آذربايجان ميلى سورودو (هيمنى)

«ميلى سورود هر بير خلقين آندى دير!»

هر ميلتين ماهنىسى و ميلى سورودو اولدوغو کيمى آذربايجان ميلتىنين ده اؤزونه مخصوص ميلى سورودو واردى. آذربايجان ميلى سورودونو خالقيميزين قوجامان و موباريز شاعيرى سيد مهدى اعتماد ناطق يازميش، موسيقىسينى ايسه جهانگيرزاده (جهانگير جهانگيروف) بستهلهميشدير. بو سورود ٢١ آذر ميلى نهضتى نتيجهسينده اؤلکهميزده دموکراسى بير اوصولون يارانيب، ظولم و اسارتدن خيلاص اولموش آزاد و خوشبخت ياشايان آذربايجان خالقىنين سسينى ترنوم ائدير.

بو سورود ميلتيميزين اؤز شيرين، دوغما آنا ديلينده يازيلديغى اوچون اونون موسيقىسى ترنوم ائديلديکده هر بير آذربايجانلىنين روحونو اوخشايير و اوندا هيجان و بؤيوک روح يوکسکليگى يارادير. ميلى سورود ترنوم ائديلرکن هر بير ناموسلو و ويجدانلى آذربايجانلى و آزادليق سئور ايران زحمتکشلرى ميلى حؤکومت دؤورونده فيرقهميزين رهبرليگى ايله قورولان خوشبخت و سعادتلى گونلرى و آذربايجان خالقىنين الده ائتديگى بوتون نايليتلرى گؤزونون قارشيسيندا موجسم ائديب، او خوشبخت گونلرى ياد ائدير.

ميلى سورود هر بير خالقين آندى دير. اونا گؤره ده او، موقدسدير. آذربايجان خالقىنين ميلى سورودو خالقيميزين اؤز آزادليغى و ايستيقلاليتى اوغروندا آپا رديغى موباريزهلرين رمزينى اؤزونده ايفاده ائدير. بو سورود آذربايجانين ميليونلارلا زحمتکش فعله و کندليلرىنين و فداکار فداييلرىنين ديلک و آرزولارينى و اونلارين نجيب دويغولارينى ترنوم ائدهرک اونلارى جوشقون ايفتيخار حيسى ايله موباريزهيه دعوت ائدير. سورودون بيرينجى بندى بئله باشلانير:

ائى وطنيم آذربايجان،

ابدى اودلاردان نيشان،

آدلى- سانلى کئچميشين وار،

سن بؤيوتدون قهرمانلار.

قوجا شرقين چيراغيسان،

آزادليغين بايراغيسان،

تاريخ بويونجا ياديگار،

ايفتيخارلى آثارين وار.

سنسن بيزه آنا وطن،

سنسن بيزه نعمت وئرن،

سنسن بيزه روح و روان،

ياشا- ياشا آذربايجان!

سورودون بو بندى اودلار- آلوولار اؤلکهسى اولان آذربايجانين ايستيقلالينى و خالقيميزين آزادليغينى تاريخ بويو ايشغالچيلاردان قورويان، ظولم و اسارته قارشى عوصيان قالديران موباريز قهرمانلاريميزين سيمالارينى گؤز قاباغيندا تجسوم ائدير. ميلى حؤکومتيميزين مرکزى اولان تبريز شهرى بورادا اؤزونون قوجا شرق قاپيسيندا آزادليغين پارلاق اولدوزو اولدوغو و هميشه اؤز تاريخ و مدنيتى ايله فخر ائتديگينى بير داها خاطيرلادير. ايکينجى بند:

ال اوزاتدى يادلار سنه،

پوزماق اوچون عيزتينى،

قالخدى شرفلى فيرقهميز

حيفظ ائلهدى حؤرمتينى،

آزادليغى برپا ائديب،

نيشان وئردى قودرتينى،

آرزو ائدير ائللريميز،

دونيا بويو شؤهرتينى،

سنسن بيزه آنا وطن،

سنسن بيزه نعمت وئرن،

سنسن بيزه روح و روان،

ياشا- ياشا آذربايجان!

ايکينجى بندده ده آذربايجان دموکرات فيرقهسى خالقيميزين بوتون آمال و آرزولارينى تمثيل ائدهرک زحمتکش کوتلهلره اؤز موباريزهلرينده رهبرليک ائديب تاريخى نهضتيميز ٢١ آذرده ايرتيجاع اوصولونون آلت- اوست اولوب يئنى بير ميلى- دموکراتيک حؤکومتين يارانماسينى خاطيرلادير. ميلى سورودون سونو آشاغيداکى بند ايله قورتارير:

آ ذربايجان آذربايجان

اسلانلارين مکانیسان

سن قوردوغون يئنى حيات،

خالقيميزا وئردى نيجات،

گؤزل گونلر گتيريبسن،

ستارخانلار يئتيريبسن،

قوى يوردوموز جنت اولسون،

دوشمن باغرى قانلا دولسون،

سنسن بيزه آنا وطن،

سنسن بيزه نعمت وئرن.

سنسن بيزه روح و روان،

ياشا- ياشا آذربايجان!

آخيرينجى بند آذربايجاندا قورولموش ميلى حؤکومتين خالقيميزا يئنى حيات وئرهرک شن و فرحلى گونلر گتيرديگينى خاطيرلادير. شرقين قاپيسيندا يانان بو آزادليق مشعلىنين شوعالارى ايرتيجاعنين گؤزونه اوخ کيمى سانجيلدى. ايران ايرتيجاعسى ايمپرياليستلرين کؤمگى ايله اؤلکهميزى غصب ائتدى. موقدراتينى اؤز الينه آلميش آذربايجان خالقىنين بير ايل مودتينده ياراتديغى مدنى، ميلى ساحهلر و ميلى آبيدهلر دوشمن طرفيندن يئر ايله يئکسان ائديلدى. لاکين بونا باخماياراق ميلى آزادليق حرکاتىنين تاثيرلرى آرادان گئتمهميشدير. ايرتيجاع جاسوسلارى خالقيميزى هر آدديمدا ايزلهديگينه باخماياراق، ايندى يئنه ده موقدس ميلى سورودوموز گيزلى صورتده اورکلرده و دوداقلاردا بؤيوک روح يوکسکليگى ايله ترنوم ائديلمکده دير.

بونا شاهيد خالقيميزين فداکار اوغوللارىنين دار آغاجى قارشيسيندا شهامتله ميلى سورودو اوخومالارنى گتيرمک اولار. ايندى ده بو سورودون آهنگينى ائشيتديکده خالقيميز ايختيارسيز صورتده گؤزلريندن ياش آخيب کئچميش بختيار گونلرى آرزولايير. بو سورود خالقيميزين ايليگينه قدر ايشلهميش و اونا قهرمان موباريز يولداشلاريميزدان بير ايرث کيمى ياديگار قالميشدير.

ميلى سورودوموز آذربايجان خالقىنين ايرتيجاع علئيهينه قالديرديغى آزادليق بايراغىنين نيشانى اولوب اونون دالقالارى بوتون شرقه ياييلاراق خالقيميزين مغلوب ائديلمز اولدوغونو بير داها ثوبوت ائدير.

مير رحيم ولائى- آذربايجان ميلى مجليسىنين کاتيبى