آدین آزادلیقدیر گؤیلومه دوشور

زیندان شعرلری

سعید موغانلی

 

 

سئویملی قارداشیم، غلامرضا امانی حضرت­لرینین اولو روحونا...

اوین- پاییز- 1387

 

دووارلار اوز- اوزه گلیر بو گئجه

دووارلار سؤز- سؤزه گلیر بو گئجه

دووارلار گؤز- گؤزه گلیر بو گئجه

بو گئجه دووارلار آراسیندایام.

                    *   

قارانلیق قلبیمی الینه آلیر

شاعیرلیک رویامی بئلینه آلیر

گودوکچو شعریمی دیلینه آلیر

بو گئجه روحومون چاراسیندایام.

                  *

یالقیزلیق جیسمیمی قیلینج­لایارکن

رویالار فیکریمی سونوج­لایارکن

کیمی دانلایارکن،  او سوچ­لایارکن

بو گئجه دونیانین هاراسیندایام؟

               *

"بارازا" اورَییم داریخدی آخ ­ائی...

"لوایی" بو گئجه اویاخدی آخ ائی...

"امانی" شعریمه قوناخدی آخ ائی...

  بو گئجه شعریمین یاراسیندایام. 

 

 

1     

 

  آدین آزادلیقدیر گؤیلومه دوشور

              

 

 آدینی تئرور ائدیرلر  
              آدینی گودورلر

                              آدینی گولـله­­له­ییرلر...

              آدین ایلقارا سئوگیناز

             ناظیم حیکمته «مانا»  

              آدینی قویاق خانیم ناز

                                       علی کریم

                                       حسین جاوید

                                       میکاییل مشفیق

                                 آدین مالکوم ایکس

                                       لورکا 

                                       اوختای، زهتابی

            آدین عاشیق ماهنی­سی اوخونور

                                 حسین جاوانین بوغازیندان

            آدینلا دانیشیر فریدون ابراهیمی آذربایجاندان

            آدین حلاج­دیر کسسگ آتیرام

            آدین نسیمی­دیر سویولور مئیدانلاردا

            گؤیلومون حلبینده سویوندوردوغوم گئجه تک

            آدین شریعتمداری­دیر فاناتلار بوغور

            آدین من،

                      دوستاق

                                  ائوین ...

            آدین لوایی­دیر گؤزوندن دوغولور

            آدین زیبا کرباسی­دیر یوخوما گیریر

            آدین هئچ زاددیر          

                             قوجاغیمدا لوله­له­نیر...

           قان- تر ایچینده چالینیر

                                    کسمه شیکسته آدین

            آدین قاراچای­دیر سورگونده اؤلور

           سن بانی چیچک،

           شاصنم

           سن گولگزسن شاه عابباسا زوررانیرسان

          آدین دمو.....چولاردیر زینداندا یاتیر

         آدین دمو   کرات         

          آدین سئوگی، سئوگیناز

          آدین سولمازدیر خزره محکوم

             و بیر موغانلی­ شاعیردیر داماندا قالیب

          ...........................

           آدین نازدیر، آدین آز...

           آدین آزاد، آزاد ناز،

           آدین سیدجعفردیر گؤیلومدن قاچیر

           آدین آزادلیق­دیر گؤیلومه دوشور

           آدینی تئرور ائدیرلر

                    آدینی گودورلر

                           آدینی گولـله­­له­ییرلر...

        

                       … آدیندان موغیات اول جانیم!.   

 

 

 

 

 

2

 

بو گون 7-7-87

سوسیالیست یاغیشلار یاغیر

کاپیتالیست بیر گونش شاخیر

 هاوا توتقون، هاوا نیهیلیست

هر نه یئرینده­جه پای-بؤلوش اولوب

منیم سئللولومدا نَسه چاتیشمیر

 

 

 

3

 

اُحِبُّ دئدیم ایت قاپدی منی

 

بوراخما اللریمی ساتن کؤینکلیم

اردبیل کوچه­لرینده ایتَرَم بیردن

یومما گؤزلرینی کتان کؤینکلیم

باخیشینین هاواسی باشیمدا گزیر

                ***

 

سسینی توراغایی­لار اوخویور

قاتارلار تورموز ائدیر

             ماشین­لار توی سیغنالی چالیر

 سسینی شعیر یازیرام

                      سسینی سئویشیرم.

