئلهنين فرقينه وارمادان بوتون مقالهسينده ايكي بٶيوك سهوي هر پاراقراف دا تكرار ائتمگه، اوخوجونو اٶز بيخبرليگينين درجهسيله حئيرتِلنديرير.

a) س.م.- اٶز كيم ليگيني تعريف ائتمكده "آذري" و ان اوزاقي "آذربايجانلي" سٶزونه "تورك" سوزنو قاتسا يا صيرف "تورك" سٶزوندن ايستيفاده ائتسه، "پان توركيست" آدلانديرير. بو آقا حتي بير يئرده اولورسا بو هيستريك نيفرت ياغديرما كامپانياسينين قوربانلاريندان نقل ائده بيلمير كي اونلار " تورك ديللرينده دانييشان بوتون خالقلارين ... توركيهنين حيمايهسي آلتيندا واحيد دٶولتده بيرلشمهسي"ني ايستهميش اولسونلار.

b) س.م.- يوخاريدا ايشاره ائتديييم كيمي، سون ايللر فارس ايدئولوگلارين شعبدهبازليغيني كوپييه ائديب و 85 ايل ايراندا اعمال اولان آپارتايد رژيميله بير سيرا آذربايجانلينين بگنمهديگي فيكيرلر آراسيندا پاريتت يارادير (قرينه دوزلدير). سانكي بيز هيتلرين هولوكاستيلا هانسي سا يهودينين يا يهودي قوروپلارينين خوشوموزا گلمهديگي فيكيرلري موقاييسه ائدك. س.م.- اٶز كاتالوقوندا بو داهيانه قرارا دا گلير كي گويا توركچولر بيزيم ميللي حركاتي "محو ائتمک ایچون جدی حرکته کئچمیشدیر" تصوور ائدين كي، بير جنوبي آفريقالي "س.م.-" تاپيليب و بير سيرا آنتي آپارتايد فعاللارينين فيكيرلري اساسيندا بو قرارا گله كي 1948 -1994 فاصله سينده آپارتايد دٶورونده آپارتايد رژيميله بو فعاللارين فيكيرلي آراسيندا پاريتت قوراشديراردي! س.م.- 10 صحيفهليك مقالهسينين بويونجا تهران آپارتايد رژيميله فيكيرلريني بهينمهدييي آذربايجان آكتيويستلري آراسيندا موقاييسه آپارير و هئچ بير يئرده بو ايكي فنومنين بير جينسدن اولماديغينين فرقيني آنلاديغينا دايير بير ايشاره ده ائتمير. آشاغيداكي جدوله ديقت ائدين:

اٶلكهده قدرتين پايلانماسي
دٶولت آپاراتي و حكومت رهبرلري	اهميت	اهميت	موخاليف، سياسي پارتيالار، ضياليلار و فردلر
نيت، دوشونجه ؟	0%	0%	نيت، دوشونجه ؟
سٶز: دٶولتي تبليغات، مئديال دومينانس	10%	2%	سٶز: سانسور محدودلاشديرير، شايعهلر، محفيل و عائيله داخيلي صحبتلر، ضعيف مئديال اورقانلار
دٶولتين اجرا ائتدييي سياست: دٶولت رسمي ديل اعلان ائدير، تحصيل سيستميني كونترول ائدير، وئرگيلر، طبيعي ثروتلر، اردو و پليس قووهسي اليندهدير و سايير.	88%	0%	نه اوشاغينين آديني سربست سئچه بيلير، نه ترحيم مجلسينين اعلاني اٶز ديلينده اولور و نه قبير داشي

وورغولامالييام كي، بو جدول تام سوبئكتيو اولاراق، سادهجه دئديكلريمه بير نٶوع ايللوستراسيا كيمي گٶرونمهليدير. اصلينده نهدن %88 ونه %78 يوخ سوآلينا منيم جاوابيم يوخدور. بوردا منيم دئمك ايستهديييم بودور كي، موخاليفتين فيكري چوز آز، حاكميت ايدئولوگلارينين فيكري بيرآز آرتيق و اساس اينسانلارين طالعينه تأثير قويون دٶولتين ايجرا ائتدييي سياست و كونكرت تدبيرلردير.

س.م.- مقالهسينده بگنمهديگي ايفادهلره ايشاره ائديب، جوره-به-جوره دوشمنلر تاپاندا، معلوم ائتمير كي مظلوم آذربايجان ميلتينين ميللي حركاتيله موقاييسهده بو دوشمن قوشونو نه كميته و گوجه صاحيبدير. ساده جه اونون 10 صحيفهليك يازيسيندا، 108 يئرده تقديم ائتدييي دوشمن سياهيسينين تركيبيندن ائله معلوم اولور كي حٶرمتلي س.م.- هئچ اولماسا بو مقالهني يازاندا آذربايجان ميللي حركاتيندا هريانا باخديقدا "دوشمن" گٶرور. شخصاً من مينلر الي قلم توتوب آغزي سٶز توتان آذربايجان آكتيويستلري آراسيندا خوشا گلمز ايفادهلر و شعارلارين شاهيدي اولوب اونلاري تنقيد ائتميش[1] بير شخص كيمي بو خسته حاللاري كميت باخيميندان چوخ محدود و تأثير دايرهسي باخيميندان داها محدود گٶرورم. آذربايجانلى الي قلم توتوتانلارين آراسيندا نقاتيو و دستروكتيو فيكيرلرله، پوزيتيو و كونستروتيو فيكيرلري اوخشار فارس قوروپو ايله موقاييسه اوچون "گوگل" آختاريش موتوروندان يارديم آلديم. نتيجه آشاغيداكي جدولده نوماييش اولور:

12 يانوار 2009 ساعات 18، گوگل
ايفاده	سايي	جمع	%
"مرگ بر"	770000	1473000	52
"زنده باد"	703000	1473000	48
اٶلوم اولسون "	3	28813	5
"اولوم اولسون "	1410		5
"ياشاسين "	27400		95
"leve" (ايسوئچجه)	32 800 000	33253000	98,6
”ner med” (ايسوئچجه)	453 000	33253000	1,4
"yaşasın"	3 160 000	3183200	99,3
"Ölüm olsun"	23 200	3183200	0,7

گٶروندويو كيمي گوگلين اساسيندا فارس ديللي يازيلاردا نقاتيو ايفاده، اساساً گونئي آذربايجان آكتيويستلرينين طرفيندن يازيلميش عرب اليفبالي تورك ديللي ادبياتدا اولان اوخشار رقمدن 10 قات آرتيقدير. جدول اٶزو اٶزلويونده ماراخليدير. و لاتين اليفبالي آذربايجان توركونون داها هومانيستي كاراكتره ماليك اولمالي و حتي ايسوئچديللي يازيلارين ياريسي قدر نقاتيو و دستروكتيو اولاراق اونا-بونا "اٶلوم" نيثار ائتمه حاللاري دير. بو مقامدا فرانسالي شرقشناس رنه قروسهنين توركلر حاقيندا بير قضاوتي ايستر-ايستهمز يادا دوشور:

"توركلر موثبت فيكيرلي (پوزيتيو) اينسانلارايديلار و هر نٶوع رجزخوانليق و خوليادان اوزاق" (تريبون 2، ص 171، چهره آسيا، ص 61-69) من تصور ائديرم كي، آقا س.م.-نين نيفرتدن باغلاديغي كاتالوق سوبييئكتيوليييني گٶسترمك اوچون بو جدول تك باشينا كيفايتدير و من مقالهمين ايلك حيسهسينده دئديييم كيمي، مقصديم ميللي مفكورهميزده يالنيشليقلارلا اوزلاشماقدير. س.م.-نين مقالهسين اوخويان هر اوخوجويا بئله ايلقا اولور كي گويا ميللي حركاتين سيرالاريندا يالنيز اٶلوم و نيفرتدن سواي بير مٶوضوع تارتيشيلمير.

3. زامان و مكان desorientation

سياست اگر زامان و مكان چرچيوهسينده، مصلحتلر و مومكونلري آغير-يونگول ائتمك و چوخ واخت، پيسلر آراسيندا آز پپس اولان آلتيرناتيوي سئچمكدير، توتاليتر ایدئولوگیا ، زامان و مكان فرقينه چوخدا وارمير. آديني چكديييم مقاله بوتونلوكله بو سجيهني اٶزونده گوسترير و باشدان-باشا زامان و مكان آدلي فاكتورلارا تام لاقيد ياناشير. سياستده ابدي دوشمنلر يوخدور، و ابدي اولان يالنيز اهالينين منافعيدير. يوزايللرله بير-بيرلريله قانلي موحاريبهلرده اولموش آوروپا ميللتلري بوگون يئني بير دونيادا، يئني منافع اساسيندا باريش ايچينده ياشاييرلار. بو پرينسيپي نظرده آلمادان، بوگون آلمان-روس يا آلمان-پولشا موناسيبتلريني گٶرن اونلارين 60 ايل اٶنجه هانسي آمانسيز موحاريبهنين طرفلري اولدوغونو آغيلينا سيغديرماسى غير موموكون بير ايش اولا بيلر. بونونلا موقاييسهده نيفرت و عيرقچيليگه دايانان هايستان ايدئولوگياسي بوتون آذربايجانين قانيني بئله تٶكسهده هله هيستريك آنتي تورك نيفرت كامپانياسيندان ال چكه بيلمز.

زامان و مكان سياستده سون درجه اهميتلي فاكتورلاردير. 1970-جى ايللرين سونو و 1980-جي ايللرده ايراندا اسلام روحانيتي آمئريكا و غرب دوولتلرينه قارشي موحاريبه آپارديغي حالدا، ايران شرقينده يئرلشن افغانستان مكانيندا آمئريكا اسلام روحانيتينين روسلارا قارشي آپارديقلاري جيهادي لوقيستيك و ماليه باخيميندان تام تامين ائدير. يا ائله همن ايللرده آمئريكانين سيلاحداشي اولان بينلادين باشقا بير زاماندا آمئركانين اٶزونه قارشي بوتون دونيادا جيهاد اعلان ائدير.

