صوغرا آذرى

م.ج.پيشه‌ورى قادينلار حاقيندا

گؤرکملى حرکات خاديمى م.ج.پيشه‌ورى ايرتيجاع و ايمپرياليزمه قارشى موباريزه‌لرده زحمتکشلرين سفربرليک ايشينه چوخ بؤيوک اهمييت وئرميشدير. زحمتکش قادين کوتله‌سينين ده ارلرى و قارداشلارى ايله بيرليکده بو موباريزه‌لرده  اؤز يئرلرينى توتمسى اونون ديقت مرکزينده اولموشدور. اونا گؤره ده اونون اثرلرينى واراقلاديقدا قادينلار حاقيندا دئيلميش تاثيرلى سؤزلره راست گليريک.

م.ج.پيشه‌ورى «يولداش» مجله‌سينده چاپ اولونان «زحمتکش قادين يولداشلار» سرلؤوحه‌لى مقاله‌سينده يازيردى:

زامان آرتيق حقيقتى مئيدانا چيخاريب، آروادلارين کيشلر کيمى اينسان اولوب اونلارلا يولداش اولماغا موستعيد اولدوقلارينى ثوبوت ائتدى...

م.ج.پيشه‌ورى همين مقاله‌سينده قئيد ائدير کى، ايسلام قادينلارى، آذربايجانلى آنالار دا (گرک) اؤز حوقوقلارينى دوشونوب قادينليغين، اينسانليغين بو گونکو طلبينى ايسته‌سينلر...داها دوغروسو قادينلار هر بير حوقوقدا اؤز ارلريله برابر اولماغا چاليشماليديرلار. يولداشلار، اينقيلابچى ارلرينيزله يولداشليق ائدين. قوى هميشه‌ليک آجى حيات دگيشسين. ريياکارليق، حييله و مکر عوضينده صداقت، عيفت، ناموس و محبت و يولداشليق مئيدانا چيخسين.

م.ج.پيشه‌ورى هله 1924- جو ايلده «شرق قادينى» مجموعه‌سينده، جوادزاده ايمضاسيله چاپ ائتديرديگى «ايراندا قادين حرکاتى» سرلؤوحه‌لى مقاله‌سينده ايراندا قادينلارين وضعييتيندن دانيشاراق يازيردى کى، ايراندا زحمتکش قادينلار چوخ اولدوغو کيمى، اونلارين حياتى دا سون درجه آغيردير...بو گون ايرانين ان موهوم تيجارت مالى، قالى، خالچادان عيبارت اولوب ايران خالچاسى اوروپا و آمريکانين هر يئرينده شؤهرت قازانميشدير. همين قالى و خالچالارى ووجودا گتيرن ايران زحمتکش قادينلارى دير.

بو واختا قدر بؤيوک قادين کوتله‌سى‌نين حالينى ياخشيلاشديران نه بير قانون و نه ده بير تشکيلات ووجودا گلمه‌ميشدير.

ميلى نهضتيميزين تشکيلاتچى‌سى، م.ج.پيشه‌ورى هميشه قادين آزادليغى اوغروندا موباريزه آپارميشدير. خوصوصيله 21 آذر نهضتى دؤورونده قادينلارين موتشکيل‌لشمه‌سينده، اونلارين حرکاتدا فعال ايشتيراک ائتمه‌سى ايشينده يورولمادان فعاليت گؤسترميشدير. ايران تاريخينده بيرينجى اولاراق آذربايجان ميلى مجليسى قادينلارا سئچيب- سئچيلمک حوقوقو وئردى. آذربايجان قادينى اؤز يوردونون موقدراتيندا، اونون آبادلاشماسيندا کيشيلرله برابر چاليشديغى حالدا اونونلا برابر حوقوقا ماليک اولدو. بوتون ايجتيماعى، سيياسى و ايقتيصادى تدبيرلرده آذربايجان قادينى فعال صورتده ايشتيراک ائتدى.