http://www.yazi.blogsky.com/

شعرلر و قاراوللى «تالانميش گونش» کيتابيندان، دوشرگه و يازى سايتيندان آلينميشدير

ناصر مرقاتی :

·       مودئرن تورکو  (قاراوللى)

تئلویزیون: " .... اؤزونه قایغی گؤستر!".

قیز:

- "نئینیم‌کی ساچلاریم برق وورسون؟".

تئلویزیون:

- "... ساچ دوزمونوزو قورویوب و ساچلارینیزی برپا ائدر.".

قیز:

-  " چوخ چالیشدیم برپا اولمادی.".   

اوغلان او بیری اوتاقدا:

-  "برپا اولونماسا، اوندا آرتیق گؤزموزو آچیب نظارت ائله‌مه‌لیک.".

قیز کانالی ده‌ییشره‌ک:

- "الیم‌دن گلن نظارتی ائدیرم. اولمور کی، اولمور.".

تئلویزیون:

- "یوخاری رایونلاردا بو گون 20- 25 درجه‌نی تشکیل ائده‌جک.".

اوغلان:

- " گرک بیر جوره تشکیل‌ائلییه‌ک.".

قیز کانالی ده‌ییشره‌ک:

- "من، تشکیل‌ائلییه‌ن شامپون‌لارین هامیسین ایمتاحان ائله‌میشم، اولمویوب.".

تئلویزیون:

- "ائرمنی طرفی هئچ بیر گوٌذشته گئتمه‌یی ایسته‌میر.".

اوغلان:

- "تشکیل ائدنمه‌سک اوندا گوٌذشته گئتمه‌لییک.".

قیز کانالی ده‌ییشره‌ک:

- "من ساچلاریمین تؤکولمه‌سینه نئجه گؤذشته گئده بیله‌رم؟!".

تئلویزیون (فیلم): "من بئله بیر جزایه لاییق ده‌ییرم.".

اوغلان:

-  "ایشه لاییقلی آدام ایستیر.".

قیز:

-  " دئییرسن یانی من لاییقلی دئییلم؟ داها سنین بو سؤزونه دؤزه بیلمرم، من بو قه‌در عذابا لاییق ده‌ییرم!".

اوغلان:

- " آدام باجاریقسیز اولسا ایشی کورلار.".

قیز:

- "سن منی ایتتهام ائدیرسن!"

قیز حیرسله ائودن چیخیر، آرخاسیجا قاپینی چیرپیر.

اوغلان:

- "بورا باخ! منه دئمه‌دن قویوب گئتدی!".

                                                                           22-12-2010   

 

·       تانـیـق     

  

بیر قییی‌دان گؤردوم

              آیاق دره گئچدی آی

و اوغرون

پیچیلداشدی اولدوزلار

بیر قییی‌دان گؤروم

              چیپچالاندی گؤل

              ییرقالاندی آی

 و گیزلین

اتک‌لره سیلیندی ایناملار

و اوغرون

پیچیلداشدی اولدوزلار

                            بو قارا ذیلینده

         بیر پیلک‌ده یوخ

 

 

   کوراوغلونون یئددی سفری 

   بیرینجی سفر (عاشیق جینون) 

بو شعر، 13- 14 ایل‌دن بری "بیرگون قوشاجاغام" آرزیسیندا اولدوغوم «کوراوغلونون یئددی سفری»
آدلی شعرینین ایلک سفری
‌دیر. بلکه گون اولدو یاییین اوزو گؤردو بو شعر.

        

·         بیرینجی سفر

 

عاشیق جنون 

1

چنلی بئل‌ده

بیر گون تئزدن

آلی کیشی اوغلو روشن

اوزاق دیلکلرین یاخین آرزیسیندا

میصری قلینجی باغلادی

قیرآتین بئلینه سیچرادی

های وئردی دلی‌لر گئیینسین

هوی وئردی نیگار گئچینسین

جنون سازینی گؤتـورسون

دونیانی گؤرلیم دییه

چیخدی بیرینجی سفره 

2

اؤنوموزده

یوخ سونوموز (1)

