علي ملازاده:

ميللي فعاليت موحيطلرينده چوماق، سٶز و قلم قولدورلاري

گئري قالميشليق و سياستله لومپنيزمين سرحدلريني پوزماق كيمي خسته ليكلره حساسليقلا ياناشمايان جماعتين وجودو، چوماق و قلم قولدورلاري نين ميللي فعال لار سيراسيندا اٶزباشيناليقلارينا زمين يارادميشدير. ايدمان يئرلري، درنك لر و حتي قورولتايلار كيمي آذربايجانلي لارين فعاليت موحيطينده، بورون و بارماق سينديرماق، قولاق پرده سي پارتلاتماق، بير تشكيلاتين قورولتاييندا بير چوخ اعتنا سيز قورولتاي نوماينده لري نين گٶزلري اٶنونوده، تك بير قاديني فيزيكي هجوما معروض قويوب "موفقيتله" اوردان قاچماق كيمي فيزيكي قولدورلوقلار آز سايلي آلچاقلار طرفيندن حياتا كئچميش اولسادا، بو عمللره مٶوقع بيلديرمه ين و حتي بعضي حاللاردا قولدورلارين خئيرينه مٶوقع توتماق كيمي حاللاري، بو فيزيكي قولدورلوقلارين ياييلماسينا باعيث اولان عاميل لرديرلر. اينانمالي اولماسادا، نئچه آذربايجان تشكيلاتي نين ايداره هيئتينده عضو اولموش بيريسي، ايشاره اولونان حاللارين بيرينده (قولاق پارتلاتماقدا) ايسوئچين محكمه سي، قولدورلوق ائدن شخصي محكوم ائتسه ده، اونون خئيرينه محكمه ده يالان شهادت وئرمك كيمي آلچاقليغا ال وورموشدور. بونلاردان علاوه سٶز و قلم قولدورلوغو دا اوردا-بوردا باش وئرير.

سٶز قولدورلوغو، ايجلاسلار، قورولتايلار، ميللي فعال لارين فعاليت و گٶروش موحيطلرينده و پالتاك اوطاقلاريندا، يالان سٶزلر يايماق و آچيق آشكار تحقيرلر ياغديرماقلا حياتا كئچير. بو نٶوع قولدورلوق چوخ حال لاردا دٶرد ديوار آراسيندا قالير و بعضاً حتي مسئوليت سيز مئديالاردان ياييلير. بوردا دا قولدورلارين سايي آز اولسادا، ساكيت بير اكثريت اٶز سوسماسيلا بو آلچاقليقلارا خئير دوعا وئرميش اولور. بو جومله دن بير ميثال كيمي، اونلارلا ويدئو كامرا قارشي سيندا، ايسوئچين پارلامنتينده كئچيريلميش بير 200 نفرليك ايجلاسدا، بير چيخيشچي نين گويا "كيم ايراندان آيريلماق ايستير ايراني ترك ائتسين گئتسين" دئدي يي ايديعا اولموشدور و بو ايدعا مسئوليت سيز بير مئديا اورقاني طرفيندن ياييلميشدير. بو اورقانين مسئولو هئچ بير سوآل وئرمه ميشدي كي، اگر بو سٶز اونلارلا ويدئو كامرا اٶنونده دئيلميشدير، بس بونون بير ويدئو گٶرونتوسو نه دن يوخدور؟!

سئوينديريجي حالدير كي قولدورلاريميزين چوخو يازي-پوزودان اوزاق شخصلرديرلر تكه توك بير شئي يازسالاردا اونلاري تاخما آدلا و اي مئيل قوروپلاريندا ياييرلار. آمما بو قايدادان موستثنا حاللاردا واردير. حركاتين حاشيه سينده مسكونلاشيب هردم بير آكتيولشن آداملاردان بيري "صمد نيكنام" آدلي جنابدير. بو شخص قوزئي آذربايجان ضيالي لاري و سياسي رهبرلرينه تحقير كامپانياسي آپارماغي اٶزونه بير "آد" قازانماق اوچون بير وسيله حئساب ائدير. توركيه، محمد امين رسولزاده و مساواتچيليق، ائلچي بي و قوزئي آذربايجان ضيالي لارينا تحقيرلر ياغديران، آذربايجانين 1920 نجي ايلده آذربايجانين ايشغالي اوچون، روس-بولشويك اورودوسو يئرينه توركيه ني ايتتيهاملاماق (!)، 20 يانوار 1990 فاجيعه سينده، آذربايجانا قارشي روس اوردوسونون تٶرهتدي يي قتل عامدا، سوئت ايتتيفاقي كمونيست پارتيا رهبرلريني يوخ، خالق جبهه سيني تقصيركار آدلانديرماق (!؟) و بوگون قوزئي آذربايجان ين ايستيقلاليني ضمانت ائدن، روسيه و ايراندان يان كئچن نفت-قاز كمرلريني پيسله ييب، آذربايجان ايقتيصادياتي نين استراتژيك شرياني ني روسيه يه باغلاماغي تبليغ ائدن بو شخص، گونئي لي لرين آپارديغي حركاتا گلديكده واخت آشيري اٶزونون قازاديغي آدا يارايان، بير خوشا گلمه ين يازيلا اٶزونو ديققت مركزينه آتماغا جهد ائدير.

