سیاسی یادداشت:

آذربایجان اؤیرنجی حرکاتینا باسقی لار آرتدیقجا داها گوجلنیر

آذربایجان اؤیرنجی حرکتی کئچن اوچ ایل ایچینده تئوریزه اولوب و بو تئوریک چرچیوه ده اؤزونه مخصوص کیملیک قازانماغا یؤنه لیب دیر. سورجین باشلانماسیندا حاکمیت طرفیندن اصلا جیددی سانیلمایان بو یئنی سیاسی کیملیک آددیم آددیم اؤز کیملییی اساسدا شبکه لر و شخصیت لر یاردیب دیر و یارانمیش بو یئنی اورتامدا بیر سیرا اؤزللیکلره صاحیب اولوب. اؤیرنجی حرکاتی آرتیق هم ایران همده گونئی آذربایجان میللی حرکاتی ایچینده اؤزل بیر دوروم حالینه گلمک ده دیر. بو حرکت 1385.نجی ایلین اردیبهشت و خرداد قیام لاریندا اؤنجول اولوب اؤزونو ایران و منطقه ده تانیتماغا باشلاییب دیر. ایرانین ایندی کی دوروموندا بوتون سیاسی و ایجتیماعی حرکت لر کامیل سس سیزلیگه اوغرادیغی بیر دؤنمده آذربایجان اؤیرنجی حرکاتی تک باشینا حاکمیتین باسقی لاری قارشیسندا دایانیب و موباریزه ائدیر. نظره گلیر سون بیر ایل و اؤزللیک له 6 آی ایچینده ایرانین ایطیلاعات و امنیت ویزارتی بو حرکتی همشه لیک آرادان قالدیرماق اوچون اؤزل تدبیرلر و ایقدام لار ایجرایا قویور. بو هفته نین یازیسیندا آذربایجان اؤیرنجی حرکتینین سون دورومو و معروض قالدیغی باسقیلار تحلیل اولوناجاقدیر.

آذربایجان اؤیرنجی حرکتی اؤزونو اؤزل سایی لار و تئوریک مقاله لر آراجلیغی یلا تانیتماقدا چوخ اؤغورلو گؤسترمیش دیر. سونرا سیته لر، وئبلاگ لار و باشقا اینترنتی چالیشمالار سونوجوندا اؤز کیملییینی اؤیرنجی جمعیتی ایچینده یایماغا چالمیشمیش و سون آلتی آیدا منطقه ده یئنی اوغورلار الده ائتمیشدیر. گونئی آذربایجان اویرنجی حرکاتی، زمانیندا دانیلماغا و سانسور ائدیلمه یه معروض قالسایدی دا ایندی آرتیق ایرانین اؤیرنجی حرکاتی طرفیندن رسمیته تانینمیشدیر و اؤز آدی ایله خبر یایماغا باشلامیشدیر. اؤرنک اوچون امیرکبیر خبرنامه سی سون توتولمالارین خبرلرینی بو حرکتین اؤز آدی یلا یایمیش دیر و اوندان سونرا بیر سیرا سیته لر و رادیولاردا دا خبرلری گئنیش بیر سوییه ده گئتمیشدیر. بو اؤنملی حرکتین آردی توتولمالی دیر. بو حرکت میللی حرکتین یئنی فازیندا دیرلی بیر رول اویناماقدادیر. بو سورجده کی اولای لاری گؤزدن گئچیریرکن، اؤیرنجی حرکاتی نین بو رولونو داها یاخشی گؤرمک اولا بیلر.

