میلّی حرکت بوتون میلتیمیزیندیر

مهندس علیرضا صرافی سیاسی و فرهنگی چالیشقانلاریمیزدان بیریدیر. او اینقیلابین بیرینجی گونلریندن "چنلی بئل" و "آذربایجان سسی" آدلی درگیلرینی چیخارتماقلا آذربایجانا خیدمت ائتمگه جان آتمیشدیر. دئدیگینه گؤره اینقیلاب دؤنمینده هئچ بیر تشکیلاتین آذربایجان آدیله باغلی اولماماسیندان دولایی، اوزون مودّت فردی چالیشمالارا ال آتمیش و هئچ بیر سیاسی قوروپا باغلانمادان آذربایجان یولوندا ایشلهمیشدیر.

مهندس صرافی 1359- جو ایلدن وارلیق درگیسی یازارلارینین بیریسی کیمی چالیشیب، دوقتور حمید نطقی، اوستاد محمدعلی فرزانه، پروفسور غلامحسین بیگدلی، دوقتور جاواد هئیت و.. بیر نئچه بویوکلریمیزله بیرلیکده وارلیغیمیزی قوروماغا چالیشیبلار. مهندس صرافینین او بیر چوخ درگیلرده یازیلارینا راستلاشا بیلریک. او جملهدن دده قورقود حاقدا آپاردیغی موفصل تدتقیقات آردیجیل اولاراق وارلیقدا نشر اولونوب . بو یازی دده قورقود حاقیندا ایرانلی اوخوجولارا سونولان ایلکین ایری حجملی اثرلردن ساییلا بیلر. هابئله چنلیبئلده و آذربایجان سسینده آذربایجانین مسالهلرینه توخونماسینی گؤرمک اولور. سون ایللرده ایسه نوید آذربایجان، پیک آذر، شمس تبریز، ائل دیلی و ادبیاتی، مبین، روزگاران و....نهایت دیلماجدا اونون تحقیقی اثرلرینه راست گلمک اولور.

آشاغیدا اوخویاجاغینیز دانیشیغی فروردین آیینین 12- جی و 16-جی گونلرینده اونونلا آپارمیشام. چالیشمیشام بعضی موباحیثهلی مؤوضوعلارا گؤره جناب مهندسین نظراتینی ائشیدیم.

بیز بو رپورتاژدا گونئی آذربایجاندا بایراق مسالهسی، تبریزده و باشقا شهرلرده تخریب جوی و شانتاژلار حاقدا، بو ایل و کئچن ایلده بابک قالاسی حاقیندا، آنا دیلی قورولتایی، میّلی حرکتیمیز، قادین کنگره سی ، شاه گولو ییغینجاغی و اونون بابک قالاسی ایله قارشیلیغی حاقیندا دانیشدیق.

او بعضی شانتاژچیلاری تنقیده توتوب، گولهرک دئدی: بعضا بیزیم ایچیمیزده T.S.T (تورک سؤزبازلار تشکیلاتی) نیسبتا یاخشی فعالیت ائدیر.

آشاغیدا بیر ساعات یاریملیق دانیشیغیمیزی اوخویونوز:

علی عباسی: جناب مهندس علیرضا صرافی سیز ایندی تبریز شهرینده بیر سیاسی آدام و بیر ژورنالیست کیمی چالیشیرسینیز. بیر آذربایجانلی اولاراق هابئله بیر سیاسی شخص اولاراق سیزین ایستگینیز نهدیر؟ اصلا نه ایسته ییرسینیز؟ هدفینیز و آماجینیز نهدیر؟

مهندس صرافی: من ژورنالیست دئییلم، ایشیمین بیر قیسمی ژورنالیستی ماهیت داشیییر.

هدفیم نه دیر؟ بو سوال چخ عام بیر سوالدیر، منیم ده جوابیم عام اولاجاق. هدفیم بوتون آذربایجانچیلار کیمی منجه آذربایجانیمیزین باش اوجالیغی، سعادتی، و نهایت آذربایجان میلتینین باشقا میلتلر ایچینده اؤزلرینه لاییق مؤوقع قازانماسیدیر.

وطنداشلاریمین سعادتی و باش اوجالیغی آرزوسوندایام و بو یولدا چالیشماغی دا اؤزومه فخر بیلیرم.