- باغیشلایین خانیم سسیزی ایتیرمیشم

سیزین موبایلین نومره­سی زیندانا دوشوب

آدینیز سارایین دؤشلویونون جیبینده گئتدی

چایی توللانا بیلمه­دی

                         عشقه ووردو اؤزونو...

آدینیزی خان چوبان بازار آغزیندا

                             یئر آلما چؤرک ساتیر.

آدینیزی ایستی سیمیشقا چیرتداییرام

آدی       نه ایدی...      سیزین؟؟؟

 

هه    کلاسیک شعر، فلاش فیکشن

 

یوخ     آد سیغمیر ادبیاتا

سسیزی یاشاییرام ساده­جه

آخی سئللولوم کیچیکدی بیر آز

سیز سیغیشمیرسیز

             یومروغومدا یئرلشن قلبیمه

یومروغوم آچیلسا

               بوتون قزئت­لر خبردن داشار

داشماسایدی آرپا چایی

                  داشما...  داش...

                    ***  

سسینی یاشاییرام اردبیل کیمی

سسینی "سحر"

                   "سحر- سحر باغا گیردیم"

باغیشلا  خانیم "پیراتملیکدن بالیخلی"­یا نئجه گئدیم من؟

آخی   ساوالانی آشماغیم گلیر

سیزین سسیزی چوخدان گؤرموشم

تئلفونوز زیندانا دوشموشدو مننن

خوشوم گلیردی آدینیزدان

آدی       نه ایدی...     سیزین؟؟؟

 

تئلفونوز دیلیمین اوجوندان

                          صیفیردن باشلانیردی

سیزینله "یاشماق"یم گلیر

            یاشاماق ...

           یاشاماق اولار

           بو شهرده پولسوز؟

 

- کیم دئدی من اؤلموشم؟

           هانسی یوسف خیال اوغلو؟

                     آی ائششگ اوغلو!

- سارایین دالییجا گئتمیشدیم  

              قورخومدان چایی توللانانما­دیم!..

- کیم   لووا وئردی منی؟

من بارالاریمی ییغیشدیرا بیلمیرم خانیم

بوردان قبریستانا نئچه اؤلو سیغیشار؟

یانی دیری­لر نئجه کئف چکیرلر ائهمال-ائهمال

بوردان ساوالانا نئچه ؟...

                      گؤزلدی ساعاتیز

                     سوییس­دی کوردوستان؟!.

یانی دئییرم من ساختا قلبدن باش چیخاردیرام

اللریزی وئرین الیمه

                   لوطفن

                   منی بیر یئره گؤتورون

خسته­خانایا

             ائوینیز یاخشی­دی البتّه

نومره­زی آلیب قاییدارام

سسیزی ایتیرمیشم اینشیلدن

بوراخما اللریمی نه اولار

"سسین گلسین ساری بولبول"

منه بیر آدرسجیک سسین گلسین.

 

- سیزین ائوه هانسی پلاک لازیمدی؟

هانسی خیابان، منی فخری خیابانیندان

                           سیزه گتیرر ؟

                          هانسی اوتوبوس؟

 

اوزوزو چؤندَرین گونشه

بیر - ایکی - اوچ

تولازلانین منیمله دلی­لیگی

سارای توللاندی­ها... قاداسی...

بس اوندا نومره­زی وئرین

بیر شاعیر سیزی شعیرلندیریر

 

- من آزمیشام خانیم ناز

منی ائویزه،

            پولیسه

                   آپارین.

نومره­سی نه ایدی؟

     ائویزین!    قاپیسی!    پولیسین !!.

دانیشین موبایلیم سسیزدن دولسون

بولوتوث ائدین اؤزونوزو لوطفن

باش اوسته یومدوم گؤزلریمی!..

"سسین گلسین باری بولبول"

        ***

من عاشیقم وطن یاخشی

گئیمه­یه کتن    یاخشی کؤینک    ایسته­میرم

من سیزی گئی....یئمک   ایسته­ییرم

آجام

       اللریزی یئمه­رم واللاه...

