ايلك٬ سون يا نؤوبتي بايراق؟

عليرضا اردبيلي

alirza@live.se

 

ميللي بايراق٬ موستقيل بير ميللت اوچون آي و گونش كيمي بديهي ساييلديغي حالدا٬ اسير ميللتلري چتين بير ايكي يول آييريجيندا قويور:

 

a)     بايراق سٸچمك اوچون ميللت­ين دموكراتيك يول­لا سٸچيلميش صلاحيت­لي اورقان­ينين قورولماسي اوغروندا چاليشماق.

b)     اؤزونه عالي و ميللي قانون وٸريجي اورقان­ين صلاحيت­يني وٸرميش بير قيسيم قوروم­لار و شخص­لر٬ هله موجاديله ايسته­نيلن نتيجه­يه چاتمادان٬ بيرباشا بايراق سٸچمك و ميللتي بو سٸچيم­ين دوغرو ـ دوزگون اولماسينا اينانديرماغا جهد گؤسترمك.

 

گؤرونودويو كيمي هر ايكي مؤوقع­ده حاكيم پرينسيپ٬ ميللي آزادليق موجاديله­سي­نين اوغورلو و افكتيو آپاريلماسي و خوش عاقيبت اولماسي­دير. هر ايكي مؤوقع بير كونكرت وضعيت­دن ديگرينه و بوگوندن صاباحا ده­ييشه بيلر. آمما آجيناجاقلي بودوركي٬ گونٸي آذربايجان­دا بير سيرا مسٸوليت­سيز حركت­لر اوچونجو بير آلترناتيو يارادماغا موفق اولموشلار:

c)      جور به جور بايراقلار ياراتماقلارلا٬ بايراغي ميللي بيرليك يوخ٬ ميللي تفرقه سيموولو كيمي تانيتديرماق.

 

حاضيردا بو خوشا گلمه­ين منظره­نين عومومي كونتورلاريني آشاغي­داكي كيمي ترسيم اٸتمك اولار:

 

  1. ايلك بايراق
    سٸوينديريجي حالدير كي مدرن تاريخميزده هانسي بايراغين ايلك آذربايجان بايراغي اولدوغو موباحيثه­سيز بير سورون­دور. آمما بو اجماع اٸله بورداجادا قورتارير. همن ايلك بايراق بوگون گونٸي­ده نه استاتوسا صاحيب اولمالي­دير؟  بٸله­ليكله قوزٸي­ده ميللي بايراق٬ بيرليك و مستقيل­ليك رمزي اولماقلا برابر٬ گونٸي ده بايراق مساله­سي اؤز حلليني گؤزله­يير.

 

2.بير مللت بير بايراق

ايلك بايراق قوزٸي­ده اولدوغو كيمي٬ گونٸي­ده ده  قوللانيلا بيلرمي؟ بو سوآلا موثبت جاواب وٸرنلراوچون داها بايراق موباحيثه­سي قالمير. اونلار٬ ايلك بايراغي اٸله بوگون گونٸي­ده ده ميللي بايراق كيمي قبول اٸديب و ايستيفاده اٸديرلر. بونلارين باخيميندان اساس مساله (زامان و مكان فاكتورلاريني نظره آلمادان) بير ميللت بير بايراق پرينسيپي دير و بو پرينسيپ هر بير سياسي يا ديپلماتيك مولاحيظه­دن اوستون­دور.

 

