سارىخانلى پاشا

اؤلکۀم ؟

آخ یانمیًش تورپاقلار،
کؤک سالدیً میً،
بیر زامانلار، کؤکسونوزده أکدیگیم،
قانلی قوللاریم؟

ماوی لره آچیلان بارماقلاریمین،
قوندومو هربیری نین اوجونا،
پارلاق بیر دان اولدوزو؟

هانسیً قاتیًندا گه زیر ایندی سونسوز عرشین،
آغیًر زینجیلرینی سوروکله ین،
قولسوز بدنیم؟

و هانسیً تختِ عاجیًن،
اوستونده دورور،
بدنسیز باشیًم، کسیک بوغازیًم؟

هاوادا گؤزله ین پاسلیً قیًلیًنجیم،
خاطیًرلارمیًسان،
دلی قانلی بیر شاعرین اللرینده،
ایلدیًریم تک پارلادیًغین گونله ری؟
شرقی، غربه باغلایاراق،
نغمه قوشوب، آت اوینادیًب،
تورپاقلاری آللادیًغین گونلری؟

غربت دیاردا دوسداق،
یارالیً مزار داشم،
نه دن بو قدر آلچالمیسان،
هر کۀچه نین آیاقلاریً آلتیًنا؟
باریًندیرا بیلرسنمی،
ظلمون تیفاقینی سوکوب،
عدالتی جارلایان،
ان اوجا داغلارین، ان ایگید اوغلون؟

آغزیمدا یانان دیلیم
دار آغاجیًندان آسلانان،
محکوم روحوم
ظالیم آلوولارا اودون اولان،
درس کیتابلاریم
آخ!
یوواسیندان کوسن قارانقوشلاریم،
چیچکلری سولوخان بنؤشه لریم،
اوزلرینی توز باسان اولدوزلاریم!
آچیلارمیً بیر گون صاباح گؤره سن،
تؤکولرمی یۀل اسرکن، قارا بولوت تورپاغا؟

باخین هله بو حالیمه
باخین هله طالعیمه
آنادان اولارکن، محبوس مو دوغولدوم؟
تانری یارادارکن، یالنیش میٌ یاراتدیً منی؟
باخین هله بو انساندا قایدالارا:
آنامین قارنینداکن بۀله ؛
یاساقمیش وارلیغیم، یاساقمیش دیلیم

آخ، یانمیًش تورپاقلار!
نه ایمیش گناهیًم، نه ایمیش سوچوم؟

اوجالیر فریادلار هجره لریمدن،
یوکسه لیر نیدالار قارا تورپاقدان،
ورمیر آمان دوشونجه یه بیرجه آن:
دانیشما طالعدن، دانیشما سوچدان
آچیل!
چیًخ قیًنیندان، پریشان انسان!
سوچون سنین،
نادانلیًغین،
قورخاقلیغین،
ساده لیگیندن دوغور
هر قارانلیًق گۀجه ده،
میلیونلارلا سیتاره،
ایشیق ساچیًر، نور دوغور
دکابر 2008
یۀنیدن دوغوش

den 11 mars 19:53