              ***                  

 

قاشسیز اوزویومون قاشلیسیندان

                   جیبیمده اولسایدی

بارماغیزا نه یاراشیر اوزوک

یوخدو منده اوز...

یانی دئمه­لی سیز هارالی­سیز؟

شورابیل سیزه اوخشاییر

                    سیز یوخ...

آخی تربیه­سیزدی آتلاری

آغ بالیقلاری آنجاق

یانی سیز آغ بالیق

             نئور گؤلو سیزدن

سیز گؤزلسیز دئییرم مطلق

                         گئرچکدن

                ***

اللریمی بوشلاساز، اللریم تؤکولر هاااا

کیم ییغیشدیراجاق بو سویوقدا

بو قدَر سئوگی  بارماقلارینین ایزلرینی.

دئییرم هادیر اولون

من الیزده قالارام

قالسام دا کی "پنجره­دن داش گلیر"

آی سانسور ائتدیم بیر آزین

"آللاها دا خوش گلیر"

 آی منه بیر زنگ ائله...

           ***

منی راپور وئرمه گؤزلرینله

داما وئردیر دامسیزام

سند گتیر آدامسیزام

سن کی زیبا کرباسی­دن ده گؤزلسن

نازپری­دن ده، هم ده...

گؤزوم گؤزونون اویونجاغی­دیر

بوراخما

بوراخما اللریمی نه اولور

اردبیل کوچه­لرینده ایت قاپار منی

سسله آدیمی سسله

من؟   من؟

من گونش اوغلویام       خانیم سن آی   ؟

آدینیز   دیله  -   دیشه     گلمیر

آدی   نه ایدی     سیزین  ؟؟؟

من سیزه گئدیرم

     سیز هاچان گلیرسیز   منی   قوناق   ؟!.

من....   من.....   من.....

نه دیلنن دئییم جوجه­م

آی لاو یو   آی    آی

اُحِِبُ    اُحِِبُ    اُحِِبُ یا حبیبی

قیزا سئوییوروم سِنی

                       بالالی....

 

گئتمه...

      دایان... 

          دور...

به ائششه­یین قیزی

                     آخی سئویرم سنی...

 

 

 

4

باراز بیر داغدی شاعیر اولوب...

باغیشلا جناب!

من اولدوزومو اوغورلاتدیرمیشام

سیزین هوتئلده بخت اولدوزو تاپیلار؟

                  ***

- دئییرسن نه­چی­یم؟

"دئییرسن شاعیرسن هانی غزلین؟"

- الیمیزه ایش وئره­جک بو شعر 

 شعریمین نه­ییندن قورخورسان؟

من غزل قوشا بیلمیرم آخی !!!

بویور وینستون چرچیل چک آغا.

               ***   

دونن دؤردنالا چاپیردی غزل چاپارلار

بیری هؤیکوردو ایمئیلیندن:

- شاه عابباسین ساراییندا یئر یوخدو گلمه­یین،

سولطان ماحمود آلزایمر توتوب

بو هفته بازارا شعر گتیرمه­سین شاعیرلر.

 

توختادین سن...

بیردن مسیح مارالاندان جالاندی

                  مشروطه پارکیناجان...

ستارخانین بئرنووسوندان آسیلدی مسیح

علی موسیو گونشدن آسیلدی

ثقه­الاسلام تحت­الحنکیندن.

اود توتوب یانیردی گونش...

            ***

بیردن دایاندی اولو اؤلولر

هاچان گؤی مچیدده نامازا دوراجاق پیغمبر؟

هاچان به ارکی سؤکوب!، ائله،  گؤل قاییراجاقلار؟

هاچان تبریز مترووسو بیزیم کنده گتیره­جک

                                          صمدخانی؟

                 کندیمیز کاتداسیز قالیب.

هاچان شعره قیزیناجاق

شَهَرین بوش بئکار فهله­لری.

بیری بیزیم شاعیرلره بارماق ائله­سین

عاغیل د­یشیمیزه نه گلدی بیزیم؟

انّ الحق کان ذهوقا

بیر کؤووز دوشونجه سپین

شاعیر ساچلاریمیزین ژئللی کؤوشنینه

بیری بایقوشو کیشله­سین سیته­لردن

پلاستیک ماسکلاری گؤتورون  دوستلار

ایپک یاشماقلارین آرخاسیندان

                    گؤزللـه­نسین قیزلار.