س.م.-نين مقالهسينده زمان و مكان ايدئولوگيادا اولدوغو كيمي ثابيتدير. اونون تقديماتيندان معلوم اولور كي، 1945-1946 دٶرو زامان كيمي و ايرانلا گٶنئي آذربايجان مكان كيمي دونوب و ابديته كيمي بيزيم ديرلنديرمه سيستميميز و دونيا گٶروموشوزده اعتيباريني ساخلاماقدا اولاجاقدير. آشاغيداكي جدولدن ايرهلي گلن كيمي روسلارين غرب و بيزيمله موناسيبتلري اٶتن 100 ايل عرضينده بير-بيرلريله تام و موختليف ماهيتلي دٶورلره ماليك اولموشدور. بو البته سياسي باخيشلا بئله گٶرسنير يوخسا اگر كومونسيت ايدئوگياسيلا بو موناسيبتلره باخساق، ايكينجي دٶردن باشاياراق، بير نٶوع دائمي كمونست-كاپيتاليست آنتاقونيستي قارشيدورماسينين حاكيم الماليسيني گٶرمك اولار. يا اگر ديني ايدئولوگيا پرسپكتيويندن باخساق گرك نه اينكي بو تون بو دٶِورلري، بلكه سون مين ايلليك روس-غرب و روس-موسلمان موناسيبتلريني، شرق اورتودوكس كليساسيايله غربين كاتوليك و پروتستان كليسالارينين باريشماز و دوشمن موناسيبتلري كيمي سجيهلنديرك.

1	30 دكابر 1911	روسلارين تبريزده ثقفه الاسلام و ديگر مشروطه رهبرلريني دارا آسماسي
2	28 آپريل 1920	لنينين شخصي امري و خصوصي سيفاريشلريله سرگئي ميرونوويچ كيرووون رهبرليگ ائتدييي 11-جي قيزيل اوردونون آذربايجاني اشغال ائدير. اشغال 71 ايل دوام ائدير.
3	23 آوقوست 1939 مولوتوف-ريبندروپ موقاويلسي 22 يوني 1941 بارباروسو عملياتي و آلمانين سووئتلره هجومو	روس آلمان دوستلوق دٶرو
4	22 يوني 1941 4-22 فورال 1945 يالتا كنفرانسي	روس آلمان موحاريبهسي
5	4-22 فورال 1945 يالتا كنفرانسي الي 2 ماي 1945 برلينين روسلارا تسليم اولماسي	روس-آمريكا-اينگليس دوستلوغو
6	11 دكابر 1945	روسلارين ميللي حوكومته موثبت مٶوقعده اولماسي
7	25 ماي 1946	روسلارين ميللي حوكومتي غربه ساتماسيندان سونرا قوشونلاريني آذربايجاندان گئري چكمهسي
8	24 juni 1948 – 12 maj 1949 برلين بلوكاداسي	سويوق موحاريبد دٶور
8	9 november 1989 برلين ديوارينين ييخيلماسي	ايقتيصادي امكداشليق و ژئوپوليتيك مٶوقعلر اوزره رقابت
9	20 يانوار 1920	روس سووئت قوشونلارينين 20-جي عصرده ايكينجي دفعه باكيا هجوملاري و دينج اهالينين قتل عامي

بو جدول ده گٶردويوز كيمي س.م.- بير واقعهني معين بير زامان و مكاندان سئچيب بوگونه كيمي (و يقين ابديته كيمي) روسلارا بسله ديگى محبتلي ياناشما طرزينه اساس قرار وئرير. آقا س.م.- توركيهيه گلديكده ده الده اولان آلترناتيولردن بيريني توركيهيه بسلهديگي نيفرت و غضبه اساس گٶتورور. من 3 آلترناتيوه اشاره ائديرهم:

آوگوست آيي‌نين 2 سي 1918 تورك قوشونلاري غربي آذربايجاني ائرمني-آسوري قتل عاميندان نيجات وئريرلر:

"شهرده قتله مشغول اولان ائرمني فدائيلر و جيلولارا، بو خبر [عثمانلي قوشونونون شهره داخيل اولماسي خبري] آمان وئرمهدي. اونلار يا سولدوزا ساري قاچديلار يا شهرده بعضي يئرلرده گيزلنديلر. عثمانلي آتديلاري دا يوردشاه دروازاسيندان شهره داخيل اولدولار. او آندا يازيق مسلمانلارين حالي آدامدا رحم دوغوروردو، آغ ساققالار شادليق و سئوينجلريندن آغلالييب، دهشتلي فاجعه‌لردن خيلاص اولدوقلاري اوچون يئره سجده ائديب شوکر ائديرديلر. سايير طبقه‌لر که چوخو ماتملي و عموميتله ستم چکميش و تالانميش‌ايديلار، آغلاياآغلايا آغير تاثير ائديجي حاللا عثمانلي قوشونونو قارشيلاييب اؤزلريني اونلارين آتلارينين اياغي آلتدينا آتيرديلار. هر طرفدن آغلاماق سسي گليردي.... مسيحي‌لر بيرزامان اؤنجه شئيلريني تانيش اولدوقلاري مسلمانلارين ائوينه داشييب، يونگوول و قيمتلي شئيلريني اؤزلريله آپارميشديلار...." (رحمت الله خان معتمداالوزاره (معتمدي)، اروميه در محاربۀ عالم سوز، نشر شيرازه، تهران، 1379، ص ص 196-195 )

16 سنتيابر 1918: نوري پاشانين اسلام قوشون باكيني ائرمني قتل عاميندان قورتارير

1945-1946: گونئي آذربايجاندا ميللي حوكومت دٶورونده، توركيه ميللي حوكومتي آذربايجان توركونون وارليغيني قورويان وارليق كيمي يوخ بلكه شرق بلوكونون بير سوبيكتي كيمي گٶرور.

گٶروندويو كيمي جناب مددي هم توركلره نيفرت ياغديرماق و هم روس سئورليك اوچون، تاريخي فاكتلار و منطقي متديكادان يوخ، اسير اولدوغو ايدئولوگيا مٶوقعيندن چيخيش ائدهرك، يوخاريداكي ايكي جدولدن اونا لازيم اولان پريودلاري سئچميشدير.

س.م.- بوگون آمئريكا و غرب دٶلتلريله آذربايجان موناسيبتلريني آذربايجاين بوگونكو موناسيبتلري اساسيندا يوخ، اٶزونون نامعلوم و سوبيكتيو سببلردن سئچديگي بير تاريخي زمان و جغرافي مكان اساسيندا اولماليدير. من بوردا بو سئچيمين سوبيكتو اولماسين وورغولامالييام. ميثال اوچون اگر بيز غربي (و ائلهجه ده دونياني) ابديته كيمي هانسي زامان بٶلومونده بيزه بسلهديگي موناسيبتلر اساسيندا گٶرمهليييك، اوندا نهدن ائله 1945-1946 -جي ايللر پريودو و گونئي آذربايجاني سئچيريك؟ نظره آلساق كه اينگليس و سايير غرب دٶولتلري مشروطه اينقلابيندا روسلارلا رقابت اساسيندا، مشروطه حركاتينا منفي باخميرديرلار، اوندا آيا بيز مشروطه دٶورونو سئچسك، يئنهده غرب بيزيم ابدي دوشمن رولونا ماليك اولوب قالاجاقدير؟

سيروس تبريزنين مكاندان آنلاييشيدا ايدئولوگيادان دوغما كاراكترليدير. شيعه بوتون يئر كورهسي اوزره اهلي سنتي اٶزونه دوشمن سانديغي يا كمونيسم ليبراليسمله دونيانين هانسي گوشهسينده آسيلي اولدوغوندان آسيلي اولمايان آنتاقونيسمي كيمي، س.م.- اوچون ده، گونئي آذربايجان مكانينين 1945-1946-جي ايللرده بيزه وئرديگي دوست-دوشمن سياهيسي قوزئي آذربايجان اوچون ده اعتيبارليدير! معلوم دئيل اگر 1945-1946 پريودوندا (و اوندان ايللر سونرادا) شاه رژيمي غرب ايمپرياليستلرينين ال آلتيسي ايدي، اوندا شيمالي آذربايجان رهبرليگيده 1920 (و اوندان سونرا) اٶز آزادليغي يولوندا موباريزهسيني غرب ايمپرياليستلرينهمي قارشي يٶنلتمهليايدي؟!

سويوق موحاريبه دٶورونده، اٶز وارليغيني و وطنداشلارينين تهلوكهسيزليگيني قورماق مسئوليتي داشايان توركيه دٶولتي غرب بلوكونا (1952-دن ناتو موقاويلهسينه) قوشولموشدور. بو بلوكدان توركيه نه دن آنتي سووئت سياستي آپارماماليدير؟

گٶرهسن بيز بوگون غرب دٶولتلريله موناسيبتلريميزي نه اساسيندا قورماليييق؟ بوگونكو رئالليقلار و بوگونكو منافعيميز يا اٶزباشينا و سوبيكتيو سببلردن سئچديييميز هانسيسا ماضي بير زماندا دونيا رئال پوليتكاسيندا مٶوجود اولموش بلوكلانمادان گلن مودل اساسيندا؟ روسيهيه گلديده تصوير داها موركب اولور:
1804، 181، 1828، 1906، 1909،0192 و 1990. بو ايللرين هانسيني بيز ابديته كيمي دوام ائدهجك روسلارلا موناسيبتلريميزي تنظيملهين سياستلرين يول گٶستريجيسي كيمي گٶتورهجييك؟

4. "فوندامنتال" زامان

سياست و دونياييه سياسي باخيش زامانلا آدديملايير. بوگونكو دوشمنلر، صاباح ياخين امكداشلار و ايقتيصادي پارتنرلره چئوريليرلر. دوننين سياسي پروقراملاري و دوكترينالاري بوگون واختي اٶتموش و يئترسيز ساييليرلار. هر نسيل، هر سئچگيده سئچيجيلرين ايرادهسيني تمثيل ائدن ايقتيداردان، هر گون مئديادان ياييلان سياسي كومنتاتورلارين فيكري اوندان قاباخكيندان فرقلنير. ان اساس بودور كي، بوتون نسيللر اٶز موقدراتلارينى معينلشديرنده لازيمي اينتلكت و ذكا صاحيبي كيمي عاقل و باليغ سانيليرلار. ايدئولوگيا آمما فوندامنتال بير زمان كسيگينه دايانير. يهوديت، مسيحيت و اسلامين "دوران صدر اسلام" كيمي آدلارلا تانينان فوندامنتال پريودلاريني و بو پريودلارين محشر برپا اولانا قدر كئچرلي اولان ادبيات، عنعنه و ييغيلميش شيفاهي روايتلر (ايسلام دا اولان بير ميليون حديث) و ساييري تانيريق. كومونيزمين ده "دوران صدر"ي بيزه تانيشدير. ماركس و انگلسدن باشلاياراق، لنين، استالين و مائوتسه تونگين يازيلي اثرلري، آتديقلاري آدديملار، اونلاردان نقل اولان سيتاتلار، بديعي ادبيات و صنعت اثرلرين اونلارين ترسيم اولان سيمالاري، هاميسي هرزامان بو ايدئولوگيالارا اينانان مٶمنلرين و اونلارين ياراتدتيقلارين سيستملرين "بوگون"ونه آغير و بوغوجو گٶلگه سالماقدا اولموشدور. بو ديني و دونيوي ايدئولوگيالارين كئچميش بير زاماندا ياشاميش رهبرلر و باش وئرميش حاديثهلره موناسيبتلري، هئچ طرزله مدرن اينسانين تاريخه باخديغي متودا بنزهمير. تاريخ اولوب كئچنلري هر بير مستقيل تاريخچينين گٶزو ايله گٶرور. آمما ايدئوگيا متوليلري بوگونكو نسلي اٶز هژمونلوق و سلطهسينده ساخلاماق اوچون اٶتوب-كئچنلري پالئتينين آغ و قارا رنكلريله بويايير و بير سيراسيني لعنت اوخوماق، باشقلاريني تقديس ائتمك اوچون كوتلهلره تقديم ائدير. اصلينده هر نسل اوندان قاباخكيندن داها ساوادلي، داها بيليكلي اولمالي دير. بئله اولماديغي حالدا، طلبهنين معلميندن و بوگونكو نسلين اٶتن نسيلدن آز بيليگه ماليك اولدوغو تقديرده گرهك زامان كئچديكجه علم توكنسين!!