3. هله­ليك گونٸي­اوچون هٸچ بير بايراق

بو فيكري دستكله­ين­لره گؤره:  ايلك بايراغا تامام ـ كامال سايقي­لا ياناشماق شرطيله٬ گونٸي­ده بايراق و هر هانسي ميللي سيموول­ون سٸچيم­ينده تلسمه­دن٬ سٸچيلن ميللي بايراغي ميللت بايراغي اٸدن لازيمي تاريخي شراييطي حاضيرلاماق لازيم­دير. بايراق و سايير ميللي آتريبوت­لار زامانلا و موناسيب تاريخي مقام­دا معين­لشه­جك­لر. ميللي حركات­يميز اؤز گليشمه­سي و يٸتگين­ليگيله بو مقاما چاتمادان٬ صنعي يوللارلا دوغان بايراق٬ تلم ـ تلسيك سٸزارين اولموش ناقيص بير سيموول اولاجاقدير كي٬ ميللي بيرليك­دن آرتيق ميللي حركاتين آكتيويست­لري سيرالاريندا٬ داغينيق­ليغي سيمووليزه اٸده­جكدير. سؤزو گٸدن مقام ايلك نؤوبه­ده ميللت­يميزين دموكراتيك يول­لا سٸچديگي قانون وٸريجي اورقان­ين يارانماسيله يارانملي­دير. هر چند كي تام غير عادي و الوٸريشلي بير شراييط ده٬ باشقا پراسٸس­لرده بوتون ميللت­ين سٸوديگي و اونونلا گوونديگي سيموولو آرايا چيخارا بيلر.

 

4. بير ميللت ايكي بايراق يا عمل­ده بير ميللت چوخ سايي­دا بايراق­لار

 

يوخاريدا ايشاره اولان تاريخي مقامي ال چاتماز گؤرن بير قيسم دوستلار٬ آلترناتيو بايراغي­ اٸله اؤزلري آرايا چيخارماغي مقصده اويقون سانيرلار. بو سيلسيله تشبوث­لره گاموح تشكيلاتي طرف­يندن استارت وٸريليب و هله سونا چاتماسي­ني گؤرمك مومكون دٸيل­دير. بو دوستلار دا اصلينده ايلك بايراغا تام حؤرمت و سايقي­لا ˮموقت“ و بو كيمي قٸيدلرله اؤز آلترناتيولريني آرايا آتيرلار. بير ميللت ايكي بايراق شعاري­نين طرفدارلاري٬ ايكينجي بايراق يا گونٸي بايراغي­نين عوموم ميللي بير پراسٸس يا هٸچ اولماسا عوموم آكتيويست­لر سويه­سينده چؤزولمه­لي بير سورون كيمي گؤرمورلر. بو دوست­لار حتي سؤز و ادعا مقاميندا دا٬ گونٸي­ده بير و يالنيز بير بايراق­ين سٸچيلمه­سيني ضمانت اٸدن پراسٸس­ين جيزگي­لريني­ده جيزماغا زحمت چكميرلر. نتيجه­ده بير ميللت ايكي بايراق شعاري­نين طرفدارلاري­نين فيكير و عمل­لري بير چوخ بايراق­لار آرايا چيخارماق پتانسيل­ينه ماليك­ اولموش­دور. بو گونه كيمي بو پتانسيل اؤزونو٬ گاموح بايراغي و بير نٸچه آز تانينميش بايراقلارين ايجاديله گؤسترميش­دير. سون زامان­لار (اگر من بيرداها سهو معلومات آلماميشام­سا!([1])) ˮبير قروپ موستقيل ميللی فعاللار طرفيندن“ آرايا قويولان يٸني پراسٸس­ده اٸله بو سيلسيله­دن اولان نه بيرنجي و نه سونونجو جهددير. بو چاغيريشا مثبت و منفي ياناشماق قصديله٬ بوگونه كيمي  25 ايمضاايله٬ 50 ـ دن آرتيق يازي نشر اولموش­دور. ايمضالارين يالنيز بٸشي­نين كيمه مخصوص اولدوغو معلوم­دور. بو 25 ايمضا صاحيبلري البته بير فيكيرده دٸيل­لر و اونلارين آراسيندا بير نٸچه آلترناتيوي دستك­له­ينلر واردير. حتي بيز اگر بو  20+5 قوروپونو بير فيكير و بير عمل صاحيبلري كيمي فرص اٸتسك٬ او حالدا اساس بير سورون اؤزونو هر فيكير صاحيبينه تحميل اٸده بيلر:

 

          عجبا بو 20+5 ايمضا ميللي سيموول سٸچمه­يه ساي يا سايير ميللي مٸريتلر باخيميندان يٸترلي ساييلا بيلرمي؟

 