بديهي دير كي، حركاتين سيرالاريندا و فعال لاري نين آراسيندا دائمي تنقيدي ياناشمالار جرياندا اولمالي دير. آمما بو تنقيدي ياناشمالار حركاتين يوكسليشينه و ميللت ايله فعال لارين ياخينلاشماسينا خيدمت ائتمه لي دير. تنقيدي ياناشما بير مثبت ياناشمادير. حركات داخيلينده اولان پولميك و تنقيد ائدن شخص، تنقيد اولونان طرفين تام يا بير قيسم فيكيرلريله راضي اولمور، آمما اونو حركاتين بير حيصه سي گٶرور و اوز موخاليف فيكيرلريني آچيق-آيدين يازماقلا، اوندان هميشه ليك ويدالاشماق، كوسمك و آيريلماق قصدي اولمور. حركاتين سيرالاريندا گئدن تنقيدي ياناشمالار، قارشيليقلي سايقي اساسيندا و قارشي طرفي اٶزوندن بيلمك اوزرينده يارانير. تنقيدي ياناشما كونكرت فاكتلار اساسيندا ائله قورولور كي، تنقيد اولونان طرف اٶز فيكيرلريندن مودافيعه ائده بيلسين و طبيعي دير كي، بوتون بو موباحيثه لرده قضاوت حاققي فردلردن عيبارت اولان ميللت ائولادي اوچون محفوظ قالير. بو تنقيدي ياناشما و اونا حاكيم اولان پرينسيپلردن. آمما تحقير و آنا-باجي سٶيوشونه بنزر سٶزلره معروض قالميش اينسان نه ائتمه لي دير؟ اون سطير يازيدا، حركاتيميزدا رولو اولان بير قوروپ اينسانلارا قارشي تحقير ياغديران طوفيلي نين مقصدي نه اولا بيلر؟ بو مقصد هر نه اولسادا، ديالوق ياراتماق يا تنقيد ائتمك دئيل.

سون ايللرده گونئي آذربايجان مسئله سي گوندمه گلديكجه بيزه قارشي اولان حساسليق و جوره به جور هجوملار و كامپانيالارين شاهيد اولوروق. تأسسوفله قلوباللاشان دونيانين قلوباللاشماسيندان دا، چيركين حركتلر، آذربايجانلي لارا نصيب اولور. ائله كي هم جنوبلي لارين شيمالا قارشي تخريباتلاردا ايشتيراكي حاللاري موشاهيده اولور و هم عكس حاللار. قوزئي آذربايجان ين روس استيلاسينا قارشي آپارديغي آزادليق موجاديله سي ايللرينده بير چوخ گونئيلي اينسانلارين، آذربايجان طرفينده فداكارليقلاريلا برابر، 20 يانوار قتل عامي كيمي تانينميش 1990 نجي ايل 19 يانواردان 20 سينه گئدن گئجه، اوندان قاباخ و اوندان سونراكي گونلرده باكيدا يارانميش روس كا گ ب-سي نين قرارگاهيندا بوتون روس جينايتلريني تأييد ائديب اونلارا چوخ ديرلي يارديملار گٶسترن گونئيلي شخصين ده آدي معلوم دور . ديني فاناتيزم يا چٶرك دردي (بعضاً ائله هر ايكي) سببدن قوزئيلي باجي قارداشلاريميزدان، قم و سايير ايران شهرلرينده فارس ديليني اٶيرنميش آداملار، ايران رئژيمي نين آنتي تورك عملياتيندا گئنيش ايستفاده اولونورلار. ائله كي "ايران شمالي" آدلي ايران رژيمي نين پروژه سينده فارسجا ياييلان مقاله لرين چوخونون مٶلفي ائله "اوف"لا بيتن فاميلييالي شيمال لي قارداشلار (و آزاراق باجيلار)ديرلار. باشقا طرفدن غرب اٶلكه لرينده، ايسلام فاناتيزمي و سايير ديني سئكتلره باغلي اولان آنتي تورك و آنتي آذربايجان ائلمنتلري، يالنيز آذربايجان جومهوريتي يوخ، ائله اللري چاتاندا گونئي آذربايجان مسئله سينده ده اٶز ايزلريني بوراخيرلار. طبيعي كي بوتون بونلار يعني هم ايراندا رژيمين تهلوكه سيزليك اورقانلاريندا بيرباشا چاليشانلار و هم قوزئي ده يا غرب ده آپاريلان آنتي تورك و آنتي آذربايجان كامپانيالاري، بير نٶوع "آذربايجانچي ليق" اٶرتويو آلتيندا آپاريليرلار و بو دا طبيعي دير و باشقا جور اولسايدي تعجب دوغوراردي. بو آرادا ماراخلي بيرلشمه لرده مئيدانا چيخير. مثل اوچون قوزئي آذربايجانا قارشي نيفرت كامپانياسيني رهبرليك ائدن، "بوتٶو آذربايجان چي" (!) و توركيه يه قارشي زهرلي تبليغات آپاران "توركچو" !