میف دؤورونده کاغیذ یوخ­ایدی آخی

یاشماقلارا شعیر یازیردی سئوگیلی قیزلار

ایندی قزئت آغا

ایندی ژورنال خانیم

ایندی یاشماق سیرا کیتاب­لاری

ایندی یالانچی آژانس­لار

ایندی "گلدیم تاکسی"لر

طبیل دؤهول­لر فیلم اولوبدولار

ایندی جیبیمیز خبر مرکزی­دیر

                           جیبیمیز باند

اجازه­سیز- زادسیز

                    قیریلداییرلار

- "مئساژین وار..."

                           

 

 

 

5

زیبا کرباسی­نین گؤگسل دویغولارینا

 

بایقوش سایاقلاماسی

 

نه سایاقلاییرسان لاله؟

قیزا نه دانیشیرسان؟!.

ایندی "قونقاباشی"ینی یاشاماق لازیم.

بیر شعر بوکوب نیفرتیمه

بو "اِوین"دن  سنین ائوینه

                       یول   لا   ییرام.

ایندی "نادیر" کیمی­یم،  ایندی "هادی"  

هدی دادا چات باجی

بیر یومروغا بیر شعر آغلاییرام

جیققیلی بیر یوسماجا اوشاق

کیتاب چیخاردیرام بوردا

هر یومروغا بیر کیتاب.

ائله بایقوشسیزلامیشام یاشماق-یاشماق

                                                                 I  love   ziba – lale – fereshte

دیوارا یازیلمیشدی بوردا

               (ایکی مئتیرلیک سئللولومدا)

اوچونجوزو تانیمیرام

دوغرودان کیمدی او

                   آدی ملک کیمی­دی...

اوچوز ده   بورداسیز

            خواجه حافظ ده

                     گودوکچو ده.

 

نه وار گؤره­سن بوردان ائشیکده ؟

گونش یئرینده­دیر؟

آتامین کانسئری نئجولدو؟

کیتابلاریمیز نه حالدادی؟

بیر سیر دئییم:

- بیزیم شاعیرلر نئجه سئویرلر زیـبانی

تکی تبریز لهجه­سینی سئویرم بوردان

لهجه­لرده یاشاماق اولورموش دئمه

وطن کیمی­دی،

تن کیمی­دی...

دؤیورلر هر گون سئومیرسن دئیه

دئییرم باش اوسته

                    - آخی سئویرم !!!

 

 

6

سنی سئویرم...

            سنی سئومیرم...              

سنی سئویرم...

           سنی سئومیرم...

قورتاماسایدی بو تسبئح دنه­لری.

 

سئومیرم یالقیزلیغی سنسیز

سئویرم قالابالیغی سنینله یالقیز

یالقیزلیغیم قالابالیغیندیر "تربیت" آغزیندا

                                 "ارک" قاباغیندا

                      *

من گؤزلرینین سعید موغانلیلیغی

                یاشیلدان ماوی­یه چالارکن یار

یار دئدیم،  یاردیم اول نه اولار

اللریم اوزانیر ساچلارینا... گونشین

یاندیر منی   یاخ

                 یار منی،  آ...خ...

یا گؤزلرین اولماسین یا دونیا

کئفیم بئله چکدی باخ!

بورجود امامیه­دن واغزالا گل

"آلما آتدیم نار گلدی

کتان کؤینک دار گلدی

قاپی­یا گؤلگه دوشدو

ائله بیلدیم یار گلدی"

قیر دویمه­لرینی واغزالا گل

                 یانی ترمینالا گل

بیر جوت بیلیت آلمیشام

            منی ده گؤتور تهرانا

               "ائوین"ه گل، ائویمه گل.

 

بیر جوت گؤزلرینی

بیر جوت باشماق­لارینی

بیر پاکات قهوه شوکولاتی

بیر جوت کیتاب گَتی... یار

قوردلار و قارانقوشلار

ان سئودیییم اینسانلار...

 

 

7

سولماز تبریزلی­نین روحونا...

