اوختای

● 

عليرضا نابدل (اوختاي)ين شعرلريندن نمونه‌لر:

ستارخان آتلي‌لاري

يهري حاضيرلايين

گتيرين توفنگيمي!

بالالار ساغ قالاسيز،

گئديرم من، گئديرم؛

يوردومو، تورپاغيمي

 هله‌ليک ترک ائديرم.

صوبح اذاني اولماميش،

گوموش اولدوز سولماميش،

"شيبلي"‌نين سول تاييندا ستارخان آتلي‌لاري

يوروش ائدير دوشمانا.

قارانليق چکيلمه‌ميش،

دان يئري سؤکولمه‌ميش،

آزادليق قوشونوندان قيزيل آت‌دا سسله‌نير،

يهري حاضيرلايين

قاچماغا هوسله‌نير.

صوبح اذاني اولماميش،

گوموش اولدوز سولماميش،

توفنگيم کوره‌ييمده

قاطارلار بئليمده‌کن،

قيزيل آتيم يئل کيمي

گؤتورولر داغلارا.

اونو بير قشوولايين!

يهرين حاضيرلايين!

ايستسبداد قوشونونا گئديريک قيرغين سالاق

گئديريک اؤلکه‌ميزي

يادلار اليندن آلاق.

گئديريک گديک‌لرين قورد‌لارين توتوب بوغاق،

بلکه گله‌جکده سيز-

بالالار، دينجه‌له‌سيز.

قيزيل آتين بئلينده-

داغلارا يوکسله‌سيز.

31/5/1342

 

ال- اله

آي اوشاقلار ال- اله!

ال- اله وئرين گئده‌ک آرزي‌گيله!

آرزي‌گيل بيزدن کوسوبلر ، بيليريک،

بو زامان بيز ال- اله وئرمه‌لي‌ييک،

اونلاري قايتارماغا گئتمه‌لي‌ييک.

 

قوجالار ديللنسه‌لر باش وئرمه‌يين،

گئجه‌نين قيفيللارين آچين گلين!

 

بير گئجه آي چيخاندا بيز چيخاريق،

سئل تکين بؤلگه‌لي داغدان آخاريق،

دوشمانين ائوجييينه اود ياخاريق؛

آي اوشاقلار ال- اله!

ال- اله وئرين گئده‌ک آرزي‌گيله....!

1344- نجي ايلين يايي‌نين سون گونلري

 

چال عاشيق

چال عاشيق سازيني، اوره ييم دولوب،
بعضن اينسان اوچون درمان بو اولور.
سازين نغمه لري آخسين كؤنلومه،
يوخسا چيچكلريم عطش دن سولور.

 چال عاشيق سازيني بلكه سازيندا
اومودسوز حياتا بير اومود تاپيم!
گل عاشيق سازيندا صبردن دانيش،
بلكه دؤزمك درسين آغزيندان قاپيم !

 

بيليرسن آي عاشيق درديميز بيردير،
گل گئده‌ك سازيندا عشق دن دانيش!
سيم لرين ديلي‌يله خالقي هارايلا،
گل بو درده منله بيرليكده يانيش !

 

گل عاشيق بو آخشام داغلار باشيندا
نغمه لر سؤيله‌يك گؤزللر اوچون!
گل عاشيق بو آخشام عاشيق اولانا
دئيه‌ك غم چكمه‌يين دولدوروب ايچين!

 

سحره جك چاليب، اوخوياق عاشيق،
بلكه اوره‌كده‌كي يارا بيتيشسين!
چاخيرلاشيب چالاق اوجا سس ايله
قوي عاشيق سسيميز يارا يئتيشسين!

 

اولدوزلارلا اولاق بو گئجه همدم،
اولكردن گل آلاق عشق ايلهاميني!
بو گئجه چاغيراق تام عاشيقلاري
چاخيرا، چالقي‌يا ييغاق هاميني!