س.م.- اوچون آذربايجان ميللي حوكومتين قورولما دؤورونده، روسلارين حيمايهچي رولو بير نٶوع "دٶوران صدر" هيبتينده گٶرونمكدهدير. اوزاماندان بري دهييشن فاكتورلارين سياهيسينه ديقت ائدين:

a. بلشويك قيرميزي روسيه، يئريني سويقونچو كاپيتاليست بير سيستمه وئريبدير.

b. غرب نه ايراني ايداره ائدير و نه حيمايه و نه حتي ايرانين دوستو ساييلير. ايران آمريكا دوشمنلرينين بيرينجي سيراسيندادير.

c. روسيه و ايران دونيادا حاكيم اولان ايكي آنتاقونيست بلوكين حيصهلري يوخ، بيرچوخ مسئلهلر و خصوصيله بٶلگهنين يئني ژئوپوليتيك منظرهسيني ترسيم ائتمكده، بير جبههنين عضولري كيمي عمل ائديرلر: چئچنستان، قاراباغ و گورجوستان بو مدعانين دانيلماز ثوبوتلاريديرلار.

d. توركيه داها ايرانلا برابر غرب بلوكوندا يوخ، ايرانلا دوشمن مٶوقعينده اولان غرب و حتي اسرائيلين متحديدير. توركيه هابئله كئچميشدن فرقلي اولاراق مستقيل سياست آپارماق عزمي و باجاريقيني آمئريكا-عيراق موحاريبهسينده مستقيل قالماسيله گٶسترميشدير.

e. قلوبال سويهده داها مركزي دٶولتلرين اٶز اهاليسيني قتل عام ائتمهسي "داخيلي مسئله" ساييلمير. هابئله دونيا ايكي اساس بلوك يوخ، بير نئچه موهوم گوج بلوكلاريندان عيبارتدير.

باشقا سوآل بودور كي بيز 1945-ده روسلارين تبريزه يوللانميش تهران قوشونلارينين قزوينده يولونو باغلاماغي اساس گٶتورمهليييك يا 1946-دا قواملا نفت آلوئريندن گٶزلهدييي منافع اساسيندا ميللي حوكومتي تهران هجومو قارشيسيندا سيلاحسيز بوراخماسيني؟ (ياديزا سالماق ايستيرم كي استالينين 8 ماي 1946 تاريخلي مكتوبو بوتون آيدينليغيايله روسلاين ميلي حوكومتي تهران رژيمي قارشيسيندا سيلاحسيز قويدوغونا اعترافنامهدير.)

باشقا مسئلهده بودوركي، هم محمد امين رسولزاده و هم سيد جعفر پيشهوري اٶز حياتلاري بويو بير نئچه دفعه فيكيرلريني ايصلاح ائديبلر. سيد جعفر پيشهورينين حياتيندا 4 موهوم ژورناليستيك فعاليت دٶورو واردير: "آذربايجان جزء لاينفك ايران است"، "حقيقت"، "آژير" و "آذربايجان". اوستهليك سيد جعفر پيشهورينين استالينله اوز-اوزه دايانديغي دٶورودن اٶلومونه قدر ده فيكرينده معين دهييشيكليكلر باش وئرميشدير. ايندي بوگون بيز نه حاقلا سيد جعفر پيشهورينين هانسيسا حيات دٶوروندن بير طرفلى ايدئولوژيك تصوير ياراديب، دوندوروب، قابا ساليب و موقدسلشديره بيلريك؟

هر ميللت اٶز كئچميش معنوي و مدني ايرثيني كئچميش زامانلارين سياسي و ايدئولوژيك قارشيدورمالاريني ابديلشديرمكله يوخ، معاصر دونيانين آچيق فيكيرليليگي و پلوراليستي باخيشلاريلا ديرلنديرير. البته بو باخيمدان محمد امين رسولزاده ايله، سيد جعفر پيشهوري و حتي (بعضي قيدلرله) نريمان نريمانوف و ابولفضل ائلچيبي و بير چوخ باشقا تاريخي شخصيتلريميز هرهسي اٶز تاريخي ديرلريني ساخلاماقلا معنوي ايرثيميزين آيريلماز حيسهلردير.

5. موخالفت و ايقتيدار

ايقتيدار حتي اگر سومالي كيمي كاسيب و دارما-داغين اٶلكهنين بئله ايقتيداري اولسا، موخاليفتدن موقاييسه اولماز بير درجهده اوستون اولور. هئچ موخالفت، ايقتيداري، هانسي توتاليتر ایدئولوگیا و دونيادا مٶوجود اولان هانسي گوج بلوكونا قوشولماغا مجبور ائده بيلمز. حتي دموكراتيك سئچگيده بير-ايكي فاييز سس فرقيايله مغلوب اولوب، موقتي اولاراق، موخالفت رولو اويناماغا مجبور اولموش چوخ مقتدر سياسي پارتيالار يا بلوكلار دا، قدرتين 48-49 فاييزيني يوخ، 100 فاييزيني ايقتيدارا باغيشلامالي اولورلار. ديكتاتور و توتاليتر رژيملرين مسئلهسي داهادا كسگين قويولور. حاكيم ايقتيدار بو رژيملرده نامعلوم مدت اوچون سياسي قدرتين يوزده يوزونه ماليك اولورلار. بو آرادا موخاليفت اوچون اويناماغا چوخ جوزئي و كيچيك بير يول قالير: آغير قوربانلار و فداكارليقلار باهاسينا ”موخاليفت” ائتمك. بوردا نه ايله موخاليفت ائتمك سوآلي تام يئرسيز و حتي معناسيز اولور. ايشاره ائتديييم كيمي بو مسئلهنين طالعيني ائله حاكميتده اولان قووه اٶزو معينلشديرير. اگر حاكميتده آمئريكايا باغلي اولان لاتين آمئريكانين خونتالاريديرلار، اونلارين موخاليفتي ماركسيست، پروسووئت و پروچين اولماغا تمايوللي اولاجاقلار و حتي كاتوليك كليسادا اٶز قاپيلاريني بو ماركسيستلره آچاجاقدير. آمما اگر سٶز شرقي آوروپانين توتاليتر رژيملريندن گئديرسه، اوندا ديكتاتورادان عصيانه گلميش آزادليق سئور اينسانلار، كنسورواتيو آنتي كمونيست كليسالار و دين خاديملرينه اوز توتوب، آمئريكانين مركزي كشفيات خيدمتينين ايداره ائتدييي "آوروپا راديوسو" و "آزاد آوروپا"دان ايلهام آلمالي اولاجاقلار. حتي پولشادا/لهيستاندا شاهيد اولدوغوموز كيمي كمونيست ايدئولوگياسينين سئويمليسي اولان فعله صينيفينين موتشكيل صينفي موباريزهسي بوتون كاپيتاليست دونياسينين آچيق-آشكار حيمايهسي و واتيكانين بيرمعنالي خئير دوعاسيله حياتا كئچيريليردي. ائله بو سببدن دير كي غرب اٶلكهلرينده طلبه حركاتي سول تمايوللي و بوتون كئچميش شرقي آوروپا ديكتاتورلوقلاريندا اعتراض حركاتي دين- پوپ موزيك و غرب استيللي ياشاييش طرزلريله عجين اولموشدو. يا مثل اوچون بوگون ايراندا رژيمين امر ائتدييي نورملاردان اوزاق پالتار گئيمك ان ياييقين اعتراض علامتيلريندن ساييلير. بو ميثاللارين هاميسيندا موخاليفت حاكم رژيمين ايدئولوگيا و سياستلرينه تاثير ائتمك ايمكانيندان تام كناردا اولموش و بير ساده رآكتيو رول اويناماغا مجبور قالميشدير.

س.م.- اٶز مقالهسينده بو موهوم مسئلهني گٶرمكدن عاجيز اولدوغونو گٶسترير. ميللي حوكومت ايراندا پهلوي ديكتاتوراسينا قارشي قورولموشدو. بوتون كاپيتاليست دونيادا اولدوغو كيمي ايراندا دا هم او تاريخ و هم اوندان سونرا رژيمين حتي دينچي موخاليفلري تام سولچو اولماسالار دا، سول تمايوللو يا هئچ اولماسا آچيق-آيدين آنتي غرب مٶوقعدن عزيمت ائديرديلر. گونئي آذربايجان ميللي حوكومتي، نه اينكي تهران بلكه بوتون غرب بلوكو قارشيسيندا اٶز تهلوكهسيزليگيني قوروماق مجبوريتينده ايدي و بو يولدا اونون يارديم و حيمايه اومدوغو بو بلوكون دوشمني اولان، سووئتلر رژيميايدي. شيمالي آذربايجان آمما بلشويك روسيه اسارتينه دوشموشدو و سونرادان يارانميش كمونيست بلوكوندا اولدوغو كيمي اٶز وارليغيني قوروماق و آزادليغينا قووشماق اوچون روس ايمپرياسيلا موقاييسه اولونا بيلن بير قدر-قودرت گوج مركزينين حيمايهسينه احتياج دويوردو. س.م.- اٶز يازيسيندا گونئي آذربايجان حاليندا، ميللي حوكومتين، آلماني مغلوب ائتميش و نتيجهده بين اللخالق گوج مركزي ساييلان سووئتلردن يارديم اومدوغونو باشا دوشدويو حالدا، شيمالي آذربايجانين لئقيتيم رهبرليگينين بينالخالق حيمايه آختارماسيني پيسلهيير.(؟!) معلوم فاكتديركي، داهي محمد امين رسولزاده، هم سوسياليست و هم دموكراتايدي و كئچميشده، سونرالار آذربايجانين ايشغالچيلاري اولان بلشويكلرلهده ياخين همكارليقدا اولموشدور. محمد امين رسولزاده چار دٶورونده استالينين جانيني اٶلومدن نيجات وئرميشدي و استالينده اٶز نٶوبهسينده اونو زينداندان آزاد ائديب، اٶزوايله موسقويا آپاريب اوردا اونا علمي ايش وئرميشدي. بو سادهجه شخصي موناسيبت دئييلدي. چار رژيمي 1917 فورال اينقيلابيندا دئوريلديكدن سونرا، روس ايمپرياسي اراضيسينده يارانميش 26 مستقيل دٶولت آراسيندان، ايدئولوگيا و بلشويك رژيميله موناسيبت باخيميندان بالشويكلره ان ياخين حوكومت، ائله محمد امين رسولزادهنين رهبرليك ائتدييي "آذربايجان خالق جومهوريتي"ايدي.

