گونش خانیمین طرفیندن، امانی عائیله سیندن شهید اولان اوچ آذربایجان عسکرینین شهادت ایل دؤنؤمو موناسیبتیله یایینلانان میللی چاغیریش

میللی حرکت دوشنبه ۲۷ مهر ۱۳۸۸: بو منم ايٌشيقليغي قارا، قهرلي بولودلارين آرخاسيندا گيزلهنن ياسلي گوٍنش. گوًزلريم غملي بير دنيز، دالغالانير، چاغلايير، دوٍزون دئسم آغلايير، كوًنلوم آيريليغين آجيسيندان كوًورلميش، باغريم بو دوًزولمز اوْلايدا قوْورولموش، چييينلريم يالقيزليقدا بو قدر يوٍكو چكمكدن يوْرولموش بير كيمسه. آرتيق گوٍنشين دوْغماسي سئوينجيمي آرتيريب باتماسي كدره دالديرمير مني. داها آرازين چاغلاماسي، دنيزين جوْشماسي روحومو اوْخشامير. داها ماوي كوًنوللرين دورولوغو، آل ياناقلي گلينلرين خوْشبختلييي، ياشيل مئشهلرين دالغالانماسي هئچ نهيي خاطيرلاتمير منه، نه بيليم بلكه ده چاليشيرام خاطيرلاتمايا...               

بو يالنيز داريخديغيم اوٍزدن يازديغيم بير يازيدير. بيليرم بو يازيني هر كلمهنين معناسين دوٍشونن كيمسهلر اوْخويوب، هذيان يازماغيمين نهدنيني بيليب مني باغيشلاياجاقلار. اوْنلار مني سادهجه اوٍرك سوًزلريمي دئمهيه دانلاماياجاقلار.              

آرخادا قوْيوب کئچيرتديييميز ايل اوْنلارا دا آغير بير ايل ايدي. آخي اوْنلار اوًز يوْلداشلاري، فيكيرداشلاري، غئيرتلي، گنج و استعدادلي بير ميلّتچيني الدن وئرميشلر. اوْ زامان كي اوْرتاق ياشاميميزي نظرده آلميرام هر بيرينين يئرينه آغلاييرام، سيٌتقاييرام، اوٍزولورم و سوْنرا اوًزوم اوْلاندا اغراق ائتمك نظره گلمهسه بلكه اوًزل ياشاميميزي ياديما سالا بيلميرم.            

مهنديس اماني منيم ده ذهنيمده بير ديرهنيش سيمگهسي كيمي جانلانير. بيزيم سئچديييميز يوْل اوْ قدر قوتسال ايدي كي، عائيلهوي ياشاميميز تام اوْنون كوًلگهسي آلتدا گيزلنميشدي. دانيشيقلاريميز، دوْلانماقلاريميز، يوْلداشلاريميز و بير سوًزده ياشاييشيميز، فيكريميزه باغلي و اوْندان تأثير آلان ايدي...

و ايندي اوْ گئديب. هاردا اوْلماغين، بيزي دويوب، گوًرمهسيني، بير ده اوْنو گوًرمهيه ايمكان تاپماني چوْخ دوٍشونوب يانيت تاپماديغيمي بوردا آراشديرميرام، آما "يار" كلمهسينين معناسين اوًز ظنّيمجه دئييرم. ايكي اينسان ائولنديكده ياري بوًلونوب و ايكيسي بيرليكده معنا تاپيرلار، هرهسي اوْ بيرينه "يار" اوْلورلار.

ايندي منيم "ياريم" توْپراغا قوْووشاركن گئديب و بو گوٍجسوز "ياري" چاليشير بير تورلو اوْنون بوْش يئرين دوْلدورسون. بو بير ايلده گوًردويونوز قصورلاري باغيشلاييب و بوگوًزلهنيلمز اوْلايين آغيرليغيندان آسيلي گوًرون.

حيات يولداشيم مهنديس اماني و قارداشلارينين بيرليكده دوٍنيا دَييشمهلري ايله آيريليغين آجيسين تامسينديم و بو گئرچهيي بيلديكده تام سيٌنديم. بئله ايسه يوْلداشلارين اوٍركلري ايستهدييي كيمي داورانا بيلمهديم. آنجاق بو منيم اليمده دَييل و بوندان دا سوْنرا اوْلاجاغينا امين دَييلم.

باشينيز هر زامان اوجا اوْلسون. تاريخين ياپراقلاري حركتيميزين بو حادثه ايله باغلي ياراتديغي حماسهنين گوًزللييي ايله بَزَنهجكدير. تاريخ نانكور دا اوْلسا، اوًز اوْغوللارينين آديني دوٍزگون  ده چكمهسه، ظاليم ده اوْلسا، آنجاق قالارقيدير، قالاجاق و هر نهيي ساخلاياجاق.

ايندي ده سيزدن بير ايستهييم وار، اوًزونوز ايزلهييب بيلدييينيز كيمي جوٍمعه گوٍنو 1/8/88 مهنديس اماني و قارداشلارينين ايلك ايل دوًنوملرينين ياس توًرهنيدير، اوْ گوٍن مچيد و مزاريستاندا اوْلماغينيز گوٍونجيميزي داها آرتيريب بيرليييميز و يوْلوموزون قوتسالليغين بيلديرهجك. طبيعي اوْلاراق اوْردا اوْلان داورانيشلار هم حركتيميز و هم مهنديس امانينين اوًزونه عاييددير. بو اوٍزدن ريجا ائديرم اوْ گوٍن مزاريستاندا نظم ياراتماق اوٍچون تشكيل وئريلميش قوروپلا ايش بيرليك آپارماق ايله مراسيمين آرتيق طمطراقلي كئچيريلمهسينه دستك اوْلاسينيز.

بو يازي يالنيز آق ساققاللار، ضياليلار، يوْلداشلار، اؤيرنجيلر و بيرسؤزده تام بو بير ايلده بيز ايله اوٍركبير اوْلانلاردان تشكّور ائتمك بهانهسي ايله يازيليردي آما بير چاغيريش كيمي قورتولموش يازي اوْلاركن مراسيمين يئر و چاغين اعلان ائتمهيه ايذن ايستهييرم. ايلك اوًنجهدن اوًز مينّتدارليغيمي بيلديريب تانريدان ائليميزه باش اوجاليق و شن گوٍنلر آرزيلاييرام.

گوٍنش تبريزلي

گوٍز 1388

مهنديس غلامرضا اماني و ايكي سئويملي قارداشينين دوٍنيادان كوًچمهلرينين ايلك ايل دوًنومو موناسيبتينه قورولموش ياس توًرهنينين يئر و چاغي:

جوٍمعه 1/8/1388 ساعات 10:30 دان 12:30 دك

آغالار: ثقهالاسلام خياوانينين سوْنو، سو منبئعي، طاليقاني مچيدي

خانيملار: مفتّح خياوانينين سوْنو، اكبريّه مچيدي

مزاريستان: مارالان خياواني، بقائيه مزارليغي، ناهاردان سوْنرا ساعات 15