 

اينسان دردلريني گل سازيندا چال،
دؤزوملي عاشيق‌لاردان حيكايت ائت!
گل، بيزه آي عاشيق عشق درسي وئر
اوميدسيز ساعاتدا درديميزه يئت!

12/5/1343

صمد کؤنلومده‌دير

اوخودو قارانقوش آيريليق سؤزون
مرووت اهلي‌نين گؤزو يولدا‌كن.
جومدو طوفانلارا اونوتدو اؤزون،
اولدوزا نه جاواب وئرجه‌يم من !؟

قيشدا قارلي داغلار سوراغلاشسالار-
تبريزين گول اوغلون ، مهريبان اوغلون؛
بير هاراي چكه‌رم آي اوجا داغلار
آختارين آرازين چنلي بئليندن!
دوشمان طعنه وورسا صمد هاردادير،
اليمي سينه مه چاليب دئيه رم:
صمد كؤنلومده دير، اورييمده دير،
دؤيوشور اؤلسه ده، دؤنمز ائليندن.

اونون صداقتي جان وئرير بيزه،
آلوولو عشقيندن ايلهام آليريق.
هر ديقه باش چكير اوره‌ييميزه
موغاياتليق ائدير اؤز اكديييندن.

سؤيله‌ين گئده‌جك، سؤزو قالاجاق،
عدالت ناغيلين ائل دوغرولداجاق،
ظولم ائوي عدل ايله بر باد اولاجاق،
صمدي قارشيدا گؤره‌جك دوشمان.

بو بير ناغيل‌دير كي ائللر سؤيله‌ير،
بيري سسدن دوشسه او بيريسي دئيه‌ر،
ناغيلچي دايانار، سؤز داوام ائده‌ر
ائل اوچون ياشايار بوردا بسله نن.

نيياران قالماسين اولدوزا دئيين
كؤنلومه آلميشام صمدين عشقين؛
صمد كؤنلومده دير، اورييمده دير،
وورغونون آداشي جيگريمده دير
اينتقام آلاجاق ائل دوشمانيندان.

26/6/1347

 

قورد و شه‌هر

قارلي کاسکئت باشيمدا وار،

جيم-‌جيلاق لوت،

قوينومداکي ياش کيتابلار.

شاختا ... شاختا ....

بيرده آغير نفس‌ايدي،

من ايديم.

داش دؤشکلي کوچه‌ميزده

زاغ- زاغ اسن ائولر‌ايدي،

پالچيقلانميش قار‌ايدي

بيز ايديک.

هر آچيشقا- قاباغيندان بيز کئچنده، آچيليردي:

"قورد وار، قورد وار

يئيين اولون آي اوشاقلار..."

داليميزجا باغلانيردي...

 

صاباحکي گون من گؤردوم کي،

قوجا شه‌هر

بؤلوک- بؤلوک

تيکه- تيکه

گئدر- گلمز کاميونلارا مينديريلير...

 

من ائوميزه قاييداندا

آچيشقالار يئنه بير – بير آچيليردي:

"قورد وار، قورد وار، آدامجيل قورد،

ائولر ييخان، آغ بيرچکلي آنالاري آغلار قويان آدامجيل قورد.

بيزه سيلاح، بيزه سيلاح!"

 

اوچونجو گون

من ائوميزه قاييداندا

آچيشقالار آچيلديلار يئنه بير- بير:

"ساکيت! ساکيت! آستا گئدين!

سس چيخماسين دوداقلاردان!

قورقوشوم‌تک هاوا آغير،

دانيشجاغين دولور آغيز..."

- شه‌هر قوردون قارنيندايدي.

27/8/1345

 

اوخاتاي آتا

نه صوفي‌لرين سون سولطاني‌ايدي او،

نه گؤورچين‌گيلين ايلکي‌سي؛

سحرچي‌لرين آغ فايتونو‌ايدي

دورنا يوللاريندا.

 

قالي‌دان قالا‌ايدي، قالي‌لاردان قالا

                                   و قيزيل‌دان اوجاق.