بيز آييق-ساييق اولمالي ييق. ايستر ديني يا سياسي باغلي ليقلاردان گلسين يا بير رئژيمين ماراقلاري اساسيندا آرايا آتيلميش خطين نتيجه سي اولسون، آنتي تورك و آنتي آذربايجان كامپانيالاريني بيز تانييب و گونئي آذربايجان ميللي آزادليق حركاتچي لارينين آز ساييلي آدلاريني لكه له مك كامپانيالاريني يولا سالانلار و اونلارا مئيدان سولايانلارلا آيدين بير سرحد قويمالي ييق.

داخيلده و خاريجده چوخ ماراق و حساسليقلا ايزلنن، گونئيلي باجي قارداشلاريميزين، قوزئي آذربايجان سفري، سٶزسوز كي تاريخي بير آدديم ايدي. سون 20 ايل عرضينده غرب اٶلكله لرينده ياشايان گونئيلي ميللي فعال لار، قوزئي آذربايجانين ايستيقلاليتي ني قئيد-سيز شرطسيز مودافيعه ائديب، اللريندن گلن قدر ائرمني تجاووزونون ماهيتيني ايفشا ائديب يوزلره قوزئيلي علم، مدنيت و سياست آداملارين ياشاديقلاري اٶلكه لرده ان عزيز قوناقلار كيمي قبول ائديبلر. بو ايللرين عرضينده موستقيل آذربايجان جومهوريتيندن، گونئيلي بير هيئتين گٶروشوندن نورمال و طبيعي بير حال نه اولا بيلر؟ اگر هر گون مينلرله يابانجي ميللتر و دٶولتلرين نوماينده لري قوزئي آذربايجاندان زيارت ائديرلر، بير قوروپ گونئيلي لرين اٶز وطنلري نين شيمالي پارچاسي ني زيارت ائتمك كيملري و نه دن ناراحات ائدير؟! عجبا ايران رئژيميندن سواي، كيمسه دونيا شٶهرتلي تبريزين لياقتلي اوغلونون، باكي دان زيارتيندن اينجيه بيلر؟!

سون و ان اٶنملي: گونئي آذربايجانين قلم، سياست ،مدنيت و دين خاديملريندن يالنيز كيچيك بير حيصه، ميللي حركاتين سيرالارينداديرلار. بوگون بو زومره لرين حركاتين سيرالاريندا اولان يا واخت آشيري حركاتا يارديم ائدنلره قارشي بسله دي ييمز موناسيبت، عئيني حالدا، آدلاري چكيلن قوروپلارين، هله حركاتيميزا ياخينلاشميش حيصه لرينه بير مئساژدير. ميثال اوچون ميللي حركاتين سيرالاريندا اٶزونه آد-سان قازانميش دين خاديملري نين حتي خاريجده ياشايان آذربايجانلي لار طرفيندن سايقي و حٶرمتله قارشييلانماسي، هله حركاتي كناردان موطاليعه ائدنلر اوچون ده موثبت بير مئساژ حئساب اولور. بئله بير حالدا، گونئيلي لرين، اٶز وطنلري نين بير پارچاسيني زيارت ائتمه سي كيملري و نه ماهيت ده آداملاري عصبلشديره بيلر؟