تربیت آغزیندان باشلانیر دونیا

سن رسول رضانین رنگ­لریندن باشلانان کیمی

بوغدایا چالار اوزون

آلچایا گؤزلرین

              ساچلارین هئیوایا...

                *

گؤزلریمدن چیخان ایت دیرسه­یی­دیر غوربت

یوخلوغون ائله قارا- قانچیم ائله­ییب منی

          بادیمجانا چالیر گؤزلریمین آلتی   

خیخدیریر منی بو گؤینرتی­نین رنگی

کیریخدیریر منی ارکه چالان بوخاغین

- یوخ کیمین تَپییی گؤگسل گؤزلریمه چاتارکی

(غوربتدی کی سونجوق آتیر هردن

هردن ائله جوگگولده­ییرم،

                 جیققیریم چیخمیر.)

اوزونه گتیرمیرسن بو شوربا  قیزدیرمانی

یاناغینا یاغ تؤکولوب

بالدیرینا بال

سنه ویزیلدایان آری­لار بیلیر نه دئییرم

منی فیلم ائله­ییبسن بیلدیردن

گئی آدیداس­لارینی

          ساری گنجه یایلیغینی

بو دَفه ساریما منی

شاه اسماعیلین قبری اوسته گؤزله­ییرم

امامیه­دن   شیخ­صفی­یه 4 ساعات یولدور،

4 ساعات شاها لووغالیق ائده­جه­یم،

4 ساعات صاندیق تؤکه­جه­یم،

4 ساعات شاها شعر،

4 ساعات شاها ائلچی...

 

 

 

 

 

8

نادیر ایلاهی­نین یایینلانمایان شعرلرینه دوشونرکن

جیردیر

    جیر بوتون مکتوب­لاریمی

اسپام بیلدیر

         دئلئت ائله

           *

من داغدان گلیرم

چپیش­لریمیز یئملیک دسته­لریمی یئدیلر

                               سنه من قالدیم.

سؤی منی

توپور گلدیییم یوللارا

سئو داغلاری اولورسا

داغ اول  "سنده گؤزوم قالیب"

                 *

کتدی داغدان گلیب باهار خانیم

 او نادیر ایلاهی­نین یاز شاگیردی­دی

شاهسئون گؤزونده قابارلارا باخ

دوداغیندا یاغ گتیریب

دیشینده یئملیک

یاغلان

یاغیشلان

یاغمالان

شَهَر قوراق کئچیر.

 

 

 

9

کیم منه قوناق اولور؟

پلاستیک لیواندا سو  سوزموشم

شامپو قابینا قند

بیر قوتو آناتا  بیسکویتی

باشیمین اوستونده قارغا قاریلدار

                 *

منه بیر چَرَک گؤی اوزو گتیرسین

کیم منه قوناق اولاجاقسا.

کیم منه قوناق اولور بو گئجه؟

کیم منه قوناق؟

کیم منه یوخودا سالام وئریب دایاناجاق؟

کیم یوخوما گیره­جک؟

            گیرنده گؤزله­سین قاپیم گؤدَک­دیر.

                  *

کیم منه سالام؟

کیمه سالام؟

کیم منه سود، کیم منه چای گتیره­جک؟

کیم منه      چؤرک      ایسته­میرم،

                               آجلیقدایام

                              ایستر- ایسته­مز.

منه سالام لازیمدی

منه گؤی اوزو

کیم منه اورک وئره­جک؟

             اورَییم امامیه­ده یادیمدان چیخیب.

کیمین منه اورَیی یانیر؟  آچیلاجاق... سان...

کیم منه قوناق اولور؟

               بو سئللولدا دؤیونور بیر اورک

قارقالاشیر بیری

کیم منه قار – قار – قار

کیم منه قار – قار – قار

          قار...  قار...  قار

 

 

11

تئلفون  (دانیشیق)

 

- سالام مهربان...

- نئجه­سن قاداسی؟

- من هاردایام کی؟

- من هئچ یئرده­یم،  چوخ   یاخشی...

- کیمین گؤزو گؤتورمور گؤزو چارتداسین

- کؤینک ایسته­میرم

    اؤزونو بوک گؤندر بیر کیتاب آراسیندا.

