سونرا نه یی گؤزله مه لیییک؟!

 

صدیقه عدالتی /15.09.2008

 

ایکی ایل اؤنجه آقای احمدی نژاد، آلمانین ان اؤنملی درگی لرینن بیری(اشپیگل)-ایله آپاریلان رئپورتاژدا "دونیا اؤلکه لری، بیر چوخ دَیری منیمسه مک اوچون، اؤزللیکله ده دیل و دوشونجه اؤزگورلویو قونوسوندا ایران توپلومونو و اورایا حاکیم اولان رژیمی نی اؤرنک آلمالاری گرکدییینی" سؤیله ییپ و حتی بیر نئچه آدیم دا ایلرله ییپ "باتی دونیاسینداکی قازئته جی لرین ایرانا گئدیپ واوراداکی اؤزگور اورتامی یاخیندان یاشامالارینی" اؤنرمیشدی. مندن باشقا داها نِئچه نفر بو رئپورتاژی "ایلین کمدی سی" سانیپ و قاتیلا قاتیلا گولدوکلرینی دوشونمک ائله ده چتین دئییل.

او رئپورتاژی اوخودوخدان سونرا ایراندان گلن آرد آردا قاپاتیلان درگی و قازئته لرین لیسته سی نی، آیدینلیق، انسان حقلری و اؤزگورلوک اوچون چالیشان عزیزلریمیزین یاخالانما و ایشکنجه یه معروض قالما خبری نی گؤروپ، جناب احمدی نژادین ادعالارینی خاطیرلاماماق مومکون دئییل. البته کی بونون یورومونو و ان چوخ دا افترایا اوغرایان اؤزگورلویون تازا تعبیر و تانیتیمینی دَیرلی اوخوجولارا و زمان زمان سسلندیییمیز انسان حقلری اورگانیزاسیونلارا بوراخیرام.

اؤلکه یه حاکیم اولان کولتورئل، سیاسی، و ائکونومیک ائشیتسیزلییی سورقولایان و اؤزللیکله اؤز آنا دیللرینده تعلیم تربیت آلما، کیمین ان ایلکین حقی ایسته مه سوچوندان یاخالانان و یارقیلانان غیر فارس آیدینلارینین توتولما خبری ایله هر گون کدرلنیپ سارسیلساقدا، بوایستکلرین نه قدر حقلی اولدوغونا هر گون گئچدیکجه بیر آز داها اینانجیمیز آرتماقدا.

 

قلملر قیریلیپ، یایینلار قاپاتیلدی، سونرا دا بو قلملری اله آلیپ، انسان حقلرینی مدافعه ائدن، گرچکلری آراشدیران و یایینلایان دوشونن لریمیزین سیراسینا چاتدی. گلن خبرلری آلدیقدا، اوزولسک ده شاشیرمادیق. چهارشنبه گونو سپتامبرین اونوندا، آخشام چاغی یاخالانان آیدین، قازئته جی، انسان حقلری مودافیعه جی دوشونن لریمیزین دوروموندان هله هیچ بیر خبر یوخ. اونلارین یاخالانما سایاغی بیله هیچ بیر انسان حقلری قوراللارینا سیغماماقدادیر.

 

البته کی مدرسه لرین آچیلما عرفه سینده بو گئنیش چاپداکی توتولمالار دوشوندوروجودور؛ اوشاخلاریمیز اؤزآنا دیللرینده ائییتیم آلمادیقلاری سوره ده اؤز کیملیکلرینه و دَیرلرینه یابانجی لاشیپ و بو دا 80 ایللیک گئچمیشی اولان غیر فارس خلق لرینی یوخ ائله مه سیاستینین داها دا گوجلنمه سینه وسیله اولاجاقدیر.

 

انسان حقلری و میللی ایستکلریمیز اوچون چالیشان آیدینلاریمیزا اویقولانان باسقی و شیددت  نه توپلوملارین  ایلرله مه و دموکراتیک لشمه آنلاییشیلا ایلگیده، نه جمهوری اسلامی نین اصرارلا سرگی لمک ایستدییی مدینۀ فاضله و نه ده امضالادیغی انسان حقلری موقاویله لریله اویماقدادیر. آیدیندیر کی بئله بیر تشبثلردونیا سئوییه سینده بوتون آزادلیق سئون انسانلار، قوروپلار و اورقانلارطرفیندن محکومدور.