آللاهی باغیشلاما
نرمین کمال
کؤچورن: لاله - ج


بیر گون
آللاه بیزدن عذر ایسته یه جک
بیر گون
حیاتین گتیردییی اولایلار،
هر گون یئنی دویونو آچماق چاباسی
کئچیدلر
یئنی سئوگیلر
عصیانلار
گؤز یاشلاری
چؤره ک ساواشلاری
باتماییب آیاقدا قالماق،
یاشاماق و یاشاتماق غوغاسی
اؤج آلماق هوسی
آلا بیمه مه ک یاسی
آرتیق دؤزولمز اولاندا
تک و گوجسوزاوزاناندا قصبه سککی لرینده
آللاه عذر ایسته یه جک بیزدن
باغیشلا
- دئیه جک، قیزیم
باغیشلا کی،
سنه یاخشی طالع وئرمه دیم
اوزگونلوک ایچینده کئچیر عؤمرون
باغیشلا منیم بالام،
- دئییب هؤنکوره جک
من اونو باشا دوشه جه یم
قولومو قالدیریب ساریلاجاغام بوینونا
اوچ دؤنه یونگولجه
کوره یینه ووراجاغام الیمله
عیبی یوخ دئیه جه یم،
عیبی یوخدور
الینی ساچلاریمین آراسینا سالیب دولومسویاجاق
بونو بئله سارشین ائتمه دیم،
بونو بئله قییمادیم سنه – دئیه جک
یاخشی، بئله ده سئونلر اولدو منی
قارا ساچ دا پیس دئییل – دئیه جم
- پئشمان اولموشام،
سئودیین پیشیک بالالارینی بئله یاشاتمادیم
اوچونو بیر گئجه ده اؤلدوردوم
- بسدیر، دئیه جه یم، اوزمه اؤزونو
باشقالارینین دا پیشیک لری اؤلور،
حتی اوشاقلاری اؤلور
- آللاهین بوغازی قه هه رله دولاجاق
داها اوجادان هؤنکورمه یه باشلایاجاق
عاجیزم، باغیشلا
- دؤنه – دؤنه بونو هیچقیراجاق
من ده اونا قوشولاجاغام
- یاراشماز سنه کیچیلمک
بسدیر، اونو ساکیت لشدیر مه یه چالیشاجاغام،
بوندان داها پیس حیاتلار وار
اینجیمه، یاخشی دیر هر شئی – دئییب
گؤزلرینی سیله جه یم
آللاهی باغیشلایاجاغام.

…………………………….

ائودار قادینین شعری

عزیز اریم،
بیلیره م سن هر آخشام ائوه دؤننده
مندن تمیز قاب – قاجاق
پیریل – پیریل ائو اشیالاری گؤزله ییرسن
بو سنین اه ن دوغال ایسته یین دیر، اونو دا بیلیره م

من سه بیر سیناق ائتمک فیکرینه دوشموشم:
ایسته ییره م یاغلی گنجه لری 75 گون
هه، دوز 75 گون
تمیزله مه دن ساخلایام
چای ده مینی چایداندا 55 گون
سویو قابیندا مثلا 96 گون.
سونوندا ده اولاجاق باخیم
نه اولاجاق گؤره سن
ماراقلی دئییلمی سنه….

دونن وئردییم بیر فینجان قاتیغی ایچمه دیم
” قاتیق آغدیر، گؤرمورسن می؟” دئدین و گئتدین
من سه او قاتیغی همن ساخلاماق فیکرینه دوشدوم، بیر ده نم
بلکه 80
بلکه 180 گون سونرا
سنه قاتیغین قارا اولدوغون گؤستره جه یم
زامان قاتیغی دا قارا ائتمه یه قادیر ایسه….