البته قوزئي آذربايجان ضياليلاري و سياستچيلري آراسيندا س.م.- كيمي بو ساده رئالليغي گٶروب باشا دوشمك ايستعداديندان محروم اولانلارين بوگون سايي چوخ آزالسادا، وارديرلار. اونلار اوچون كئچميش سووئتين جينايت و ترور رژيميله باغلي هر نه كي اولوب يا واردير محكومي بوطلان اولماليدير. او جوملهدن واختيلا سووئت رژيمينين حيمايهسينه آرخالانميش ميللي حوكومتي ديرلنديرمهيه گلديكده واختيلا قوزئي آذربايجاندا نئقاتيو ايفادهلر مٶوجود اولوبلار. البته ايراندا ايسلام اينقيلابيندان سونرا حتي "شاه" آديني اٶزونده احتيوا ائدن آدلار و اسملرين (ميثال اوچون كرمانشاه، شاهسئون، شاهداماد، شاهكار) هيستريك بير حالدا كٶكلريني كسمهنين شاهيدي اولان بيزلر اوچون ماراخليدير كي قوزئي آذربايجان روس استيلاسيندان آزاد اولاركن، بو وحشتلي گئجهنين سيموللارينين چوخو اهالينين غضبينه دوچار اولماديلار. مشهدي عزيزبيگاوف و نريمان نريمان اوفون آدلاري و قرانيت هيكللري بوگونده اولدوقلاري يئرده ساخلانيرلار. حتي آذربايجاني ايشغال ائدن بلشويك جينايتكار دستهلرينين كامانداني سئرگئي ميرونويچ كيروفون هئيكلي ساكيت بير شكيلده يئريندن سٶكولدو.

6. حيسات يا منطق ، كونكرت يا مبهم

ايدئولوگيا اينسانلارين حيسياتينا تاثير قويماق ايستيرسه، سياستده منطق و دوشونجهلره تاثير قويماق مقصد اولور. سياست آيدين و كنكرت اولدوغو حالدا، ايدئولوگيا دومانلي، مبهم و غير كنكرت اولور. سياستده فاكت آئوديتوريانين ايختيارينا قويولر، اينسان لارين سربست دوشونمك قابيليتلري رسمنيته تانينير و آزادليق، اينسان لارا سهو ائتمك، سهو قرار وئرمك و سهو فيكيرلره ماليك اولماغي دا جايييز گٶرور. ايدئولوگيا اينسانلارين سهو ائتمك يا سهو قرارلا چيخارماسيندان آرخايين اولماديغي اوچون، رئالليقدان فاكتلار و منطقي تفكوردن گلن آرقومنت يئرينه، قولاخ كار ائدن پروپاگاندا و حيسسياتا تاثير قويان، نيفرت يا عبوديت حيسلري اويادان شعارلار و ريتوآللار ا ال آتير. ايدئولوگيا "فاكتا-منطق-دوشنجه-تاثير" پروسهسيني قيصالديب، بير باشا دوشمن حاقيندا ميلتده نيفرت يحسي يارادان پروپاگاندا ايله مئيدانا گيرير. ايدئولوگيا هابئله كنكرت اولماغي سئومير و دوشن تاپيب معرفي ائتمك يا سايير كامپانيالاريندا كنكرت اولمور، موبهم، آدي ادرسي نامعلوم يئرلرده، نامعلوم شخصلرين نامعلوم ميزاندا نامعلوم تخريبات لاريندان خبر وئرير. ايدئولوگيا ايتيهام ائدير و محكوم ائدير. ايدئولوگيا آئوديتوريا اوچون يالنيز ال چالماق و هورا چكمك رولونو نظرده آلير.

س.م.- اٶز مقالهسيني چوخ عصبي و هيستريك نيفرت اعلان ائتمك كامپانياسينا چئويرير. بوتون مقالهده بير سيتات يوخدور آمما اوخوجو معطل قالير كي مٶليف بو گئنلي-بوللو نيفرتنامهسيني هانسي ثوبوتلار و منطيقي آرقومنتلرله اساسلانديرير. مقالهده ائلچيبي، "قاتي پان توركيست" و توران خوليالي آدلانير، ديني دٶولت يارادماق ايستهين آذربايجان ميلتچيلرينه هجوم ائدير، ائرمني مسئلهسينين بيزه شيمالي آذربايجاندان و كورد مسئلهسينين توركيهدن گلمهسيني ايدعا ائدير، "توران بٶيورنلر"دن دانيشير، ديليميزين توركچو-تورانچيلار طرفيندن تاپدانديغيندان و بير سيرا آذربايجانلي|لارين " فارسلارا قارشی مبارزه اعلان" ائتمهسيندن خبر وئرير و سايير. جناب س.م.- هابئله ائرمنيلرين قاراباغدا ياراتديقلاي فاجعهده ائلچيبيين حاكميتيني ده تقصيركار اعلان ائدير. بو مٶوضوعلاين هر بيريني آچماق اوچون كيفايت قدر سند لازيمدير. البته س.م.- ايدعا ائده بيلر كي بير شيفاهي دانيشيقدا هر نه يه سند گتيرمك اولماز. بو دوز. آمما مگر جناب سيروس تبريزي چيخيشينين بو متنيني اينترنتله ياياندا دا، لازيمي سندلره اونا علاوه ائده بيلمزدي؟ عجبا سند وئرمك چتينليگي حٶكم سورن بير شيفاهي دانيشيقدا، بو قدر سندسيز ايدعانين يئريديرمي؟

7. دوشمن

سياستده ابدي دوشمن اولماديغي كيمي، دوست و دوشمن آنلامي هر ايكيسي نيسبي معنا داشيرلار. هر "دوشمن" زامان و شراييط دهييشديكجه يوموشالماق و دوست بير قووهيه چئوريلمهيه دوغرو حركت ائتمك و هر بوگونكو دوست، صاباح، مٶوقعينين دهييشديره بيلمك پتاسيلينه ماليكدير. قووهلرين (اٶلكهلر، قونشو ميللتلر و بين الخالق گوج مركزلري، سياسي پارتيالار و س) بو دائمي گزيشمهسي سياستچيني مجبور ائدير كي آشاغيداكي ايستيقامتلرده چاليشسين:

a) آكتيو دوشمنلري پاسيولشديرمك

b) پاسيو دوشمنلري، پاسيو دوستلارا چئويرمك

c) پايسو دوستلاري آكتيو دوستلارا چئويرمك

d) آكتيو دوستلاردان موغايات اولماق.

آمما ايدئٶلوگيا اوچون بو نئانسلار يوخدورلار: آغ يا قارا، دوست يا دوشمن، مٶمن يا كافر . اوستهليك ايدئولوگيا يوخاريداكي پرينسيپين تام عكسينه اولاراق، ان ياخين قووهلري ان چيركين بير طرزده دوشمن اوبرازيندا ترسيم ائتمكده اصرارلي اولور. شيعه اوچون ان قاطي دوشمن، نه بوديستلر نه ده مسيحيلر دئيللر، اونلارين ايلين نئچه آييندا لعنت اوخودوقلاري، ايسلام پيغمبرينين حيات يولداشي عايشه و پيغمبر اسلامين ياخين صحابهلري اولان، ابوبكر و عمربن خطاب و ايسلام اومتينين يوزده دوخسانيني تشكيل ائدن اهل سنتديرلر! استالينلين تروتسكيدن سونرا، بوخارين، زينوويف، كامنوف تقريباً بوتوب بلشويك رهبرلريني قتله يئتيرمهسيني ياديزا ساليرام. آمما ائله همن استالينين فاشيست هيتلرله پولشاني بٶلمك اوزره موقاويله ايمضالاماسي، و همن زامان آوروپا سوسيال دموكراتلاريني سووئت تبليغات توپخاناسيندان "سوسيال فاشيست" (!) كيمي آتشه توتماسي دا، ايدئوگيالارين بو غريبه كاراكترلريندندير. بو ميثاللاري چوخ دوام ائتمك اولسادا من داها بير-ايكي اٶرنهيه ايشاره ائتمكله، كيفايتلنيرم: چين-ين آمئريكا ايله موناسيبتلرين ياخشيلاشديغي حالدا، ُسووئتلره قارشي نيفرتلي كامپانيا آپارماسي، ايراندا اينقيلابدان سونرا توده پارتياسي و اونون سيلاحداشي "اكثريت"ين، ديني فوندامنتاليستلري قوجاخلاييب، سايير سول قووهلره قارشي هيستريك دوشمنچيليك ائتمك و سايير س.م.-نين مقالهسيني نيفرتنامهدن علاوه، دوشمننامهده آدلانديرماق اولار. بو مقاله 108 يئرده (!) دوشمن معرفي ائدير. ايشاره ائتديييم دوشمن سياهيسي اٶز بوتونلوگونده بو مقالهنين سونوندا وئريلميشدير.

