http://www.hbayat.azerblog.com/1388_06_05_Say=999.ay

آذربايجان قاديني و ايكي قات ظولوم

آلما يولو: اؤتن ایل هئریتئیج (heritage) فوندونون سیتهسینده ایستاتیکسل بیر یازی اوخودوم. ماراقلی یازی ایدی. اینسان حاقلاری ائلهجه ده قادین حاقلاری ایله آزاد اقتصادین ایلیشکیسی اوزرینه یازیلمیشدی. اقتصادی آزادلیغی دا اینسان حاقی اولاراق ساوونان کیم ر. هولمئس، اقتصادی آزادلیغین توپلومسال و سیاسال آزادلیق گتیردیگینی ده سؤیلمیشدی. ایستاتیکلر ده بونو سؤیلمکدهدیر. آزاد اقتصاد قادینی اقتصادی چالیشمالارا گتیریب چیخاریرسا، اقتصادی دوزئیده ائلهجه ده قادین حاقینی قورویا بیلهجک گوجه ییهلنهجک. قادین، اؤز حاقلارینی ساوونماقلا بیر باشا آزادلیغین، دئموکراسینین ده قوروجوسودور.
منجه بیز، یالنیز گؤگسل آزادلیق دویغولارینا قاپانمیشیق. قونولارا بوتونجول یاناشمیریق. اؤرنه یین آزادلیغین اقتصادی طرفینی سؤیله مک اولار. اصلینده زیمباوهنین دیکتاتور دؤولتی او اؤلکهنین اقتصادی قورولوشو ایله اویغوندور. هامینین تانیدیغی، یاشادیغی اؤلکهلر ده هابئله. آدینی چکمهیه چکیندیگیمیز اؤلکهلرین ده حکومتی اقتصادینا اوخشار دورومدادیر.
بلکه ده سؤزوم بیر آز قوربته دوشدو. سؤیله مک ایستدیگیم ایسه بو گونلر آزربایجانین گئرمی شهریندن دویولان آجی اولایلاردان عبارتدیر. آرتیق اون ایللردن بریدیر کی، آزربایجان کؤچگونلرینین فایزی بو اؤلکه ده یاشایان هر بیر اولوسون کؤچگونلرینین فایزیندن آرتیقدیر. تکجه ایران- ایراق ساواشی دؤنمینده خوزیستاندا اؤلوم جایناغیندان قاچانلار اولدوغو حالدا اورانین کؤچگونلرینین فایزی، مووقتی اولاراق آزربایجان کؤچگونلرینین فایزینی اوستهلهدی. ساواش بیتدیکدن سونرا ایسه آزربایجان یئنه بیرینجیدیر.

منی بو آن دوشوندورن ایسه باشقا مسئلهدیر. آزربایجانا قیییلمیش بو ظولومدن دولایی گئرمیدن ده رشته، تئهرانا فهله کیمی گئدنلرین ساییسی سایسیزدیر. اوشاقلیقدان گؤردوگوم اولایدیر بو. آرتیق ایللردیر کی، بو کندلرده قوللاریندا گوج دویان رشته، تئهرانا گئتمهلیدیر. سون ایکی ایلده ایسه تکجه قوللارینین گوجونو دویان اوغلانلار دئییل، هم ده اوغولسوز یا عائله باشچیسی خسته اولان عائلهلردن ده قیزلار بو شهرلره ایشله مهیه گئدیرلر. قادینلیقدان دولایی یارانان اقتصادی آسيلیلیغی آزالتماغا دئییل، یاددیللیلر فابریکلرینده فهله ایشله مهیه. دوغونون قارانلیق و اینسان ازیجی دوشونجهسی ایله یاناشی اولوسال بیر محکوملوغون دا آجیسینی چکمکدهدیرلر.
باشقا چیخیش یولو دا یوخ. قیسیر اکین یئرلری، بؤلگهنی اقتصادی باخیمدان تامین ائدهجک هئچ بیر یاتیریم ایمکانلاری یوخ. نه ائتمک گرکیر؟
گؤرونور آزربایجان قیزلاری، آزربایجانلی اولماقلا یاناشی توپلومون وئردیگی جینسيیت اوزوندن ایکی قات آجیلیق یاشامالیدیرلار.

۲۰۰۶-جی ایلین رسمی نوفوس ساییمینین نتیجهلرینه گؤره گئرمی شهرینین نوفوسو اون ایل اؤنجهکی ایله موقاییسهده ۲۳ فایز آزالمیشدیر. قادینلاری آرتیق اوشاق دوغورماغا سوروکلندیکلری ایللر ایچینده اینسانلارین ساییسینین بو شهرده آزالماسی گؤزلنیلمز دئییل. گئرمیده تام بوشالمیش کندلرین ساییسی گوندن گونه آرتماقدادیر. داغلار آراسیندا تیکیلمیش کند ائولرینین اوچوق تاوانلاری آدامین اوزونه قیشقیریر. تصوور ائدین گئرمی تئرمینالیندان تبریزه بیر ماشین بئله یوخدور. بونا ایستک یوخدور اصلینده. رشت، تئهران مقصدینه ایسه هر گون چوخ سایدا آوتوبوسلار گئدیر. باخمایاراق کی، گئرمینین تبریزله ۳ ساعت، رشتله ایسه ۹ ساعت آراسی وار. منجه بو بؤیوک گؤستریجیدیر.