- ناهارا سویا پلو، شاما سویا شورباسی

                         سحره سویا مورابباسی.

- یوخ باشیم شولوقدور

رومان اوخویورام، داریخیرام، شعر یازیرام

                               بیر آز دا آغلاییرام…

- گونده دوققوز ساعات یاتیرام

- بیر ساعات آییغام سنه شعر یازیرام

            23 ساعات اویاغام سنه دوشونورم

- بیردن باشقاسینی سئوسن

                      کوسمه­رم هااا سئو!..

- آخی منیم باشیم شولوخدو

- یوخ کیشی­لر آغلاماز دئمیش­لر

- نییه آغلاییم کی...

- الو...

- الو...

- الو...

 

 

12

باخیرسان

سویونور گولوش­لرین

باخیرسان

یویونور گؤزلرین

باخیرسان

من آسلاق قالیرام بوخاغیندان

تای – دَییشیک دوشن سیرغا کیمی

باخما نه اولور

داغیتما گؤزلرینی دوشونجه­مه

دوشون منی دؤشونجه

دوش منی

دوشونوش منی

تکی یویونماغا سویوندورما دوشونجه­نی

گؤزوم گؤزومون غیرتین چکیر...

 

 

13

گوللَندی شاباشلار

                  سپیلدی چیچک

گوللـه­لَندی سئوگی

                    سئویلدییی تک.

گویا کی خاطیره اونودولماسین

میخلاندی دیوارا

                     بیر دسته بیرچک.

 

 

 

14

ساچلاری دولانباج، گؤزلری ماویش

دوداغیندا یاز وار،  سینه­سینده قیش

اللری پلنگ­دیر، اللری درویش

قارتالدی سیچراییر قاهقاها دوغرو

                  *

باغلارا یاس دوشوب قارا باغلاییر

شاعیر قوپوزلانیر، شاعیر آغلاییر

بیر آشیق مزاردان نفس چاغلاییر

قشم­دیر اوزانیر ایمراها دوغرو

                  *

گئدیر سحنه بانی، اؤلور علسگر

بو دردی ساده­جه فضولی چکر

کربلا قان آغلار، کربلا چؤکر

سئوگیناز یوکسه­لیر بیر آها دوغرو

                 *

آیا ال اوزاتدیم، گونشی یولدوم

نیفرتدن بوشالدیم سئوگییه دولدوم

من آدام اولمادیم، من شاعیر اولدوم

اوچورام گؤیلری آللاها دوغرو.

 

 

 

 

15

آتام

 

آنام سانجی چکنده اؤلمه­میشدی بیردن

ایندی آتام اوچ وعده اؤلور چؤرک یئرینه

آتام شوکور ایچینده

ساری تئللی بوغدالاریمیز دا!...

آتام گؤی آتلی سولطان.

او قدر آج قالدی کانسئر بوشالدیلدی معده­سینه

او قدر دؤیوشدو عراق ساواشیندا

حاجی­لار بورجا دوشوب مشهده گئتدی

                                 لندنه اوچدو...

او قدر اوتاندیردی شلمچه­نی

               برادر آغا ساری قوچلاریمیزی

                           قوربان دوغرادی!..

او قدر دؤیوشدو

هئچ کیم قورخوسوندان سالام وئرمه­دی سرطانا

چاراسیز گئجه نامازی قیلدی

چاراسیز زنگ آچدی سردارا

- سلام آقای رئیس

- سلام آقای همسنگر

سیزین خسته­خانادا معده آغریسینا

              نه قدر رشوه وئرمه­لییم؟

معده­مه پاتک ووروبلار قوربان

صداما گوجوم چاتیردی سرطانا یوخ…

                  *

مکتوب یازدی آتام

سلام آقای میلیاردر

سلام آقای همسنگر

سلام حضرت اجل اکرم اَفَخَم

کارخانازدا نگهبان ایسته­میرسیز؟

                  باقی بقای حضرت عالی.

                    *

آتیمیزی – ایتیمیزی داریخما بوغدو

کیشنه­شیردیلر، اولاشیردیلار

… سونرا اینه­ییمیز سودون چوخالتدی بیردن

تویوقلاریمیز ایکی ساریلی

                              یومورتدادیلار.