س.م.-نين تقديماتيندا دوشمن قوشونونون تركيبي	مقالهنين نئچه يئرينده آدلانير:
توركچولوك، تورانچي ليق، پان توركيسم	38
كيمليكلري نامعلوم و موبهم دوشمنلر	34
عيرقچي ليق	10
توركيه	10
كونكرت دوشمن لر: ائلچي بي، جميل حسنلي و سايير	6
محمد امين رسولزاده	6
صينفي دوشمن	1
ايمپرياليستلر	1
"دوشمن" قوشونونا س.م.-نين مقالهسيندا ايشارهلرين كولل سايي	108

8. دٶولت-ميللت

1648-جي ايلده وست فالن صولح معاهدسي، آوروپادا ”اوتوز ايلليك موحاريبه” يه سون قوياركن دونيا ميللتلري -سونرالار ”دولت-مللت” آدلانان- بيرليكلرينده فورمالاشماغا باشلاديلار. سون 20 ايلده بو فورمالاشمادا معين دهييشيكليكلري نظره آلماق شرطيله، بوگونه كيمي دونيا ميللتلري بو دٶولت-ميللت فورماسيندا بير-بيرلريله اونسيت قاتيب، آلوئر ائديب يا قانلي موحاريبهلر مئيدانينا آخينيرلار. بو ائله گوجلو بير فاكت ديركي حتي بو دوزني پوزماق ايستهينلر ده -اونو پوزماغا قادير اولانا قدر- اونولا حسابلاشماليديرلار. هر ميلت و باشقا ايجتيماعي يا سياسي قووه بو رئالليقلا حئسابلاشماليدير. واخت گلير كي، بو ميللتدٶولتلره (يا اٶلكهلره) حاكيم ميللتلرين (واقعي يا فرصي و موهوم) منافعي او اٶلكهلرين اسير ميللتلرينين منافعيله توققوشور يا همان حاكيم ميللتين ياخين و اوزاق اٶلكهلرده ياشايان قوهوم-قارداشلارينين منافعيله اوست-اوسته دوشمور. بو حاللاردا، حاكيم ميللت اٶزونون منافعيني اوستون توتور. بو سببدن هم پرولتاريا انترناسيوناليسمي، پان اسلاويزم پان اسلاميزم و پان توركيزم معاصير دونيادا كئچرلي اولمورلار. روسلار شرقي آورپانين سلاويان ميللتلرينين منافعيني قورومورلار، بلشويكلر غرب پرولتارياتي و شرقين اسير ميللترينه شرق-غرب آراسينداكي صولحون قورونماسينا خلل گتيرمهمهيي تٶوصيه ائديرديلر. ايران قاراباغ و چئچنستان موسلمانلاريني ائرمني و روس جينايتكارلارينين حالال قوربانلاري حئساب ائدير. توركيه نه "آذربايجان خالق جومهوريتي"ني و نه "آذربايجان ميللي حوكومتي"نه قوروماغا جهد ده ائتمير. دئمهلي دٶولتچيليگين پراقماتيستي منافعي ايدآليستي شوعارلار ايجاباتيله قارشيلاشاركن حتماً غاليب اولماليدير.

س.م.- بو مودعالارلا نه ياددير و نه اونلاري رد ائدير. آمما آقا س.م.- ايكي يالنيش ايش گٶورور:

a) توركيه دٶولتيني پان توركيست بير دٶولت اعلان ائدير.

b) توركيه دٶولتينين غيرپانتوركيستي و پراقماتيستي عمل ائتمهسيني "ايفشا" ائدير.

جناب رحيم رئيسنيا بو حاقدا يازير:

"پس از شکست دولت اتحاد و ترقی و به قدرت رسیدن کمالیستها، که تمام اشکال توسعه طلبی را مردود شمرده و پدید آوردن ترکیة نوین را در چهارچوب میثاق ملی وجهة همت قرار داده بودند، پان ترکیسم و پان تورانیسم در عرصة سیاست طرد شد. مصطفی کمال پاشا معروف به آتاترک * در سخنرانی خود به مناسبت امضای قرارداد دولتی بین ترکیه و شوروی (26 اسفند 1299 / 16 مارس 1921) در مجلس ملی ترکیه ، رؤیای تأسیس امپراتوری توران را از علل بدبختی ترکیه به شمار آورد و رسماً اعلام داشت که «ما نه پان اسلامیست هستیم و نه پان تورانیست ، هدف ما نیل به استقلال واقعی است ». مصطفی کمال که ایدئولوژی دیگری را بجز ملی گرایی محلی متمرکز بر ترکیه و ترکهای ترکیه برنمی تافت ، از بازگشت سران اتحاد و ترقی به ترکیه جلوگیری کرد و نهادهای پان ترکیستی موجود را که میراث حاکمیت اتحاد و ترقی بود، بتدریج منحل و یا تعدیل کرد. بدین ترتیب پان ترکیسم سیاسی با پیروزی کمالیستها و اعلام جمهوری در ترکیه واپس زده شد (واند، ص 166؛ > دایرة المعارف جهان اسلام آکسفورد < ، همانجا)؛ حتی شخصیتهایی چون ضیاء گوک آلپ نیز که نقش مهمی در شکل گیری ملی گرایی ترک داشتند در دوران جمهوری از صحنة اصلی فعالیتهای سیاسی و فرهنگی رانده شدند (بیات ، ص 68)"

9. مدنيت بٶلگهلري

بوگون 6000 مين ديل ده دانيشان و يوزلرله دين و مذهبه اينانان بير دونيا 180 ميللت-دٶولته بٶلمك ا دئمكدير كي:

a) سومالي و ايسلند كيمي موستثالاري نظره آلماساق، ديل و دين يا بير سٶزله مدنيت باخيمنندان بير دنه ده اولسا هموگن اٶلكه يوخدور.

b) بير چوخ بٶيوك دينلر و ديللر صاحيبي اولان اينسانلار، بيردن آرتيق اٶلكهده سپهلنيبلر.

باشقا سٶزله دئسك، ديل، دين، تاريخ و باشقا فاكتورلارلار، سجيهلنن بير ميللت هم بير واحيد بير اٶلكهنين چرچيوهسينده آزليق فورماسيندا مٶوجود اولا بيلر و هم بئله بير ميللت بير نئچه دٶولت-ميلتده چوخلوق حاليندا حاكيم ميللت اولا بيلرلر. ميثال اوچون عربلر بير طرفدن 23 عرب دٶولت-ميللتلرينده چوخلوق تشكيل ائدن حاكيم ميللتر كيمي ياشاييرلار و بير طرفدن ايران كيمي دٶولت-ميللتلرده آزليق فورماسيندا تاريخي وارليقلارينا دوام ائديرلر. آذربايجان تورك ميللتي بوگون هم بو هر ايكي فورمدا دونيا صحنهسينده حاضيردير و هم دونيا و بشر مدنيتينين داها بٶيوك بير عائلهسي اولان تورك دونياسينا عائد دير. بيزيم فارس باجي قارداشلاريميزدا دا ايكي اٶلكهده حاكيم ميللت، افغانستاندان حاكميتده بٶيوك پايلاري وار و هم بير سيرا اٶلكهلرده آزليق كيمي ياشاييرلار. فارسلارين اوستياداكي قوهوم-قارداشلاريلا نه سويهده موناسيبت قورمالي يا تاجيكلر و افغانستان دريلريله نه مدني آلوئره گيرمك ايستهديكلري نه پان فارسيسمدير و نه غيرمشروع. بوگون غرب دٶلتلرينين بوديئتيله فارس ديلينده يايينلانان مئديا بوتون فارس ديللي ميلتلره خيطاب ائدير و فارس ديلينده دونيانين فارس ديلينده دانيشانلاريني اٶز آئوديتورياسي اعلان ائديرلر. دونيانين گوندن-گونه يئني كامونيكاسيا واسيطهلريله ياخينلاشديغي بير زمانهده، اينسانلار اٶزلرينه، ديل، ديل، مدنيت، ماراخ و هر ديگر ساريدان ياخينليق و دوستلوق آختاريرلار. بوگون بير آذربايجان توركونه چضمده ياشايان اويقور توركوايله قوهوملوغونو بيليب، حيسس ائتمك، ماراخلي اولدوغوندان علاوه اونون اٶزو حاقيندا دونيا گٶروشونو گئنيشلنديره بيلر. بونو پان توركيسم آدلانديرماق سادهجه يالنيش و سياسي ساوادسيزليق نيشانهسي دير.

اوستهليك هر دٶولت-ميللت، و هر دٶولت-ميللتين چرچيوهسيندا ياشايان حاكيم و اسير ميللتلر، بو چرچيوهنين مٶوجودلوغوندان ايرهلي گلن رئالليقلارا و اويون قايدالارينا تابع اولماليديرلار. او جوملهدن هر دٶولت اونون تابعليگينده اولان ميللتين منافعيني نومايندهليگ ائدير. هر زامان هم دٶولت-ميللتين چرچيوهسينده ياشايان ميللتلرين منافعي آراسيندا توققوشما باش وئره بيلر و هم حاكيم ميللتله قونشولوقدا و اوزاقلاردا اولان، قوهوم-قارداش ميللتلرين مصلحتلريله. بو مقاملاردا حاكيم ميلتين نومايندهسي اولان دٶولت، اٶز دٶولت-ميللت قورلوشونون منافعينه اوستونلوك وئرير. ميثال اوچون توركيه چين دٶولتيله اآليش-وئريشدن الده ائتدييي ايقتيصادي منافعيني، اويقورلارين منافعي نامينه قوربان وئرمير آمما بو مقالهنين باشقا يئرينده وورغولاديغيم كيمي بونونلا توركيه اويقور توركونون دوشمنينه چئوريلمير. توركيه هئچ واخت باشقا بير ايدعادا ائتمهميشدير نه شيفاهي و نه كتبي. بو ائله اسرائيل دٶولتيله دونيايا سپهلنميش يهوديلرين موناسيبتينه ده عاييددير و سايير.

10. پان توركيسم و عيرقچيليك

هم آذربايجان، هم فارسيستان (و هابئله عربلر، كوردلر، بلوچلار و توركمنلر) ياخينلاردا و اوزاقلاردا اٶزلرينه قوهوم-قارداش سانديقلاري اينسانلار و ميللتلرله آليش-وئريش ائديب، اونلارا باغلي اولدوقلارينا گوونمك حاقينا تامام كامال ماليكديرلر. بير دونيادا كي، اينسانلار مين بير بهانهايله بير-بيرلرينه ياخينلاشماغا جان آتيرلار، ديل، دين و عموميتله مدني باغليليقلارين اطرافيندا ييغيشماق اينسان حاقلاري كيمي دونيادا رسميته تانينير. پانيسم آمما بير اساس علامته ماليك اولماليدير: باشقا ميللتلرين معنوي يا فيزيكي محويله بوگونكو مٶجود دٶولت-ميللتلرين يئرينه، بٶيوك فارسستان، توركوستان، كوردوستان، ائرمنيستان، صربستان و سايير ياراتماق. يوخسا »نه موتلويوم توركوم« يا »هاراي هاراي من توركم« ديين پان توركيست آدلانيرسا اوندا ايرانين عربلري ده، ايرانا حاكيم اوللان تحصيل سيستمينين فارس ديل و مدنيتيني تبليغ ائدن شعارلارين تكراري اوچون، »پان فارسيست« سانيلماليديرلار! پان توركيسمي، 1983-جو ايلده باكيد نشر اولان، هر بير سطري توتاليتر رژيم ين موختليف اورقانلاري طرفيندن كنترول و فيلتر اولموش "آذربايجان سووئت ائنسيكلوپئدياسي" بئله تعريف ائدير: "تورك ديللرينده دانييشان بوتون خالقلارين گويا عيني ميللت اولدوغونو و توركيهنين حيمايهسي آلتيندا واحيد دٶولتده بيرلشمهسي ايدهياسيني تبليغ ائدن ميلتچي شووينيست، بور ژوا ایدئولوگياسی"(7-جي جيلد ص 451) اينسيكلوپئديا سونرا همين ايدئولوگيانين آتاتورك طرفيندن قدغن اولدوغونادا اعتيراف ائدير. (وورغو مندندير) جناب رحيم رئيسنيانين ايسلام ايسيكلوپدياسينا يازديغي "پان توركيسم" مادهسي آلتيندا مقالهسيده بوتون دئتاللاريله "آذربايجان سووئت انسيكلوپدياسي"له فرقلنمير:
(باخ: http://www.encyclopaediaislamica.com/madkhal2.php?sid=2644)