اگر بو سوآلا جاواب مثبت­ديرسه٬ اوندا يٸني بير  20+5 يا  40+10 (و. س.) بو  20+5 كيمي عوموم­ميللي قرارلار چيخارماغا صلاحيتلي ساييلا بيلرمي؟ بٸله اولورسا٬ اوندا يٸني  20+5ـ لر اسگي  20+5 ـلرين چيخارديغي قرارلاري ابطال اٸده بيلرلرمي؟ ايمضا صاحيبلري­نين كيم­ليك­لري معلوم اولماديغي حالدا٬ خٸير (يا شر) نييت­لي بير شخص 5٬ ٬ 10 يا 20  و هر هانسي باشقا سايي­دا ايمضاايله اينترنت عالمي­نه داخيل اولا بيلمزمي؟

 

5. باشقا بير آسپكت­دن

مساله­يه باشقا بير آسپكت­دن ده باخماق دا مومكون­دور. ميللي منافع­يميز باخيميندان اورتوقرافيك قايدالاريميزين استانداردلاشديريلماسي داها اؤنملي­دير يا 30 ـ 40 ميليون­ليق ميلتي دونيادا دوست و دوشمن آراسيندا تمثيل اٸده­جك بايراق؟ جواب البته بايراغين داها اؤنملي اولماسي­دير. چونكو بيزده فارسلار كيمي چوخ­دا استاندارد اولمايان يازي قايدالاريلا يازيب نشر اٸتسك­ده٬ بير قباحت  ساييلا بيلمز.

 

بس بير بيرگه سياسي بيانات­لا موقاييسه اٸسك نٸجه؟ ميلي بايراق اطرافيندا ميللي بيرليك داها گٸنيش اولمالي­دير يا سياسي بير بيانات اطرافيندا؟

اؤتن يازيمدا اشاره اٸتدي­ييم كيمي٬ تهراند­ا كٸچيريلميش ايكي اورتوقرافي سٸمينلارلاري بوتون موهوم تورك شهرلريندن چوخ سايي­لي يازيچي٬ ژورناليست٬ ديلچي٬ ضيالي و فيكير صاحيبلرينين دموكراتيك بير پراسٸس چرچيوه­سينده موداخيله­لريله باش توتموش­دور. يا ميثال اوچون ˮآذربايجان دانيشير“ بياناتي  1500 ـ دن آرتيق ايمضاايله نشر اولموشدور. ماراخلي بودور كي٬ بو ايكي ميللي آدديمي آتانلار آراسيندا ياشاييش يٸري و سياسي فيكير خريطه­سي باخيميندان بير ـ بيرلريندن ديامترال فرقلي  جغرافي­لره منسوب اولان و كيمليكلري هامي­يا معلوم شخصيتلرين آدلاري واردير.

 

6. سون سؤز

منجه 30 ـ 40 ميليون نفوس­لو گونٸي آذربايجان تورك ميللتي­نين ميللي سيموول مساله­سيني  صاحيبلري معلوم اولمايان ايمضالارين آراسيندا موبارك اٸتمك ايسته­ينلر٬ ميلت­يميزين نه يه قادير اولدوغونو و بوگون ميللي آزادليق موجاديله­ميزين٬ بير مجهول سٸكت يوخ٬ بلكه بير ميللت مساله­سي اولدوغونو گؤرمه­لي­ديرلر.

 

گاموح تشكيلاتي­نين آرايا چيخارديغي بايراق ايللردن سونرا نه قدر ˮميللي“ بايراغا چٸوريلدييي گؤز اؤنونده­دير. ديقت اٸتمك لازيم­دير كي گاموح ليدري دوكتور چهرگاني رسمي اعلام اولموش رقملره گؤره  12 ايل اؤنجه (8 مارت 1996) آذربايجان ميللتينين 104279 نفري­نين اعتماديني قازانميش­دير. ايندي اگر گاموح بايراغي بو ايللر عرضينده  گاموحچي­لاردان باشقا بير نفر اوچون ده ˮميللي بايراق“ ساييلمير٬ اوندا٬ 20+5 نفرلي قوروپون آرايا چيخارا بيلدي­يي بايراغي هانسي طالع گؤزله­يير.