علی عباسی: سیزجه بیزیم آذربایجانیمیزدا سیاسی - ایجتیماعی دوروم نه حالدادیر؟ ایندی میللی دوشونجه خالق ایچینده نئجهدیر؟ خالق اوزونو تانیماغا دوغرو گئدیرمی؟

مهندس صرافی: بلی. سون ایللرده اینفیجاری شکیلده بو میللی دوشونجه، آذربایجانلیلیق تعصّوبو، آذربایجانچیلیق دوشونجهسی خالقیمیزین ایچینده یاییلماغا باشلاییب، بو دوشونجه آرتیق بیزیم افکاری-عومومیمیزده دانیلماز و گوجلو بیر وارلیق کیمی مئیدانا چیخیب. بو ایشده مطبوعات، اینتئرنت و مئدیا واسیطهلری، و اوست اوسته آذربایجان چالیشقانلارینین اورتاق فعالیتلرینین نتیجهسینده الده ائدیلیب، بو دوشونجه گونو گوندن داها دا گوجلهجک.

علی عباسی: آذربایجانچیلیق دوشونجهسی و بو میللی دوشونجهیه باغلی اولان فاکتلاردا نه دییشیکلیکلر اوز وئریب؟ بویوراسینیز!

میللی دوشونجه ایلک اؤنجه میلی کیملیک دوشونجهسیندن آیریلمیر و اونونلا عینی گؤرونمکده ایدی، اونا گؤره فعالیتلریمیز عوموما میلی کیملیگیمیزین اؤنملی عونصورلریندن اولان دیل، فولکلور، ادبیات و موسیقی ساحهسینده ایدی، سیاسی ایستکلریمیز ده همین چارچووادان قیراغا چیخمیردی. آنجاق سون ایللرده میللی دوشونجه اولدوقجا یتگینلشیب و دیلی ده، ادبیاتی دا، یاشادیب، قورویا بیلن بیر یئنی ایداری دوزنین قورولماسیندان صؤحبت گئدیر. (فدرالیسم) ، بیلدیگیمه گؤره اکثر میللی فعاللاریمیزین هم ده اکثر غئیر فعال آیدینلارین ایچینده دموکراسی و فدرالیسم اورتاق ایستکدیر.

بو آرادا یئنی بیر گلیشمهنین ده شاهیدی اولماقداییق: او دا میللی حرکتیمیز ، آذربایجان میلتینه عایید اولان بوتون ساحهلری اوز ایچینه آلماسی و اونلارین حلینه چالیشماسیدیر.

علی عباسی: بو ایشی گؤره بیلریک می؟

مهندس صرافی: سیاسی ایقتیداری اله آلمادان آذربایجان پروبلملرینین بویوک حیصهسینی حل ائتمک ایمکانسیزدیر، آنجاق همین پروبلملری تانیماق و اونون حل یولونو دوشونمک، بو گون گؤروله بیلن ان واجیب ایشلردندیر. بو دؤنمده میللی حرکتین موتفکیرلری دیلدن و عومومیتله کیملیگیمیزه عایید اولان مسالهلردن باشقا بوتون مسالهلری ده اله آلماغا یول آچمالیدیر . منجه بو مرحلهنین ایلکین آددیملارینداییق.

علی عباسی: دونیا آنا دیلی گونو موناسیبتینه کئچن ایله تای بو ایل ده بیر قورولتای اولاجاقدی. آنجاق معلوم اولمایان عیلتلره گؤره بو قورولتایین قاباغینی آلدیلار. سیزدن سوروشماق ایستردیم کی 84 - جو ایلده ده آنادیلی موناسیبتینه قورولتای کئچیریلهجکمی؟

مهندس صرافی: قطعیا 84 - جو ایلده ده بو قورولتایی کئچیرمگه چالیشاجاغیق.

عینی حالدا آنا دیلی قورولتایی تبریز دئییل بوتون شهرلریمیزده قورولا بیلر. هم ده تکجه قورولتای دئییل، یاریش، شعر مجلیسی، موسیقی مجلیسی نه بیلیم کارناوال و.... بیر چوخ چالیشمالاری دوزنلهمک ده اولار.