آقا س.م.- 38 يئرده پان توركيست دوشمنلري "ايفشا" ائديب اونلارا نيفرت ياغديرماق يئرينه، گونئي آذربايجان ميللي آزادليق حركاتينين سيرالاريندان ايكي آچيقلاما وئرمهليدير: كيم بو تعريف اساسيندا:

(aكيملر "توركيهنين حيمايهسي آلتيندا واحيد دٶولتده بيرلشمهسي ايدهياسيني تبليغ" ائديرلر؟ و

(bبونلارين نفوذو و حضورو ميللي حركاتين سيرالاريندا نه قدردير؟

عيرقچيليگين من بيلن تعريفي بودور: " راسيسم، بير ييغيم آنلاييشلاردان عبارتدير كي، بشريتي بير سيرا ، "عيرق"لره بٶلور كه يالنيز فيزيولوژيده يوخ، هم ده، تفكور قابليتي و اينتلكتوئل باخيمدان فرقلينيرلر و بير-بيريله اوستونلوك-آشاغيليق موناسيبتدهديرلر" اگر آقا س.م.-نين باشقا تعريفي يوخدورسا، يوخاريدا كي كيمي گٶسترمهليدير كي، ميللي حركاتين سيرالاريندا

(aكيملر و هاردا دا بشريتي عيرقلارا بٶلوب، تورك عيرقينين اوستونلوگونو ايدعا ائديبلر؟ و

(bبونلارين ميللي حركاتدا چكيسي نه قدردير؟

سايير مسئلهلر:

ايشاره ائتديييم كيمي آقا س.م.- سووئتچي ايدئولوگيا مٶوقعيندن يالنيشليقلار و منطقدن اوزاق فيكيرلريندن ياراتديقي كاتالوقدا توخونماديغي مٶوضوع قويماميشدي. نتيجهده هله من 18 صحيفهده سونرا بير سيرا مسئلهلري آچماغا چاتماميشام. بوردا اونلارين بير نئچهسينه مختصر ايشاره ائديرم. ديرناق آراسيندا اولان سيتاتلار س.م.-دان ديرلار:

v "تورکیه دولتی ده اوز کورد مسئله سینی بیزه صادر ائتمکله، اوزونه «پشت جبهه» یاراتمیش، و بیزی جدی پروبلملر قارشیسیندا قویموشدور."

v عجبا غربي آذربايجان اراضيسينين كورد تورپاغي اولماسيني ايدعا ائدن، خريطهلري توركيه دٶولتيمي چكميشدير؟!

v "شمالی آذربایجاندا، قاراباغدا ارمنی داشناکلاری رهبرلیگی ایله یارانان .... اما فاجعه نین گلیشمه سی و گنیش لنمه سینده «تورکچولوک» سلاحی ایله سیاست میدانینا چیخان، «توران» خولیالی ائلچی بیگ حاکمیتی نین ده رولونو انکار ائتمک اولماز. دئمه لی بو ایکی اکسترمیست پارتیا بیر بیرینی تکمیل لشدیرمیش دیر. ایکی ملتین ساده زحمتکش انسانلارینین ضررینه قورتاران بو ماجرانین داخلی عامللری قدرتدن اندیریلمه لی ایدی و اندیریلمه لیدی. خوشبختانه آذربایجان خلقینین ضررینه"

v بلكه يهوديلر ده آلمان نازيلرينين اونلاري قتل عام ائتمهسينده روللاري واريميش؟! آقا س.م.- بوردا جينايتكارلارلا، جينايت قوربانلاري آراسيندا پاريتت يارادماغين لاپ بي آبير فورمونا ال وورموشدور.

v "چین تورکلری مین ایللر چینلی لرله بیرگه یاشاییب بیر بیرینه تاثیر قویموشسا، سیبری تورکلری روسلارلا متقابل علاقه ده اولموشسالار، بیزده قونشولوغوموزدا یاشایان فارس ملتی ایله بیر یئرده یاشامیشیق"

v بوردا آقا سيروس اوچ اسير تورك ميلتينين، اونلارا حاكيم شوينيست قووهلرله ائله بير يئره قويوب كي، ائله بيل هئچ اولماسا امنستي اينترناشنالين بو اوچ رژيمين جينايتلري حاقدا راپورلاريني اوخوماميشدير.

v "ترکیه ده، اروپادا و هابئله شمالی آذربایجاندان گلیب ایراندا یاشایان پان تورکیستلر و مساواتچیلار فارس شوونیسمی نین، رضا شاهین غدار تبلیغاتچیلاری اولموشلار.... بیزه قارشی مبارزه آپارانلارین چوخ بؤیوک بیر حصه سی ائله آذربایجانلیلار اولموشلار. سید حسن تقی زاده، ساعد، شاه بختی، ذوالفقاری، امیر نصرت اسکندری و مینلر باشقاسی نین آذربایجانلی اولدوغونا شبهه ائده ن یوخدور. شریعتمداری و تهراندا معرکه گزدیرن میرزه حسین واعظ ده آذربایجانلی اولموشلار."

v الجزايرده فرانسا اپمپرياسينين آدام اٶلدورنلري ائله الجزايرليلرايديلر، ويتنامدا آمئريكاليلاردان چوخ آرتيق ويتناملي آمئريكانين حربي عملياتلاريندا ايشتيراك ائديرديلر، هيندوستاندا بريتانيانين ان غدار قووهلري هيندوستانلي، نازيلرين آدام يانديران كورهلرده كادرلاري و ساده ايشچيلري يهوديلر، ايران ايسلام جمهوريتينين شيكنجه و بازجويي ائدن كادرلارينين چوخو تواب سولچولار و موجاهيدلرايديلر. مساوات حاكيميتي روس بولشويك اوردوسو طرفيندن دارماداغين ائديلديكدن سونرا او حاكميته منسوب شخصلر دوشمنلره چاليشديغي حالدا، اونلار، بير او قدر "مساواتچي"ايديلارلار كي، ايراندا عباس شهرياري، سيروس نهاوندي، كورش لاشايي، محمد باهري، پرويز نيكخواه، عبدالله شهبازي و مهدي پرتويكيميلر كمونيست ساييلابيلرلر.

v "امریکا پرزیدنت لیک سئچکی لرینده دسته باغلاییب سویوق محاریبه قهرمانی، افراطی «مک کین» ینین سئچیلمه سینه چالیشان"

v عجبا آمئريكادا رسپوبليكاچي پارتيادا عضو اولوب، آمئريكا سئچگيلرينده ايشتيراك ائتمكده غئير قانوني، غئيري دموكراتيك يا غئيري اخلاقي بير شئيمي وار؟

v "خارجی آنتی سووه ت و پان ترکیست محافلین- فعالیتی نتیجه سینده، سیاسی بوشلوق محیطینده، ائلچی بیگ دیکه له نیر"

v ائلچي بي، سووئت دٶورنده توتاليتر رژيمين غضبين دوچار اولموش ديسيدنتايدي. ائلچي بي1992-جي ايل (7 يون) (99 فاييز يوخ بلكه) 64 فاييز سسله پريزيدنت سئچيلدي. حاكميتده نهيين باهاسينا اولورسا-اولسون پرينسيپيله قالماغا حاضير اولمادي، حاكيميتده اولدوغو ايللرده اينسانلارين آزادليغيني محدود ائتمهدي و حاكميتده گئدندن سونرا هلهده ياشاماغا بير كيرايه اوتاغيدا يوخ ايدي.

v "آنتي سووئت" سيروس آقانين مقالهسينده منفي بير ايتتيهام كيمي ايشلهنير. بوگون مليونلارلا سنده ايستيناد ائتمكله، ساغ يا سول سياسي فيكرلره منسوب اولمادان آسيلي اولمادان، هر دموكرات اينسان اوچون "آنتي سووئت" ائله "آنتي نازيست" كيمي مثبت بير آنلامدير. بوگون آوروپانين سول سوسيال دموكراتلاري و كمونيستلريده سابيق سووئتلرده حاكيم اولموش توتاليتر رژيمي، جينايتلر و كوتلهوي ترورلارلا ياد ائديرلر. 1920-جي ايللرده بيزيم بوگون بيلدييميزين يوزده بيريني بيلمهين نريمان نريمانوفون لنين و استالينه يازديغي اعتراض مكتوبلاري و 1945-1946-دا سيد جعفر پيشهورينين استالينين صبير كاساسيني داشيردان تنقديلري، يا 1990-دا موسقووادا آذربايجانين دائمي نومايندهليگي ساييلان "پوس پردستوآ"دا سووئت جينايتكار اوردوسونون، باكيدا قنوسيد تٶرتمهسيني بير معنالي محكوم ائدن مرحوم پريزيدنت حيدر علييف كيمي شخضيتلر اگر بير نٶوع سولچو و كمونيستايديلرسه، 2009-دا مليونلارلار جينايتين هر بيرينه اون سند قويوب گئدن رژيمين طرفداري اولماقدان آقا س. م.-نين موعجوزهلريندندير.