اویرنجی حرکاتینین گوجوندن قورخویا دوشن حاکمیت حساس گونلره یاخینلاشمادان بو حرکتی داغیتماغا چالیشیر. بیر سیرا اویرنجی فعاللارینی تحصیلدن محروم ائتمک، اونلارجا اؤیرنجی نی اینظیباطی کومیته لره چکمک و نئچه اؤیرنجی نی توتوب زیندانا سالماق بیر پیلانلاشمیش حرکتدن خبر وئریر. حاکمیت اؤز فیکریجه بو ایشله اؤیرنجی شبکه لری، تانینمیش اؤیرنجی فعاللاری و مئدییالارینی تانییب و داغیتماغا یول تاپا بیله جک دیر و هر ندن اؤنملی بو حرکتین تانینمامیش هیدایت شبکه لری، مرکزلری و سمبلیک فردلرینی کشف ائده بیله جک دیر. بونلاردا دا اوغور قازانا بیلمه سه ان آزیندان بو باسقی لار فعالیتین هزینه سینی آرتیب فعاللاری گیزلنمه یه و سوسماغا مجبور ائده جک دیر. حاکمیتین باسقی لاری دوغرولتوسوندا رسمی اؤیرنجی درنک لری (نهادهای دانشجویی) اؤزللیک له اؤیرنجی سل تشکیلات لار، اوجاق لار، درنک لر و درگی لر باغلادیلیب دیر و اویرنجی یاتاق خانا لارینا حمله اولونوب. بو ایش لر تام آنلامییلا یئنی بیر سورجین باشلانقیچی نین آچیق بیر گؤسترگه سی دیر. بو ایشلر نتیجه سینده اؤیرنجی فعالیت لری اینترنت کیمی مجازی دوشرگه لره کوچوبدور. یئنی آشامادا حاکمیت چالیشاجاق دیر الیندن گلدیکجه اینترنت فضالارینی کنترولا آلسین. آنجاق بوندا چوخ اوغور قازانا بیلمه دییی ایندیدن بللی دیر. اؤیرنجی حرکتینین اؤزل و بللی بیر هیدایت قروپ یا مرکزی اولمادیغی اوچون نئچه مرکزلی فعالیت ائدیر. هر هانسی جمع داغیلیرسا نئچه یئنی مئدیانین یارانماسی اؤن گؤرولور. هر حالدا بو باسقیلارلا موباریزه ائتمک اوچون گرک اؤیرنجی چالیشقانلاری بوتون فعالیت لری بیر یئرده متمرکز ائتمه ییب و هر نه یین اوجونو بیر نوقطه یه دویونله مه سین لر.

بیلیم یوردلار ایچینده تبریز بیلیم یوردو اؤزل بیر دورومو یاشاماقدادیر. آیدینجاسینا بللی دیر کی بو اونیورسیته آذربایجان اؤیرنجی حرکاتی کیملیینی منیمسه ییب دیر. حرکت تئوریک تمللرینی برکیدرک کیملییینی فعاللار ایچره یاییب و بو اسادا شبکه لر و قورولوشلار قوروبدور. اؤنجه قورولان و ایرانا منسوب اولان بوتون قورولوشلار بو کیملیک ائتگیسینده آذربایجانلی لاشیب لار. حاکمیت ایرانین بوتون اونیورسیته لرینده اینستیتولاری داغیدا بیلسه ده تبریز اونیورسیته سینده هله اؤیرنجی-حاکمیت موباریزه سی بو اینستیتولاردا دوام ائدیر. بو بوتون اویرنجی لر اوچون دیرلی بیر تجروبه دیر. بونا رغمن آذربایجان اؤیرنجی کیملیییی تئهران اونیورسیته لرینده یئترینجه یاییملانیب، منیمسه نمه ییب دیر. تاسسوفله بو اونیورسیته لرده چالیشان اؤیرنجی لر بو حرکتین فعالیت لرینی تئوریزه ائتمه ده دوزگون گرکلی چالیشمالاری اولماییب دیر و طبیعی کی بئله بیر دورومدا اؤیرنجی لر ده بو حرکت له ایلگی قوروب اونو تام قبول ائده بیلمه ییب لر. باشقا اونیورسیته لرده ده نیسبی بیر چالیشمالار گؤرونور.

نظره گلیر گلن گونلرده حاکمیتین توتوقلامالاری دوام ائدیب یئنی اؤیرنجی فعالاری دوستاقلارا سالینسین. اونوتمایاق، بیز موباریزه ائدیریک و هامیمیز بوتون توتولان دوستلاریمیزدان حیمایه ائتمه لییک. اونلارین خبرلرینی یایماق و هر ندن اونملی اونلارین ایداللارینا چتینلیک گونلرینده چالیشماق ان بؤیوک وظیفه میزدیر. اؤیرنجی حرکاتی نه قدر ده بیر گوج کیمی دیرلندیرسک، بعضا بو دوشونجه آلدادیجی اولوب و بیزی اساس گؤرویمیزدن اوزاق سالا بیلر. بیز بونو یاخشیجا بیلمیشیک کی اؤیرنجی حرکاتی هر زمان ایله رلمه پروسسینده آددیملامالیدیر و هئچ بیر باسقی بونون گلیشمه سینه انگل اولا بیلمه یه جک. اؤنملی اولان حرکتین توتومو و دورومیلا باغلی گرکلی سیاست و هدف لری پیلانلاشدیریب و او دوغرولتودا حرکت ائتمکدیر. زیندان لار و باسقی لار یالنیز موباریزلرین سایینی آرتاجاق دیر و سو کیمی آخیب یولونو تاپان اؤیرنجی حرکاتی یاخین گله جک ده کوکره ین بیر سئل و شایدده ووقارلی بیر دنیزه چئوریله بیلر. بونو بیزیم بو گونکو تدبیرلی موباریزه میز و چتینلیک لره دؤزمه میز ایثبات ائده جک دیر.

شنبه شهریور آی نین ایکیسی 1387

گله جک بیزیمدیر

http://www.oyrenci.com/