ميانالى عليرضا

ناغیل حقیقت

شیدیرغی یاغاجاق یاغیش ایسته رم ؛

یاغا، تمیزله‌نه دنیا گؤزومده.

گؤزومده پیس ده لاپ یاخشی گؤرونه؛

داها توکه نیبدی آخی دؤزوم ده.

بو ناغیل اولسادا- اولسون، نه عیبی؛

بیزکی، باشقا تورلی اولموروق تمیز.

قوی بو دا ده ییشیب بیر ناغیل اولسون؛

ناغیل اولوبدی کی، حقیقتیمیز.

هره بیر دون بیچیر اؤز عالمینده.

بو یازیق ملتین حالینا بیر باخ.

ناغیل اولماسایدی حقیقتیمیز

باشقا بیر ملته اولمازدیق یاماق.

تزه جوجوق گلیب دنیایا سانکی؛

هره بیر آد قویور، آد یاراشدیریر.

چوخدی اؤیره نندن اؤیره دن، بودا

قاریشیق اولانی لاپ قاریشدیریر.

سوی کوک آختارانلار دونه نه دئییل

اسکی زامانلارا قاییداسیدی.

یانیب کوله دؤنن وارلیقدان دئییل

کؤکونی آراسان اود اولاسیدی.

اوددان یارانمیشیق، بیز اود اوغلی ییق.

بونو تورک ده دئییر، تورکمن ده، من ده.

دئه او ده ده قورقود، ائل آغ ساققالی

کیمیندیر؟- بیلیره م، بیلیرسن سن ده.

بؤلوب- بؤلوشدورن چوخ اولوب بیزی؛

اؤزوموز بؤلمه یک، پارچالامایاق.

دیلده بیر، سویدا بیر، کؤک ده بیریک بیز

پارچا- پارچا ائدیب، تک- تک اولمایاق.

ملت پارچالانسا عاغلا گلمه ین،

فیکیر ایشله مه ین نه لر اولورموش.

ملت پارچالانسا گؤز گؤرنمه ین

ادراک دا، شعوردا پارچالانیرمیش.

ایندی هر پارچایا باشقا آد قویاق؛

باشقا یؤن ده وئرک بو گونوموزه.

هر پارچا لاپ یئنه قوی پارچالانسین

یئنه توخونانماز سوی کؤکوموزه

بو ناغیل اولسادا- اولسون، نه عیبی؛

بیزکی، باشقا تورلی اولموروق تمیز.

قوی بودا ده ییشیب بیر ناغیل اولسون؛

ناغیل اولوبدی کی، حقیقتیمیز