حبيب ساهير اؤزو حقينده دئميشدير:

 

...اکينلر گؤورنده، آغاجلار گوللننده مرموز دونيادان، ايشيقلی عالمه گلديم...بئشيک منی سيخارکن، ائو منی بوغارکن آنام منه لايلای دئدی...

 

        آنامين سوتی منه جان وئردی، او منی اؤپرکن دوداقلاريم، اوزوم- گؤزوم آل رنگه بوياندی! ايچيم ياندی! بئله ليکله بختيم، طالعيم اوياندی. بوی آتديم...بئش ياشا چاتديم. کنديميزده فيرتينا قوپدو! آتام بير گئجه، پاييز گئجه سی، قوناق گئتدی، بير داها ائوه گئری دؤنمه دی...يئتيم قالديق، سينيق لامپايا قييديق، آلتيميزا کؤهنه کئچه سالديق، آجليق گؤردوک، کورلوق چکديک...هئی، باتميش دونيا، نه لر گؤردوک! بؤيودوک...مکتبلرده، مدرسه لرده مؤوهوماتلا باشيميزی توولاديلار، بيزی آزغين سالديلار...دئديلر کی، «اولدوزو کور اولانين، بختی ده قارا اولور، قول اولور...داخمادا ياتسين گرک، دونيانی آتسين گرک، بؤيوکلره حؤرمت، اربابلارا خيدمت ائديب! بير پارچا چؤرکله، بير کوزه سو ايله گئچينسين، آللاها شوکور ائيله سين...»

 

        عربيات جانيمی سيخدی، ادبيات ايسه اوميد ائويمی ييخدی. «دونيا بئش گوندور» دئدی، «گؤزللرده وفا يوخ، حياتدا جفا چوخ، اؤزونه گل، دئيرده اوتور، سو باشيندا چادير قور، شراب ايچ، افيون چک، حياتين اوزونه آت توپورجک!»

 

        درويشليکله، قلندرليکله آليشاماديم...ايکی يول آراسيندا قالديم: بير طرفده تصووفون رمزلی، قارانليق دونياسی، بير طرفده ايسه گونشله پارلايان رئا ل عالم گؤردوم. آتيمی ايشيغا سوردوم! ماهنی سؤيله ديم ، شعر يازديم، يازديم، پوزدوم...يادلار منی دانديلار، ائللر منی آنديلار، آلقيشلاديلار...

 

        من يولومو تاميشام، ايشيق عالم اوردادير، شن گونلر، آزاد ائللر اوردادير...دونيا بئله اولمالی...