علی عباسی: بعضی محفیللرده بو قورولتایین قوروجو هئیاتینین بیریسینین باشقا سیاسی قوروپلارا باغلی اولماسینی دئییردیلر.

مهندس صرافی: بیزیم قوروجو هیئتده اولان شخصلر بیلدیگیمه گؤره هئچ بیری هئچ بیر سیاسی قوروپا باغلیلیقلاری یوخویدو. او شاییعهلر یانلیشدیر. ایشاره ائتدیگینیز شخصین اوزنه ده موراجیعه ائدیب، سوروشماق بیلرسیز.

بئله اینانیرام کی هر کیمسه باشقا قوروپلارین نظراتینی اؤیرنیب، اوز نظراتینی دا اونلارا دئمگه حاقلیدیر. دوغرودور ایشاره ائتدیگینیز شخص ملی - مذهبیلرین عادی جلسهلرینه گئدر، آنجاق او همیشه اورادا آذربایجان مسالهسینی مودافیعه ائدر و اونلاری بو زمینه ده باشا سالماغا چالیشاردی. یعنی او بیر آذربایجانی سئون، آنا دیلینه فخر ائدن بیریسی کیمی او جلسهلره قاتیلاردی. عادی و عومومی ایجلاسلارینا قاتیلماق او قوروپلاردا اورگانیک عضو کیمین فعال اولماق یا خوددا اونلارا باغلی اولماق آنلامیندا دئییل.

علی عباسی: سیزجه باشقا قوروپلاردان آیریلیب، بیزلره قوشولانلارا عکسالعملیمیز نئجه اولمالیدیر؟

مهندس صرافی: من بئله دوشونورم کی بیز گرک او قدر سعهیی- صدر ایله مساله باخاق. بیزه بیر قدم بئله یاخینلاشانی اؤزوموزدن قوومایاق.

ایشیمیز او زامان یاخشی یئرینه گئدهجک کی دوننکی اؤزگهلر ده بیزیله اؤز اولسونلار، آیاغیمیزدان توتماقدانسا بیزیمله آیاقلاشمالاری یاخشیدیر، یئتر کی بیزیم علیهیمیزه اولماییب، قارشیمیزدا دورماسینلار،

حرکتیمیزه یئنی بیر یول آچماسالاردا، اونا یول وئرسینلر ایرلی گئتسین. اینانیرام کی میللی حرکت بوتون میلتیمیزه عاییددیر، او موعین بیر فیکری جریانی و موعین بیر سیاسی قوروپون اینحیصاریندا اولان بیر حرکت دئییل.

علی عباسی: یعنی سیز بئله دوشونورسوز کی آذربایجانلی اولان هر بیر شخص میللی حرکتده اولا بیلرمی؟

مهندس صرافی: میللی ایستکلریمیزی هر کس بیر بویوتدان وورغولایا بیلمزمی؟

میللی حرکتیمیزین ایستکلری ائله بوتون آذربایجان میلتینه عایید اولان مسالهلرین مجموعهسیدیر. بیزیم و سوز یوخ کی اونون ایچینده ساغچی دا اولا بیلر، سولچو دا اولا بیلر، بیر چوخ دوشونجه صاحیبلری کی آذربایجانیمیزی مودافیعه ائدیر بو حرکتین ایچینده اولا بیلر. آما آذربایجانین علیهینه اولان هئچ بیر جریان طبیعی کی میللی حرکتین ایچینده اولا بیلمز.

علی عباسی: بعضی میللتچی دوستلار بئله دوشونورلر کی بیزیم میللی حرکتده باشقا سیاسی فیکری اولان شخصلر اولا بیلمزلر. مثلا اونلار بیر نفرین کئچمیش سابقهسینی اوزه چکیب و و بئله دوشونورلر کی اونون حاقی یوخدور، میللی ایستکلریمیزی ایستهسین.

مهندس صرافی: اینانمیرام میللتچیلرین هامیسی بو دوشونجهنی داشیسینلار. بلکه اونلارین بعضی سینین بئله بیر افکاری اولا بیلر.

منجه اینسانلارین بوگونکو مؤوقعی داها اؤنملیدیر.