 

ميللت سونسوزدورسا٬ ميلتچي آكتيويستلرين سايي و اٸنرژيسي محدوددور و داها محدود٬ بو آكتيويست­لرين الي قلم توتان زومره­سي­دير. البته كي وجدان آزادليغي نامينه هر هانسي مؤوضوعو هر كس دونيانين هر يٸرينده موباحيثه­يه چيخارا بيلر. آمما اشار اولان محدودلوق­لاري نظره آلاراق پري­آريتت­لر/ ترجيح­لر سياهي­ميزي ديقت­له حاضيرلامالي­ييق و داها اهميتلي بودر كي٬ هر نه­يي نظره آلا بيلمه­ين دوستلار وهٸچ نه­يي نظردن قاچيرمايان دشمن­لر بو سياهي­ني بيزيم اوچون حاضرلايا بيلمه­سينلر. ميللي آزادليق موجاديله­ميزين نظري و پراكتيك ايشلري­نين گونده­ليگي البته كي٬ آدي و كيم­ليگي معلوم اولان قوروم­لار و شخصيت­لرين بيرباشا موداخيله­سيله حاضيرلانمالي­دير. عكس تقديرده٬ فرضي و اٸكسترم بير حالدا٬ ميللي حركته منسوب اولان آكتيويست­لري باهانا قوتوسو دالينجا گؤندرمك٬ دوشمن­ين راحات و اوجوز باشا گلن تخريبات مٸتودونا چٸوريله بيلر.

 

ˮا. اورمولو“ ايمضاسيله يازان چوخ حؤرمتلي بير دوست٬ منيم بو مؤضوع­دا ˮعوموم ميللي قرارلار وٸرمك مٸكانيزملري“ باشليقلي مقاله­مده تنقيد اٸتدي­ييم يازي­نين٬ بايراق مؤضوعسوندا جريان اٸدن حاضيركي موباحيثه­لره ايلك چاغيريش اولماديغي­ني بيلديريب­دير. من يوخاريدا هاردان ايلك چاغيريش حاقيندا سهو معلومات آلديغيما ايشاره اٸتديم. آمما حؤرمتلي ˮا. اورمولو“نون آچيقلاماسي اؤز نؤبه­سينده باشقا بير سوآل آرايا چيخارير:

غير دموكراتيك هده ـ قورخولار گلمك و آز زاماندا اليفبا و سرحدلر مساله­لريني چؤزمك وعده­سي وٸرن  ˮ ميللي سيمبول سئچمک اوچون، “بای بک”-دن ميللي دوشونجه لي سويداشلارا چاغيريش“ باشليغي آلتيندا يازي ايلك چاغيريش اولماسادا٬ بو مؤوضوع­دا ايلكين يازي­لاردان دير و اتك تاريخي ˮبير قروپ موستقيل ميللی فعاللار طرفيندن“ ايمضالي چاغيريش­دان 3 گون سونرادير. بوگونه كيمي بو مؤوضوعدا 50 دن آرتيق يازي يازان دوست­لاردان نٸچه­سي اوردا ايفاده اولان غير دموكراتيك فيكيرلره اؤز مؤوقع­لريني بيلديرميش­لر؟  بس بو 50 يازي­نين م‍ؤلفي اولان 25 حؤرمتلي دوست­لار بو مؤوضوع­دا يازيلان ماتريال­لاري وٸرن مٸديانين بير سيرا تنقيدي فكيرلرين سانسورلا اؤرت ـ باسدير اٸتمه­سيني گؤروب ـ دويوبلارمي؟ اگر گؤروبلرسه٬ او حالدا اونلارين مؤوقع­لري بو حاقدا نه اولوب و هاردا نشر اولوبلار؟

 

 

 

 


[1] من بوندان اؤنجه ˮعوموم ميللي قرارلار وٸرمك مٸكانيزملري“ باشليق­لي مقاله­مي يازاركن ايلك تشبوث­ن هاردان باشلاديغي حاقدا٬ بير چوخ بو حاقدا اولان يازيلانلاري اؤزونده احتيوا اٸدن سايتين مسٸولوندان اي مٸيل واسيطه­سيله سوردوم و او بٸي ده اؤز يازيلاري­نين بيريسي­نين ايلك يازي اولدوغون بيلديردي. سونرا حؤرمتلي ˮاكبر اورمولو“ يازيسيندا بيلديردي كي٬ من اؤز يازيمدا تنقيد اٸتدي­ييم يازي ايلك چاغيريش دٸيل­دير.