سوورولموش سامان

سئیرهَ‌لمیش دومان

داریسقال کؤهوللرده 

هردَن‌ بیر آددیم سسی ... (2)

                              و خاطره‌لرین تؤوشک نفسی

کیمیسی بَم چاغیردی

         آغالار

         خانیملار

         من لیوان پنیری سئویرم

          لطفن

         رئکلاملاریزداکی چیلپاق مَـلَکلره آنلادین

                   دَییشمَسینلر آغیزیمین دادین

و کیمیسی زیل باغیردی

                   من

                   اؤز اورَییم

اؤز گؤزوم

و اؤز سؤزومله

سئوَمک ایستیرم

ماوی گؤزلو قونشو قوناغین

آسمادی قولاق کوکرَمیش کولک

سایمادی اسرَمیش دنیز

و بیز

ایکی گؤزلریمیزله گؤردوک

اوخونون کیریشی‌ایله قان قارداشینی بوغان

شیلی خونکاری (3)

اهَر چارشی‌سیندا

اهَر چارشی‌سینین قارشی‌سیندا (4)

دَدَم قورقودو

اؤز قوپوزوندان آسدی (5)

و بیز

اون‌مین دئشیک بوغازلا باغیردیق

آ .......ه

"ماهنیلار نه چتین

نه قورخونج

اوندا کیم

دئهشتی اوخویاسی‌ییق" (6)

یادلیغلا اسیر

                 یادلیغلا

و قییی‌دان باش آلیب گلن چکیملی ماهنی‌لار

نئجه بایدران

نئجه یاراماز

داها سال‌لارا توخوناسی‌دیر

یئلکن‌سیز و آوارسیز کولاز  (7)  

 

1-  «اؤنوموزده/ یوخ سونوموز» سؤزونو، تی. اس. ائلیوت‌‌ون «دؤرد کووارتئت» شعرینین «ایست کوکئر» بؤلومونده‌کی:"منیم باشلانیشیمدا سونوجوم وار" سؤزو ایله موقاییسه ائدین (دؤرد کووارتئت/ فارسجایا مهرداد صمدی/ 1368/ ص 83)

2- دؤرد کووارتئت شعرینین «برئنت نورتون» بؤلومونده‌کی: "آیاق سسلری حافظه‌ده عکس اولور/ گئچمه‌دییمیز بیر دالاندا/ هئچ زامان آچمادیغیمیز بیر قاپییا ساری/ گولوستانا آچیلان بیر قاپی ..." لا موقاییسه اولونسون (دؤرد کووارتئت/ فارسجایا مهرداد صمدی/ 1368/ ص 71)

3- بو سؤز، محمت دوغانین «بؤیوک تورکجه سؤزلوک»ونده: صاحیب افندی، حاکیم معناسیندا گلدیکده، اونو اویغور کلمه‌سی«اونکار (طالع‌لی»دن و یا فارسجانین خداوندگاریندان آلینمیش یازیر. بو سؤزجوک ائحتیمالجا  مقدونییه‌ده بیر لئمان آدی اولسادا، آرتیقجا عثمانلی سولطانلارینین لقبی عینوانیدا ایشلَنیب. تورکجه سؤزلوک‌ (تورک دیل‌قورمو/ آلتینجی باسقی 1974)‌ده بو کلمه‌ «پادشاه» معناسیندا دا گلیب، تورکییه علوی‌لرینین اینانجلاریندا حاجی بکتاش ولی و موولاناچیلارین ایناجلاریندا موولانایا خونکار لقبی وئرمیشلر، آنجاق بئله نظره گلیر کی، سورالار سیاسی ادبییاتدا خونکار سؤزو منفی بیر آنلامدا ایشلندیکده؛ موستَبید، ظالیم، قان تؤکن و قان ایچن کیمی بیر آنلاملار آلیب اؤرنک اولاراق ناظیم حئکمتین شیخ بدرالین شعرینده بئله بیر منفی آنلام داشیر: " اؤز قارداشی موسانی اوخ کیریشیله بوغوب/ یعنی آلتین بیر له‌یَنده قارداش قانیلا آبدست آلاراق/ چلبی سولطان محمد تاختاچیخمیش خونکار ایدی/، و هابئله شیلی کودئتاسیندا شیلی جَللادی «پینوشه‌»‌یه بئله بیر عینوان وئریلمیشدی.