او چيراق‌تکين آليشديريردي-

تاقچالاردا بيزي

تاقچالاردا پاپاق.

 

"آلاقاپي"‌نين کرپيچ سککي‌سينده-

قيزيل چيچک‌لر آخشام سولدو؛

گؤي بيلک لردن يوموروق- يوموروق يئميش‌لر بيتمه‌دي.

کرپيچ سککي‌لرده

سحرچي‌لرين قيزيل فايتونو،

کرپيچ سککي‌لرده هيجان شاخسئيي؛

کرپيچ سککي‌لرده چيراق يانديران اوخاتاي آتا؛

گؤزونده گؤزلوک،

بوينوندا شريف

گئديردي تمکينله آليشقان يوللاري؛

و "ترويا"نين داش قاپيسيندا

ناغيلين سونو: چيراق سؤندورن تاختا آت!

27/10/1345

توزلو پييانو

اؤرتوک‌لر سؤکولسون، بولوت چکيلسين،

قايالار اوزولسون گؤي ياماجلاردان،

قوي آپارسين آغ يئل قارانليق‌لاري!

 

سازاقلي بير سحر آچيلاجاقلار-

ماتمسيز اؤلومدن بري باغلانان-

جئويز تاختاسيندان اسکي قاپيلار.

 

سازاقلي بير سحر پارچالاياجاق

قارا سس‌سيزلييي توزلو پييانو؛

قيزغين بارماقلاردان آخاجاق او گون

سهندين بوزلانميش آغجا گؤل‌لري.

قورخولو بير رقصه باشلاييرلار،  باخ!

داغلارين آچماميش سولان گول‌لري.

جالانير دنيزلر، قيوريلير چؤل‌لر

قاچيرلار اولدوزلار قانلي گؤيلردن.

اولدوزلار گئجه‌نين بهادورلاري....

 

اوشاقلار اليزي منيم قلبيمين

ايستي‌لييي‌ايله قيزديرين، گئدين!

يوخسا سويوق ال‌لر نه ائده بيلر؟!

 

سازاق

دان يئرينده

بيزي گؤزله‌يير،

سويوق ال‌لرايله آچا بيلمه‌ريک-

گله‌جک گونلرين قيزيل قاپيسين؛

سويوق ال‌لرايله چالا بيلمه‌ريک-

گونلرين سازيندا ظفر ماهني‌سين.

1344-نجي ايل، پاييزين ايلک گونلري

 

پاپاغيم، قيلينجيم و آتيم

چيينيمده يورغونلوق، دؤشومده يئترليک

ائينيمده مين يارا، کؤنلومده مين آرزو،

آتيمين ديرناغيندا وطن.

ديرناقلار داشلارا چيرپيلا- چيرپيلا

اؤژلرين قانيني ياياراق داشلارا

يئتيشديم

يئتيشديم و پوزدوم سون اؤژون يوواسين،

قيزي‌دا قورتارديم.

قاراشين، قارا قاش، قارا تئل بير قيز

گؤزلري اولدوز.

اولدوزلار سسلندي قارنقولوقدا

و اينسان چاغريلدي:

"بري گل آي قوناق

من قوملوق قيزي‌يام

واحه‌سيز چؤللرين يوموشاق تيکاني...

تئليمدن آلاچيق قورارام

قولومو ياسديغين ائده‌رم

گؤزلريم نور ساچار

دؤشلريم دويورار سن يورغون قوناغي

گئجه‌لن"!

 

تئل‌لردن آلاچيق، دونوندان دؤشمه

قولوندان ياسديقجا قاييردي

واحه‌جيک قوردوق بيز.

 

من تورکمان آتيمي بوراخديم باييرا

قيلينجي آتا‌بئي باغيندا ايتيرديم

آنامين تيکدييي پاپاق‌دا يوخ اولدو

گلديييم يوللاري اونوتدوم.

سيلديم‌ده کؤنلومه ياييلان کئچميشي

حاليم بئله اولدو.