علی عباسی: ایچیمیزده موختلیف سلیقهلر وار بعضیلر داها دا رادیکال بعضلر موحافیظهکاردیر، عجبا اونلاری حرکتدن قیراغا آتمالیییق؟

مهندس صرافی: منجه بیزیم (هم ده هر بیر سیاسی شخص یا قروپون) صلاحیمیز بوندادیر کی بیر آز اؤزوموزدن رادیکال و بیر آز اوزوموزدن موحافیظهکارلاری رد ائتمهیک، اونلارا قارشی جیبهه آچمایاق، اوز یانیمیزدا ساخلایاق. هامی اوچون چئوره لازیمدیر.

رادیکاللار و محافظه کارلارین دا هرهسینین موعین رولو و وظیفهسی اولا بیلر. فلسطینه هم حماس لازیمدی هم الفتح .

اونوتمایاق کی زامان ایرلی گئدینجه بیر چوخ پارامترلر دییشیر و اولا بیلسین کی هم اونلار (هم ده بلکه ائله بیز اوزوموز ده) گله جکده داها دا رادیکاللاشاق و یاخود داهادا موحافیظهکارلاشاق. آرخادا کی سنگری و قارشیداکی سنگری ییخماق ساواش اوصولونا آیغیریدیر. واقت گلر یئریمیزی دییشمگه مجبور اولاریق. الیمیزله ییخیلان سنگرده دالدالانماق اولارمی؟

علی عباسی: باشقا سیاسی قروپلارا گؤره نئجه؟

اوزلرینی میلی حرکتدن بیلمهین آنجاق اونا ماراقلانان بیر سیرا سیاسی قورپلار و شخصلر ایله آنجاق رابیطه ساخلاماق و موذاکیره آپارماق دوغرودور. ایشی اونلارا تاپیشیرماق تمامیله یانلیشدیر.

بیز بونلارلا آرا قاپی ساخلامالییق و اونلارین صادق نیرولارینی اوزوموزویله آیاقلاشدیرماغا چالیشاجایق.

بئله قوروپلار و شخصلر اوز مؤوقعلرین سون اوجدا آچیق-آیدین معلوم ائتمهلیدیر. آیا بونلار آذربایجان میللی منافعیندن مدافعه ائدهجکلر یوخسا نهایی تحلیلده شوونیستلرین طرفینده اولاجاقلار.

علی عباسی: سیزجه نه اوچون بعضیلر هامی ایله ضیدیته گیرر، بیر حالدا کی اؤزلری ده هئچ بیر اؤنملی ایش گؤره بیلمیرلر.

مهندس صرافی: بیر حرکت بویومک ایستهییرسه گرک جاذیبهسی اولسون، نه دافیعهسی . یعنی سعی ائده کی ائشیکدهکی نیرولاری دا اوز ایچینه گتیرمگی باجارا، نه کی ایچریدهکیلری ده ائشیگه اؤتوره.

ضعیف مودور گوجلو کارمندی سئومز،

ضعیف مودور و ضعیف کارمندین چالیشمالاری دا ضعیف اولار.

گوجلو ایشی گوجلو مودورلرو گوجلو کارمندلر گؤره بیلرلر . هر بیر تشکیلات گرگ دائیما یئنیلشمگه دوغرو گئتسین و هم مودورلر ، هم کارمندلر گرک گونو گوندن اؤز چیخارلارینی، معلوماتلارینی یوکسلتسینلر.

علی عباسی: جناب مهندس آذربایجانین مختلیف شهرلرینده اوجمله دن تبریزده آغیر بیر جو وار. تاسوفله هر کیم ایندی میللی حرکته بیر قدم آتماغا بیر ایش گورمگه چالیشیر. اونا تئز دامغا وورورلار. هره یه بیر دامغا یاپیشدیرماقلا مختلیف سیاسی، فرهنگی شخصیت لرین دالیسیجا شانتاژ یایماقلا بونلارین اعتبارلارینا و حیثیتلرینه آبرولارینا توخونماق ایستهییرلر. بئله دئییلمی؟ سیزجه بئله زهرلی آتمسفر بیزم تبریزده وار یوخسا باشقا شهرلرده ده گوزه گلیر؟!

مهندس صرافی: من بئله اینانیرام کی بیزیم باشقا شهرلریمیزده ده آز چوخ بو وضعیت واردیر. تبریزین کی ده چوخ فرقلی بیر دوروم دئییل. حتی بعضی شهرلریمیزه گوره ده داها یاخشیدیر.