4- ائشیتدییمه گؤره 1325 ینجی ایلده دئموکراتلیق سیندیقدان سورا شاه رژیمی و بیر پارا دین خادیملری عطایی آدلی بیر کیمسه‌نین الیله، قوردوغو بیر قورغودا، بیر نئچه کَند ماللاسین آذربایجانین ماحال‌لار و کَندلرینه یوللادیلار. اولار، عاشیغلار و چالغیچیلاری مجبور ائلَدیلر سازلار و بالابانلارین  سیندیریب و یا اوددا یاندیریب و توبه اوچون مشهده گئتسینلر. بو قوپولارین بیری‌ده اهَرده قوپدو. دئمک اهر مچیدینین قاباغیندا عاشیق یدالله آدلی بیر عاشیغین بارماقلارین سیندیردیلار و اونا تووبالاتما وئردیلر.

5- ناظیم حئکمتین شیخ بدرالدین شعرینه گؤره، شیخ بدرالدینی سَـرَز چارشی‌سینین قارشیسندا بیر قورو (توت آغاجی)ندان آسدیلار.

6- بو سؤزلر شیلیالی اوخوجو «ویکتور خارا»نین سانتیاقو ایستادیومندا اوخودوغو سون ماهنینین بیر ایکی میصراعسینا اشاره‌دیر.   

7- چکیملی ماهنیلارایشاره‌دیر یونان میتولوژیسنده اولان «سیرئن»لرین ماهنیسی و آرقوناتلار ناغیلینا (فرهنگ اساطیر یونان و رم/ پییئر گریمال/فارسجایا: احمد بهمنش/ 1367ینجی ایل/ 2ینجی جیلد ص 833 – 835) 

 

 

·         النمیشلر آغیسی

 

             I.     

 

ایستی بیر سحر

سؤنمه‌دن اولدوز

گئدیر بیر قادین گئدیر

هـله

سون سایریشمالاریندایدیلار

                                     الـنمه میش اولدوزلار

ایستی بیر سحر

ساچمادان گونش

گئدیر بیر کیشی گئدیر

                                      قارا لـچک لنمه‌دیدی گونش

ایستی بیر سحر

قالخمادان شهر

قادینلار

کیشیلر گئدیر

                  

                                      گؤزلرینده و قولاغلاریندا کدر

و شهر ...

بو دلی شهر ...

آغلار ـ گولر

چالخالانیر کیرلی گونش آلتیندا

                                      و لاپ ایندیجه

                                      سحرین قیزیل تشتینده

                                      قان قوسور گونش 

  

          II.     

 

ایستی و جیزلاما گونش

گون اورتا یئرین

      آلانا قَـدَر

الینده چانتا

گلیر

بیر کیشی گلیر

                                   مهربان گونشیم

                                      منیم گونشیم

و آشیریمی آشان

توزلو

توستولو

و دومانلی گونش آلتیندا

اللرینده یئددی چانتا

گلیر

بیر قادین گلیر

آه دنیزدنده کرامتلی گونشلریم   

منیم گونشلریم

و باتی‌دا

اوچیرکین گونشین

سون قیرمانجلاری آلتیندا

اللرینده چانتا

کیشی‌لر قادینلار گلیر

                                       آه اوزو آغ

 بیزیم گونشلریمیز

                                        بیزیم گونشلریمیز

 

 

       III.            

 

یئللر یئللر

قارا یئللر

قیوریم قیوریم

یوللار آشار

و اؤز قیزدیرماسیندا آلیشان شهر دیشیندا

اون دؤرد گونشین ایتیریب

حسرت حسرت

باخا قالان

قادینا چاتار

و ....

    هله ده ...