 

من اونو اردبيل خالچاسي ساياغي تکين

ايپکدن توخودوم؛

اريشي ماردان، آرقاجي اؤوره‌دن،

ايلمه‌سي ناخيشدان، گولوش‌دن؛

بير گول‌دا قيزيل گول

تيکاني دؤيوشدن، چيچه‌يي باريشدان؛

بير کول‌دا قيلينج،

بير کول‌دا آغارچين،

بير کول‌دا گؤورچين...

 

من اونو اردبيل خالچاسي تکين

ايپکدن توخودوم،

توخودوم و سالديم کؤنلومون تکينه؛

دايانديم آخشامين يولو اوسته

سسلنديم:

"بري گل قاراشين

من قيپچاق اوغلويام،

بؤلگه‌لي داغلارين سيلديريم قاياسي

گؤزومون اوستونو ياتاغين ائده‌رم،

ديزيمي اوتاغين،

قولومو قالخان تک چکه‌رم اوبايا

قوروسون سئوگيمي،

داماردان توخونان خالچادا سالينار

گله‌جک گونلرين تکينه

دوست اولاق!"

 

"داشليقدا گلرکن کند يئريشي‌له

هؤروک‌لر بورولسون، قيوريلسين، آتيلسين

بيرجه بستي يوخدور چيينينده دورايدي

بولاغين يولو‌ايله گئده‌ر اولايدين.

 

آخشاملار اوغلان- قيز هالاي گئده‌ايديک

عاشيقين چؤگورو ناغيل دئيه‌ايدي

پاپاقلي کندلي‌لر چپيک توتايدي."

 

دايانديم آخشامين يولو اوسته

بير يول‌دا چاغيرديم: "بري گل قاراشين سئوگيليم!"

اوندا قاش قارالدي

تکجه اؤز سسيمي ائشيتديم داشلاردان

اوندا يئل باشلادي قارا يئل

قارا يئل...

بو قارا سسي‌ده يئل يئتيردي منه:

"سن باشي پاپاقلي اوباني ايستيرسن

سن آغزي ياشماقلي کندلري ايستيرسن

قيزيمي وئرمه‌رم آيريليق سئوه‌نه"

دايانديم

آيريليق دئميشم يوخسا من؟

آيريليق دئميرم، بيز بيريک

او مني چاغيردي، او سئودي، سئويشديک.

 

تانري‌لار

آي آلتميش آلتي‌لار

سيز دئيين...

 

دايانديم و دؤزدوم "آت ايل"دن آت‌ايله

يئنه‌ده آتيلان آتيله

يئنه‌ده...

گون دوشدو يانديرسين، يانماديم،

يئل اسدي کؤکومدن قوپارتسين، قوپماديم،

گلدي سئل آپارسين، گئتمه‌ديم،

دايانديم، قورودوم، اؤزومسوز واحه‌ني؛

دايانديم گئجه‌نين قاپيليغيندا

سسله‌يم قيزي

سسله‌يم يازي

سسي‌ده سسله‌ديم

سؤزوده سسله‌ديم

و بوتون عالمه هاراي ياغديرام

و بوتون عالمي ياغديرام قاپي‌يا.

 

قاپيليق قارا‌ايدي ... من قارانليق گؤردوم

و آغير توستولر؛

يارديم من توستونو، ياريلدي

سؤکدوم‌ده تالواري، سؤکولدو؛

نه گؤردوم اوندا من ...

ساغينا، سولونا اؤژجوک‌لر دوزولموش:

قانلي اؤژ

پاپاغيم باشيندا

قيلينجيم بئلينده

آياغي آتيمين اوزنگي‌سينده‌ايدي.

 

·        يئترليک: فاتح‌ليک

·        قارانقولوق: قارانليق

·        مؤوره: مؤو بوداغي‌نين کسيلميشينه دئيرلر.

·        هالاي: رقص آدي

·        چؤگور: عاشيق سازي

·        قاپيليق: دروازا

·        تالوار: حصار

·        اؤژجوک: کيچيک دئو