علی عباسی: بو مسموم فضا نی آرادان آپارماق اوچون نه ایش کورمک اولار؟ بیز بو خصمانه و یا منفی جوی نئجه ده ییشه بیلهریک؟ نئیلهمک گرک؟

مهندس صرافی: علی بی ! فضا بیر او قدر ده خصمانه دئییل! نه اولوب کی؟!

"نه ائدک؟" سوالینیزی "نه ائتمهیک؟" کیمی سورشسایدینیز داها دوغرو اولاردی.

بیر یول بودور کی بیز اوزوموز بو منفی اتمسفره قاتیلمایاق. یعنی بیری اگر منیم علیهیمه دانیشیب، شانتاژ ائلهدی، من ده اونون علیهینه شانتاژ ائلهمهیم گرک. صیرف اوزومدن مودافیعه ائتمک قصدی ایله کیمسهیه شر یاخمایام.

تک مودافیعه ائدیلهجک شئی حرکتین عومومی اعتیباریدیر. منه توخونماق حرکته ضربه وورماسا قوی توخونسونلار. وورسا دا اؤزومو بوراخیب حرکتی مودافیعه ائتمهلییم.

باشقا بیر یول بودور کی درگیلر و سایتلاریمیز دیققتلی اولمالیدیر . گرک شخصیت لرین تخریبینه عایید یازیلار اللرینه گلیرسه بلیرلی کنترللا ردان سونرا یایینلاسینلار. باخیب، گورسونلر بو یازی هانسی منبعدن گلیر، نئچه نفر مؤعتبر آدام بو سوزو تایید ائدیر.

ایفتیرا یازان شخص اؤزو کیمدیر؟ عجبا تانینمیش بیر آدامدیر یا بیر مجهولالهویه و مجعول بیر شخص بیر جعلی ایمضایلا گوتوروب تانینمیش بیر شخصی داشا باسیر.

من اینانمیرام کی اوزلرینی میلتچی آدلاندیران بیر شخص اوصولا بئله ایش گورسون. اولا بیلر بو ایش بیزیم شوونیست دوشمنلریمیزین طرفیندن اولسون. اونلار بئله شاییعه لری یایا بیلرلر. هامیمیز بیلیریک بعضا ایچریده چیخان درگیلر مجبور اولورلار بعضی تخریبی متنلری یایسینلار. همین یازیلار سایتلارا دا گؤندریله بیلر ، مجعول ایمضالارلا ، آنجاق روزنامهلرین عکسینه سایتلارین اللری چوخ آچیقدیر. سایتلار گرک دیقتلی اولوب و بئله دیالوگلاری یایمایالار.

خوشبختلیکله بیزیم بیر چوخ سایتلاریمیز بئله قارایاخان یازیلاری یاییمیرلار . آنجاق بعضا ده بیر ایکیسی "الده آچیلما" اولور.

علی عباسی : بابک قورولتایینا یاخینلاشماقلا بو حاقدا سوزلر چوخالیر آنجاق بو ایل بئله قرارا گلینیب کی تیر آیینی 9-10 - جو گونلریند بو میللی قورولتای قورولسون. باشقا بیر طرفدن ایسه بئله دئییلیر کی تبریزده بیر نئچه نفر بو ایل بابک قالاسی یئرینه گئتمک عوضینه شاهگولو ده ییغینجاغی تبلیغ ائدیرلر( شاییعه دیر!) بونونلا ایلگیلی سیزین نظرینیزی ایستردیم؟!

مهندس صرافی: منجه شاهگؤلوده و یا هر آیری یئرده موعین مراسیمین قویولماسی یاخشیدیر. آنجاق بابک قالاسینین مراسیمینین بدیلی عنوانیندا یوخ! بلکه بیر آیری واخت و بیر و آیری موناسبته گؤره باشقا بیر مراسیم دوزنلهنه بیلر.

من اینانیرام کی بابک قالا سینین مراسیمی بو ایل واخلی- واختیندا اولاجاق. کئچن ایل اونون قاباغی بیر قدرآلینمیشدی، اونا گؤره ده مراسیم کئچمیشلردهکیلر کیمی چوخ گوجلو اولمادی. انجاق بو ایل ائله اولمایاجاق. بیز هامی میز ییغیلیب، کئچن ایللر کیمی مراسیمی کئچیرهجگیک.