شهر دیشیندا

بیر داشدان

ایکی بولاغ آخار  *

ــــــــــــــــــــــــــــــــــــــــــــــــــــــــــــــــــــــــــــــــــــــــــ 

 ـ تئبس شهرینین ملکه سی « نیوب »ون تراژدی سینه اشاره دیر

 

 

·       تیکیش

 

قارا اؤرپه‌یینه

         یاسمن عطرینی تیکیر

ساری کؤینک

       گوموش سئوگی ساریر  بوداغیندا

سونبوللرین آلوو هنیرتیسی

جیرجیرامانین سونسوز ساری ماهنیسی

قبیرصانلیخدا قارا بایداخلارین کؤلگه‌سی

و قیزجیغـ...از

هرگون

 یادیرغانمیش اوزاق دوشلرین

یاخین دومانیندا ایتیر

قیزجیغـ...از

 تیکیش تیکیر

                                                                  31/ 3/ 2009

 

 

·       سارالمیش دئیینمه‌لر

 

گؤزلر

سارالیر یارپاق تونلویونده

دونیا

سرین دینله‌ییر

         زاغ-زاغ اسن سس‌سیز دوداغلاردان

یاشیل

پنجه-پنجه وداعلاشیر

و کول ساچاقلاری ساللاناندا

قورشون- قورشون نیسگیل دامیر

                            یارپاق باغیندا

آ ...ه

یئنه کسیلدی آمانلار

یئنه سوواشدی دومانلار

یئنه کدرلندی جاملار

                   یالقیزلیق پیچیلتی‌لاریندا

هئی

         هئی ...

گئتمک گلیب چاتدی

آی هوولانمیش جاملار آردیندا پیچیلدییان

به‌بَک‌سیز گؤزتچیلر

چیخا چیخین

         چیخا چیخین

                   و بو یورقون گؤوده‌نی

                            لیل‌لی سولارا تاپشیرین

 

                                              فرانکفورت اودئر  پاییز- 2000

 

 

·       اوزاق سؤزلر

 

خاطره

 

 آیین آلتیندا

          او اوزاق یوللاردان گلمیش

 ماوی گؤزلرینده

                                      دالغا ـ دالغا سئودا

یونس ایدیم

         دالغالارا دالدیم 

 

  

اسرار

 

قولاقلارین اونودقاندی

قوی تاپشیریم دوداغینا

                            کلمه ـ کلمه

                                      سیرّیمی 

 

 

دالغاج 

 

اورمودا

ایکی گؤل گؤردوم

                   توم

دوم

  و

                   اونون

                  ماوی

                   لییینه

         جوم

                    دوم 

 تالانميش گونش

 

       1 ...

 

زيروه لره يوللانديق

سؤز گونشدن دوشدو

ايپك ساچاقلاريندان ساللانان گونوزدن

بيترليده يام – ياشيل بيتگی لر

آخارليدا دورنا گؤز آخمالار

چؤرك، ايش و بهشت 1

سؤزلر قاناد آلدی گؤگسل 2

                        ای يئنی اينسان

                                        يوكسل

 

تورپاق قارا دَيـَرليميش

اينسان ...

        نفسلی

                هوسليميش

كوتان ...

        ايتی

                كَسَرليميش

ايش گرگين

        يئر شوملاندی درين

                سپيلدی سَپين

اؤيله كيم

        او شريف تانری اؤيرتميش 3

 

آدديملار موحكم ايدی

                يوللار

                        يورولماز

 

 

       2 ...

 

زيروه لره يوكسلديك

سؤز اينساندان دوشدو

گؤردوك كی اوندا

        دايانيب فئميدا 4

                عدالت قيلينجين ايتيرميش

و بيز

اؤلوم اؤلكه سينين يئددی قاتيندان 5

                        قايتارديق قلينجين

                                وئرگيسی جاننان

آنجاق آنكيدونون اؤلوم سيررينی اؤيرَننمه ديك 6 

دئمه لی...

                تكجه

                        آدينی قورودوق اينسانين

 

آدديملار موحكم ايدی

                يوللار ...

                        يورولماز

 

 

       3 ...

 

زيروه لرده دايانديق

دنيزلرده آت قوودوق

چؤللرده يئلكن آچديق

آتلارا سوموك ...

        ايتلره آرپا

 تكليف ائتديك

گونش سو ايچمَيه گئتدی

دونون دَييشمَيه گئتدی

كؤچدو اورتاليغا دومان

        گومان ...

                گومان ...

