ترسا بالاسی

گئتمه ترسا بالاسی باخ دالینا سایه گلیر

ترک محراب ائله ییب ماللا کلیسایه گلیر

باخما وار ساققالی عمامه سی ترمه عباسی

اوزده اسلام دئسه ده میلی مسیحایه گلیر

ختنه وغسل .وتیّممم دئییلی مسئله سی

دگیشیب نیّتینی غیر ایله سودایه گلیر

اولکودوب باده یه قدرت گؤتوروب بیعتینی

بوراخیب خیمه لری شیمره تمنّایه گلیر

حوکمونو سورماق اوچون لازیم اولان رنگه دوشور

شرّ ایله صلح ائله ییر خیریله دعوایه گلیر

نه حیا خلقدن ائیلیر نه خدادن اوتانیر

تخت فرعونا چیخیر سونرا مصّللایه گلیر

ارمنی داشناق ایله قول بویون اولموش اؤپوشور

قان توکن قاتل ایله خلوتی ماوایه گلیر

ترس تفسیر اولونور سانکی شریعت دئدییی

هر فریلداغی اوچون وحی اولونور آیه گلیر

شیعه نین عومرو بویو موسیقینی کفر سانان

تار ایله ضرب توتور سازیله آوایه گلیر

چوخ حرام اولدو حلال جامی دولاندیر ساقی

بو گون اولمازسا صاباح فتواسی ودکایه گلیر

یار حجاب آتما دادیر حوسن جمیل اولسون عیان

بولبول ال گولدن اؤزوب ذووق تماشایه گلیر