علی عباسی: سیزجه بابک قالاسی ییغینجاغینین ماهیتی نهدیر؟ قالایا کئدنلرین سوزلری نه دیر. آیا اورایا گئدن لرین هامیسی اعتراض اوچون اورایا ییغیشرلار یوخسا ائله بابکین یاد سالماسی دا بورایا گلنلره سبب اولور؟ آیا اورایا گئدنلر موباریزه اوچون اورایا گئدیرلر؟

مهندس صرافی: بابک قالاسینین بیرینجی ایلیندن من اولموشام . باخین اورادا شوعار وئرنلر معدودآداملار اولور. من دئمیرم کی بو ایش یاخشیدی یا پیس . آنجاق بونو دئمک ایستهییرم کی اورایا مثلا اگر 500 مین نفر آدام گئدیر اورادا مین نفر شوعار وئریر یوزده 99.5 شوعار وئرمیر. دوغرودور اورادا اولانلاردا البته شعار وئرنلرله مخالیف دئییللر ، اولا بیلسین اونلارلا همعقیدهدیرلر. آما ایستهمیرلر کی بو مراسیمین شولوخلوق سالماقلا، قاتسینلار.

بایراق چیخارتماق دا ائله همین مقولهدندیر. یعنی اول ایل کی بایراق چیخدی. یعنی بیر عده جنوبی آذربایجان بایراغی آدینا بیر بایراق چیخارتدیلار. اوردا اولانلارین کیمسهسی بو ایشی پیس بیلمهییردی منجه! آنجاق بایراغین دوره سینده هامی یوخ بلکه بیر قیسم اورایا گئدنلردن ییغیشدیلار.

نیه پیس بیلمهییردیلر؟! چون کی بایراق دا بیر علامت دیر. بیر میلتین آدی کیمی و اونو هویتینین رمزی کیمی. اگر آذربایجان میللتی وار و اونون بیر آدی وار. اونو هویتینی تمثیل ائدن بیر بایراغیندا اولماسی کاملا طبیعیدیر.

نییه اونون دؤرهسینه هامی توپلانمادی؟ چونکی قارداش سن بایراغیوی اؤزون قوردوغون بیر مراسیمده هر هانسی آیری بیر یئرده چیخاتمالیسان.

علی عباسی: بایراق ایستیقلال ایستهمک آنلامیندا دئییلمی؟

مهندس صرافی: شوونیستلر چالیشیرلار دئسینلر کی بو استقلال ایستهمکدیر. اودا بونلارین ساوادسیزلیقلارین گوز اونونه سرگیله ییر. چونکی هر بیر اقتصادی موسسه نین و یا ایدمان تیم لرینین ده بیر بایراقلاری وار . ندن کی اونلارین دا بیر اوزل هویت لری وار.

کئچمیشده اوستانلاری تمثیل ائدن بیر آرم واریدی. ان آزیندان او ، اونو ایبداع ائدن تشکیلاتین آرمی اولا بیلمزمی؟ داهی بونون نه دخلی وار استقلال ایستمگه ؟!

بیزلردن بعضیمیز ده مسئله نی فرقلی دوشوندوگوموزه گؤره اونو علیهینه دوروروق. مثلا دئییرلر چون من استقلال ایستهمیرم اونون اوچون بایراقلا مخالیفم. حال بوکی بایراق بیر آرم دیر و تکجه بیر هوییتی تمثیلیدیر. بایراق هویته بیلدیرن بیر علامتدیر . استقلال ایستهمگه عایید بیر علامت دئییل.

نئجه کی ایراندا هر ویزارتخانانین بایراغی وار. حتی هتللرین ده بایراغی وار . نیه گرک بایراقدان بئله دیسکینیب و اونو عثمان کوینگی ائده لر؟ بایراقدان تکجه او آدام دیکسینیر کی آذربایجانین آدیندان دا دیکسینیر. قوی دیکسینسین.

علی عباسی: جناب مهندس اجازه وئرسهنیز ایستهییردیم ایندی کی تبریزده یاشایان و آذربایجانا خیدمت ائدنلر علیهینه گئدن شانتاژلار حاقیندا بیر آز آچیق دانیشاق. ایندی بیر قیسم آداملاری سولچولوق دامغالاری ایله تخریب ائدیرلر بونلار حاقدا دانیشاسینیز.