                        گومان

بوزلاقلار قوناقچی اولدو

 گؤزدن دوشموشلره

و ...

اومانلار دومانلاردا ايتدی

 

آدديملار موحكم ايدی

                يوللارسا ...

                        يورقون

 

 

 

       4 ...

 

يئنيشه دوندوك

سؤز كولكدن دوشدو

لَپه لی عوممانلاردا باتان گميلردن

يانميش زَميلردن

و ...

اوركلردن جالانميش ايستيلردن

 

و بويلانيب باخديقدا

                بيترليده جيغ 7

                آخارليدا حسرتيميش

و گؤز ايشلديكجه

                كيمسه يوخ

                تكجه او شريف تانری ايلَشميش

الی اوزونده

        درين حئيرته دالميش

 

و اوزاقلاردا

        يورقون آدديملار

                يورقون يوللاردا

                        توزاناق سالميش

 

ـــــــــــــــــــــــــــــــــــــــــــــــــــــــــــ

ايضاحلار

1.       ايشاره دير سَن فرانسيس سالئزيانی آدلی مسيحی موقددسلرينين بيرينين سؤزلرينه: «من سيزه چورك، ايش و بهشت وعده سين وئريرم».

2.       قانادلی سؤزلر (قارودا) هيندوستان اسطوره لرينده قانادلی و مقدس سؤزلر ديلر.

3.       شريف تانری، ايشاره دير يونان اسطوره لرينده اولان پرومئتَيه. پرومئته اينسانا اكين، بيچين، فيكيرلشمه و اود يانديرماغی اؤيرتدی.

4.       يونان ميتولوژيسينده قانون و عدالت تانريسی.

5.       اؤلوم اؤلكه سی، چوخلو ملتلر افسانه و ميتولوژيلرينه گؤره، يئرين يئددی قاتيندا اولان اؤلولر دياری.

6.       سومئر و بابل ميتولوژيسينده آنكيدو ، گيلگـَميش آدلی بير – ياريم تانری ياريم اينسان _ ايگيدين يولداشييدی، آنكيدونون اؤلومونَن سورا گيلگميش دوستونون اؤلوم سيررينی اءيرنمك اوچون چوخ چَتينليكلر چكير، آنجاق چوخ آراديغی سيرری تاپا بيلمير.

7.       جيغ، سوپورگه كولونا اوخشار دَيـَرسيز بير كول.

 

 

 

 

 گئدک

  دئدیک :

           یئلکن لره اسن بیر اَسیم

           سؤنموش اوجاغ لارا بیر قیغیلجیم

          سوسموش دوداغ لارا ایپک تبسم

          یانقی چیچک لره بیر ایچیم سو

                                          اولاق

بیز قوزای یئل لری آردیندا دوران

 

خوشبخت لر دیاری سوراغیندایدیق

آه سیزلر ائی طوفان معجزه لی

اژدها سئحیرلی ائلچی لرین حق منادیسی

دئیین هانسی گؤیدن یئره یئندیز کی :

                       گمی لر غرق اولدو

                       قیغیلجیم سؤندو

                       دوداغ لار کیپ لندی

                       و باخچادا کی چیچک لر

                       آچمادان سولدو

 

گئدك دوستلار گئدك 

ياغيش ياغميياجاق بوز بولودلاردان

و قوراق ايللرين قورو دوداغي ايسلانميياجاق

گئدك دوستلار گئدك

تورپاق يانديريري روحومو منيم

و دنيز بو تئزليقلا جوشمياجاقدير

 

گئدك دوستلار گئدك

باخچا سون نفسين چكيري ايندي

و قانلي تيكان لار آليب باخچاني

گئدك

      گئدك…

               گئدك دوستلار گئدك

گؤزلریم گئرییه باخاردا قالسا

ایز قویسا قلبیمده هر تانیش بیر زاد

                            عیبی یوخ گئدک

تورپاق دیدرگین دی غربت ائل لرده

گئدک ...

     دوست لار ...

                    گئدک ....

 

ياد تورپاغيم

 

  1...  

