حسن صفري

خوجالي فاجعه سينين 13 ايللگي

 

      13 ايل بوندان قاباق 1992- نجي ايل فئورالين 25-دن 26- سينا كئچن گئجه ائرمني حربي بيرلشمه لري خان كندينده يئرلشن 366- نجي روس موتوآتيجي آلايينين كمگي ايله دونيا اجتماعيتينين گؤزو قارشيسيندا يوزايلليگين ان دهشتلي فاجعه لريندن بيريني تؤرتدي. همين گئجه هر طرفدن محاصره يه آلينميش آذربايجانين خوجالي شهري قراد راكت قورغولاريندان و تانكلاردان آرديجيل آتشه توتولدو. سونرا 366- نجي روس موتوآتيجي آلايينين مشايعتي ايله شهره گيرن ائرمني داشناقلاري اهاليني سوي قيريما معروض قويدولار. شهردؤيوش ماشينلاري و زره لي تئخنيكا واسطه سيله يئرله يكسان ائديله رك يئر اوزوندن سيليندي. تكجه بير شهردن 613 نفر شهيد اولدو، 1725 نفر اسير آليندي، 230 عائله باشچيسيني ايتيردي، 8عائله تماميله محو اولدو، قتله يئتيريلنلرين 106 –سي قادين،59-و اوشاق، 80 نفري ايسه قوجالاردير.187 نفر خوجالي ساكيني ايسه شيكست اولوب و150 نفرينين طالعيندن خبر يوخدور. بئله ليكله ائرمنيلر 20- جي عصرين سونلاريندا خوجالي شهرينده مثلي گؤرونمه ميش وحشيليكلر تؤرتديلر.همين عموم بشري فاجعه دن آرتيق13 ايل كئچسه ده هله مسئله يه سياسي قيمت وئريلمه ييب. عيني زاماندا ائرمنيلر تكجه خوجاليدا دگيل عموميتله تاريخ بويوآذربايجان توركلرينه قارشي تورتديگي جنايتلردن اوتانمادان، دونيا اجتماعيتيني اينانديرماغا چاليشيبلار كي، گويا توركلر اونلاري سوي قيريما معروض قويموشلار و تاسفله دونيا اجتماعيتيني اولمايان حادثه يه اينانديرا بيلميشلر.

       ائرمنيلرين بير عصردن آرتيق بير دؤورده فرصت يارانديقجا ايستر آذربايجانين شماليندا ايسترسه جنوبوندا دفعه لرله توركلره قارشي تؤرتديگي سوي قيريم و عموميتله اونلارين يئريتديگي سياست آذربايجانليلارين كوتله وي قيرغيني واونلارين تورپاقلاري حسابينا دنيزدن دنيزه  بؤيوك ائرمنيستان ياراتماق مقصدي گودموشدور.ائرمنيلر همين پروسئسين معين مرحله سينده آذربايجان اراضيسيني آذربايجانليلاردان تميزله مكله «يانديريلميش تورپاق» تاكتيكاسي اساسيندا اؤز غير انساني ايستكلرينه چاتماغي نظرده توتموشلار.اونلار بير عصردن آرتيق مدتده چيركين نيتلري اوغروندا بير طرفدن آذربايجانليلارا قارشي وحشيليك و سوي قيريم سياستي يئريتميش ديگر طرفدن حياسيزجاسينا رياكارليق ائده رك اؤزلريني يازيق و ظولمه اوغراميش ملت كيمي گؤسترميشلر. بو ايكي اوزلولوك و وحشيليك بير عصردن آرتيق بير دؤورده سانكي اونلارين گئنلرينه نفوذ ائديب و خصوصي ائرمني خصلتي كيمي اؤزونو بروزه وئرير.

       ديگر طرفدن غرب دونياسيندا مؤوجود اولان خريستيانليق و ائرمني تعصب كشليگي، اسلام دونياسيندا ايسه بو عموم بشري جنايتلره لاقيدليك ائرمنيلري داها دا اركؤيونلشديرميشدير.شبهه سيز ائرمنيلرين 100 ايلدن آرتيق بير دؤورده حياتا كئچيرديگي بو پروسئس سونا چاتماييب. ائرمنيلرين افشاء اولونماماسي ائله جه ده آذربايجانليلارين سوي قيريمينين دونيا سويه سينده تانيتديريلماماسي تقديرده فرصت ياراناركن يئنه آذربايجانليلارين باكي، شاماخي، قاراباغ، ناخچيوان، خوي، سالماس، اورميه و ساير شهرلرده تؤره ديلن سوي قيريمي تكرارلانا بيلر.

      ائرمنيلر تاريخده هئچ واخت باش وئرمه گن اوزدن ايراق سوي قيريمي دونيايا تانيتديرا بيلديگي تقديره آذربايجانليلار نه اوچون دونيا اجتماعيتينين گؤزو قارشيسيندا باش وئرن سوي قيريملاري دونيايا تانيتديرماماليديرلار.

      عيني زاماندا نظره آلماق لازيمدير كي،ائرمنيلرين دنيزدن دنيزه بؤيوك ائرمنيستان خولياسي تكجه آذربايجان تورپاقلاري ايله كيفايتلنمير. بو گون آذربايجان بو غير انساني سياستين قورباني اولوبسا صاباح قونشو اؤلكه لر ده بئله فاجعه لر له اوزلشه بيلر.

      ديگر طرفدن خوجالي فاجعه سي كيمي دهشتلي و عموم بشري فاجعه نين قارشيسيندا وجداني اوياق هر بير انسان، توتدوغو وظيفه سيندن آسيلي اولماياراق اؤز وجدانينين حكمي ايله بشريت عليهينه اولان بئله فاجعه لرين تكرارلانماماسي، حاق، عدالت، انسانليق، صلح و امن- آمانليق نامينه اوز انساني مؤوقعيني و منفي مناسيبتيني بيلديرمه ليدير.

      عيني زاماندا غربين ديني تعصب كشليك زمينينده جنايتكار ائرمنيلري دستكله مه سي، اؤزلريني اسلام دونياسينين حمايه چيسي حساب ائدن اؤلكه لري دوشوندورمه ليدير. تكجه اسلام و مسلمانليق نامينه يوخ عيني زاماندا حاق، عدالت وانسانليق نامينه همين اؤلكه لرين مسلمان آذربايجان خالقينا قارشي تطبيق ائديلميش سوي قيريم سياستينه وخوجالي فاجعه سينه دوزگون سياسي قيمت وئرمگي اوز قارشيلارينا مقصد قويماليديرلار.