v يوخاريدا ايشاره ائتديييم كيمي شاه رژيمينين آمئريكا و غرب بلوكوندا اولدوغونا گٶروه بوتون ايران و او جوملهدن گونئي آذربايجاندا آزادليق و عدالت ايستهين جاوانلار سول ايدئولوگيا مٶوقعيندن دونيا و مافيهايه باخيرديلار. بو سولچو نسيل استالينين كوتلهوي تررور رژيميني مودافيعه اوچون يوخ، مظلوملار و سسسيزلرين سسي اولماق ائحتيراصيندان جانلاريني اله آليب، مئيدانا چيخميشديلار. طبيعي كي ليبراليسمين لاتين آمئريكا خونتالارينداكي واريانتي غربي آوروپا ليبرلايسميله عئيني جينسدن اولماديغي كيمي، گونئي آذربايجاندا كي سولچولوق دا، سووئتلر، افغانستان و اتيوپيده اولدوغو جينسدن دئيلدي. بوگون ديوارلارين آشماسي و آرشيولري آچيلماسيندان 20 ايل سونرا، سووئتچيليك و حاكيم ميللت و طبقهلرين باخيميندان ميللي حركاته باخماق چوخ معمالي و آنلاشيلمازدير. ائله بوگون آذربايجان ميللي حركاتينين ضيالي و موتفكير زومرهسينين خصوصيله ياشلي نسله منسوب اولانلارين چوخونلوغونو، كئچميشين سولچو قووهلري تشكيل ائتمهسي اگر بير فاكتدير، آقا س. م.-نين قلمه آئديغي عتيقه فيكيرلرين يوخ درجهسينده اولدوغودا هم باشقا بير فاكتدير و هم يئنهده معنالي. منجه گلهجكده ده عدالت و آزادليق ايستهين اينسانلار ساغ و سول ايدئولوگيالارا منسوبيتلريندن آسيلي اولمادان، آذربايجان ميلل آزادليق حركاتينين بير حيصهسي اولماليديرلار. هابئله توتاليتر رژيملر و ايدئولوگيالار وورغونلاري، ژوزف استالين يا آقوستو پينوشه طرفداري اولمالاريندان آسيلي اولماياراق، آذربايجان ميللي حركاتيندا پان توركيسم و بو كيمي خوخانلار تاپيب، كناردان، حاكيم ميللتين مٶوقعيندن ياناشماقلا يادلاراين اورهييني اله گتيرمهيه اوستونلوك وئرهجكلر.

v ايران ايسلام جومهوريتينين ايدئولوٌژيك دايرهلرينين محمد امين رسولزاده و مساواتين دموكراتيك و سكولار معنوي ايرثينه نيفرتي باشا دوشولندير. بو رژيم حئساب ائدير كي اگر 1980-جي ايلرده بو دموكراتيك عنعنه تام قاباريقليغيلا شيمالي آذربايجاندا، حضورا ماليك اولماسايدي، اوندا بوگون ايران شيمالي سرحدلرينده "2 نٶمرهلي ايسلام جومهوريتي"له قونشو ايدي. ائله بونا گٶرهدير كي رژيمين حسين آباديان كيمي ايدئولوگلاري محمد امين رسولزاده و مساوات حركاتينا اليندن گلن زهري تٶكمدكدن اسيرگهمير. ايندي گٶروهسن آذربايجاننين شرقده باشيني هميشهليك اوجا ائدن، مساوات عنعنهسينه، س.م.-نين حسين آبادياندان قات-قات كين-كيدورتلي موناسيبت بسلهمهسينين سببي نه دير؟

v داها ماراخلي بير مقام آقا س.م.-ين نه اينكي ايدئولوگيا هم ده، متدولوگياسي، سووئت و ايران توتاليتر رژيملريني تداعي ائدير. بيلديييميز كيمي، بو رژيملرده اينسانلاين سياسي و ايدئولوژي منسوبيتي اوبيكتيو اساسلاردا يوخ، "بازجو"لار و "ترويكا"لارين سئوديگي كيمي معينلشير. سٶزو گئدن مقالهده ده آقا س.م. توتاليتر و ايدئولوژيك باخيشلاريندان علاوه اون مينلرله كتبي اينساني عيرقچيليق و پان توركيسمه موتهم ائدركن نه بو ايكي ايسمدن بير تعريف وئرير و نه او كتبي اينسانلاردان بير سيتات گتيرير. ايتتيهاملانديران، مودافيعهائدن، قضاوت قايدالاريني يازان و محكوم ائدن بير "قادير متعال" بير توتاليتر ايدئولوگيا وورغونودور.

v آقا س.م. 10 صحيفهليك يازيسيندا سيد جعفر پيشهورينين آدرسينه خوش سٶزلر عنوانلاماقلا، داها اليني آچيق و اٶزونو آذربايجانديگي ايتتيهاملار و نيفرتلر ياغديرماغا وثيقه قازانميش حئساب ائدير. آقا س. م.-نين يازيسيندان پيشهورييه عاييد تعريفلر و تعاروفلري قيراغا قويساق، بو يازي هر هانسي فارس استالينچي راسيستين بياننامهسيند بير او قدرده فرقلنمهيهجكدير.

دوزو بوردا سٶز قورتارمادان، من يازيمي بيتيرمك قرارينا گليرم. بيرداها س. م.-نين منيم نقد ائتديييم مقالهسينين اوخونماسينين ضرورتيني ورغولاييب، اينترنت آدرسيني بوردا وئريرم:

۲۱ آذر و بو گون دموکراتیک ۲۱ آذر و بو گونکی «ملی» مبارزه ده بعضی آنتی دموکراتیک باخیشلار

این سخنرانی به نقد و افشای برخی جریانات ملی گرای افراطی در آذربایجان امروز - بویژه پان ترکیسم و پان تورانیسم، دشمنی آنان با نهضت دموکراتیک ۲۱ آذر و نقش آنان در انحراف مبارزه امروزی اختصاص یافته است. متن سخنرانی بزبان ترکی آذربایجانی است ...
اخبار روز: www.akhbar-rooz.com شنبه ۱۴ دی ۱٣٨۷ - ٣ ژانويه ۲۰۰۹

اوستهليك سولچولوق و سول ايدئولوگيا حاقيندا منيم فارسجا مقالهمين آدي و آدرسي بئلهدير:

اسطوره زدايي از ايدئولوژي و تاريخ «چپ»

استوكهولم 19 يانوار 2009

(جدول ده "سيرا" س.م.-نين مقالهسينده اول دن باشلايير)