 

 آجي دان دؤننده شهره ساري 

  هامينيزين اللرينيز  اللريمين ايچينده ايستي 

                                                      و يوموشاق 

  هامينيزين اورکلرينيز هر کيچيک اولايا آچيلان 

  هامينيزين دوداقلارينيز بير کلمه يه قاچان 

  هر بير زاد اينجه 

  هر بير زاد معنالي  

  هر بير زاد ايستي ايدي باغ يولوندا. 

   

  و يئرين يئددي قاتيندان 

  قاييتميش اوغلان 

  آياقلار آلتينا  

  گول سپه-سپه 

  گزيشيردي هر ياني 

   

  آجي دان دؤننده شهره ساري 

  يادينداديرمي - ساچلاريني اوينادارکن اسيم - 

                    سؤيله دين منه:  

                           نه يامان آخير آجي. 

  منيسه دئديم: 

                          گؤز ايشله ديکجه ساپ ساري زمي لر 

                                     يام -ياشيل باغلار 

  آه…  

   يئرله گؤي دوغمايدي  هه له. 

   

  2… 

 

هئي، هئي…  

  آي منله بيرگه دوغودان کؤچوب 

  دوزنلرده کؤچ سالانلار 

  بيره ر-بيره ر دئيين گؤروم: 

        پيشميش کرپيشلردن هؤردوگوموز ارکيميز  

                                                             دورورمو؟ 

  سؤيله دي آتا: 

            نه دن ائولادلاريم و قاريم باشا دوشمه ديلر  

                                                   نه سؤيله ديکلريمي؟ 

  سؤيله دي آنا: 

          نه دن ائولادلاريم و اريم باشا دوشمه ديلر  

                                                   نه سؤيله ديکلريمي؟ 

  سؤيله ديلر اوغوللار و قيزلار: 

           نه دن آتا، آنا، قارداش و باجي لاريميز 

           باشا دوشمه ديلر نه سؤيله ديکلريميزي؟ 

  سؤيله ديلر هامي: 

            اؤزوموز ده اؤز دئديکلريميزي. 

  و او گؤردوگون دوزنلرين تورپاغي ايندي کول و

                                                          کول 

  اورکلري قورشون،  

  هاواسي توستو و دومان 

  گؤيلره قالديرديغيميز بورج ايسه آرزولاريميز کيمي  

  ويران. 

  و کؤچدوگوموز يوللار بويو، 

  - بايات دوغماليق و بيرليک - تکجه داشلارا  

                                                          قازيلميش 

  بيز اورکلريميزي اوزاقلاردا باغيشلاديق

 

  بؤيله سؤيله ميش اولدولار هاميلار 

  آنجاق من آجي ساحيلينده منله بيرگه دوغودان  

  کؤچموشلرين نه سؤيله ديکلري نين بيريني ده دوشمه ديم

                                                                          باشا 

  آه…  

  نه سؤيليه جگيم وار سيزه؟ 

  آي بيرگه لريم بير ديلده دردلشديکلريم 

  يادلاشان آشنالار، 

  نه دئييم من سيزه؟ 

  آي اؤگئي دوغمالار، 

  آنميياجاقسينيز مني  

  نه دئسينيز منه  

  آنميياجاغام سيزي 

  آجي نين قانا دؤنمه سيندن بري 

  و او لعنته گلن توستولو و دومانلي 

  چاققاللار دوزوندن آيريلالي 

   

  3... 

 

آجي دان دؤننده شهره ساري 

  اللرين اللريم ايچينده بوم -بوز 

  باخيشلارين سازاق 

  سؤيله ديگين هر بير سؤز ياد ايدي 

  سن دئدين:  

                 قورويوب آجي؛ 

  من ايسه دئديم: 

                  گؤز ايشله ديکجه کول اولوب باغلار 

                  آج قارغالار يانميش زمي لره قونموش 

  داها دانيشماديق شهره قدر. 

  … … … 

  … ... 

  … 

  دونيا، مين ديلده ايدي. 