مهندس صرافی: میثال بویورون دئییم!

علی عباسی : مثال اوچون جناب منوچهر عزیزینی آد آپارماق اولار.

مهندس صرافی: من آقای عزیزینی تانییرام او قدیم دن بو خط ده یعنی آذربایجان خطیندهدیر. اصیل سولچولوغونا شک وارسادا، (بونو دا اصیل سولچولاردان سوروشا بیلرسیز)، آذربایجانچیلیغیندا شک یوخدو. بیلیریک ایندی ده سوئتلر بیرلیگی داغیلاندان سونرا سولچولوغون دا تملینه بویوک بیر ضربه ده یدی . آنجاق اونون عکسینه آذربایجانچیلیق و تورکچولوگ دیرچه لدی. بئله بیر آداملار کی واختیلا اوز آذربایجان مرامیندا چالیشمالارینی سول جریانلارین ایچینده آختاریردیلار، طبعا اوز آختاریشلاریندا یئنی یوللار تاپابیلدیلر و اوز آذربایجانچیلیق مراملارینی ادامه وئردیلر.

من آقای عزیزی نی ائله او جوان عزیزینین ادامه سینده گورورم. هئچ ده ده ییشمییب دی . اونون یالنیز تجربه سی چوخالیب. بیر ده کی دونیا و شرایط ده ییشیلیب و اودا ایسته ک لرینه موناسیب بستر تاپاندان سونرا ، اودا یئنی یول آختاریب کی آذربایجانا چالیشماغینا داوام وئرسین.

علی عباسی: بیز بیر شخصین کئچمیش فعالیت لرینه گوره اونون اوز میللی ایستک لری اوغروندا چالیشماسینین قارشیسیندا دورابیلریک؟

مهندس صرافی: مگر بیز ائله یه بیله ریک ؟ گورورسوز ایندی خاریجده بیر نفر بیر حزبه رای وئریر. عملده او حزبین ایشلرین اوز ایسته کلری اساسیندا گورمه سه یقین باشقا بیر حزبه رای وئره جک. سککیز ايل قاباق و دورد ایل قاباق نه قدر آدام خاتمی یه رای وئردیلر. میلیونلار آذربایجانلی سککیز ایل قاباق رای سالدی. آما آیا ایندی اونلار ائله همان دوشونجه ده دیلر؟ یقین یوخ! ایندی بیز اونلار حق وئرمه ییک کی بیزلرله اولسونلار؟! اینسان مطالعه ائدیر، عمل ده و تجربه ده ثابت اولور . دوستو و دشمانی آرتیق تانییابیلیر. شناختی تکمیلله شیر. اینسان ائلیه بیلر فیکرینی اصلاح ائده.

علی عباسی: ایندی ایراندا مختلف حزب لر تشکیلاتلار و فیکیرلر وار مثلا میلی-مذهبی قروپلار. آذربایجان میللی حرکتینین فرقی بو حزب تشکیلات و یا فیکیرلرله نهدیر؟

مهندس صرافی: آذربایجان حرکتی بیر ایجتیماعی حرکتدیر. بو حرکت تدریجا اؤزونه سیاسی هویت قازانماغا دوغرو گئدیر. ایندی بو حرکت سیاسی تشکیلاتلارا صاحیب اولماغا دوغرو گئدیر. آنجاق آدینی چکدیگینیز تشکیلاتلار صیرف سیاسی تشکیلاتلاردیر کی آرخالاریندا بیر ایجتیماعی حرکت یوخدور.

بیزیم حرکت بیر اجتماعی حرکت اولدوغونا گؤره اوندا موختلیف طیفلره راست گلمک اولورهم ده گنجدیر. بیر چوخ گنجلر و اویرنجیلر اوندا بویوک پتانسیله مالیکدیر.

آنجاق ایرانداکی سیاسی قوروپلارین چوخو ایندی قوجالیق مرحلهلرینی کئچیردیرلر. جوانلاشماسالار اؤله ده بیلرلر. بیزده شور حال و حرکت وار. جسارتلی آددیملار وار. اونلاردا بو اولابیلمز. اونلار یوز اولچوب، مومکوندور اصلا بیر ده بیچه بیلمهسینلر! مومکوندور بیزیم حرکتین جوانلیغینا گوره و تجربه سینین آزلیغینا گوره ایشتیباهلار راستلاشاق.