قویونلاریمیز ائکیز دوغدولار.

ننه­م ناماز اوسته

               شاه مقصود تسبئحینه دئدی:

یاخشی کی آجیندان اؤلمه­دی

                          سون بئشیک بالام.

و داها سونرا…

    مهره-مهره خرجلندی قیرمیزی تراکتوروموز.

                        * 

آتام مکتوب یازدی

مؤعجوز دیوانینین آراسینا قویدو

 سلام آقای احمدی­نژاد

دونن قونشو کتدی عدالت

                      آجیندان اؤلدو!

عدالت سهمینه چاتمادی

کفن پولونا ایکی آناج قاز ساتدی

                     گوللو­به­ییم خالا!..

 

…سونرا

حیدربابانی اوجادان آغلادی

"یاخشیلیغی الیمیزدن آلیبلار

یاخشی بیزی یامان گونه سالیبلار"

              *

آتام مکتوب یازدی

سالام تانری بَی

سالام ایلاهی

نئجه­سن قاداسی؟

خسته­خاناندا بوش یئرین وار؟

داریخیرام واللاه…

داریخیرام

داریخ…

دار…

  والسلام علی من التبع الهدی

      موغان – یئل سویو

 

 

16

مهدی نعیمی­نین داغ بویدا اورَیینه ...

ایلاهی داغلاری هئچ داغ گؤرمه­سین

قلبی وورغون کیمی، حوسنو داغلارجا

کؤچَری شَهَرلر نئجه سئومه­سین

دره­نی داغ کیمی، داغی داغلارجا

 

ایلاهی چای­لاری ایچمه­یه دوداق

داغلاری سئومه­یه قوجاق اولایدی

شَهَرین ائولری یووا حَیَطلی

بو شَهر داغلارا قوناق اولایدی

 

دئیه­سن داغلارین گؤزو قاناییب

دیسگینیردی گونش گون باتان چاغی

آی خانیم گئجه­نین گؤزون یالاییب

سئویشیر گونشله ساوالان داغی

 

داغلارین قبله­سی هایاندی گؤرَن

اورَیی بو قدر چیلچیراقلی­دیر

باکیره بولاقلار چیمیشیر چیلپاق

داغلارین کورَیی داغا باغلی­دیر

 

بو داغلار آللاهین سؤیکنه­جه­یی

قایالار بیر آشیق میته­ککه­سی­دیر

بو  یال­لار علسگر سحنه­بانی­سی

بو یووشان گولگزین توی دینگه­سی­دیر

 

اوجالیب گونشله سئویشیر گوندوز

گئجه­لر کیملری قوجاقلاییرلار

تومان کؤینه­یینی هاردان آسلاییر

او خانیم بولاقلار، او کیشی داغلار.

 

قایدینا قالمیشیق گؤره­سن اونون

هر داشین دالیندا بیز سئویشمیشیک

نه قدر آللاها بورجوموز قالیر؟

نه قدر داغلارین کئشییینده­ییک؟

 

مکتوب دا گؤندریب، قوناق چاغیریر

یوللارین توزونا گؤز یاشی جالیر

داغلارین یای ائوی های-هشیر سالیر

داغلارین قیش ائوی قوناقسیز قالیر

 

بس داغین گوناهی نه­دیرکی آخی؟

داغین قاتیلی­دیر داغا گلن­لر

گون اولور مین دَفه اود توتوب یانیر

دره­ده پلاستیک، داغدا گون­لر

 

داغلار بابالارین دؤیوش سنگری

داغلار آنالارین سانجی یئری­دیر

چای قیزیل مایداندی، داغ کَهَر یابی

بالدیری بوسبوتون قامچی یئری­دیر

 

جادده­لر داغلارین شالوار قاییشی

گؤره­سن باش آلیب هایانا گئدیر

باغلاییب چیینینه قاری یاغیشی

بیر ائکیز کؤرپه­لی گنج آنا گئدیر

 

هر داغین دالیندا اصلی یویونور

هر داغین دالیندا کرم جان وئریر

هر داغین دالیندا بیر آشیق اؤلور

هر داغین  دالیندا آللاه آغلاییر…

تهران-ائوین-پاییز- 1387