  کولک يئرسيز اسمير 

  سازاق يئرسيز کسمير 

  و قارا دومان کيمي دير داريسقال پئنجره لردن 

                                            کول رنگلي لال باغيرتي لار ؛

  و باخديقدا: 

     گؤز يئرينده گؤز 

         اوز يئرينده اوز 

             و سؤز يئرينده سؤز گؤرمه ديم سؤز؛

  بيرجه بولانيق سسلر 

  ايتگين اوزلر 

  اويوق گؤزلر… 

  بير ده کي توستويدو و دومان؛ 

  و اؤلومون جايناغيندان دامجي-دامجي دامان قان. 

   

  تکجه…  

  ياييلير هاوادا بير سس: 

       تنهاليق…  

                      اؤزگه ليک…  

                            و اؤلوم يولدا؛ 

                      اؤلوم…  

                          اؤلوم يولدا. 

  آه…  

  ارکين دووارلاري تؤکولور 

  تؤکولـ…ور 

  تؤکولـ…ور.  

 

  1. ايشاره دير سَن فرانسيس سالئزيانی آدلی مسيحی موقددسلرينين بيرينين سؤزلرينه: «من سيزه چورك، ايش و بهشت وعده سين وئريرم».
  2. قانادلی سؤزلر (قارودا) هيندوستان اسطوره لرينده قانادلی و مقدس سؤزلر ديلر.
  3. شريف تانری، ايشاره دير يونان اسطوره لرينده اولان پرومئتَيه. پرومئته اينسانا اكين، بيچين، فيكيرلشمه و اود يانديرماغی اؤيرتدی.
  4. يونان ميتولوژيسينده قانون و عدالت تانريسی.
  5. اؤلوم اؤلكه سی، چوخلو ملتلر افسانه و ميتولوژيلرينه گؤره، يئرين يئددی قاتيندا اولان اؤلولر دياری.
  6. سومئر و بابل ميتولوژيسينده آنكيدو ، گيلگـَميش آدلی بير – ياريم تانری ياريم اينسان _ ايگيدين يولداشييدی، آنكيدونون اؤلومونَن سورا گيلگميش دوستونون اؤلوم سيررينی اءيرنمك اوچون چوخ چَتينليكلر چكير، آنجاق چوخ آراديغی سيرری تاپا بيلمير.
  7. جيغ، سوپورگه كولونا اوخشار دَيـَرسيز بير كول.

 

 

ســرگی

 

باغلی گونلر

جيغيرلار قورتولوشوندا تپه جيکده قيميلدايير

بير قازاشلی هفته سونوندا

اودانلار

کوّر سودا ال يوموش اودوزانلار

و بيرده کهنه دييرمانين اسرارينی ساخلييانلار

 

دکتر گوله ــ گوله دئيير

بيرجه بورجلاريميزدان دانيشميياجاييق

و شهرين کئچميشلرده آل گئييملی سی

و بو گونلر فرعون مولکوندن کؤچن زرگری

قاققيلدايير

                   نه ياخشی گوندو نه ياخشی دوران

                   گونش

                   من

                   و داغ

                   بيرده ايستکلی لرله آياق 

 

 

 

خسته ليک

 

گونون توزلو و کيرلی ساچاقلاری آلتيندا

                               قيوريلان يولدا

          کؤلگه سيز آغاجلار

          النگه لردن چپرلنن زميلر

و تورپاقلا راوسته هله ده بوغلانان قان

نه يولدا چوبان آللادان

نه يوکسلمه کؤنوللوسو

بير زامان سئوداليسی قارتاللار اولان

ايندی باشينا آليب دومان

 

 

 

سايقاج

 

ــ  سؤز وار کی

                   بوداغين زيروه سی

                   ان اوجا زيروه دير دنيا اوزونده

 

    دئييرلر

                   بوداغين يولو جنت يولودور ...

 

ــ اوشاغلار شومالی ــ خارجی سئوير

   آما اوتوز ايلدير

                   تپه ده هامان جيغير دا هامان

   باخمارام هئچ زامان هنده وه ريمه

   نه بيليم بلکه ده بير زاد واريميش

 

ــ  من بوردا نه زيروه نه داغ گؤرورم

    عجبا قلبيرده سو داشييرديق

    نه يامان يازييميش بيزيم يازيميز

    .......

    .......

    دوغوردان نئچه دير درسين ساعاتی

    اوغـلوم رياضی ده  دالی  دير بير آز

 

ــ  سن اؤزموزونکو سن  نه دئييم سنه

ــ  هله دئ گؤره ک ...