علی عباسی: بو اشتباهلاردان آد آپارا بیلرسینیزمی؟

مهندس صرافی: قاییتدیق سؤزوموزون اول کی بؤلومونه . مثلا بیزیم ایچیمیزده شایعه یاراتماق و شانتاژ ائتمک بیزیم اشتباهلاریمیزدان بیریسیدیر. باشقا سیاسی قوروپلار و جریانلار بو ایشلری گؤرمزلر. مثلا نهضتآزادیچیلر قهوهخانا دا اوتوروب اوز بحثلرین قاباغا آپارمازلار. آنجاق بیز بو ایشی گوروروک. بیز پرنسیپسیز موحیط لرده اوتوروب مهم مسائلیمیزدن دانیشیریق و سیرر ساخلایا بیلمیریک.

بیروار کی سوزو بیشیریب دانیشاسان . بیر یول دا اودور کی چیرکنویسلریوی دانیشاسان. بیز چیرکنویسلریمیزی چوخ دانیشیریق. و.....

علی عباسی: کئچن آی بیرینجی دفعه اولاراق تبریزده دونیا قادین موناسیبتینه قادینلار کنگرهسی کئچیریلدی. بو کنگره آنا دیلیمیزین یاساق اولدوغونا راغما قوروجولار وریندن ایجرا اولوندو. آنجاق کنگره ده حتی بو مسئله یه اعتراض دا اولونمادی. نییه؟

مهندس صرافی: یاخشی اولار بونو کنگرهنین مسئوللاریندان سوروشاسینیز. هر حالدا کنگرهنین قوروجولاری اکثرا بو قرارا گلدیلر کی بو کنگرهنی قورسونلار. اونو دا دئییم کی الده اولان کنگرهنین قاتیلیم بلگهلری تورکجه-فارسجا یازیلیبدیر. بوتون تورکجه مقالهلرین هم خولاصهسی بیر کیچیک کیتابچادا چاپ اولوب، کنگره ده داغیلدی. اونلارین اصلینی دئییبلر چاپ ائدهجکلر.

علی عباسی : قورماسایدیلار نئجه اولوردو.

طبیعی قورمه یه ده بیلردیلر. اصلینده قارشی طرف ده بئله ایستردی.

من بیر آذربایجان وطنداشی کیمی اونون قورانلاریندان مینتدارلیغیمی بیلدیرمهلییم. آرزو ائدردیم کی گؤنوللرینجه ده بو ایشی یئرینه قویا بیلهیدیلر. آنجاق بیزه اونوتمایاق کی بیزه اوندان آغیر شرطلره ده قاتلانمیشیق. بیری اوشاغینین آدین اصیل تورکجه آد قویماق ایستهییر. او دایانیر اما بیر یول تاپا بیلمیر. ایندی اوغلونا شیناسنامه آلماسین، اعتیراضینی بیلدیرسین. سالسینلار کی بلکه اصلا ایش اوز ایچیندن قورولماسین. البته اعتراضلار دا اولدو. آما عملا ان اؤنملی اولان مقالهلرین چوخو اوخوندو.

منجه بو بیر بینوره داشی ایدی و قویولماغی قویولماماغیندان یاخشی ایدی.

علی عباسی: باشقا مراسیملر بو یاخینلاردا قورولاجاقمی؟

مهندس صرافی: بیر احتمالا گؤره خرداد آییندا دوقتور جواد هئیته آغیرلاما مراسیمی توتاجاییق. البته پیشیک آسقیرماسا !!

علی عباسی : سون سوز اولاراق دیلماج حاقدا معلوماتینیزی ائشیتمه یه ماراقلی یام. دیلماج ایستدیگینه چاتیبمی؟ اونون ساتیشی نئجهدیر؟

مهندس صرافی: دیلماج یاخشی گئدیر. هدفلریمیزه چاتمامیشیق. آنجاق او یولدا گئدیریک. ساتیشیندان ایسه ناراضی دئییلم.

علی عباسی: ساغ اولون.

18/1/1384 تبريز