سيرا	سايي	توركچولوك، تورانچي ليق، پان توركيسم
35	1	آنتی سووه ت و پان ترکیست محافلین
3	2	فوق العاده تهلکه لی جریان، «تورکچولوک- تورانچیلیق» جریانی
7	3	پان تورکیسم ده عمل میدانیندا ، بیر معین قدرتلی وارلیق، تورک دولتلری ایچینده ان گوجلوسونونه دایانمالی و اوراداکی حاکم دایره لرین منافعینی اؤز منافعیندن اوستون دوتمالی اولور.
10	4	«تورکچولوک- تورانچیلیق»
11	5	تورکچولوک- تورانچیلیق خطی بیرینجی گوندن بیزیم 21 آذر نهضتی ایله دشمن اولموشدور.
12	6	بوتون آذربایچانچیلیقÑ 3 –بوتون آذربایجانچیلیق Ñ تورکچولوک 4- تورکچولوک Ñ تورانچیلیق
13	7	فوق العاده تهلکه لی پان تورکیسمه، پان تورانیسمه
16	8	تورکچو- تورانچیلارین رضاشاهلار، محمد رضا شاهلار، هیتلرلر- موسولینی لرله، امریکا و انگلیس تجاوزکارلاری ایله بیرلشیب، شمالی آذربایجانا و 21 آذره قارشی امکداشلیق ائتدیکلرینی تاریخین صحیفه لریندن سیلمه ک اولماز.
17	9	21 آذر حرکاتی و ملی حکومت دؤرونده «تورکچو- تورانچیلار» بیزه یوخ، تهران حکومتینه یاردیم ائتمیشلر.
23	10	پان تورکیسم
27	11	پان ترکیسمین 21 آذره قارشی سیاستینی تبرئه ائتمه ک ایسته ین بیر شخص [؟!]
30	12	پان ترکیسم فقط محاربه دن سونرا یوخ، محاربه نین ایچینده و اوندان ایللر اونجه دن آذربایجان دموکراتلارینین قانینا سوسامیشدیر.
37	13	«تورکچو- تورانچیلار» بیزیم مبارزه تاریخیمیزی تحریف ائدیب، اونو اؤز خیرلرینه «مصادره» ائتمه گه، منیمسه مه گه چالیشیرلار.
38	14	اونون ایده یا - دوشونجه لرینی تحریف ائتمک، اونا یالان تاریخ یازماق تورانچیلارین
44	15	ملی هویتینی تورکچولوک ایچینده ازیب محو ائتمه گه چالیشیرلار.
45	16	مشخص آذربایجان ایچون دموکراتیک مبارزه دن یاییندیریب، مجرد «توران» ایچون- آنتی دموکراتیک یوللارلا، قان و عرق مبارزه سینه چاغیریرلار.
46	17	چین تورکلری ایله آذربایجان تورکلرینین تاریخی سیاسی جغرافیایی فرقلرینی گیزله دیب ، هامینی تورک آدی ایله تانیدانلار،
47	18	بیزیم ملی وارلیغیمیزی، آذربایجان هویتیمیزی محو ائدیب، موهوم و نامعلوم تورکه چئویرنلر،
48	19	دیلیمیزی ده اریدیب آرادان آپاریرلار
49	20	تورکچولوک- تورانچیلیقدا دا «آذربایجان» آدی، آذربایجان هویتی دؤزولمز حساب اولونور.
50	21	آذربایجان هویتی یوخ، تورک هویتیندن دانیشیلیر.
51	22	«تورانین بیر ائلی وار، بیر دیلی وار» باغیران «بیگ» لر و «بایان» لار
53	23	مترقی آذربایجان سئوه رلیک ادبیاتیمیزدا «آذربایجانلی» معناسیندا ایشله نن «آذری» سؤزو، و هابئله «آذربایجان تورکجه سی» معناسیندا اولان «آذری تورکجه سی» سیخیشدیریلیب، میداندان چیخاریلمیشدیر.
55	24	یئنی میدانه گلن تورکچو- تورانچی جنابلار
56	25	«تورکله شدیرمگه» چالیشدیقدا، سؤزلر دگیشدیریلیر، «استانبوللاشدیریلیر».
57	26	مختلف دونا بورونموش «تورکچو» ، «تورانچی»، عرقچیلرین سیاست و باخیشلارین.
58	27	«تورکچولوک» تورکلرین بیرلیگی فلسفه سی یوخ، عملده معین دایره لرین منافعینه اؤرتوک اولان بیر فلسفه
59	28	ترکیه ده، اروپادا و هابئله شمالی آذربایجاندان گلیب ایراندا یاشایان پان تورکیستلر و مساواتچیلار فارس شوونیسمی نین، رضا شاهین غدار تبلیغاتچیلاری اولموشلار.
64	29	پان تورکیسم بیزیم نهضتی ملی دموکراتیک مضموندان بوشالدیب، اونو محو ائتمک ایچون جدی حرکته کئچمیشدیر.
69	30	«نه موتلو تورکوم دئییه ن»
70	31	تورکچو و ملیتچیلرین فیکری
78	32	توران بؤیوروب، عرقچیلیک تبلیغ ائتمه گله
84	33	اما فاجعه نین گلیشمه سی و گنیش لنمه سینده «تورکچولوک» سلاحی ایله سیاست میدانینا چیخان، «توران» خولیالی ائلچی بیگ حاکمیتی نین ده رولونو انکار ائتمک اولماز
85	34	قاتی تورکیه پرست، قاتی پان تورکیست ائلچی بیگچیلر
102	35	افراطی تورانچیلار، بوزقوردچیلار
103	36	و جمهوریتی «آذربایجانلاشدیرما» یوخ، «تورکیه لشدیرمه»
108	37	آذربایجاندا «باش بوغچو» لاری، «اولکوجو» لری، «تورانچی» لاری
9	38	«تورک عرقی»، «تورک قانی»، «تورک دونیاسی» اوغروندا مبارزه
سيرا	سايي	كيمليكلري نامعلوم و موبهم دوشمنلر
73	1	بوگون ملاحسنی لری، هادی غفاریلری، آذربایجانلی اولدوقلاری ایجون بیزیم و بیزه متحد حساب ائدنلر،
106	2	بو تهلکه لی خطین
6	3	معین سیاستلرین آلت دستی
24	4	بعضی شیادلار
41	5	سویوق محاربه تاریخی موسسه لری
54	6	آذربایجانا شخصیت وئره ن هر هانسی المنت وارسا، اونونلا دشمنچیلیق ائدیلیر.
62	7	پیشه وری نین عکسی رسولزاده ایله، «بؤزقورد» لا بیر یئرده یاییلیر.
63	8	21 آذرده «قورد» اولاماسی تشکیل ائدیلیر.
65	9	«من تورکم» دئیه، آذربایجان منافعی ایچون عصیان ائدیرلر. اونلار آرا سیرا اؤزلرینی «تورکچو» آدلاندیرسالاردا،.....، اونلاری «پان تورکیست، تورانچی» کیمی قلمه وئره نلر
66	10	تاریخیمیزی مصادره [ائدنلر]
67	11	مبارزلریمیزی ده مصادره ائتمه گه جهد گؤستر[نلر]
74	12	دینی دولت یاراتماق ایسته ین لر
77	13	اؤزلرینی الده قاییرما تشکیلاتلار لیدری آدلاندیران پهلوان پنبه
79	14	مختلف دولتلرین یاراتدیغی بودجه لرله، اوزدن ایراق ملی مبارزه آپارماق ادعاسیندا اولان، امریکانین بیر سنات نماینده سی ایله بیر خیاواندا یان با یان کئچدیکلرینی بؤیوک فخر حساب [ائدنلر]
81	15	امریکا و انگلیس حاکم جنگ طلب دایره لرینه، «ایرانا حمله ائت، سن گویدن بیز یئردن!» دئین بیگلر
90	16	«کوردلره» قارشی اسلامی ایران جمهوریتی ایله بیرلشنلر
93	17	كورد اولترا ملیتچیلری ایله کورد ملتی آراسیندا فرق قویمایان شخصلر
95	18	فارسلارا قارشی مبارزه اعلان ائدن شخص لر،
96	19	فوق العاده ساده لوح، یا مغرض و یا ایران رژیمینین بیزیم ایچیمیزده کی مامورلاری
98	20	بؤیوک داش گؤتوروب آتا بیلمه ین لر،
99	21	ایندیدن استقلال آلیب بیر باشا شمالی آذربایجانا قووشماق و یا تورکیه ایله بیرلشمک ایسته ینلر
100	22	، اؤزونو 21 آذرتشکیلاتی لیدری آدلاندیران تورانچیلار،
104	23	مختلف واسطه لرله بؤیوک قدرتلر- مؤسسه لر طرفیندن حمایه [اولانلار]
105	24	بو موسسه لری دولاندیرانلار
1	25	- آنتی دموکراتیک کاراکتر داشییان بیر سیاسی میل
4	26	ساده، صمیمی، خیرخواه، مبارز انسانلاری حقیقی مبارزه دن یاییندیریب، اونلاری انحرافی یوللارا یؤنه لدن «باشچی لار»
15	27	آذربایجان علیهینه ...دوشمنچیلیگ
52	28	«آذربایجان» دان سؤز آچماغی، آذربایجانچیلیغی باغیشلانماز گناه و «کفر» سانیرلار.
61	29	دوننه کیمی پیشه وری یه لعنتلر اوخویان «بوزقورد» چیلار
75	30	تورک دیلینی یایماق ایچون، خمینی اثرلرینی بیزیم دیله ترجمه ائد [نلر]
80	31	امریکا پرزیدنت لیک سئچکی لرینده دسته باغلاییب سویوق محاریبه قهرمانی، افراطی «مک کین» ینین سئچیلمه سینه چالیشان، اوباما سئچیلدیکدن سونرا، شوونیست شاهپرستلریمیزله بیرلیکده «تعزیه» دوتانلار
91	32	مرتجعلرین و اولترا ناسیونالیستلر
97	33	«ایران» سؤزونو تابو ائدنلر، ،
97b	34	«ایران آدلانان اؤلکه نی» رسمیتله تانیمایانلار
سيرا	سايي	عيرقچي ليق
2	1	بیر آیری متدیک- سیاسی خط ده وار. او خط، «انسان»، «خلق» «وطن»، «آذربایجان» و «ملت سئوه رلیک» یئرینه «قان» «عرق» و «نژاد» سئوه رلیک
5	2	«نژادی»، «عرقی» بیرلیک اساسیندا قورولان «اتحاد» لار
14	3	«عرق»، «قان» و «نژاد» کیمی آنلاییشلار
26	4	ساده زحمتکش خلقی، عرق اوستونلوگو ایله، آلدادان سیاستچیلر، بو قوه نی آذربایجان نهضتی نین علیهینه تحریک ائتمیشلر.
36	5	ملت سئورلیک پرده سی آلتیندا عرقچی لیکه و نهایت اؤز منافعلرینه تابع ائتمک ایسته ین پان تورکیست رهبرلر،
68	6	افراطی ملت پرستلیک
87	7	آذربایجان جمهوریتینده کی «ارمنی- مسلمان» مسئله سینی عرقی دشمنلیک تبلیغ ایتمک
94	8	شوونیسم موضعیندن حرکت ائتمک
101	9	ساغچی افراطی ناسیونالیستلر، تورانچی بوزقوردچیلاردیرلار.
107	10	عرقچیلیر
سيرا	سايي	توركيه
18	1	ترکیه دولتی او ایللر بیزیم فداییلرین یوخ، سرلشگر زنگنه کیمی جلادلارین پناهگاهینا چئوریلمیشدیر.
19	2	ترکیه مطبوعاتینین صفحه لری و آنکارا رادیوسونون آرشیولری بو دشمنچیلیک لرین سندلریله دولودور.
20	3	آنکارا رادیوسو، لندن رادیوسونون قویروغو کیمی نهضته قارشی الیندن گلن افترالاری یایمیش و توطئه لری ائتمیشدیر.
21	4	پیشه وری دؤنه دؤنه بو خیانتکارانه سیاستی تنقید ائتمیش و اونلارین بیزه نه قدر ضربه لر ووردوغونو قید ائتمیشدیر.
22	5	تورکیه یه حاکم اولان ارتجاعی دولت
25	6	ترکیه ده حکم سوره ن تورک ارتجاعسی و «تورکچو- تورانچیلیق» آدی آلتیندا اوز منافعلرینی تعقیب ائده ن مرتجع رهبرلر
28	7	ترکیه ارتجاعسی
29	8	تورکیه مرتجعلری، تورکیه پان تورکیست رهبرلری.
89	9	تورکیه دولتی ده اوز کورد مسئله سینی بیزه صادر ائتمکله، اوزونه «پشت جبهه» یاراتمیش، و بیزی جدی پروبلملر قارشیسیندا قویموشدور.
92	10	ایکی قونشو، ایکی قارداش ملت آراسیندا بؤیوک قانلی سناریولار حاضیرلاماقدادیر تورکیه دولتی اوز سیاستینی بیزه اکسپورت ائتمه سین.
سيرا	سايي	كونكرت دوشمن لر: ائلچي بي، جميل حسنلي و سايير:
42	1	آذربایجانا و اونون تاریخینه محمود افشارلار، کسروی لر قدر ضرر ووران، ائلچی بیگچی
83	2	عثمانلی و مساوات حکومتلری نین وارثلری
8	3	90 نجی ایللردن، آذربایجان جمهوریتینده تورکیه چی ائلچی بیگین حاکمیتي
39	4	ائلچی بیگین یاخین یاردیمچیلاریندان اولان بو شخص [جميل حسنلي]
40	5	وودرو ویلسون
43	6	فارس شوونیسمی و غربده کی سویوق محاربه رهبرلرینین سئوگیلیسی [جميل حسنلي]
سيرا	سايي	محمد امين رسولزاده
31	1	م. ا. رسولزاده نین شکلینی پیشه وری نین شکیلینین یانیندان آسدیرانلار
32	2	رسولزاده او ایللرده عمرونون ان یئتگین چاغلارینی یاشایاراق، بیزیم نهضتین قانلی دشمنلریندن اولموشدور.
33	3	شیادلیقلا 1937 دن 1946 نجی ایللری مسکوت قویوب، رسولزاده حیاتینین او ایللرینی گیزله دن جنابلار
34	4	رسولزاده نه تک بیزیم نهضته طرفدار اولمامیش، بلکه آلمان فاشیسمی ایله- سونرالار ایسه امریکا و انگلیس امپریالیستلری ایله ال اله وئریب بیزه و شمالی آذربایجانا قارشی گرگین فعالیت آپارمیشدیر.
60	5	رسولزاده نین دؤنه دؤنه رضاشاهی مدح ائتدیگیندن
88	6	«رسولزاده کومپانیه سی»
سيرا	سايي	صينفي دوشمن
71	1	آذربایجانلی خانلار
72	2	«تورک» خانلاری و «تورک» ساتقینلارینی «خلق دشمنی» اعلان ائدیب. اونلار بیزی و بیز اونلاری محو ائتمگه چالیشمیشیق.
سيرا	سايي	شيمالي آذربايجان
82	1	ارمنی مسئله سی بو دورده بیزه شمالی آذربایجان واسطه سیله داخل ائدیلمیشدیر.
سيرا	سايي	ايمپرياليستلر
76	1	دنیا امپریالیستلرینین قورقوسو ایله داغیلیب، قان دریاسیندا محو ائدیلمیشدیر.

[1] تصادوفاً حاضيركي يازيدان قاباخكي مقالهم ائله بو مٶوضوعدا اولموشدور: "فيكير موباحيثهسي يوخسا شخصيت ترورو" يس تريبون 4-ده "منفي منم-منم ليك موسابيقهسي" و بير نئچه باشقا مقالهلر