ــ  اؤزگه يه مين بئش يوز سنه مين تومن

ــ  بير قده ر اوجوز سال ...

ــ  قازانماز واللاه

 

 

 

 زينه

 

"گؤزلرينيزی اوجا گؤيلره قالديرين

آلچاق يئره باخين

گؤيلرتوستولر کيمی ايتگين

(قانلی) يئر جينديريخ گئييم ... "

يئنه ده آخچاسيچانلار ساپ ــ ساری بوغدانی

داشيير لار و قاپ ــ  قارا يووالار دولورو زيم به زيم

بئله ليکله

          هامی نين گؤزوندن بير داملا

          پای اولدو فراتين قانلی آخيميندا

          و

          يوللار اوسته دوران سازسيز ده ـ ده

          اورگ دن بير آه چکدی

                                      داغلار داغـيم دير منيم

                                      غم اويلاغـيم دير منيم

                                      دينديرمه قان آغلارام

                                      آخير چاغـيمدير منيم

 

چانلی بئل يولوندا

                   بير اسره ک آيغير گئديری يورغـا

                   نالينين سـسی عکس اولور داغـدا

 

 

هوولو جامين آرخاسيندا

هوولو جامين آرخاسيندا
سرخوش آيلی گئجه هارينتيسی دير
بو آخار
زينه زينه
سورونن کيرلی و کور

سئوگی
بير آنين ليجيغی دير
بؤيله گئدر
قورو چايلاغدا  

نه شنليک تار – قاواليندا
يولا يوللانديران
نه بالابانين غربتی هيچقيرتيسيندا يوللارا گؤز تيكن
بوينو بوكوك بنؤشه لر يازی ايزلمز
ياز
ناغيلين شيرينليی دير
قورو اويلاقدا
آه...
نه اومورسان
نه آريرسان
و من
اورمو قييسيندا يئره چؤکووب
هؤکورتمه ووروب
عممان – عممان دنيزلر تؤکووب
و آتام بَبَکلرينين ابد...ی
سولماسينا سيتقاديم *
 
 گل آغليياق گل
گل
قان ياش تؤکَك
گل

و باغير
باغير
 باغيراق
سازاغی لاغا چاغيراق
بلكه
بيزه گولسون دَرين
و
ديلـَک
ارَميک ثانيه لرين بوزلوغودور
گونلرين اتَـگيننن آسيلميش

نه اومورسان
نه آريرسان
کور
گؤرمز
و گؤرونمز دير بيزدن قافا گئدن ايزلر
و تورپاغ
مين بير سومسوکدن گـَبه
و بوننان بئله
من دوغاجاق
بيز يئرينه

آه ...
يو...م
يو...م
يوم
چيرکين و کيرلی دير بو شيرناق
قورودور بو چايلاق
قيسير دير باهار
و
"اوندا کيم چيرکيندی هر نه وار
گؤز نـَيه يارار ** "

 

  / 12. 10 . 1385 برلين  / مرقاتی
ـــــــــــــــــــــــــــــــــــــــــــــــــــــــــــــــــــــــــــــ

*-  داوود پيغمبرين زبور کتابينداكی 137 ينجی مزمورلا مقايسه ائدين و هابئله سومر ميتولوژيسينده تموزون اؤلمه سيله.  
** - اشاره دير يونان يازيچيسی سوفوكولون «اوديپوس شاه» ناغيلينا

 

 

 ·       آجی

 

قيش باغيننان

يادليق ديارينا

بير توفار وار

بَريسی اوغورسوز سئوگی

اؤتَسی لال اونودقانليق

                             سئوگيليم گئديلَسی بير سفر وار

                             اؤزگه ليك مزارينا

 

قيش باغيننان

يادليق ديارينا

آغی وار

چيپجالانان گؤز ياشی

و دئييلمَز حسرت

                   و آياغ آلتينا سريلميش بو تورپاغين تورونجو بَزَكلرينده

 اؤزلويونن آيريليق شَنلييی

                  

قيش باغيننان

يادليق ديارينا

بير اووج شيرين